30/09/2024
IMF එපාද?
2024 ජනාධිපතිවරණයේදී සාකච්ඡාවල වූ ප්‍රධාන මාතෘකාවක් තමයි IMF (International Monetary Fund) නැතිනම් ජාත්‍යන්තර මූල්‍ය අරමුදල හරහා ශ්‍රී ලංකාවේ ආර්ථික ගැටලු විසඳාගත යුතුද නැතිද යන්න. එහිදී ප්‍රධාන වශයෙන් ජාත්‍යන්තර මූල්‍ය අරමුදල හරහා ආධාර ලබාගත යුතුයි කියලා සඳහන් කරපු පිරිසක් වගේම සෘජුවම IMF විරෝධී කණ්ඩායමක් ජනාධිපතිවරණ සටනේ නියැලුණා. එහිදී ඔවුන් ජනතා බලය ඉල්ලීමේදී IMF ප්‍රධාන මාතෘකාවක් වශයෙන් ඉදිරියට ගෙන එනු ලැබුවා. 2024 ජනාධිපතිවරණ ප්‍රතිඵලය හරහා අපට නිගමනයකට එන්න පුළුවන් ජනතාව IMF නැතිනම් ජාත්‍යන්තර මූල්‍ය අරමුදල හරහා ලංකාවේ මූල්‍යමය වශයෙන් පවතින ගැටලු විසඳාගත යුතුද නැද්ද යන්න සම්බන්ධයෙන් ජනතාව සතු වූ අදහස මොකක්ද කියලා.
ජාත්‍යන්තර මූල්‍ය අරමුදල හරහා ශ්‍රී ලංකාවේ පවතින ආර්ථික ගැටලු විසඳාගත යුතුයි කියලා ප්‍රධාන වශයෙන්ම සඳහන් කරපු අපේක්ෂකයින් කිහිපදෙනෙක් ජනාධිපතිවරණ සටනේ දැකගත හැකි වූවා සේම සෘජුවම IMF විරෝධී ජනාධිපති අපේක්ෂකයින් කිහිපදෙනෙක් ද ඔවුන්ගේ ප්‍රතිපත්ති ප්‍රකාශන පිරික්සා බලන විට හඳුනා ගත හැකි විය. එහිදී, අනුර කුමාර දිසානායක, සජිත් ප්‍රේමදාස, රනිල් වික්‍රමසිංහ, නාමල් රාජපක්‍ෂ හා දිලිත් ජයවීර යන අපේක්ෂකයන් ජාත්‍යන්තර මූල්‍ය අරමුදලට සෘජුවම හෝ වක්‍රව ඒ් හා පක්ෂව අදහස් ඉදිරිපත් කර තිබුණු අතර පානි විජේසිරිවර්ධන, සිරිතුංග ජයසූරිය, මහින්ද දේවගේ හා නුවන් බෝපගේ IMF විරෝධී අදහස් ඉදිරිපත් කර තිබිණි. ඉහත කී ජනාධිපති අපේක්ෂකයින් ලබාගත් ජනතා මනාප අනුව ඔවුන්ගේ මතය ජනතාව විසින් පිළිගත් ආකාරය හඳුනාගත හැකිය. එහිදී,
ජාතික ජන බලවේග අපේක්ෂක අනුර කුමාර දිසානායක ඡන්ද - 5,634,915 – 42.31%
සමගි ජන බලවේග අපේක්ෂක සජිත් ප්‍රේමදාස - 4,363,035 – 32.76%
ස්වාධීන අපේක්ෂක (එක්සත් ජාතික පක්ෂය ප්‍රමුඛ) රනිල් වික්‍රමසිංහ - 2,299,767 – 17.27%
ශ්‍රී ලංකා පොදු ජන පෙරමුණු අපේක්ෂක නාමල් රාජපක්‍ෂ - 342,781 – 2.57%
ශ්‍රී ලංකාවේ කොමියුනිස් පක්ෂ අපේක්ෂක දිලිත් ජයවීර - 122,396 – 0.92%
ලෙස ජාත්‍යන්තර මූල්‍ය අරමුදල හා පක්ෂව අදහස් පළ කල ප්‍රධාන අපේක්‍ෂකයන්ගේ ඡන්ද ප්‍රතිශතයන් පමණක් ගණනය කලද එය 95.83% ලෙස දැක ගත හැකියි. එසේම සෘජුවම ජාත්‍යන්තර මූල්‍ය අරමුදල සමග එකග නොවන කණ්ඩායම් ලබාගත් ඡන්ද හා ප්‍රතිශත පරීක්ෂා කර බලන කල,
සමාජවාදී සමානතා පක්ෂ අපේක්ෂක පානි විජේසිරිවර්ධන - 4,410 – 0.03%
එක්සත් සමාජවාදී පක්ෂ අපේක්ෂක සිරිතුංග ජයසූරිය - 8,954 – 0.07%
ශ්‍රී ලංකාවේ සමාජවාදී පක්ෂ අපේක්ෂක මහින්ද දේවගේ - 5,338 – 0.04%
සමාජවාදී ජනතා සංසදයේ අපේක්ෂක නුවන් බෝපගේ - 11,191 – 0.08%
මේ අනුව පෙනී යන්නේ ජාත්‍යන්තර මූල්‍ය අරමුදල හා සෘජුවම විරෝධතාවයක් දැක්වූ ජනාධිපතිවරණ අපේක්ෂකයින් සමස්ත ඡන්ද ප්‍රතිඵලයෙන් 0.22% ක අතිශය සීමා සහිත ප්‍රතිශතයක් පමණක් ලබාගත් බවයි.
අවසාන වශයෙන් පැහැදිලි වන කරුණ නම් 2024 ජනාධිපතිවරණයේ ඡන්ද බෙදී ගිය ආකාරය දෙස බලන කල තවදුරටත් “ජාත්‍යන්තර මූල්‍ය අරමුදල වෙත නොගොස් ශ්‍රී ලංකාවේ ආර්ථික ගැටලු විසඳාගත යුතුයි.” යන්න තවදුරටත් සමස්ත සමාජය තුළ සත්‍යයක් නොවන බවයි.
පෞද්ගලිකව ජාත්‍යන්තර අරමුදල හරහාම ශ්‍රී ලංකාවේ සමස්ත ආර්ථික ගැටළු විසඳාගත යුතුයි යන්නට 100% මාද එකඟ නොවුනද 2024 ජනාධිපතිවරණ ප්‍රතිඵලය දෙස බලන කල පෙනී යන්නේ IMF විරෝධී අදහසට ජනතාව තුළ කිසිදු පක්ෂපාතිත්වයක් නොමැති බවයි.
මැල්කම් ඩෙප් වීරසිංහ.
තවදුරටත් කියවන්න - https://historywithmalcome.blogspot.com/2024/09/imf.html
