01/09/2026
எழுதுவதற்கு முன்… எழுதத் தயார்படுத்துவோம்!
புதிய முன்பிள்ளைப் பருவக் கல்விக் கலைத்திட்டத்தின் முக்கிய நோக்கங்களில் ஒன்று, பிள்ளைகளின் வயது, வளர்ச்சி மற்றும் விருத்தி நிலைக்கு ஏற்ப கற்றல் அனுபவங்களை வழங்குவதாகும். எனவே, முன்பள்ளிக் குழந்தைகள் உடனடியாக எழுத்துகளை எழுத வேண்டும் என ஆசிரியர்களை வலியுறுத்துவதை பெற்றோர்கள் தவிர்க்க வேண்டும்.
முன்பள்ளிப் பருவம் என்பது பிள்ளையின் கையில் பென்சிலைத் திணித்து பக்கங்களை நிரப்பச் செய்யும் காலம் அல்ல; அந்தச் சிறிய கைகளை எழுதுவதற்குத் தயார்படுத்தும் பொன்னான காலம்!
இன்று சில பெற்றோர்கள்,
* “என் பிள்ளை மற்றப் பிள்ளைகளைப் போல எழுத வேண்டும்.”
* “அ, ஆ முதல் அனைத்து எழுத்துக்களையும் எழுதத் தெரிய வேண்டும்.”
* “பயிற்சிப் புத்தகத்தில் நிறைய எழுத வேண்டும்.”
என்று எதிர்பார்க்கின்றனர்.
ஆனால் நாம் புரிந்துகொள்ள வேண்டிய ஒரு முக்கியமான உண்மை உள்ளது. எழுதுதல் என்பது திடீரென உருவாகும் திறன் அல்ல; அது படிப்படியாக வளர்த்தெடுக்கப்பட வேண்டிய ஒரு திறனாகும்.
அதிகப்படியான எழுத்துப் பயிற்சியால் என்ன பாதிப்புகள் ஏற்படலாம்?
உடல் ரீதியாக:
நீண்ட நேரம் பென்சிலைப் பிடித்து எழுதச் செய்வது கைகள், விரல்கள் மற்றும் மணிக்கட்டில் சோர்வையும் அசௌகரியத்தையும் ஏற்படுத்தலாம். நுண்தசைத் திறன்கள் இன்னும் முழுமையாக வளர்ச்சியடையாத நிலையில், அதிகப்படியான எழுத்துப் பயிற்சி குழந்தைக்குச் சிரமமாக அமையக்கூடும்.
உள ரீதியாக:
“எழுது… சரியாக எழுது… ஏன் இன்னும் முடியவில்லை?” என்ற தொடர்ச்சியான அழுத்தம் குழந்தைகளிடம்,
× பயம்
× பதற்றம்
× தன்னம்பிக்கைக் குறைவு
× தோல்வி உணர்வு
× கற்றலின் மீதான வெறுப்பு
போன்ற உணர்வுகளை உருவாக்கக்கூடும்.
விளையாட்டு நேரம் குறையக்கூடாது!
முன்பிள்ளைப் பருவத்தில் விளையாட்டு என்பது வெறும் பொழுதுபோக்கு அல்ல. விளையாட்டின் மூலம் குழந்தைகள் மொழித்திறன், சிந்தனைத்திறன், சமூகத் திறன், சுயகட்டுப்பாடு மற்றும் நுண்தசைத் திறன்களை இயல்பாக வளர்த்துக்கொள்கின்றனர்.
“அப்படியானால் எழுதக் கற்றுக்கொடுக்க வேண்டாமா?”
கண்டிப்பாகக் கற்றுக்கொடுக்க வேண்டும்! ஆனால் அழுத்தத்துடன் அல்ல; ஆர்வத்துடனும், குழந்தையின் வளர்ச்சி நிலைக்கு ஏற்பவும் கற்றுக்கொடுக்க வேண்டும்.
குழந்தை முதலில்,
✓ கோடுகள் வரையட்டும்
✓ படங்கள் வரையட்டும்
✓ வண்ணம் தீட்டட்டும்
✓ புதிர்களைச் சேர்க்கட்டும்
✓ களிமண் பிசையட்டும்
✓ மணிகளை கோர்க்கட்டும்
✓ எழுத்துக்களை விளையாட்டின் மூலம் அறியட்டும்
✓ கதைகள் கேட்கட்டும்
✓ நிறையப் பேசட்டும்
✓ கவனமாகக் கேட்கட்டும்
இத்தகைய செயற்பாடுகள் அனைத்தும் பின்னர் எழுதுவதற்குத் தேவையான கை–கண் ஒருங்கிணைப்பு, விரல் இயக்கம், நுண்தசைத் திறன், மொழித்திறன், சிந்தனைத்திறன் மற்றும் எழுத்தறிவுக்கான அடித்தளத்தை உருவாக்குகின்றன.
பெற்றோர்களே… இதை நினைவில் கொள்ளுங்கள்!
“இன்று என் பிள்ளை எத்தனை பக்கங்கள் எழுதினான்?” என்று கேட்பதைவிட,
• இன்று என் பிள்ளை எவ்வளவு மகிழ்ச்சியாகக் கற்றுக்கொண்டான்?
• என்ன புதிய விடயத்தை அறிந்துகொண்டான்?
• எவ்வளவு நேரம் விளையாடினான்?
• என்ன கதையைச் சொன்னான்?
• என்ன புதிதாக வரைந்தான்?
என்று கேளுங்கள்.
எழுத்தை விரல்களால் மட்டும் கற்றுக்கொள்வதில்லை.
அதை முதலில் கண்கள் பார்க்க வேண்டும்…
காதுகள் கேட்க வேண்டும்…
மனம் புரிந்துகொள்ள வேண்டும்…
வாய் பேச வேண்டும்…
கைகள் செயல்பட வேண்டும்…
அதன் பின்னரே எழுத்து அழகாக மலரும்!
முன்பள்ளிக் குழந்தைக்கு நாம் வழங்க வேண்டியது “எழுதும் அழுத்தம்” அல்ல; “கற்கும் ஆர்வம்” ஆகும்.
பெற்றோர்களே, உங்கள் பிள்ளையின் வேகத்தை மற்றொரு பிள்ளையுடன் ஒப்பிடாதீர்கள். ஒவ்வொரு குழந்தைக்கும் தனித்துவமான வளர்ச்சி வேகமும் கற்றல் பயணமும் உண்டு.
எனவே, “எழுதக் கற்றுக்கொடுக்கிறோமா?” என்பதைவிட, “எழுதுவதற்கான அடித்தளத்தை வயதிற்கும் வளர்ச்சி நிலைக்கும் ஏற்ப வழங்குகிறோமா?” என்பதையே நாம் கவனிக்க வேண்டும்.
ஆய்வுகளும் குழந்தை வளர்ச்சி சார்ந்த அணுகுமுறைகளும், முன்பிள்ளைப் பருவத்தில் எழுதும் திறன் படிப்படியாக உருவாகும் ஒன்றாகும் என்பதை வலியுறுத்துகின்றன. விளையாட்டு, நுண்தசைச் செயற்பாடுகள், பேச்சு, வாசிப்பு மற்றும் அர்த்தமுள்ள கற்றல் அனுபவங்களே அதற்கான வலுவான அடித்தளமாக அமைகின்றன.
எதிர்காலத்தில் கற்றலை விரும்பும், தன்னம்பிக்கையுள்ள ஒரு குழந்தையை உருவாக்க ஆசிரியர்களுக்கு பக்கத்துணையாக இருங்கள்!
விளையாடட்டும்… பேசட்டும்… வரையட்டும்… ஆராயட்டும்… எழுதட்டும்!
ஆனால் அனைத்தும் அன்புடன்… அழுத்தமின்றி!
இன்றைய மகிழ்ச்சியான குழந்தையே, நாளைய தன்னம்பிக்கையான கற்றலாளி!
உசாத்துணைகள்:
* தேசிய முன்பிள்ளைப் பருவக் கல்விக் கலைத்திட்டம்
* குழந்தை மையக் கல்வி
* குழந்தை உளவியல்
* குழந்தை வளர்ப்பில் பெற்றோரின் பொறுப்பு.
ஆசிரிய ஆலோசகர் அருணாகரன்
நன்றி sir
Arunakaran Ve
