Zenter fir d'Lëtzebuerger Sprooch - ZLS

Kennt Dir den Ausdrock „eng … Sträif hunn“? 👀

Et kann ee souwuel eng gutt wéi och eng schlecht Sträif hunn an „Hatt huet eng gutt Sträif“ bedeit, dass hatt – also déi Persoun, iwwer déi geschwat gëtt – gutt gelaunt ass.

Am LOD gëtt een am Beispillssaz gewuer, dass een de Leit, déi eng schlecht Sträif (= eng schlecht Laun) hunn, besser sollt aus de Féiss goen:
Géi em léiwer aus de Féiss, en huet grad eng schlecht Sträif.

Dir fannt d’Expressioun am LOD beim Wuert „Sträif“: https://lod.lu/artikel/STRAIF1

Mir hoffen, dass Dir haut eng gutt Sträif hutt! 😊

Liicht Sprooch Lëtzebuergesch – Reegelen a Recommandatioune fir eng inklusiv Kommunikatioun op Lëtzebuergesch ✨
Vun haut u gëtt et eng Broschür iwwer d’Liicht Sprooch Lëtzebuergesch, déi den ZLS an enker Zesummenaarbecht mat engagéierten Experten an Expertinnen ausgeschafft huet.

An dëser Broschür fannt Dir d’Reegelen, déi musse respektéiert ginn, fir dass en Text de Krittäre vun der Liichter Sprooch entsprécht an esou vu méiglechst ville Lieserinnen a Lieser ka verstane ginn. Dozou gehéieren ënner anerem:
– einfach a geleefeg Wierder,
– kuerz Sätz mat nëmmen enger Informatioun,
– en einfache Sazbau an
– en iwwersiichtleche Layout.

ℹ️ Firwat Liicht Sprooch?
Administrativ Texter sinn am Allgemengen op engem Sproochniveau verfaasst, dee fir Leit mat Liesproblemer eng grouss Barriär duerstellt; ouni Hëllef hu si also dacks keen Accès op relevant Informatiounen. Et sinn awer net just Leit mat Liesproblemer oder intellektuelle Beanträchtegungen, déi vun der Liichter Sprooch profitéieren: Och eeler Leit, Leit mat Demenz oder enger Aphasie, mat enger Héier- resp. Séibeanträchtegung, funktional Analphabeten, Ufänger an der Sprooch a Persoune mat spezifesche Besoinen, wéi z. B. Leit mat Dyslexie, hunn doduerch d’Méiglechkeet, Texter besser ze verstoen.

👉 De ganze Guide fannt Dir um Site vum Ministère de la Culture, Luxembourg an iwwer dëse Link: http://gd.lu/9dvD97

Wann Dir Feedback zum Guide hutt, da kënnt Dir eis dee gäre per Mail zoukomme loossen. 📧

📸 E puer Andréck vum Vernissage vun eiser Expo „D’Lëtzebuerger Sprooch(en)“ zu Nidderaanwen ✨

De leschte Méindeg war den Optakt vun dëser Statioun zu Nidderaanwen. Merci un all déi, déi derbäi waren a sech Zäit geholl hunn, d’Ausstellung ze entdecken a sech mat eis auszetauschen. 🙏

👉 Falls Dir d’Expo wëllt kucke goen: Se ass nach bis de 27. Juni an der Sportshal „Am Sand“ zu Nidderaanwen.

ℹ️ Se ass am Prinzip vu méindes bis freides vun 8:00 bis 21:00 Auer fir de Public zougänglech, ausser op dësen Deeg:

– samschdes, den 13. Juni, vun 8:00 bis 18:00 Auer;
– samschdes, den 20. Juni, vun 8:00 bis 16:00 Auer;
– dënschdes, den 23. Juni, ass d’Expo zou;
– samschdes, de 27. Juni, vun 8:00 bis 16:00 Auer.

Et gi gratis Visite-guidéeën op Lëtzebuergesch, Franséisch an Englesch ugebueden, fir déi Der Iech awer musst iwwer de Site vun der Gemeng Nidderaanwen umellen: https://respond.forms.app/niederanven/expo-letzebuerger-sproochen

Gemeng Nidderaanwen

An engem Schreiwes, also engem Bréif oder enger E-Mail, gëtt am Lëtzebuergeschen (an och am Däitschen 💡) no der Uried am Prinzip klenggeschriwwen:

Madamm,
heimat erlaben ech mir, [...]

Groussgeschriwwe gëtt just, wann dat éischt Wuert vum Haaptdeel souwisou géif groussgeschriwwe ginn, wéi zum Beispill bei der Héiflechkeetsform (Dir, Är asw.) oder engem Substantiv:

Monsieur,
Dir hat mir matgedeelt, dass [...]

Gudde Moien,
Groussherzogsgebuertsdag kënnt ëmmer méi no! An deem Kontext [...]

Hätt Dir et gewosst? 😊⤵️

„Sozial oder kulturell Barrièren. D’Lëtzebuerger Sprooch als ‚Türöffner‘?“ – dat ass den Titel vun eisem Bäitrag am .kult vum Luxemburger Wort 🗞️ vun haut, an deem et ëm d’Roll vum Lëtzebuergeschen an engem (ganz) méisproochegen Ëmfeld geet.

Mir wënsche vill Spaass bei der Lektür! 😊

Wat hu mir eis fir dëse Sproochesnack kristillegt! 😵‍💫💫😱

Nee, dat ass natierlech just e Witz – mir freeën eis all Woch op en Neits, de Sproochesnack mat Iech ze deelen. 😇

„Sech kristillegen“ heescht nämlech näischt anescht ewéi „sech ploen“. Wa mir also behaapten, mir hätten eis fir dëse Sproochesnack kristillegt, da bedeit dat, dass dëse fir eis – op eng negativ Manéier – mat vill Méi an Aarbecht verbonne war.

👉 Dir fannt d’Verb „kristillegen“ och am LOD: https://lod.lu/artikel/KRISTILLEGEN1

Mir hoffen natierlech, dass Dir Iech haut, an och soss, net ze vill musst kristillegen. 🤞

Eis Expo „D’Lëtzebuerger Sprooch(en)“ ass erëm ënnerwee! ✨

📅 Vum 8. bis de 27. Juni ass eis Ausstellung „D’Lëtzebuerger Sprooch(en)“ zu Nidderaanwen an der Sportshal „Am Sand“ ze gesinn.

Se ass am Prinzip vu méindes bis freides vun 8:00 bis 21:00 Auer fir de Public zougänglech, ausser op dësen Deeg:

– samschdes, den 13. Juni, vun 8:00 bis 18:00 Auer;
– samschdes, den 20. Juni, vun 8:00 bis 16:00 Auer;
– dënschdes, den 23. Juni, ass d’Expo zou;
– samschdes, de 27. Juni, vun 8:00 bis 16:00 Auer.

ℹ️ Wann Dir un enger (gratis) Visite guidée (op Lëtzebuergesch, Englesch oder Franséisch) wëllt deelhuelen, da musst Der Iech iwwer de Site vun der Gemeng Nidderaanwen umellen: https://www.niederanven.lu/lu/aktualiteiten/ficheactualites/2026-05-20/expo-letzebuerger-sproochen26

👉 Wann Dir den 8. Juni um 17:30 Auer wëllt um Vernissage deelhuelen, da musst Der Iech bei der Gemeng Nidderaanwen iwwer dës E-Mail-Adress umellen: [email protected]

Deen neie KONTERBONT ass do! 🎉 An dëser Editioun geet et ëm Iessen an Ernärung. Gitt bis luussen! 👀

KONTERBONT 22 | Léift geet duerch de Mo: Iessen an Ernärung

Iessen hält net nëmme Leif a Séil zesummen, mee kann an der Literatur am Extreemfall souguer an de Fokus vu Kriminalfäll geroden. Keng Suerg, an eiser neister KONTERBONT-Ausgab zerwéiere mir dir méi bekëmmleche Kascht – och wa mer d’Theema Liewensmëttelsécherheet eescht huelen an déi ongebiede Keimer op dengem Teller net verheemlechen. De KONTERBONT hëlt dech mat op eng kulinaresch Achterbunn duerch Lëtzebuerg:

• Mam Generaldirekter vum Brancheverband Horesca, dem Steve Martellini, hu mir eis net nëmmen iwwer d’Problemer, mee och iwwer nei Chancen a Méiglechkeeten am Horeca-Secteur ënnerhalen.
• Beim bekannte LëtzeBurger hu mir eis et bei engem kulinareschen Intermezzo gutt schmaache gelooss an dobäi erausfonnt, wat eigentlech hannert der Business-Iddi vun der Firma stécht.
• Bei eiser Recherche ware mir de verschiddenen Ernärungsformen op der Spuer an hunn dobäi festgestallt, datt et niewent deene bekanntsten ewéi dem Vegetarismus oder Veganismus nach sou munch anere Begrëff gëtt, dee mer virdrun net wierklech kannt hunn.
• Zu Lëtzebuerg huet dëst Joer nëmmen een eenzege Kach e Michelin-Stär fir säi Restaurant kritt: de KimKevin de Dood fir de Lys an der Villa Pétrusse. An natierlech war de KONTERBONT direkt op der Plaz an huet de sympathesche Stärekach interviewt.
• De Vëterinär-Mikrobiolog Dr. Serge Losch huet eis am Gespréich e puer Grondsätz iwwer d’Liewensmëttelsécherheet verroden an e puer Tipps fir doheem mat op de Wee ginn.
• A fir eis zum Schluss vun deem ganzen Iessen e bëssen ze erhuelen, hu mir mat der Ernärungsexpertin Dr. Bérénice Hansen e Bléck op d’Faaschte geheit.

Honger op méi? Dëst a villes méi – z. B. d’Liblingsrezepter vun eisem Inklusiounsatelier – fënns du elo an eiser neier KONTERBONT-Ausgab.

Kim de Dood
École d'Hôtellerie et de Tourisme du Luxembourg - EHTL
SERVIOR
Ville de Luxembourg

„Ech hunn d’Schong voller Féiss!“ 👞🦶

Dëst kann ee soen, wann een d’Féiss wéi huet, well een zum Beispill de ganzen Dag getrëppelt ass oder op de Bee war.

💡 Den Ausdrock „d’Schong voller Féiss“ ass och Deel vum Titel vum zweete Band vun eiser Serie „Lëtzebuerger Wuertschatz“: „D’Pan klaken an d’Schong voller Féiss. 99 typesch Lëtzebuerger Riedensaarten“.
Dëse Band an och eis aner Publikatioune gëtt et an de Librairien ze kafen. 📚

👉 Dir fannt d’Expressioun och am LOD bei den Artikele „Schong“ a „Fouss“:
https://lod.lu/artikel/FOUSS1
https://lod.lu/artikel/SCHONG1

Wéini hat Dir fir d’Lescht d’Schong voller Féiss? 😁