15/08/2026
பொது முகாமைத்துவ சேவை உத்தியோகத்தர் சங்கத்தின் கண்டனம்
அபிவிருத்தி உத்தியோகத்தர்களின் அர்ப்பணிப்பான சேவையை களங்கப்படுத்தும் வகையிலும், அவர்களை மன உளைச்சலுக்கு உள்ளாக்கி, தமது சேவையில் பற்றற்ற நிலையை ஏற்படுத்தும் வகையிலும் வட மாகாண சபையின் பதவி நிலை உத்தியோகத்தர்கள் கலந்துகொண்ட கலந்துரையாடலில் கருத்துக்கள் தெரிவிக்கப்பட்டதாக சமூக வலைத்தளங்களில் வெளியாகியுள்ள குரல் பதிவுக்கு பொது முகாமைத்துவ சேவை உத்தியோகத்தர் சங்கம் தனது **முழுமையான கண்டனத்தை** தெரிவித்துக் கொள்கின்றது.
வட மாகாணத்தின் அபிவிருத்தி தொடர்பான கலந்துரையாடல் ஒன்றில், அபிவிருத்தி சார்ந்த விடயங்களை முன்னிறுத்தி ஆக்கபூர்வமான கலந்துரையாடல்கள் இடம்பெற வேண்டிய நிலையில், அபிவிருத்தி செயற்பாடுகளில் அர்ப்பணிப்புடன் பணியாற்றிவரும் அபிவிருத்தி உத்தியோகத்தர்களின் சேவையை களங்கப்படுத்தும் வகையில் கருத்துக்கள் தெரிவிக்கப்படுவது எவ்விதத்திலும் ஏற்றுக்கொள்ள முடியாததாகும்.
நாட்டின் அபிவிருத்தி செயற்பாடுகளில் முக்கிய பங்காளர்களாகவும், மக்களுக்கான அரச சேவையை வினைத்திறனுடன் வழங்குவதில் அர்ப்பணிப்புடனும் கடமையாற்றிவரும் அபிவிருத்தி உத்தியோகத்தர்களின் கௌரவத்தையும், தொழில்சார் மனநிலையையும் பாதிக்கும் இத்தகைய செயற்பாடுகள் உடனடியாக நிறுத்தப்பட வேண்டும் என சங்கம் வலியுறுத்துகின்றது.
மேலும், இவ்விடயம் தொடர்பில் தமது எதிர்ப்பையும் கண்டனத்தையும் வெளிப்படுத்தும் வகையில் அபிவிருத்தி உத்தியோகத்தர்கள் முன்னெடுக்கும் **கண்டன சுகயீன விடுப்பு நடவடிக்கைக்கு** பொது முகாமைத்துவ சேவை உத்தியோகத்தர் சங்கம் தனது **முழுமையான ஆதரவை** வழங்குகின்றது.
அபிவிருத்தி உத்தியோகத்தர்களின் கௌரவம், உரிமைகள் மற்றும் தொழில்சார் மரியாதையைப் பாதுகாப்பதற்காக அவர்களுடன் சங்கம் தொடர்ந்தும் உறுதியாக நிற்கும் என்பதையும் தெரிவித்துக் கொள்கின்றோம்.
**பொது முகாமைத்துவ சேவை உத்தியோகத்தர் சங்கம்**
