15/03/2026
මාධ්‍ය නිවේදනය
ඉන්ධන බලපත්‍රය (QR Code) භාවිතයෙන් ඉන්ධන ලබාගැනීමේ ක්‍රියාවලිය පිළිබඳ දැනුවත් කිරීම
ජාතික ඉන්ධන බලපත්‍ර පද්ධතිය (National Fuel Pass) යටතේ ඉදිරියේදී ඉන්ධන ලබාගැනීමේ ක්‍රියාවලිය විධිමත් කිරීම සඳහා රථවාහන හිමියන් අනුගමනය කළ යුතු පියවර 3ක් පිළිබඳව බලධාරීන් විසින් අවධාරණය කරනු ලබයි.
ඒ අනුව, ඔබ අයත් වන්නේ පහත කුමන කාණ්ඩයටදැයි හඳුනාගෙන අදාළ පියවර අනුගමනය කරන්න:
පැරණි QR කේතය නොවෙනස්ව පවතින අයට:
දැනටමත් QR කේතයක් හිමි, තම වාහනයේ අයිතිය සහ ලියාපදිංචි කළ දුරකථන අංකයෙහි කිසිදු වෙනසක් සිදු නොවූ වාහන හිමියන්ට, තමන් සතු එම පැරණි QR කේතයම ඉදිරිපත් කර බාධාවකින් තොරව ඉන්ධන ලබාගත හැක.
QR කේතය අස්ථානගත වූ නමුත් තොරතුරු නොවෙනස් අයට:
මීට පෙර ලියාපදිංචි වී ඇති නමුත්, තම QR කේතය අස්ථානගත වී හෝ දුරකථනයෙන් මැකී ඇත්නම් (දුරකථන අංකය සහ වාහන තොරතුරු නොවෙනස් නම්), නැවත ලියාපදිංචි වීම අවශ්‍ය නොවේ. පද්ධතියට ලොග් වී (Log-in) ජංගම දුරකථනයට ලැබෙන OTP කේතය මගින් නැවතත් සිය QR කේතය ලබාගත හැක.
අලුතින් ලියාපදිංචි විය යුතු අයට:
මීට පෙර කිසිසේත්ම ලියාපදිංචි නොවූ පුද්ගලයන්, තම වාහනය අලුතින් මිලදී ගත් පුද්ගලයන් (අයිතිය වෙනස් වූ) හෝ මීට පෙර ලියාපදිංචි කළ දුරකථන අංකය දැනට භාවිත නොකරන පුද්ගලයන් පද්ධතියේ අලුතින් ලියාපදිංචි වීම අනිවාර්ය වේ.ඉන්ධන පිරවුම්හල්වල තදබදය අවම කර ගැනීමටත්, කාර්යක්ෂම සේවාවක් ලබා ගැනීමටත් ඉහත උපදෙස් නිසි පරිදි පිළිපදින ලෙස රථවාහන හිමියන්ගෙන් කාරුණිකව ඉල්ලා සිටිමු.
