03/08/2023
දරුවන්ගෙ අත් අකුරු ගැන වදවෙන ගුරුවරුන් දෙමාපියන් කියවිය යුතුම ලිපියක්.... (දෙවන කොටස)
🖊️අපි පළමු කොටසින් කතා කළා දරුවෙකු වැරදි ආකාරයට පැන්සල ග්‍රහණය කරනවාදැයි මූලිකව හඳුනාගන්න පුළුවන් කොහොම ද? හොඳ පැනසල් ග්‍රහණයක් පුරුදු වීමේ වැදගත්කම මොකක්ද ? යන කරුණු පිළිබඳව සරලව.
ක්‍රමිකව දරුවෙකු නිවැරදි පැන්සල් ග්‍රහණයකට හුරු කරවීමට මග පෙන්වීමක් ලබා දෙන මෙම ලිපි මාලාවවෙන් අද අපි දුර්වල පැන්සල් ග්‍රහණ ක්‍රම කිහිපයක් හඳුනාගනිමු.
➡️පළමු ඡායාරූපයේ දැක්වෙන දරුවා ඉතා තදින් පැන්සල අල්ලාගෙන ඉන්නෙ.ලිවීම සඳහා ඇඟිලි චලනය කිරීම වෙනුවට මැණික්කටුව චලනය කිරීම සිදු කරන්නෙ.දරුවෙකු මෙලෙස පැන්සල ඇල්ලීමට හේතුව දුර්වල සහ හොඳින් පාලනය කළ නොහැකි බාහු මාංශපේෂීන් පැවතීම වෙන්න පුලුවන්.
➡️දෙවන රූපයේ දරුවා ලොව පුරා ප්‍රචලිත tripod grip ක්‍රමය භාවිතා කර පැන්සල අල්ලා සිටියත් වෙදැඟිල්ල සහ සුළැඟිල්ල පොත මත පැත්තකින් තබාගෙන සිටියි.මෙය ලිවීම වෙහෙසකර කටයුත්තක් කරන අතර අතට වේදනාවක් ද ගෙන දෙයි.මෙම ඇඟිලි දෙක ඇතුළට නවාගැනීමට හුරුවීම මෙම දරුවාට ඉතා පහසුවෙන් ලිවීමට සහයක් වනු ඇති.
➡️මහපට ඇඟිල්ල තෙවන රූපයේ පරිදි පැන්සල රඳවාගැනීමට සහය කරගැනීම (wrapped thumb) බහුලව දරුවන් අතර දැකිය හැකි ක්‍රමයක්.ලිවීමේ දී අත්හළයුතු පුරුද්දක් වන මෙය උරහිස් සමායෝජනය නොමැති වීම , දුර්වල ස්පර්ශ සංජානනය හෝ මනාව බාහු මාංශපේෂීන් හැසිරවීමේ දුෂ්කරතා හේතුවෙන් ඇතිවෙන්න පුලුවන්.
➡️සිව්වන රූපයේ දැක්වෙන්නේ මහපට ඇඟිල්ල ලිවීමේ දී පැන්සල ඇල්ලීමට භාවිතා වන තවත් ක්‍රමයක් . Tucked thumb grip ලෙස හඳුන්වන මෙම ක්‍රමයේ දී නැවූ මහපට ඇඟිල්ලෙන් දරුවා පැන්සල අල්ලා සිටී.
➡️දුර්වල බාහු මාංශපේෂීන් හෝ උරහිස් මාංශපේෂීන් හේතුවෙන් පස්වන රූපයේ ආකාරයට දරුවා පැන්සල ඇල්ලීම සිදු කරනවා වෙන්න පුලුවන් .මෙම ක්‍රමයට ද ඉතා තදින් පැන්සල අල්ලා සිටීම සිදුවන බැවින් කාර්‍යක්ෂම ව ලිවීම , ඇඳීම හෝ පාටකිරීම සිදුකිරීම දරුවන්ට අපහසු වෙයි.
➡️හයවන රූපයේ දක්වා ඇති ආකාරයට පැන්සල අල්ලන දරුවන් ඇඟිලි තුඩුවලින් තදින් පැන්සල අල්ලා සිටින අතර පැන්සල හරි කෙලින් තබා ලිවීම් සිදුකරන්නෙ.මෙමගින් කාර්‍යක්ෂම ලිවීමේ ක්‍රියාවලියකට ඇඟිලි නිදහසේ හැසිරවීම අවහිරවන අතර දරුවාට ලිවීම වෙහෙසකාරී අත්දැකීමක් බවට පත් වෙනව.
⚠️️⚠️️ඔබේ දරුවාත් අපි අද හඳුන්වා දුන් ක්‍රමයකට පැන්සල අලලනවා නම් කලබල වෙන්න එපා...⚠️️⚠️️
එය තමයි වැදගත් ම දෙය.
මතක තබා ගන්න...
කාලයක් දරුවා හුරුව සිටින පැන්සල අල්ලන ක්‍රමය එක් රැයකින් වෙනස කළ නොහැකියි....
ඒ වගේ ම ඉක්මනින් පැන්සල අල්ලන ක්‍රමය වෙනස් කිරීමට දරුවා වෙහෙස කරවීම දරුවාගේ ලිවීමේ රුචිය අඩු වීමටත් ලිවීම තව තවත් ඔවුන්ට අප්‍රසන්න අත්දැකීමක් වීමටත් හේතු වෙන්න ඉඩ තියෙනව.
ලිවීම , ඇඳීම දරුවන්ට රසවත් අත්දැකීමක් කරමු...
මෙම ලිපි මාලාවෙ ඉදිරියෙදි අපි ඒ ගැන කතා කරමු...
=====================================
මේ ගැන වැඩිදුර අධ්‍යනය කරන්න කැමති දෙමාපියන්ට ,ගුරුවරුන්ට අපි ආරාධනා කරනව අපේ ulearner whatsapp සමූහයට එකතු වෙන්න කියල.පෙර පාසල් , ප්‍රාථමික පාසල් දරුවන් සිටින දෙමාපියන්ට , ගුරුවරුන්ට අලුත් අත්දැකීමක් වේවි එය
https://chat.whatsapp.com/I7RiMabf6oo7VysQm4uqtR
