FÉDUSE/Enseignement-CGFP

25/02/2026

Eng 7. ëffentlech Europaschoul - Ass dat dee richtege Wee?

D'Chambre des Fonctionnaires et Employés publics (CHFEP), an där d'FÉDUSE-CGFP béid Vertrieder fir d'Fonctionnairen aus dem Enseignement Secondaire stellt, huet sech an hirem Avis kritesch zum Gesetzesprojet zum Bau vun engem Lycée zu Schëffleng geäussert.

Monéiert gëtt virun allem, dass den Ausbau vun ëffentlechen internationale Schoulen hei am Land weider virugedriwwe gëtt, obwuel rezent Etuden op en Neits gewisen hunn, dass d'Schüler aus dëse Schoulen hei zu Lëtzebuerg am Verglach zu hire Kolleegen aus den Europaschoulen am Ausland a quasi alle Fächer méi schlecht ofschneiden. Wann ee bedenkt, dass trotz deene schlechte Performancen den Taux de réussite am europäesche BAC hei am Land no bei 100% läit, drängt sech d'Fro op, wéi gläichwäerteg dësen Ofschloss wierklech soll zu eisem nationale Premièresdiplom sinn. Donieft kritiséiert d'CHFEP, dass zu kengem Zäitpunkt e reelle politeschen Debat iwwert méiglech Alternativen zu dëse Schoule gefouert gouf.

Genee ewéi d'CHFEP ass och d'FÉDUSE-CGFP dofir der Iwwerzeegung, dass et héich Zäit gëtt, de Modell vun deenen ëffentlechen internationale Schoule kritesch op de Leescht ze huelen amplaz weider blannemännerches den Ausbau vun dëser konkurréierender Parallelwelt zu eisem traditionelle Schoulsystem virunzedreiwen. Um Spill steet heibäi nämlech net nëmmen d'Qualitéit vun eiser Schoul allgemeng, mee och déi sozial Kohäsioun insgesamt!

Dee ganzen Avis vun der CHFEP genee ewéi de Projet de loi selwer fannt Dir ënnert deem follgende Link:

https://mcusercontent.com/96cf4e777e4f194de32d6ca1c/files/aa9ea71b-3621-93fd-bf3d-506533774c6a/Avis.pdf

16/02/2026

D'Secrétaire générale vun der FÉDUSE-CGFP, Mona Guirsch, gouf a senger Fonctioun als Presidentin vun der Chambre des Fonctionnaires et Employés publics (CHFEP) vu S.A.R. Grand-Duc Guillaume zu enger Audienz empfaangen.

12/02/2026

Déi sektoriell Verhandlungen tëscht de CGFP-Memberorganisatiounen an dem Minister vun der Fonction publique, Serge Wilmes, sinn op der leschter Ligne droite. 📌 Konform zum Punkt 12 vum leschte Gehälteraccord hu vill vun eise Fachverbänn hir legitim sektoriell Fuerderunge virgedroen. D’CGFP erwaart elo als Daachverband vun allen Agenten konkret Resultater. Mir hunn ëmmer betount: Et däerf net bei engem einfachen Austausch bliwwen – néideg si verbindlech Verhandlungen, déi zu faire Kompromësser féieren. Keng Symbolpolitik oder politesch Inzenéierung 📸, mee reell Fortschrëtter mat Substanz. 🔎 Elo huet d’Regierung d’Geleeënheet ze weisen, datt de „Sozialdialog“ fir si net just eng eidel Floskel ass.

10/02/2026

Den 9. Februar 2026 hat de Comité vun der FÉDUSE-CGFP eng Entrevue mam Minister vun der Fonction publique, Serge Wilmes, senge Beroder an héije Beamten.

Bei dëser Entrevue goufe virun allem déi follgend Sujeten diskutéiert:

1. Impakt vun der Formation continue op de Karriärsverlaf.

2. Attraktivitéit vum Recrutement ënnert dem Statut vum Fonctionnaire.

3. Revalorisatioun vun der Karriär E7.

4. Verlängerung vum S.à.t.p. a Congé sans traitement wéinst Kannererzéihung bis 18 Joer.

All Detailler zu deenen eenzele Punkte vum Ordre du jour vun dëser Entrevue fannt Dir ënnert deem follgende Link:

https://mcusercontent.com/96cf4e777e4f194de32d6ca1c/files/f09ff86d-26a4-8416-1ba3-11539a2cf2b1/Communique_Reunion_FP_9.2.2026.pdf

01/02/2026

Am Titel (vun der Facebook-Versioun) vun dësem Communiqué huet sech leider en Tippfeeler ageschlach: "D'Zukunft vuN eise Schüler entscheet sech net un Toiletten!"

Ënnert deem follgende Link fannt Dir de PDF (ouni Tippfeeler am Titel) fir erofzelueden:

https://mcusercontent.com/96cf4e777e4f194de32d6ca1c/files/86a800c6-4444-489b-8284-90f273d2e861/Communique_1.2.2026_16.46.19.pdf

14/10/2025

12/10/2025

06/10/2025