20/08/2026
தண்டு உறுதியானால் மரம் உறுதியாக வளரும் – அதுவே மாணவர்கள்
ஒரு மரம் உயரமாகவும் வலிமையாகவும் வளர்வதற்கு அதன் தண்டு உறுதியாக இருக்க வேண்டும். தண்டு பலவீனமாக இருந்தால், மரம் எவ்வளவு உயரமாக வளர்ந்தாலும் சிறிய காற்றுக்குக்கூட அது சாய்ந்துவிடும். அதேபோன்று, ஒரு குழந்தையின் எதிர்கால வாழ்க்கை சிறப்பாகவும் உறுதியாகவும் அமைய வேண்டுமாயின், அதன் ஆரம்பக் கல்வி மற்றும் வளர்ப்பு முறையானதாகவும் வலுவானதாகவும் அமைய வேண்டும்.
முன்பள்ளிக் கல்வி என்பது ஒரு குழந்தையின் கல்விப் பயணத்தின் அடித்தளம் ஆகும். இக்காலகட்டத்தில் குழந்தைகள் பெறும் அனுபவங்கள், பழக்கவழக்கங்கள், அறிவு, ஒழுக்கம், சிந்தனைத்திறன், சமூகத் திறன்கள் மற்றும் உணர்வுகளை வெளிப்படுத்தும் திறன் ஆகியவை அவர்களின் எதிர்கால வளர்ச்சியில் முக்கிய பங்கு வகிக்கின்றன.
முன்பள்ளியில் குழந்தைகளுக்கு எழுத்துக்களையும் எண்களையும் மட்டும் கற்றுக் கொடுப்பது போதுமானதல்ல. அவர்கள் பகிர்ந்து கொள்ளுதல், பிறரை மதித்தல், அன்புடன் பழகுதல், தன்னம்பிக்கையுடன் பேசுதல், பிரச்சினைகளைத் தீர்த்தல், குழுவாகச் செயல்படுதல், பொறுப்புணர்வுடன் நடந்து கொள்ளுதல் போன்ற வாழ்க்கைக்குத் தேவையான திறன்களையும் கற்றுக்கொள்ள வேண்டும்.
அதனை சரியான முறையில் வழங்குவதில் முன்பள்ளி ஆசிரியரின் பங்கு மிக முக்கியமானது. ஆசிரியர் ஒரு அறிவைப் புகட்டுபவராக மட்டுமல்லாமல், குழந்தையின் ஆர்வத்தையும் திறமையையும் கண்டறிந்து, அதனை வளர்க்கும் ஒரு வழிகாட்டியாகவும் செயற்பட வேண்டும். குழந்தைகளின் வயதுக்கும் வளர்ச்சி நிலைக்கும் ஏற்ற விளையாட்டு, செயற்பாடு, பாடல், கதை, உரையாடல் மற்றும் அனுபவக் கற்றல் போன்ற முறைகள் மூலம் கல்வியை வழங்கும்போது, குழந்தைகள் மகிழ்ச்சியுடன் கற்றுக்கொள்வார்கள்.
அதேவேளை, பெற்றோர்களும் முன்பள்ளியும் ஒன்றிணைந்து செயற்படுவது அவசியம். குழந்தையின் வளர்ச்சியை ஆசிரியர் மட்டுமே கவனிப்பதோ அல்லது பெற்றோர் மட்டுமே பொறுப்பேற்பதோ போதாது. இருவருக்கும் இடையே நல்ல தொடர்பும் புரிந்துணர்வும் காணப்படும்போது, குழந்தையின் தேவைகளை சரியாக அறிந்து அதற்கேற்ற வழிகாட்டலை வழங்க முடியும்.
முன்பள்ளிக் காலத்தில் குழந்தைகளின் வளர்ச்சியை தொடர்ந்து கணிப்பீடு செய்து அவதானிப்பதும் முக்கியமானதாகும். ஒவ்வொரு குழந்தையும் தனித்துவமானது. சில குழந்தைகள் விரைவாகக் கற்றுக்கொள்வார்கள்; சிலர் சிறிது காலம் எடுத்துக்கொள்வார்கள். எனவே, குழந்தைகளை ஒப்பிடாமல், அவர்களின் தனிப்பட்ட முன்னேற்றத்தை அறிந்து, தேவையான ஆதரவை வழங்க வேண்டும்.
ஒரு சிறிய செடியை நாம் அன்புடன் பராமரித்து, சரியான அளவு நீர், உரம், ஒளி ஆகியவற்றை வழங்கினால் அது நாளடைவில் பெரிய மரமாக வளரும். அதுபோல, அன்பு, அறிவு, ஒழுக்கம், பாதுகாப்பு, நல்ல வழிகாட்டல் மற்றும் தரமான முன்பள்ளிக் கல்வி ஆகியவற்றை குழந்தைகளுக்கு வழங்கினால், அவர்கள் எதிர்காலத்தில் தன்னம்பிக்கைமிக்க, பொறுப்புணர்வுள்ள, நல்ல பண்புகளைக் கொண்ட மனிதர்களாக வளர்வார்கள்.
இன்றைய முன்பள்ளிக் குழந்தைகளே நாளைய ஆசிரியர்கள், மருத்துவர்கள், பொறியாளர்கள், தலைவர்கள், தொழில்முனைவோர் மற்றும் சமூகத்தின் பல்வேறு துறைகளில் பணியாற்றும் சிறந்த குடிமக்கள். எனவே, அவர்களின் ஆரம்பக் கல்வியை சாதாரணமான ஒன்றாகக் கருதாமல், நாட்டின் எதிர்காலத்தை உருவாக்கும் முதலீடாக நாம் கருத வேண்டும்.
“தண்டு உறுதியானால் மரம் உறுதியாக வளரும்;
அடித்தளம் உறுதியானால் கட்டிடம் உறுதியாக நிற்கும்;
முன்பள்ளிக் கல்வி உறுதியானால் மாணவர்களின் எதிர்காலம் உறுதியாகும்.”
எனவே, ஒவ்வொரு குழந்தைக்கும் தரமான, அன்பான, பாதுகாப்பான மற்றும் முறையான முன்பள்ளிக் கல்வியை வழங்குவது ஆசிரியர்கள், பெற்றோர்கள் மற்றும் சமூகத்தின் கூட்டுப் பொறுப்பாகும். இன்று நாம் ஒரு குழந்தையின் அடித்தளத்தை எவ்வளவு வலிமையாக அமைக்கின்றோமோ, நாளை அந்தக் குழந்தை சமூகத்தில் அவ்வளவு உறுதியான மரமாக நிமிர்ந்து நிற்கும்.
குழந்தைகளை வளர்ப்பது ஒரு குடும்பத்தின் பொறுப்பு மட்டுமல்ல; அது ஒரு சமூகத்தின் எதிர்காலத்தை உருவாக்கும் பொறுப்பாகும்.
✍🏼 சுதர்ஷினி ராகுல்
