محمد حفوظة - Mohamed Hafuda

محمد حفوظة - Mohamed Hafuda الفيزياء للمرحلة الثانوية
رابط قناة التيليجرام : https://t.me/mohamedhafudaphysics

خوتنا أبطال الفرصة الثانية 🫡اللي راغب يقرا الفيزياء من المحتوى الخاص بيا يتواصل معاي على بريد الصفحة ✅
15/08/2026

خوتنا أبطال الفرصة الثانية 🫡

اللي راغب يقرا الفيزياء من المحتوى الخاص بيا يتواصل معاي على بريد الصفحة ✅

12/08/2026

إخوتي الطلبة 🫡

مبارك لكم ثمرة اجتهادكم وتعبكم
ونتمنى من الله التوفيق لكل من تعثر وتأجلت فرحته

وهادي نصيحة سريعة
مهما كانت نسبتك ، من فضلك افرح بيها وقول الحمد لله

عيلتك تعبو معاك عام كامل ويستنوا في اليوم هذا باش يفرحو
فياريت تفرح وتفرحهم معاك لانه يوم حيقعد في الذاكرة ماتحرمهمش منه

اي نعم في من طلبة دارو مجهود اكبر وتوقعوا نسب اعلى ولكن دائما قول الحمد لله ومزال الخير جاي والمستقبل الحقيقي قدامك

نسأل الله ان يبارك لكم ويوفقكم لكل ما فيه خير 💙

أخوكم في الله محمد حفوظة..

نسأل الله لكم النجاح والتفوق خوتنا الطلبة 🤲🏻
09/08/2026

نسأل الله لكم النجاح والتفوق خوتنا الطلبة 🤲🏻

21/07/2026

دفعة 2009

هذا أول وآخر منشور انزله ليكم الفترة هادي
وماكنتش نبي انزل إلا لأت كثرت الأسئلة بخصوص البداية والقراية

أنا لو بنعطيك نصيحة ، اطلع منه سباق الشهادة اللي بادي من توا ،
(( جهزوا روحكم ، واستعدوا ، وامتى نبدا نقرا ، وشن ندير في العطلة … الخ ))
حتلقى روحك تحمل على روحك في تفكير وتوتر ومسؤولية الشهادة ، في وقت انت مش مطلوب منك ابدا الشي هذا ابداً

خليك ذكي واعرف كيف تحط مجهودك وامتى تحطه
وكيف تقدر تستفيد اكبر ما يمكن من مجهودك مش غير تهدر فيه هكي وخلاص 👌🏻🧠

مرات انت مش مقتنع بالكلام متع : ارتاح وغير جوك وهيج وتبي تدير شي مفيد باش ضميرك يرتاح

وانا معاك ، تقدر في الشهرين هادو تقوي نفسك في اللغة وهذا مكسب كبير ليك حتى في الشهادة نفسها
تقدر تحفظ حتى جزئين من القرآن وهذا مكسب اكبر
وغيرها في هلبا حاجات تقدر تستفيد بيها

وفي نفس الوقت ، انت ماكنتش مرتاح وفاضي ، انت كنت طالب سنة ثانية ودرت مجهود وتعبت وماتستهينش بتعبك ، فمن حق نفسك عليك انك ترتاح باش تقدر تعطي احسن ما عندك في بداية العام ان شاء الله

وقت يجي وقت القراية حنعطوا لكل شي حقه بالصورة الصحيحة بأذن الله تعالى 🫡

لكل منا وجهة نظر حسب خبرته وتجربته ، وكلها تحترم ، وانا رأيي انه القراية توا غير مناسبة والتفكير الزايد فيها ضرره اكثر من نفعه.

بالتوفيق للجميع

17/07/2026

Fact :

الدراسة شي ممتع ويلقى فيه الانسان نفسه ويحسسه بقيمته

لو بس مافيش مهزلة الامتحانات من فوضى واسئلة تعجيزية للطلبة والضغط النفسي هذا

تتفق او لا ؟ 🤔

16/07/2026

أخيراً صافرة النهاية 🏁

وداعاً 2008 💙
موفقين في مسيرتكم الجامعية 🫡

05/07/2026

كلمة حق ☝🏻
والله غالب على أمره
نعم المولى ونعم النصير

03/07/2026

حين سكت أهل الحق عن الباطل ، توهم أهل الباطل أنهم على حق

[ الغش من كبائر الذنوب ]
هادي خليها هي الأولى باش نتكلموا بوضوح

لما تجي تشوف تفشي وانتشار الغش بشكل مرعب ومخيف وكل عام أكثر من اللي قبله
وسبحان الله العديد من المعلمين وأولياء الأمور بدو يدعموا ويأيدو في الكارثة هادي
تحس وكإن الموضوع بدي عادي ومستساغ وسهل

وطبعاً لراحة الضمير ، يبدا إختراع المبررات ، زي :
مافيش كتابات من بداية العام - المعلمين مايعرفوش يشرحوا - الامتحانات صعبة هلبا ، وغيرها… ( ألّف ما شئت )

وانت هنا أسأل روحك سؤالين .
الأول : يوم الحساب لما تقف أمام الله عز وجل وتُسأل، هل تشوف فيهم أجوبة مقتنعة تبررلك هذا الذنب ؟

الثاني : في ناس في غزة تقرا وتمتحن زيك زيهم ، هل ظروفك هادي تجي حتى جزء بسيط قدام ظروفهم ومعاناتهم ؟

فنصيحة لو انت مخطئ وغلطت ، باب التوبة مفتوح ، تب الى الله عز وجل مدامه الفرصة موجودة

ختاماً للمنشور ، خوتي الطلبة المجتهدين اللي من كثر انتشار الغش لين بدي يحس نفسه في غربة تذكر قول النبي صلى الله عليه وسلم

«يَأتي على الناسِ زمانٌ الصابرُ فيهم على دِينِهِ ‌كالقَابِضِ ‌على ‌الجَمْرِ».

وأيضاً رد بالك تحساب ان تعبك ومجهودك وصبرك هذا حيساويك باللي غش ومتعبش لأن اللي بيجازيك هو الله وهوا اللي شاف تعب كل واحد ومجهوده
فأبشر بالخير 🤲🏻

وَمَنْ يَتَّقِ اللَّهَ يَجْعَلْ لَهُ مَخْرَجًا وَيَرْزُقْهُ مِنْ حَيْثُ لا يَحْتَسِبُ

فننصحك تستمر وتصبر وتجتهد وأبشر بالخير والتفوق باذن الله عز وجل والمستقبل طويل وحتعرف قيمة الكلام القدام

نسأل الله لنا ولكم الثبات ، كان الله في عونكم
تحياتي 🫡

29/06/2026

غداً إن شاء الله ثاني أيام الإمتحانات
وأكيدة في العديد من خوتنا الطلبة ثقتهم انهزت ومعنوياتهم مش أحسن شي بسبب امتحان الفيزياء
وفي اللي يبدا خايف بحكم التجربة الاولى
انه يتعاود معاه نفس الشي في الإحصاء
فالدوشة هادي اللي في راسك انا حنجاوبك عليها

اول شي يا شباب لازم تعرف ان حني في الدنيا في امتحان
لابد أن يمتحن المؤمن ويختبر في مدى صبره وثقته بالله وبعدين ربي يجازيه على امتحانه هذا

والامتحان هذا انا عارف انه صعب
مرات انت تجتهد وتتعب ومتجيبش الدرجة اللي تستاهلها وتشوف حد غش جاب اكثر منك

في اللحظات هادي بالذات لابد تكون مقتنع وعندك يقين تام بالله انه حيجازيك على مجهودك وتعبك خير

ودير في بالك ان مستقبلك ومسيرتك الجامعية ووظيفتك اللي تطمحلها كلها بيد الله وهوا حيدبرلك امرك ويفتحلك الآفاق لما تتوكل عليه


بتقولي اهو الفيزياء الامتحان تم كيف بيتغير ، نقولك رد بالك تطيح في المصيدة هادي ،
لان هادي مجرد اسباب دنيوية ، وعوض الله انت متقدرش تتخيل او ترسم كيف الصورة او الطريقة اللي يجي بيها
انت اللي عليك ان تخلي ثقتك بالله عالية وتكمل بس في اجتهادك

وبالله يا شباب نتعضوا من غلطة المراجعة اللي بعد الامتحان ، ما تعاودوش نفس الغلطة
تطلع من الامتحان انساه ومتراجعش واستمر في اللي بعده

موفقين إن شاء الله

يعلم الله تعب وسهر شهور وارهاق التحضير وتصوير الفيديوات انتسى وراح كله بمجرد ما قريت الكلام هذا وغيرهم هلبا من الرسايل ...
28/06/2026

يعلم الله تعب وسهر شهور وارهاق التحضير وتصوير الفيديوات
انتسى وراح كله بمجرد ما قريت الكلام هذا وغيرهم هلبا من الرسايل اللي ملحقتش نشوفها

رسائل وتعليقات فيها كلام يثلج الصدر ويسر الخاطر ، شكرا شكرا ليكم على رسائلكم 💚

ضغط وزحمة الرسايل نعتذر عارف نسيت هلبا وحنقراهم كلهم ونرد عليهم بالوحدة

عقبال رسائل النتيجة ان شاء الله 🤲🏻
اللهم لك الحمد💚

Address

Tripoli

Website

Alerts

Be the first to know and let us send you an email when محمد حفوظة - Mohamed Hafuda posts news and promotions. Your email address will not be used for any other purpose, and you can unsubscribe at any time.

Shortcuts

Share

Category