Emmi - Eng Joffer op 4 Patten

Praxisbeispill 118: Emmis Forschertagebuch zu den Hohlmaßen 🍶🧪

Am C3.2 stoungen dës Woch d‘Hohlmaße um Programm. D‘Emmi hat de Kanner hei 3 Statiounen matbruecht, fir d‘Eenheeten praktesch unzewenden an ëmzewandelen.

Statioun 1: 400ml 🍶
Forschungsfro: Wéi kann ech 400ml offëllen?
D‘Kanner kruten en Dëppche mat 300ml Faassungsverméigen an eent mat 500ml. Elo sollten si e Wee fannen, fir genau 400ml domat ofzemoossen.

Statioun 2: Medizin 🩺🧪
D‘Emmi gouf vun engem Insekt um Bak gepickt (true story) a krut vum Déirendokter e Medikament verschriwwen, wat verdënnt muss ginn (fake news 😅). An der Apdikt gouf d‘Zoubereedung vum Medikament awer anescht verschriwwen, wéi vum Déirendokter. Et war elo un de Kanner rauszefannen, wéi ee Mëschverhältnis wuel éischter richteg wier a wou wiem e Feeler ënnerlaf ass.

Statioun 3: Gleich voll? 💦
Hei hunn d‘Kanner misste schätzen. 10 verschidde Behältere mat ënnerschiddlechem Fëllstand u Waasser stoungen um Buedem. Si missten elo Folgendes erausfannen:
- Wéi eng 2 Behälteren hu genau de selweschte Contenu?
- Wéi vill ass jeeweils an de Behälteren?
Fir dat erauszefannen haten d‘Kanner kleng Käertercher mat verschiddenen Eenheeten zur Verfügung, déi si de Behälteren zouuerdne sollten (zB 500ml & 0,5l fir 2 gläich voll Behälteren).
Op 4 Kaarte stounge falsch Wäerter drop, déi net konnten zougeuerdent ginn (zB 2,5l). Op dëse Kaarte sollten d‘Kanner Leckerlie fir d‘Emmi placéieren.

Praxisbeispill 117: Emmi n‘ordonne pas…! ⚠️(Négation + impératif)

Am Cycle 3.2 ass et haut streng hiergaang: et goung ëm Reegelen an Instructiounen. D‘Emmi hat de Kanner hei 4 verschidde Statioune matbruecht.

1) Ne fais pas ci, ne fais pas ça 🐕‍🦺
Am Gank gouf e klengen Agility-Obedience-Parcours opgebaut. Als éischt huet de Grupp déi „einfach“ Instructioune bei den Hindernisser gelies a misst déi dann mam Emmi ausféieren.
- Tourne autour des tabourets.
- Marche tout droit.
- Saute l‘obstacle.
- Fais le slalom autour des cônes
- Asw
Beim zweeten Tour gouf et méi schwéier an d‘Instructioune goufen all an d‘Negatioun verwandelt. Hei war elo de Kanner hier Kreativitéit gefuerdert:
- Ne tourne pas autour des tabourets: d‘Kanner sinn am Slalom derduerch gaang, riicht derlaanscht oder iwert d‘Hockere geklomm.
- Ne saute pas l‘obstacle: d‘Kanner si ronderëm d‘Hürd gaang, de laange Wee driwer getrëppelt oder hunn d‘Bänk opgehuewen, fir dass d‘Emmi kéint gemittlech drënner erduerch goen ♥️
Si ware sou kreativ an hunn dat super gutt mam Emmi (an ouni hat) ausgefouert 🤩

2) Au Lac de la Haute Sûre:
Hei gouf mat Hëllef vu KI e „Wimmelbild“ vum Stauséi erstallt, wou vill Leit sech an de Summerdeeg net gutt ze behuele wëssen: haart Musik, Knascht an Iessreschter um Buedem, d‘Flora a Fauna net respektéiert. D‘Emmi ass sauer! D‘Kanner sollten elo déi Leit all zurechtweisen an hinne soen, wat se ze maachen hunn, dëst mat der Benotzung vum impératif an der négation.

3) eng passend Aufgab mat der Joffer am Buch

4) No 2 Joer mam Emmi sinn d‘Kanner Profie, wat d‘Anhale vun de Schoulshondreegelen ugeet. Si haten elo d‘Aufgab dës op Franséisch ze formuléieren, fir déi Kanner, déi bei eis an der Schoul sinn a just Franséisch verstinn. ♥️

Frësch no der Vakanz mam Emmi senger „Sommer-Werkstatt“ (schonn an de Praxisbeispiller ze fannen) gestart fir am C3.1 d‘Divisioun anzeféieren.
Voll ustrengend!
Wann d‘Kanner schaffen, gënnt d‘Emmi sech seng wuelverdéngte Paus ♥️🐕‍🦺♥️

Sportswoch ♥️⚽️🎽🚴🤾🏀🥅🤸👟
Eise Sportsgrupp huet dës Woch eng super flott Sportswoch an der Schoul organiséiert. Do huet d‘Emmi natiirlech och missten derbäi sinn. Bei summerlechem Wieder huet d‘Emmi sech geschter mat senge Kanner dobaussen ameséiert an ass vun hinne gutt versuergt ginn. ☀️

Praxisbeispill 116: Emmis Deutsch-Stationen zu den Zeitformen

Fir am Cycle 3.1 de „Perfekt“ anzeféieren, huet d‘Emmi de Kanner haut flott Statioune matbruecht.

Statioun 1: Emmis Zeitleiste 🐕‍🦺
Op enger Zeitleiste gesinn d‘Kanner d‘Vergaangenheet, de Présent an d‘Zukunft mam Emmi visualiséiert. Fir unzefänken hu si mam Emmi gewierfelt an esou en Dëppchen mat zerknujelte Sätz ausgewielt kritt. Am Grupp hunn si no an no d‘Sätz „entknujelt“, gelies an zesummen analyséiert, wou op der Zäitleescht een dëse kéint positionnéieren. De richtege Beräich identifizéiert konnten si de Saz erëm zu enger Bull zerdrécken an an de passende Basketskuerf schéissen.

Statioun 2: Emmi zu Besuch bei Oma
Zesummen hunn d‘Kanner eng Geschicht gelies, wou d‘Boma dem Emmi vun hirem Liewen erzielt. Si misste sou vill wéi méiglech Aktivitéite verhalen an déi herno an enger Aart Mind Map am Perfekt festhalen.

Statioun 3: Emmis Ferien
Déi al Bomi Emmi weess net méi, wat et schonn alles a senge ville Vakanzen erliewt huet. D‘Kanner sollte kreativ ginn an sech Saachen iwerleeën, déi d‘Emmi scho gemaach huet. Do hunn si jeeweils e klenge Saz am Perfekt derbäigeschriwwen.

Statioun 4: das PERFEKTe Spiel
Hei hunn d‘Kanner e Gesellschaftsspill (wéi d‘Leederspill) gespillt. Op de Felder stunge Sätz am Präsenz a si missten se an de Perfekt ëmwandelen, fir dierfe weider ze réckelen.

Statioun 5: Würfelsätze
D‘Emmi huet hënnt vun enger verkéierter Welt gedreemt. Reen deen no Jus geschmaacht huet? Fësch déi iwwert d‘Strooss gerannt sinn? Nach méi verréckt Saachen sollten si hei erfannen.

Statioun 6: Katzen-Chaos
Eng Kaz huet der Joffer Christine hiert Haus verwüst. D‘Kanner sollten hei opschreiwen, wat dat verréckt Déier alles ugeriicht huet!

Praxisbeispill 115: Satzglieder-Placemats

Fir d‘Satzglieder am Däitschcours vum 3.2 ze üben huet d‘Emmi de Kanner haut säi Glécksrad an d‘Placemat-Method matbruecht.

Um Glécksrad hunn si eenzel jeeweils ee conjuguéiert Verb mam Emmi erdréint. Dëst Verb hunn si op enger Placemat, déi si sech zu 4 gedeelt hunn, notéiert.

An hirer Case hunn si dann als éischt e „Bebe-Saz“ (sou hunn d‘Kanner et genannt 😅) misste maachen, bestoend just aus dem Verb an dem passende Sujet. Elo hunn si ronderëm d‘Placemat den Tour gemaach an all Saz ëm een neien Deel erweidert.

Zum Schluss hu mir gekuckt, wéieng Deeler een elo an de Sätz kéint nei verschieben a wéieng Deeler mussen zesummebleiwen, well de Saz soss kee Sënn méi ergëtt.

Praxisbeispill 114: la place de l‘adjectif

Am C3.2 huet d‘Emmi deslescht e schwéiert an abstrakt Thema agefouert: la place de l‘adjectif.

Mir sinn dës Woch deduktiv un d‘Saach erugaang an hunn eis direkt d‘Theorie ugekuckt. Seet een eigentlech „le grand noir chien“, „le chien grand noir“ oder awer „le grand chien noir“? Bei der richteger Äntwert waren sech d‘Schüler séier eenz, dat anert „kléngt alles jo falsch“, mee wisou?

Mir hunn eis d‘Kategorien ugekuckt a mat der BANGG-Reegel ënnersicht, wéieng Adjektiver virun a wéieng hannert dem nom placéiert ginn.

Fir d‘Theorie an der Praxis ze testen hu mir zesumme mol no Adjektiver gesicht, déi d‘Emmi beschreiwen, an an enger Mindmap festgehal (ronderëm eng wonnerschéi Foto vun Mrs Nature Photography ♥️)

Déi gesammelt Adjektiver hu mir op Karteikaarte geschriwwen a „live“ mat eisem „chien“ d‘groupes nominaux forméiert. Heibäi hunn d‘Kanner d‘Adjektiver *mat Kapp, Hand an Häerz* ronderëm d‘Emmi placéiert a sou determinéiert, ob d‘Adjektiv elo virum oder hannert dem „chien“ muss kommen.

Happy 11th birthday mäi gutt Emmi ♥️🐕‍🦺
Mäi Schied, mäi Séilenhond, meng trei Begleederin heiheem, am Hobby, op der Aarbecht ♥️
Hoffentlech bleiws du nach ganz vill Joren u menger Säit ♥️

Praxisbeispill 113: les verbes de mouvement (passé composé formé avec l‘auxiliaire être) 🚶🏻‍♀️

Haut huet d‘Emmi am C3.2 d‘verbes de mouvement, déi am passé composé mam auxiliaire être forméiert ginn, agefouert.

Zil vun der Stonn war et, déi Verbe kennenzeléieren a se praktesch unzewenden: mir hunn eng Fotostory vum Emmi sengem Alldag an der Schoul erstallt, wou hat déi Mouvementer an der Schoul mëscht.

A sengen Ü-Eeër huet hat de Kanner dofir 12 Beweegungsverbe verstoppt. A klenge Gruppen hunn d‘Kanner Eeër gesicht a sech d‘Verben ugekuckt. Zesummen hu mir iwwerluecht, wou d‘Emmi an der Schoul déi Beweegung mëscht a wéi mir dat visualiséiere kënnen 📸.

Uschléissend hu mir eis eng logesch Uerdnung vun de Verben an den Aktiounen iwwerluecht, fir dass eis Fotostory och e Sënn ergëtt.

Fir ofzeschléissen sollen d‘Kanner zu all Bild d‘Aktioun am passé composé an engem Saz beschreiwen, schlisslech ass d‘Aktioun op der Foto jo well eriwwer. Déi wichtegst Fro bleiwt um Schluss: wat hunn déi Verben am passé composé elo gemeinsam? Esou hunn si eng realitéitsno Geschicht, déi hinnen hoffentlech am Kapp bleiwt, fir d‘Verbe mat „être“ ze identifizéieren 🐕‍🦺

Praxisbeispill 112: Emmi und die (beinahe) Osterkatastrophe 🐰🦊🐕‍🦺

No der Ouschtervakanz hat d‘Emmi de Klassen aus dem Cycle 3.1 eng spannend Aventure mam Ouschterhues matbruecht, verpak als Billergeschicht.

Am groupe classe hu mir als éischt den Titel analyséiert. Besonnesch spannend, dass de Kanner direkt den BEINAHE an de Klammeren an d’Ae gesprong ass, wat zu flotten Diskussioune gefouert huet, wéini een da vun enger Katastroph schwätzt a wéini et BAL eng Katastroph ass.

Dank KI goufe Biller erstallt, déi d‘Kanner och an der Klass zesummen analyséiert a beschwat hunn. Mat villen oppene Froen „tëscht de Biller“ hunn d‘Kanner hierer Fantasie fräie Laf gelooss. A souguer méi roueg Kanner, déi ee soss net sou oft héiert, huet d‘Emmi a senger Helderoll an der Geschicht aus der Reserve gelackelt ♥️

Kontext: Den Ouschterhues huet gemittlech seng Ouschtereeër dobaussen am Gaart verdeelt, wéi op eng Kéier e Fuuss ogetaucht ass, deen e friesse wollt. Um nächste Bild gesäit ee just den Ouschterhues, dee säin Arem am Gips huet an dem Emmi vun der Renconter mam Fuuss erzielt. Wat ass em geschitt? Gouf e gebass? Ass e bei der Flucht virum Fuuss iwwert e Steen gefall (Anekdot vun engem Kand ♥️). D‘Emmi iwwerhëllt ouni ze zécken dem Ouschterhues seng Aufgaben a gëtt dann och mam wëllen Déier aus dem Bësch konfrontéiert… wéi et weidergeet, bleiwt de Kanner hirer Fantasie virbehalen!
🔥 Mäi Liiblingsschluss vun haut: „De Fuuss hat jo secher Honger an d‘Emmi ass ëmmer léif, hat huet him bestëmmt e Kebab vu Rammeresch (⚠️ Schleichwerbung) bestallt, do war ech och an der Vakanz, deen ass mega lecker!“