03/04/2026
මොනරාගල අධ්‍යාපන කලාපයට අයත් මො/සරස්වතී දෙමළ කණිෂ්ට විද්‍යාලය සාමාන්‍ය පෙළ දක්වා පන්ති පැවැත්වුණු අති දුෂ්කර පාසලක්. සාමාන්‍ය පෙලින් පසු උසස් පෙළ හැදෑරීම සඳහා බොහෝ දුර ගෙවා මොනරාගල නගරයට සිසුන්ට පැමිණීමට සිදු වීම නිසා අධ්‍යාපනයෙන් දරුවන් ගිලිහීම වලක්වන්නට සරස්වතී විද්‍යාලයේ උසස් පෙළ පන්ති ආරම්භ කරන ලදී. නමුත් ඒ වෙනුවෙන් කිසිදු අමතර ගුරුවරයෙකු පාසලට ලබා දෙන්නට කලාපය තුළ ගුරුවරු නොසිටියත් විදුහල්පති එම්.සුදාහරන් මහතා ඇතුළු ගුරුභවතුන් ඒ වගකීම තම කර මතට ගෙන කටයුතු කිරීමේ ප්‍රතිඵලය දැන් ලැබී තිබේ.
පළමු උසස් පෙළ සිසු කණ්ඩායමේ දරුවන් සිව් දෙනාගෙන් දෙදෙනෙකු විශ්ව විද්‍යාල වරම් ලැබූ අතර එක් දරුවෙකු විද්‍යාපීඨ සුදුසුකම් ලැබීමත් අනෙක් ශිෂ්‍යයා ද විෂයන් තුනම සමත් වෙමින් 100% ක සමත් ප්‍රතිශතයක් වාර්තා කර ඇත.
මෙම ප්‍රතිඵලය ලබා දීමට දේශපාලන විද්‍යාව, එම්.අරුන් ප්‍රශාන්ත් සහ එස්.කිරුශාන්දන්, හින්දු ශිෂ්ටාචාරය, ගෝකුලරමනන් සහ කෝගිලවදනි, දෙමළ භාෂාව එම්. සුදාහරන් (විදුහල්පති) සහ සවිප්‍රියා සහ තර්ක ශාස්ත්‍රය එම්. සුදාහරන් (විදුහල්පති) සහ ප්‍රියංකා දර්ශනී යන ගුරු භවතුන් විසින් ඉගැන්වීම් සිදු කර ඇත. එක් විෂයක් ගුරුවරුන් දෙදෙනෙකු ඉගැන්වීම පාසලේ ගුරු හිඟයට පිලියමක් ලෙස භාවිත කරමින් සිදු කළ මෙම ක්‍රියාවලියේදී එක් ගුරුවරයෙකුගේ සම්පුර්ණ කාලසටහන කාලච්ඡේද 40 ඉක්මවා යන බව ද සඳහන් කළ යුතු ය.
පාසල් කාලයෙන් පසු ද ඉගැන්වීම් සිදු කරමින්, සිසුන් කිසිදු අමතර පන්තියකට සහභාගී නොවී මෙම ලබා ගන්නා ලද සුවිශේෂී ජයග්‍රහණය වෙනුවෙන් විදුහල්පතිතුමා ඇතුළු ආචාර්ය මණ්ඩලයට ගෞරවනීය ප්‍රශංසාව පල කරමු.
