Ananda College Colombo 10
12/05/2025
"යථාපි රුචිරං පුප්ඵං වණ්ණවන්තං සගන්ධකං..
එවං සුභාසිතා වාචා සඵලා හොති පකුබ්බතො.."
"සිත්කලු වූ මනා පැහැති සුවඳැති මල යම්සේ ද, එසේ ම මනා කොට දෙසන ලද ත්රිපිටක බුද්ධවචනය එය කරන්නහුට සඵල වේ."
සියලූ ලෝක සත්වයා දුකින් මිදවීමේ මාර්ගය සොයාගත්, තිලෝගුරු බුදු රජාණන් වහන්සේගේ සම්බුදු තෙමගුල සිදු වූ අති උතුම් වෙසක් පුන් පොහෝ දිනය අදයි.
ලෝක වාසී සැමට නීරෝගිමත් පිංබර වෙසක් මංගල්යයක් වේවා!
31/03/2025
ආනන්ද විද්යාලයීය සිංහල භාෂා සංගමයෙන් ඉස්ලාම් ඔබට සුබ පැතුමක්...
සාමය සමගිය සැමදා පිරී ඉතිරෙන්නයි...
සිනහා සතුට විසුළ හදවත් නිති යාවෙන්නයි...
කුසගිනි නිවී සහෝදරත්වය සමාදානය රජ වෙන්නයි...
මනු ගුණ දම් පිරී නැහැවෙන ලෝ සත වැපිරෙන්නයි...
යම් අරමුණක් කේන්ද්ර කොට ගෙන කරන්නා වූ කැප කිරීම, පරාර්ථකාමී මිනිස්සුන්ගේ තවත් එක් සුවිශේෂී ගුණාංගයකි. අනේකාගේ සතුට, ප්රීතිය උදෙසා තම කාලය, ධනය,ශ්රමය හා නොයෙකුත් විවිධ අවස්ථාවල කරන්නා වූ කැපකිරීම සෑම කෙනෙකුට ම කළ නොහැක. මෙලෙස මසක් පුරා කෙරෙන ආධ්යාත්මික ගමනෙහි නොනිමි සිත්තම් රටා එක් කැටි වන , ආදරය හා සතුට උතුරා යන සුබ ම සුබ රාමසාන් දිනයක් වේවා ඔබ සැමට...!
12/03/2025
🙏සංසාර දුක් නිවෙන,පින්සාර සිත් සැදෙන උතුම් වූ මැදින් පොහෝ දිනය අදයි🪷
▪️බුදුරජාණන් වහන්සේ බුදු වීමෙන් පසු ප්රථම වරට ශාක්ය දේශයට වැඩම කිරීම.
▪️ඥාතීන්ගේ මානය බිඳීමට යමාමහා පෙළහර පෑම.
▪️ සුද්ධෝදන රජතුමාගේ තුන් වන වැඳීම සිදු වීම.
▪️යශෝදරා දේවියට සඳකිඳුරු ජාතකය දේශනා කිරීම.
▪️නන්ද කුමරු සහ රාහුල කුමරුගේ පැවිද්ද සිදුවීම.
වැනි උතුම් ශාසනික කටයුතු කීපයකට ම මුල් වූ මැදින් පොහොය දින සම්බුදු අමා සිසිලසින් මුළු ලෝකය ම නිවී සිසිල් වන පින්සාර මැදින් පුර පසළොස්වක පොහොය දිනයක් වේවා.🙏
25/02/2025
ආනන්ද විද්යාලයීය සිංහල භාෂා සංගමයෙන් හින්දු ඔබට සුබ පැතුමක්...
2025 මහ ශිව රාත්රී දිනය පෙබරවාරි මස 26ට යෙදී ඇත.
ශිව දෙවියන්ගේ ප්රධාන පූජා දිනවලින් එකක් වන මහ ශිව රාත්රී දිනයේ දී සූර්ය උදාව දක්වා නිදිවර්ජිතව සිටීම හා ශිවරාත්රී කාලය තුළ පූජා පැවැත්වීම වේදයේ නියෝගයයි.
එසේ ම ශිව රාත්රිය යනු ආත්ම ශුද්ධිය සදහා යෝග භාවනාවලට සුදුසු අවස්ථාවන්ගෙන් එකකි.
හින්දු විශ්වාසයට අනුව විශ්වයේ ආරම්භය සොයන මෙහෙයුමට ගුරුලා මතින් දියත් වූ විෂ්ණු දෙවියන්ට පිහිට වූයේ ශිව දෙවියන් වහන්සේ ය. එදා අද වැනි අමාවක රාත්රියක ලෝකය ම ආලෝකවත් කළ ශිව දෙවියන්ට උපහාර වශයෙන් මේ රාත්රිය මහ ශිව රාත්රිය ලෙස විෂ්ණු දෙවියන් ප්රකාශ කළහ .
ඔබ සැමට සුබ මහ ශිව රාත්රී උත්සවයක් වේවා ! 🙏🏻
04/02/2025
77 වන ජාතික නිදහස් දිනය අභිමානයෙන් සමරමු..2025🇱🇰🙏🏻♥️
සිංහල ජාතියේ අභිමානය මෙලෙස කියාපාමින් 1948 දී බ්රිතාන්යන්ගෙන් රට මුදවා ගැනීමේ ඒකායන අරමුණින් කාලාන්තරයක් පුරාවට මේ පින් බිම රකින්නට මැරි මැරී, යළි ඉපදි ඉපදී පහළ වූ සහ පහළ වන සියලු ම හෙළ විරුවන්ට ආනන්ද විද්යාලයීය සිංහල භාෂා සංගමයෙන් කෙරෙන ගෞරවනීය උපහාරයයි මේ...
ඈත අතීතයේ සිට අප ධරණීතලයේ උපන් ධීර වීර දූ පුතුන්ගේ ලෙයින්, දහඩියෙන්, කැපවීමෙන් දිනාගත් ශ්රී ලාංකේය අනන්යතාව අපට උරුම වී වසර 77 ක් වූ අද දිනයේ, අප වැනි දූ පුතුන්ගෙන් රට වෙනුවෙන් විය යුත්ත සිහියෙහි රැඳවිය යුතු ම කාලයයි මේ...
දිනෙන් දින ලොව දිනා අප ශ්රී ලංකා දීපයේ ශ්රී නාමය මුළු මහත් විශ්වය පුරා රැව් පිළිරැව් දෙන්නට, බබළවන්නට හැක්කේ ද අපිටම ය.
එක ම සිතින් එක ම පැතුමෙන් ශ්රී ලාංකිකයෙකු ලෙසින් එක් ධජයක් යට එක සිතින් පෙළගැසෙමු.
ලක් මවුනි ඔබට ජයග්රාහී නිදහස් දිනයක් වේවා....!!!
14/01/2025
සහල අලුත් කරවන
සශ්රීකත්වය උතුරවන
මනු දම් මිතු දම් වඩවන
බත බුලතින් සරු වන
සුබ ම සුබ තෛපොංගල් දිනයක් වේවා...!
සුර්ය දින ක්රමයට අනුව තෛ මාසය හෙවත් දුරුතු මස ආරම්භ වන විට, තම ගොවිතැනට අත්වැලක් වන සියලු සොබා සම්පත්වලට සහ භවභෝග - ගව මහීෂාදීන් ට ද කෘතගුණත්වය පළ කරමින් ලෝ සත පුරා දමිළ ජාතිකයින් තෛපොංගල් උත්සවය ඉමහත් ප්රීතියෙන් සමරයි. මෙය දමිළ දින ක්රමයට අනුව නව වසරක ආරම්භය ද සනිටුහන් කරයි.මෙලෙස උදා වූ තෛපොංගල් දිනය සුබ ම සුබ තෛපොංගල් දිනයක් වේවා...!
ආනන්ද විද්යාලයීය සිංහල භාෂා සංගමයෙන් දමිළ ඔබට සුබ පැතුමක්...
13/01/2025
සදහම් සිසිල ගලා හැලෙන පින්බර දුරුතු පුර පසළොස්වක පොහොය දිනයක් වේවා...!
දුරුතු පුර පසළොස්වක පොහොය දිනය ලෝකවාසී බෞද්ධ ජනතාවට තවත් එක් සුවිශේෂී දිනයකි.
බෞද්ධාගමික සිදුවීම්වලින් අනූන වූ මෙම අසිරිමත් දුරුතු පුන් පොහෝ දිනයෙහි,
1. වසරේ පළමු පොහොය දිනය වීම
2. යක්ෂ නාග දෙපාර්ශවය අතර ඇතිවූ ගැටුම සමථයකට පත් කිරීම සදහා බුදුරජාණන් වහන්සේගේ ප්රථම ලංකාගමනය ලෙස මහියංගණයට වැඩම කිරීම.
3. සුමන සමන් දෙවියන්ගේ ඉල්ලීම පරිදි ලක්වාසීන්ගේ වන්දනාව සදහා කේෂ ධාතූන් වහන්සේලා පිරිනැමීම.
4. උරුවෙල කාශ්යප, නදී කාශ්යප සහ ගයා කාශ්යප යන තුන් බෑ ජටිලයන් බුදුහිමියන් විසින් දමනය කිරීම.
ආදි සම්බුද්ධ ශාසනයේ වැදගත් සිදුවීම් රාශියකට මුල් වූ උතුම් දුරුතු පුර පසළොස්වක පොහොය දිනය සැදැහැ සිතින් සමරමු.
31/12/2024
ලැබුවා වූ 2025,අලුත් අවුරුද්ද, සුවහසක් ලංකාවාසී ,ලෝකවාසී , සියලු ම දෙනාට, සැප සම්පතින් පිරි, සිංහල භාෂාව හා සංස්කෘතිය පෙරදැරි කොටගත් සුවහසක් ආනන්දීයයන්ගේ ද මං පෙත් විවර කරන නැවුම් ආරම්භයක තවත් එක් සොදුරු නිමිත්තකින් - කිරියෙන් පැණියෙන් ඉතිරෙන නිදුක් නීරෝගී සුබ ම සුබ නව වසරක් වේවා !!!
අවුරුදු ආසිරි ගෙනෙන අප ආනන්ද විද්යාලයීය සිංහල භාෂා සංගමය
27/12/2024
සිංහල යනු බහුතර සිංහල ජනතාවගේ මාතෘ භාෂාවයි. පාසල් අධ්යාපනය
තුළ සිසුවෙකු වැඩිම කාලයක් වැය කරනුයේ භාෂා අධ්යාපනයටයි. භාෂාවක
මූලික අරමුණ වනුයේ ශ්රවණය, කියවීම, ලේඛනය හා කථනය යන චතුර්විධ
භාෂා කුසලතා ඉහළ නැංවීමයි. නිරවද්ය හා සම්මත භාෂා පරිචිත බව ලැබීම,
වාග්මාලාව පෝෂණය කිරීම හා දාර්ශනික, විද්යාත්මක මෙන් ම තාක්ෂණික
දැනුම උකහා ගැනීම ඉන් ප්රධානය. සිංහල විෂය ඉගැන්වීමට අමතරව
සිසුන්ගේ භාෂාමය හැකියාව වැඩිදියුණු කිරීමද නූතන සිංහල භාෂා භාවිතයේ
පෙනෙන අපභාෂා ලක්ෂණයන්හි නිරවද්යතාවය මනාව පසක් කිරීමටද බලාපොරොත්තුවේ. එසේම භාෂා භාවිතය, සිසුන්ට ඒ සඳහා ශක්තිමත්
අඩිතාලමක් තනා දීමද අපගේ ඉලක්කයයි.
25/12/2024
ආනන්ද විද්යාලයීය සිංහල භාෂා සංගමයෙන් කිතුනු ඔබට සුබ පැතුමක්...
ලෝකයට - ලෝක සත්ත්වයාට ආලය, කරුණාව, දයාව, සාමය පතුරුවන්නා වූ ඒ උතුම් මිනිසාගේ ගුණ සිහිපත් කරන දිනයයි මේ.
ප්රේමය ප්රේමණීය කරන
රිදුනු හදවත් සුව කරන
මනු දම් මිතු දම් වඩවන
ජේසු සමිඳුන්ගේ අනුහසින් කිතුනු ලෝ දිනේවා...
තවත් එක් සොදුරු වසරක අවසානයත් - නිර්මල අවුරුද්දක නොනිමි ආරම්භයත් හමුවේ, සාමයේ පණිවුඩය මුළු මහත් ලෝක වාසි සියලු සතුනට වැටහෙන, ගුණ දම් වපුරන, සාමය ලොවපුරා පැතිරෙන, ළඟ ම එළඹෙන නව වසරේ සිට මිනිසත් ගුණ, වර්ධනය වන සාමය සතුට පිරි සුබ ම සුබ නත්තලක් වේවා !
19/12/2024
1899 දෙසැම්බර් මස 19 වැනි දින උපත ලැබූ රැයිපියෙල් තෙන්නකෝන් ශූරීන් කොළඹ යුගයේ මුල් පරපුර නියෝජනය කළ කවියෙකු, ඉතිහාසඥයෙකු මෙන් ම හෙළ හවුලට අයත් ප්රමුඛ සිංහල වියතකු ද වෙයි.මෙම විද්වතාණන් විසින් රචිත"වවුලුව " "සක් පුබුදුව" වැනි උපහාස කාව්ය සහෘද අවධානයට ලක් වූ සුවිශේෂී නිර්මාණයෝ වෙති.
කුමාරතුංග මුනිදාසියන්ගේ ප්රබල අනුගාමිකයකු වූ මොහු ලක් ඉතිහාසය පිළිබඳ මනා දැනුමකින් යුතුව කටයුතු කළ අතර ඒ දැනුම "අනුරාධපුර බැසීම හා වැටීම", "යටගිය දවස", "සිංහල වංසය", "පරංගි සමය" වැනි ඉතිහාස කෘතිවලින් මෙන් ම "වවුලුව "වැනි කාව්යයකින් ද ප්රකට වෙයි.
මෙතුමා පාසල් අධ්යාපනය ලබන අවධියෙහි රන්දොළුව පන්සලෙන් ප්රාචීන භාෂා හා ඉංග්රීසි භාෂාව ද හදාරා ඇති අතර පසුව දෙමළ, ප්රංශ, ග්රීක්, හීබෲ ආදී භාෂා ගණනක් ම ස්වෝත්සාහයෙන් අධ්යයනය කළ ප්රතිභාපූර්ණ නිර්මාණකරුවෙකි. 2500 බුද්ධ ජයන්තිය නිමිති කර ගෙන පවත්වන ලද තරගයකින් "මහා කවියා"ලෙස නම් කර ඇති අතර එහි ප්රතිඵලයක් ලෙස පැදි 2500කින් ලංකා ඉතිහාසය පද්යකරණයට ලක් කිරීමට ඔහුට පවරන ලද බව ද සඳහන් වෙයි. "සිංහල වංශය" එහි අග්ර ඵලය වූ බව ද සඳහන් වේ.මේ ආකාරයෙන් රට දැය වෙනුවෙන් තම ශ්රමය, කාලය වැය කළ මෙම අද්විතීය හෙළ කලාකරුවා 1965 වර්ෂයේ දී මෙලොවින් සමු ගන්නා ලදී.
14/12/2024
පින්බර උඳුවප් පුන් පොහොය දිනයක් වේවා..!
උඳුවප් පුර පසළොස්වක පොහොය දිනය ලෝකවාසී බෞද්ධ ජනතාවට තවත් එක් සුවිශේෂී දිනයකි.
බෞද්ධාගමික සිදුවීම් වලින් අනූන වූ මෙම අසිරිමත් උඳුවප් පුන් පොහෝ දිනයෙහි,
1. බුදුරජාණන් වහන්සේ තව්තිසා දෙව්ලොවෙහි සිට සංකස්ස නුවරට වැඩම කිරීම.
2. සැරියුත් හිමියන්ට ප්රඥාවෙන් අගතැන් තනතුර ප්රදානය කිරීම.
3. සංඝමිත්තා තෙරණිය වැඩමවීමට අරිට්ඨ ඇමතිවරයා දඹදිවට පිටත්වීම.
4. ථූපාරාමයේ කරන ලද සංගායනාව.
5. ජය ශ්රී මහා බෝධි අංකුරය පිහිටු වීම.
6. වස් පවාරනය.
7. මෛත්රී බෝසතුන් පැවිදි වීම
ආදී සම්බුද්ධ ශාසනයේ වැදගත් සිදුවීම් රාශියකට මුල් වූ උතුම් උඳුවප් පුර පසළොස්වක පොහොය දිනය බැති සිතින් සමරමු.