Math Home-ගණිත නිවහන-Weerasekara

❤️නව අධ්‍යාපන ප්‍රතිසංස්කරණ❤️
නව අධ්‍යාපන ප්‍රතිසංස්කරණ එනතුරු අධ්‍යාපන ක්ෂේත්‍රයේ ඉන්න අපි වගේම මුළු රටම කාලයක ඉඳල බලාගෙන හිටියෙ නැවුම් බලාපොරොත්තු දල්වාගෙන.විභාගය සමත්වීම මූලික අරමුණ කරගත් විභාග කේන්ද්‍රීය ඉගෙනුම් ඉගැන්වීම් ක්‍රියාවලිය අවසානයේ බොහෝ දේවල් අපට අහිමි වෙලා තියෙනව. දැනුමෙන් පිරුණු එහෙත් කුසලතා හා යහපත් ආකල්ප වලින් පිරිහුණු ශිෂ්‍ය ප්‍රජාවක් බිහිවීම තමයි එහි අවසන් ප්‍රතිඵලය වෙලා තියෙන්නේ. මේ අධ්‍යාපන ක්‍රමයේ නරක ප්‍රතිවිපාක මේ වන විටත් අපි ඕනෑවටත් වඩා අත්විඳිමින් ඉන්නව. මේ යන ක්‍රමය කඩිනමින් වෙනස් නොකලහොත් අපට අත්වන ඉරණම හිතා ගන්නත් අමාරුයි.
ඇවිත් තියෙන අධ්‍යාපන ප්‍රතිසංස්කරණ පිළිබඳව මේ දවස්වල සමාජයේ ලොකු කතිකාවතක් නිර්මාණය වෙලා තියෙනව.වැඩි දෙනෙක් කතාවෙන්නේ පාසල් කාලය පැය භාගයක් වැඩි කරපු එක හරිද වැරදිද?ඉතිහාසය,සෞන්දර්ය සා.පෙළ විභාගයේ අනිවාර්ය විෂයන් නොකිරීම හරිද වැරදිද?ආගම විෂයට සදාචාරය ඈඳීම හරිද වැරදිද වගේ දේවල්.ඇහෙන දකින සමහර දේවල් අනුව නම් අපට හැඟී යන්නේ මේ දේවල් පිළිබඳ ගැඹුරු අධ්‍යයනයකින් යුතුව කෙරෙන සංවර්ධනාත්මක විවේචන වෙනුවට පටු දේශපාලන අරමුණු වෙනුවෙන් කෙරෙන විවේචන බව.කොහොම නමුත් ඒ දේවල් ගැන මම කතාකරන්න යන්නෙ නැහැ.මොකද ඒ දේවල් ගැන කතා කරන්න ඕන තරම් අය ඉන්නවා.ඒ දේවල් ආණ්ඩුවයි මහජනතාවයි කතාකරල විසඳගන්න ඕනි.මේ වගේ දේවල් පිළිබඳ කතිකාවත කරලියට ඒම නිසා උනේ සැබෑම කතිකාවත ගොඩනැගිය යුතුව තිබුණු විෂය මාලාවේ පරිවර්තනීය වෙනස තුළ ඇති ගැටලු සහගත තත්ත්වයන් නිරාකරණය කර ගැනීම පිළිබඳ කතිකාවත සහ තවදුරටත් සංවර්ධනය කර ගත යුතු කරුණු පිළිබඳ කතිකාවත යටපත්වීම.මොකද මේ වෙලාවේ අප හමුවට ඇවිත් තියෙන විෂය මාලාවේ පරිවර්තනීය වෙනසට අපේ අපේක්ෂාවන් මුළුමනින්ම ඉටු කළ හැකිද කියන ප්‍රශ්නය අප හමුවේ තියෙනව.කොහොම නමුත් අධ්‍යාපන ක්ෂේත්‍රයේ ඉන්න අය විදියට අපට මේ ඇවිත් තියෙන ප්‍රතිසංස්කරණ ඉස්සරහට අරගෙන යන්න වෙනවා.ඒ වගේම ඒ තුළ අපේ අපේක්ෂාවන් මුළුමනින්ම නැතත් බොහෝ දුරට ඉටු වී තිබෙන බව පිළිගන්නත් වෙනව.ඒ නිසා අපි ඒ ගැන කතාකරමු.ඒ දෙස සුබවාදීව බලමු.
අධ්‍යාපන ප්‍රතිසංස්කරණ පිළිබඳ ගුරු පුහුණු වැඩසටහන් මේ දවස්වල රට පුරාම ක්‍රියාත්මක වෙනවා.අපේ කලාපයේත් ගණිත ගුරුවරුන් පුහුණු කිරීමේ වැඩමුළු හතරෙන් තුනක් මේ වන විට අවසන්.වැඩමුළු සියල්ලම අවසන් උනාට පස්සේ මේ ලිපිය ලියන්න හිතාගෙන හිටියත් ඒක තව ටිකක් කල් යන නිසා මුලින් පුහුණුව ලැබූ අපේ කලාපයේ ගණිත ගුරුබවතුන්ට මතකය ආවර්ජනය කරගෙන පාසල් නිවාඩු කාලය තුළ වඩාත් හොඳින් සූදානවී 2026 වර්ෂයේ 6 ශ්‍රේණියට පා තබන පුංචි දරු පැටවුන්ව ආදරණීයව පිළිගන්න තවදුරටත් ශක්තිය එක්කිරීම වෙනුවෙන් සහ මහ ජනතාවටත් යම් අවබෝධයක් ලබාගන්න දින 4 ක අපේ පුහුණු වැඩමුළුව තුළ අපි කල කී දේවල් සාරාංශ වශයෙන් ඉදිරිපත් කරන්න කල්පනා කළා.
අධ්‍යාපන ප්‍රතිසංස්කරණවල සාර්ථකත්වය දරා සිටින කුළුණු පහෙන් පළමු කුළුණ තමයි නව විෂයමාලාවේ පරිවර්තනීය වෙනස.මේ තුළ සංවර්ධනය කරගත යුතු තැන් තිබුණත් සාධනීය ලක්ෂණ බොහොමයක් තියෙනවා.මේ දේවල් පිළිබඳව අපි ගුරු බවතුන් හොඳින් දැනුවත් කළා.ඒ වගේම විෂය මාලාවේ පරිවර්තනීය වෙනස තුළ ප්‍රබලව සාකච්ඡාවෙන විසි එක්වන සියවසේ කුසලතා පිළිබඳවත් ක්‍රියාකාරකම් පාදකව ගණිතය ඉගැන්වීමේදී භාවිත කළහැකි ශිල්පීය ක්‍රම පිළිබඳවත් එම ශිල්පීය ක්‍රම භාවිතා කරමින්ම අවශ්‍ය දැනුම කුසලතා සහ ආකල්ප අත්පත්කර ගන්න ගුරුබවතුන්ට අවස්ථාව සලසලා දුන්නා.
මේ වැඩමුළුව තුළ කල කී හැම දෙයක්ම අදාල වුණේ අධ්‍යාපන ප්‍රතිසංස්කරණවල දෙවෙනි කුළුණ වන ගුරුබවතුන් දැනුවත් කිරීම සහ සවි බල ගැන්වීම වෙනුවෙන්.
ඇගයීම හා තක්සේරුකරණය තමයි තුන්වන කුළුණ.රුබ්‍රික්ස් පදනම්කරගෙන සම්බවන හා සම්පින්ඩිත තක්සේරුකරණය හරහා ප්‍රසස්ථ අන්දමින් ඇගයීම් ක්‍රියාවලිය සිදුකරන ආකාරයට අදාලව න්‍යායාත්මක සහ ප්‍රායෝගික පුහුණුව උපරිමයෙන් ලබල දෙන්න පුහුණුවට අදාල දින හතරෙන් දින දෙකකට ආසන්න කාලයක් වෙන්කලා.ඉතින් ඒ වැඩේ හොඳින්ම උනා කියල අපි විශ්වාස කරනව.
ප්‍රතිසංස්කරණවල සාර්ථකත්වයේ කුළුණු දෙකකම බර අපේ ගුරුබවතුන්ගේ උර මත තිබෙන බව එයාලා හොඳින්ම තේරුම් ගෙන ඉන්න බව අපි විශ්වාස කරනව.විෂය මාලාවේ සිදුවී ඇති පරිවර්තනීය වෙනස පිළිබඳව ලොකු ගැටළු නැති බවයි මගේ නම් අදහස.ඒ කියන්නේ අධ්‍යාපන ප්‍රතිසංස්කරණවල පළමු කුළුණු තුනේ සාර්ථකත්වය පිළිබඳව අපට විශ්වාසය තියන්න පුළුවන් කියන එක.
ඊළඟට තියෙන්නේ හතරවෙනි කුළුණ.ඒ කියන්නේ යටිතල පහසුකම්.අධ්‍යාපන ප්‍රතිසංස්කරණවල සාර්ථකත්වයට මේක නම් තීරණාත්මක සාධකයක් වේවි.විශේෂයෙන්ම දරුවන් සඳහා වන මොඩියුල,ක්‍රියාකාරකම් පාදක ව ඉගැන්වීමේදී අවශ්‍යවන ඉගෙනුම් ද්‍රව්‍ය,තාක්ෂණික මෙවලම් වගේ දේවල් ලැබෙන්නම ඕනේ.ඒ ගැනත් අපි සුබවාදීව බලාගෙන ඉමු.
පස්වෙනි කුළුණ වෙන්නේ මහජනතාව නිවැරදිව දැනුවත් වීම.මේ කාරණයේදී නම් දැනටමත් විවිධ ගැටලු ඇතිවෙලා තියෙන බව පෙනෙන්න තියෙනව.මහජනතාවගේ හඬටත් ඇහුම්කන් දීල අවශ්‍ය සංශෝධන සහිතව ඉදිරියට ගියොත් මහජනතාවගේ සහයෝගය ලැබේවි.එහෙම නොවුණොත් නම් ඉතින් ලොකු අවුලක්.ඒ පිළිබඳවත් අපි සුභවාදී බලාපොරොත්තු දල්වාගෙන බලාගෙන ඉමු.
අන්තර්කරන අධ්‍යාපනය පිළිබඳව හොඳ මඟ පෙන්වීමක් ලබාදුන් අතර පන්ති කාමරයේ සිටින විවිධ දුර්වලතා සහිත දරුවන් පිළිබඳව අලුතෙන් හිතන්නට හොඳ පෙළඹවීමක් ඇති කළා.
ගණිතය වැඩිදුර ඉගෙනුම් මොඩියුලය වෙත දරුවන් ආකර්ෂණය කර ගැනීමේ අවශ්‍යතාවය පිළිබඳවත් එය පන්ති කාමරය තුළ ක්‍රියාත්මක කරන ආකාරය පිළිබඳවත් හොඳ පුහුණුවක් ලබාදුන්නා.
ඉතින් 2026 වර්ෂයේ 6 ශ්‍රේණියට පය තබන දරුවාව ආදරණීය ලෙස පිළිගැනීමට අවශ්‍ය කරන විෂය දැනුම යාවත්කාලීන කර ගැනීමටත් ලබා ගත් ප්‍රායෝගික අත්දැකීම් නැවත අත්හදා බැලීමටත් මේ නිවාඩු කාලය ප්‍රයෝජනයට ගන්න පුළුවන්.ඒ වගේම අප ලබාදුන් පුහුණුව පිළිබඳව ඔබගේ නිදහස් අදහස් ඉදිරිපත් කරන්න මෙය අවස්ථාවක් කර ගන්නත් පුළුවන්.
අවසාන වශයෙන් මේ දේ කියන්න ඕනේ.මේ අධ්‍යාපන ප්‍රතිසංස්කරණ කාලයක පටන් මහජනතාව ඉල්ලපු දෙයක්.රටේ ප්‍රධාන දේශපාලන පක්ෂ සියල්ලේම පාහේ ආශිර්වාදය ලැබුණ දෙයක්.අනාගත දරු පරපුර පිළිබඳ සුභ සිහින ගොඩනඟා ගන්න හේතු වන දෙයක්.එහි අඩුපාඩු තියෙන්න පුළුවන්.එහෙම කියල එය පැත්තකට විසි වෙන තැනට කටයුතු යෙදුණොත් අපේ සුභ සිහින බිඳවැටේවි.අපේ ආදරණීය ගුරුභවතුන්ගෙන් ඉල්ලන්නේ එවැනි දෙයක් වෙන්න වචනයකින් හෝ ඔබේ දායකත්වය ලබා නොදෙන ලෙසට.ඒ වගේම අධ්‍යාපන බලධාරීන්ගෙන් සහ දේශපාලන නායකත්වයෙන් ඉල්ලා සිටින්නේ නිවැරදි අධ්‍යාපන ප්‍රතිසංස්කරණයක් අපේක්ෂා කරන ජනතාවගේ හඬටත් ඇහුම්කන් දීලා සාධනීය ලෙස මෙම ප්‍රතිසංස්කරණ ක්‍රියාවලිය ඉදිරියට අරගෙන යන්නට අවශ්‍ය මැදිහත්වීම කරන ලෙසට.

ඩබ්.එම්.එස්.වීරසේකර
ගණිතය ගුරු උපදේශක.
2025.11.18

️❤❤️❤❤️️පොදු මහ ️️️ජනතා පැතුම️️️❤️❤️❤❤️

❤️️ඔබ මා ඇතුළු මේ රටේ අති බහුතර ජනතාවක් අපේක්ෂා කළ දේශපාලන පරිවර්තනය දැන් සිදුවෙලා තියෙනව.ජනතා විමුක්ති පෙරමුණ ප්‍රධාන ජාතික ජන බලවේගය මේ ජයග්‍රහණයේ පෙරගමන්කරුවන්.මේ මහා ජනතා බලවේගය ඒකරාශී කර ගනිමින් මේ මහා ජයග්‍රහණය අත් කරගන්නා තෙක්ම අත් නොහැර මෙය අල්ලාගෙන සිටි ජනතා විමුක්ති පෙරමුණෙහි දේශපාලනය විශ්වාස කළ අය වගේම ඒ වෙනුවෙන් අසීමිත කැපකිරීම් කළ අය වසර 40 ක පමණ කාලයක සිට දුටු සිහිනය අද සැබෑ වෙලා තියෙනව.
දේශපාලකයින්ගේ රැවටිලිකාර මුසා බස් වලින් අන්දව සිටි එදා මිනිසුන්ට තේරුම් ගැනීමට නොහැකි වූ සත්‍යය වර්තමානයේ ජීවත්වන දේශපාලකයින්ට ඇන්දවිය නොහැකි උගත් බුද්ධිමත් පොදු මහා ජනතාව නිවැරදිව තේරුම් අරගෙන තියෙනව. ඔවුන්ගේ යුතුකම නොපිරිහෙලා ඉටුකරල තියෙනව.කිසි දිනක මේ බිමේ බිහි නොවේ යැයි සිතූ පාලනය අද බිහිවෙලා තියෙනව.මේ මීට වසර හතළිහකට පමණ පෙර ඔවුන් බිහිකිරීමට වෙර දැරූ පාලනය.ප්‍රජාතන්ත්‍රවාදී මං මාවත් අවහිර කළ තැන තරුණ ජීවිත දහස් ගණනක් අහිමි කර ගනිමින් සන්නද්ධ අරගලයකින් බිහි කර ගැනීමට උත්සාහ කළ පාලනය.එදා පාලකයන් තමන් සතු අවි බලය සහ මාධ්‍ය බලය භාවිත කරමින් ජන මතය යටපත්කරමින් සහ විකෘති කරමින් මේ බිමේ බිහිවීමට ඉඩ නොදුන් පාලනය. ආශ්චර්යයකින් මෙන් අද ඒ පාලනය මේ බිමේ බිහිවෙලා තියෙනව.එදා ජනතා විමුක්ති පෙරමුණට පාලන බලය ලබාදීමට වෙර දැරූ ජනතා බලවේගය සහ අද ජාතික ජන බලවේගයට පාලන බලය හිමි කර දුන් ජනතා බලවේගය වෙනස් වුවද පාලන බලය හිමිකර ගත් පාර්ශවයෙහි වැඩි වෙනසක් නැහැ.එදා ඔවුන්ට වැරදුනු තැන් වලින් ලබාගත් අත්දැකීම්වලින් සහ සමාජ පරිණාමනය තුළින් එකතු කරගත් නවමු අත්දැකීම්වලින් ඔවුන් බොහෝ සෙයින් සන්නද්ධව ඇති බවට නම් නිසැකයි.එදා ඔවුන් බිහිකිරීමට උත්සාහ කළ පාලනය යහපත් ජනතාවාදී එකක් බව ඒත්තු ගැන්වීමට සහ ඒ වෙනුවෙන් මේ බිමෙහි මිහිදන් වූ දහස් ගණනකගේ ජීවිතවලට සාධාරණය ඉටු කිරීමට නම් වර්තමාන පාලනය ජනතාවගේ බලාපොරොත්තු ඉටු කළ යුතුමයි.ජනතාවාදීව රට පාලනය කළ යුතුමයි.ඔවුන්ගේ දේශපාලනය තුළ මියගිය විරුවන් වෙනුවෙන් ස්මාරක නොතැනුනද ජීවිත පරිත්‍යාගයෙන් ඔවුන් අපේක්ෂා කළ සුන්දර ලෝකය මේ බිමේ බිහිකළ යුතුමයි. එසේ නොවන්නේ නම් ඔවුන්ගේ දේශපාලනය වෙනුවෙන් දිවි පිදූ වන්ගේ මෙන්ම ඔවුන් පිළිබඳ අසීමිත බලාපොරොත්තු පොදි බැඳගත් මහා ජනතාවගේ සාපයෙන් නම් ගැලවීමට නොහැකි වේවි.
❤️සැක කරන්නට තරම් දෙයක් නැහැ. ආණ්ඩු බලය ලැබිල තාම ගෙවුනෙ මාසයක් වගේ සුළු කාලයක්.මේ මාසය තුළ අවුරුදු 76 ක් තුළ සිදුවුණු වැරදි සියල්ලම නිවැරදි කරාවියැයි පරාජිත කුහක මිනිසුන් සුළු පිරිසක් බලාපොරොත්තු වූවද අවලාද නැගුවද ජනාධිපතිවරණයේ ජයග්‍රහණය වෙනුවෙන් පෙළගැහුණු සබුද්ධික පොදු මහජනතාව එහෙම බලාපොරොත්තු වෙන්නේ නැහැ. දැනටමත් ඔවුන් ජවසම්පන්න ලෙස වැඩ ආරම්භ කරල තියෙනව.රට නිවැරදි දිශාවට හැරවීමේ මහා උත්සාහයක නිරතවෙලා ඉන්නව.නියත ලෙසම ඔවුන් අපේ අපේක්ෂාවන් ඉටු කරාවි.අපි අපේක්ෂා කළ පාලනය මේ රටට උරුම කරල දේවි. ඉවසිලිවන්තව විශ්වාසයෙන් යුතුව බලාසිටිමු.කොහොම නමුත් ජනාධිපති ධුරය අත්කර දුන් පමණින් ඔවුන්ට මේ සියළු වගකීම් ඉටුකිරීමට හැකිවන්නේ නැහැ.කල් පවතින අභියෝගාත්මක තීන්දු තීරණ ගැනීමට,අනපනත් සම්මත කරගැනීමට වගේම ව්‍යවස්ථාවේ පවතින ගැටළු නිරාකරණය කර ගැනීමට පාර්ලිමේන්තුවේ බහුතර බලයද ඔවුන්ට ලබාදිය යුතුම වෙනව.ඒ වගේම කකුල් මාට්ටු දමමින් ගමන අඩාල කරනවුන් පාර්ලිමේන්තුවට නොයවා ඉන්නටත් ගමනට ශක්තියක් වන උගත් බුද්ධිමත් ගුණවත් මිනිසුන් පාර්ලිමේන්තුවට යවන්නටත් වගබලා ගන්න ඕනේ.මෙතෙක් බලාපොරොත්තු සහගතව කටයුතු කළ ආකාරයටම ඒ යුතුකමද ඉටු කිරීමට අපි එකාවන්ව පෙළ ගැහෙමු.මෙතෙක් එකතු නොවූ පිරිස් ද ඒ සඳහා එකතු කර ගනිමු.ඒ යුතුකම ඉටු නොකර ඔවුන්ගෙන් යහපත් රටක්,ජනතාවාදී පාලනයක් බලාපොරොත්තු වීම සාධාරණ නැහැ.මෙච්චර දෙයක් කරපු එකේ පාර්ලිමේන්තුවේ බලයත් අපි ඉහළින්ම ඔවුන්ට අරගෙන දෙමු.ඊට පස්සේ බලමු ඔවුන් ජනතා අපේක්ෂාවන් ඉටුකරනවද කියල. ඉතාමත් අපහසුවෙන් අත්පත් කරගත් මේ ජයග්‍රහණය ආපසු හැරවීමට පරාජිත සතුරු බලවේග මේ වනවිටත් පිඹුරුපත් සකසමින් සිටිනව.සතුරු පිලේ සියළු පාර්ශව ඒක රාශී වෙමින් සිටිනව.නැවතත් ජනතාව ඇන්දවීමට බොරු බේගල් ඇදබාමින් කිඹුල් කඳුළු හෙලමින් ඉන්නව.පාලන බලය අතට ගත් මොහොතේ සිටම ජනතාවට කිසිදු ප්‍රයෝජනයක් නැති කුණු කන්දල් අවුස්සමින් විවිධ අවලාද නගමින් ඉන්නව.ඉතින් අපිද පෙරටත් වඩා වැඩි ශක්තියකින්,ජවයකින් සහ විශ්වාසයකින් යුතුව සතුරු බල මුළු එකට තබා පරාජය කරන්නට එකාවන්ව නැඟී සිටිය යුතු වෙනව.ආණ්ඩු බලය නොමැතිව මාධ්‍ය බලය නොමැතිව මවන ලද විවිධ බිල්ලන් අභිමුව 3% ක ජනබලය 42% කට එසවූ ජනතාවකට එය අපහසු කාර්යයක් නොවනු ඇත.පාර්ලිමේන්තුවේ බලයද ලබාදුන් පසු තවදුරටත් ඔවුන්ට කියන්නට කිසිවක් නැත.සුවහසක් ජනතාවගේ අපේක්ෂාවන් ඉටුකරනු මිස.අඩියටම වැටුණු මේ රට මාසයෙන් දෙකෙන් අවුරුද්දෙන් ගොඩ ගත නොහැකි බව අපි දනිමු.ඒත් ඒ වෙනුවෙන් දරන අවංක සාධනීය උත්සාහය දෙස අපි විමසිල්ලෙන් බලා සිටිමු.
ජනතා අපේක්ෂාවන් ඉටුකර මේ පුංචි රට ලෝකයේ දිදුලන රාජ්‍යයක් බවට පත්කිරීමට ඔවුනට ශක්තිය ධෛර්යය ලැබේවායි අපි ප්‍රාර්ථනා කරමු.

ඩබ්.එම්.එස්.වීරසේකර.

❤️මගේ ජීවිත කතාව තුළ මා නොලියූ දේශපාලන කියවීම❤️

මින් පෙර මා ඉදිරිපත්කල මගේ ජීවිත කතාව ඔබ කියවන්නට ඇතැයි සිතනව.එය කියවීමෙන් වගේම math home youtube නාලිකාව හරහා math home facebook පිටුව හරහා දරුවන්ගේ ගුරුවරුන්ගේ මෙන්ම දෙමව්පියන්ගේ අධ්‍යාපන සංවර්ධනය වෙනුවෙන් මා ඉටුකළ කාර්යභාරය තුළින් තරමක් දුරට හෝ ඔබ මාව හඳුනාගෙන ඇතැයි විශ්වාස කරනව.සමාජ මාධ්‍ය තුළ මා බොහෝ දේ කතා කර ඇතත් මෙතෙක් මා කතා නොකලම මාතෘකාව තමයි දේශපාලනය. මොකද මම හොඳින්ම දන්නව මේ මාතෘකාවේදී තමන් දරන මතයට විරුද්ධ මතයක් දරන ඕනෑම කෙනෙකුට එරෙහිව අවි අමෝරන්න වැඩි පිරිසක් දෙවරක් නොසිතන බව.ඒ තරමටම අපේ ඇස් අන්ධ කරන්න මේ පාලකයින් සමත් වෙලා තියෙනව.මේ යථාර්ථය හේතුවෙනුත් දේශපාලනය නම් සුන්දර මාතෘකාව අපේ දේශපාලකයන් විසින් අසුන්දර කර තිබීම හේතුවෙනුත් මා වැන්නන් බොහොමයක් දේශපාලනය ගැන කතා නොකර ඉන්න තීරණය කිරීම පහුගිය කාලයේ දකින්නට ලැබුණු සුලභ දෙයක්.කොහොම නමුත් අද අපේ රට මුහුණපාල තියෙන මේ අඳුරු ඉරණමට අපි වැන්නන්ගේ නිහඬ බවත් හේතුවක් වූ බව පිළිගන්නට වෙනව.මොකද කියමනක් තියෙනව සමාජයක පරිහානියට වැඩියෙන්ම හේතු වෙන්නේ වැරදි කරන මිනිසුන්ගේ වැරදි ක්‍රියාවන් නොව හොඳ මිනිසුන්ගේ නිහඬ බව කියල.කොහොම නමුත් තවදුරටත් අපට නිහඬව සිටිය හැකිද කියන ප්‍රශ්නය මා හමුවේ තියෙනව.සමාජය යහපත් කරන්න තනි තනිව අපි ගොඩක් දේවල් කරල ඇති.ඒත් රටක් විදියට අපි අද කොතැනද ඉන්නෙ.මොනවද අපට ඉතිරි වෙලා තියෙන්නෙ.පොඩි හරි හැකියාවක් තියෙන අපේ දරුවෝ රට අත හැරල යන්න වෙර දරනව.ඔවුන්ට නවතින්න කියන්න අපට පුළුවන්ද?විධිමත් පාසලෙන් අතරමග හැලෙන දරුවන් නතරකර ගන්න වගේම උසස් පෙළ පන්ති කාමරය රාජ්‍ය විශ්වවිද්‍යාලය ප්‍රතික්ෂේප කරන දරුවන් නැවත ගෙන්වාගන්න වැඩපිළිවෙළක් අපට තියෙනවද?කුසගින්න නිවා ගැනීම වෙනුවෙන්ම මුදල් ඉපයීමේ කෙටි මාර්ග සොයන,වැරදි වැඩ වලට යොමු වන දරුවන්ව ඒවායින් මුදවගන්න ඔවුන්ට යහගුණ කියාදෙන්න අපට හැකියාවක් තියෙනවද?මේ හැම දෙයක්ම පිළිබඳ කලකිරීමෙන් ඉන්න අපේ ගුරුවරුන්ගෙ ප්‍රශ්න විසඳන්න වැඩපිළිවෙළක් තියෙනවද?සමස්ත රාජ්‍ය සේවයම බරපතළ බිඳ වැටීමකට ලක්වෙලයි තියෙන්නේ.ඔවුන් හැමෝමත් ඉන්නෙ කලකිරීමෙන්.ඉතින් ගුරුවරයා කලකිරුණු තැන අධ්‍යාපනය පිරිහුණු තැන රාජ්‍ය සේවය බිඳ වැටුණු තැන හොඳ රටක් ගොඩනගන්න පුළුවන්ද?ඉතින් මේ සියලු කරුමයන් අපට උරුමකර දුන්න දේශපාලකයින් ඉන්න රටක දේශපාලනය ගැන කතා නොකර වෙන මොන දේ ගැන කතා කළත් ප්‍රයෝජනයක් තියෙනවද කියන ප්‍රශ්නයත් මා හමුවේ තියෙනව.විශේෂයෙන්ම පවතින වටපිටාව තුළ අත්විඳි දුක් ගැහැට තුළ යථාර්ථවාදීව මහජනතාව ගොඩනගා ගන්නා දේශපාලන මතවාදයන් වෙනස් කිරීම සඳහා මැතිවරණයක් ආසන්නව දහසක් බොරු පොරොන්දු දෙමින් දේශපාලන බලය මැරබලය සහ මුදල් බලය උපරිමයෙන් භාවිතා කරමින් රූපවාහිනී ගුවන් විදුලි නාලිකා භාවිතා කරමින් මුකරි කථිකයන් යොදා ගනිමින් විවිධ වංගු ගහමින් අහිංසක ජනතාවගේ දේශපාලන මතවාදය වෙනස් කිරීම සඳහා දරන ලැජ්ජා සහගත උත්සාහයන් දැක්කම අප වැන්නන් නිහඬව සිටීම මොනතරම් ලොකු වැරද්දක්ද කියන පසුතැවිල්ල මා තුළ තියෙනව.ඉතින් මේ පසුතැවිල්ලෙන් නිදහස් වීම වෙනුවෙන් සහ මේ වෙලාවෙ අපි කුමක් කළ යුතු දැයි විමසන මගේ ආදරණීයයන් වෙනුවෙන් මා විශ්වාස කරන එහෙත් මෙතෙක් කල් යටපත් කරගෙන සිටි මගේ දේශපාලන මතය ගැන අද මම ඔයාලට කියනව. කැමතිනම් මා සමග එකඟ වෙන්න.මම වැරදි නම් ඒ බවත් පෙන්වා දෙන්න
...................................…..........................................
මට මතක ඇති දේශපාලනය ආරම්භ වෙන්නේ 1977 දී.ඒ වෙද්දි මට වයස අවුරුදු 7 යි.77 දී හඳුන්වා දුන් විවෘත්ත ආර්ථිකය නැමැති ගිනිදැල්ලේ ආලෝකයෙන් සහ සුන්දර පොරොන්දුවලින් ඇස් නිලංකාර වුණු සමහර ඡන්දදායකයින්ගේ ඇස් ප්‍රකෘති තත්ත්වයට පත්කරගන්න මේ වෙනතුරුත් බැරිවෙලා තියෙනව.82/83 සමය තුළ කලගෙඩි ලාම්පු සෙල්ලම් හරහා මැතිවරණ කල්දමමින් කලු ජූලි නිර්මාණය කරමින් ප්‍රජාතන්ත්‍රවාදී ලෙස දේශපාලනයේ නිරතව සිටි තරුණයන්ගේ පක්ෂය තහනම් කරමින් ඔවුන් අවි ආයුධ වෙත තල්ලු කල දේශපාලන ඉතිහාසය ගැන ඒ දවස්වල මට ලොකු වැටහීමක් තිබුණේ නැහැ.88/89 සමය තුළ සමාජය තුළ ක්‍රියාත්මක වූ දේශපාලනය දකින්න,අත්විඳින්න වගේම හඳුනාගන්න ඒ වනවිට උසස් පෙළ ශිෂ්‍යයකු ලෙස සිටි මා හට හැකි වෙනව.එදා පාලකයින් සුන්දර රටක් ගොඩනැගීමේ පිවිතුරු චේතනාවෙන් දේශපාලනයට පිවිසි තරුණයින් බලහත්කාරයෙන් අවි ආයුධ වෙතට තල්ලු කරමින් ඔවුන් කායිකව ඝාතනය කරනවටත් වඩා සාහසික ලෙස ඔවුන්ගේ දේශපාලනය සහ ආත්මය ඝාතනය කරනව.ඒ ලබපු අමිහිරි අත්දැකීමුත් එක්ක සරසවි අධ්‍යාපනය හරහා මා තුළට කා වැදුණු දේශපාලනයක් තියෙනව. සුන්දර රටක අභිමානවත් පුරවැසියෙකු ලෙස ජීවත්වීමේ සිහිනයක් එදා සිටම මා තුළ තිබුණ.ඒ වෙනුවෙන් අරගල කරන්නට බිය වුණු මම ඒ සඳහා වෙනම මාර්ගයක් තෝරා ගන්නව.මා නිරතව සිටි ගුරු වෘත්තිය හරහා හොඳ මිනිසුන් තනන්නට මම උපරිමයෙන් කැප වෙනව.පසු කාලයක math home හරහා දියත් වන්නේත් එම අභිලාෂයන්මයි. කොහොම නමුත් සුන්දර රටක් ගැනවූ පූජනීය අරමුණ ඉටුකර ගැනීම වෙනුවෙන් දේශපාලන මාවතම තෝරාගත් සමහර මිතුරන් ඒ වෙනුවෙන්ම තමන්ගේ වටිනා ජීවිතය පවා පූජා කරනව.තවත් සමහර මිතුරන් බොහෝ කැපකිරීම් කරමින් එම අරමුණේම අදටත් එල්ලිලා ඉන්නවා.මේ ගෙවුණු දීර්ඝ කාලය තුළ දේශපාලනය නැමැති කඩතුරාවෙන් ජනතාවගේ දෑස් බැඳ අන්ධයන් සේ ඔවුන්ව දක්කාගෙන යන දේශපාලකයින් ඕන තරම් දකිනව.මැතිවරණ සමයන් තුළ ලබාදෙන දහසක් පොරොන්දු ආසාවෙන් තුරුලු කරගන්නා ඡන්ද දායකයින් වගේම ජයග්‍රහණයෙන් පසු එම පොරොන්දු පයට පෑගෙන දූවිලි තරම් වත් මායිම් නොකරන දේශපාලනඥයින් ඇති තරම් දැකල තියෙනවා.
එදා පටන් ඇසූ ඡන්ද පොරොන්දු ඉටු වූවා නම් අද අපේ රට සුරපුරක්.ඡන්දයක් ළඟ තියාගෙන ලබා දෙන ඡන්ද පොරොන්දු ගැන විශ්වාසය තියල නම් කාලයක් තුළ ඔබ ගොඩනගාගත් දේශපාලන දැක්ම වෙනස් කර ගන්න එපා.ඒ තරම්ම ඒවා බොරු පොරොන්දු.බොහෝ දේශපාලනඥයින් හිතනව අපි මොන දේ කළත් අන්තිම මාස දෙක තුන තුළ මාධ්‍ය ටික අල්ලගත්තම හොඳ කථිකයන් ටිකක් ඉස්සරහට දැම්මම සල්ලි ටිකක් විසිකලාම ජනතාවගේ මතය වෙනස් කරගන්න පුළුවන් කියල.සැබැවින්ම අතීතයේදී සිදුවුණේත් ඒ දේම තමයි.ප්‍රජාතන්ත්‍රවාදය තුළ සෑම ඡන්දදායකයෙකුටම සමාන වටිනාකමක් හිමිව තිබීමේ වාසිය මේ තක්කඩි දේශපාලකයින් අපූරුවට අරගන්නව.බත් පැකට් එකට, අරක්කු වීදුරුවට,ටකරන් තහඩුවට, සිල්රෙද්දට ඡන්ද දායකයින් නම්ම ගන්න පුළුවන් කියල මෙයාල හිතනව.ඒ දේවල් වලට නැමෙන ඡන්ද දායකයිනුත් අතීතයේ නොසිටියා නොවෙයි.
කොහොම නමුත් මේ ජරාජීර්ණ දේශපාලනය වෙනස් කරන්නට ඉදිරිපත් වුණු,කැපවුණු අතනොහැර එය අල්ලගෙන සිටි මිනිසුන් නොසිටියා නොවෙයි.රටේ අවාසනාවට ඔවුන්ගේ කැපවීමට හැකියාවට මේ සමාජයෙන් නිසි වටිනාකමක් නොලැබීමයි සිදුවුණේ.හැබැයි අද තත්වය හාත්පසින්ම වෙනස්.මින් පෙර කිසිදාක නුදුටු ආකාරයට මහජනතාව ඔවුන් වටා එක්රොක් වෙමින් සිටිනව.ඔවුන්ව විශ්වාස කරමින් සිටිනව. ඔවුන් සතු පූජනීය සිතුම් පැතුම්,තරුණ ජවය,අසීමිත කැපවීම,ආදර්ශමත් දිවි පැවැත්ම සහ තාක්ෂණික හැකියාව අගය කරමින් සිටිනව.ඒ වගේම ඒ ආකර්ෂණීය නායකත්වය වෙත තරුණ පිරිස් සීඝ්‍රයෙන් ආකර්ෂණය වෙමින් පවතිනව.සියල්ලටමත් වඩා සාම්ප්‍රදායික දේශපාලනය තුළ සිරවී සිටි වැඩිහිටියන් ගේ වෙනස් වීම ඇදහිය නොහැකි තරම්.තමන් ඇදහූ දේශපාලන පක්ෂ,ලාංඡන එම පක්ෂවල වර්තමාන නායකයින් විසින්ම තමන්ගේ වාසියට කුණු කොල්ලයට විකුණමින් ඉන්නව.මෙතෙක් කල් අප ඇන්ද වූ දේශපාලන යථාර්ථය ඔවුන් විසින්ම නිරාවරණය කර දෙමින් ඉන්නව.
දේශපාලන පරිවර්තනයකට අප බිය විය යුතු නැහැ.මන්ද අපට අමුතුවෙන් නැති වන්නට දෙයක් නැහැ.සියලු දේම අලුතෙන් ගොඩනගන්නටයි තිබෙන්නේ.අලුත් පරිවර්තනයකට නායකත්වය දෙන මේ පිරිසත් අලුත්ම පිරිසක් නෙවෙයි.එදා සිටම කට්ට කාගෙන මේක අල්ලගෙන සිටි පිරිසමයි ඒ.එයාලව අවිශ්වාස කරන්න තරම් දේවල් අපට තියෙනවද?ඔවුන් උගත්,බුද්ධිමත්,තරුණ ජවයෙන් යුක්තයි.භාවිතාවෙන් මනුස්සකම නායකත්වය සහ කැපවීම උපරිමයෙන් පෙන්නල තියෙනව.නවීන තාක්ෂණයෙන් සන්නද්ධයි.හොරකම් මැරකම් කළ බවට කිසිදු සාක්ෂියක් නැහැ.මේ මහා ජන බලවේගයට නායකත්වය දෙන ඉදිරි පෙර නායකයින් සහ ප්‍රබල සාමාජිකයින් බොහෝ පිරිසක් කැලණිය සරසවිය තුළදී මටත් සමීපව ඇසුරු කරන්න ලැබෙනව.ඒ කාලයේ පටන් අද දක්වාම ඔවුන්ගේ නායකත්වය කැපවීම සහ හැකියාව පිළිබඳ මා තුළ පවතින්නේ ඉතාමත් ඉහළ ගෞරවයක්.ඉතින් මට නම් ඔවුන්ව සැක කරන්න සාධාරණ හේතු කිසිවක්ම නැහැ.ඒ වගේම අද වන විට ඔවුන් ගැන විශ්වාසය තබමින් ඔවුන් වටා රොක් වන මහා ජන ගංගාව දිහා බැලුවම අපේ විශ්වාසය තහවුරු කර ගන්න තවත් අපට පහසු වෙනවා. කොහොම නමුත් ජීවිත පරිත්‍යාගයෙන් ඔවුන් බොහෝ කැපකිරීම් කරල ජයග්‍රහණයේ මායිමට අපව ඔවුන්ගේ කර මතින්ම රැගෙනවිත් තියෙනව.ඉතින් මේ අවසන් මොහොතේ වත් අපි බිමට බැහැල ඔවුන්ටද ශක්තියක් වෙමින් අපි සැම ඔවුන් සමග අත්වැල් බැඳගෙන එක්ව ගමන් කළහොත් මේ ජයග්‍රහණය ඉතාමත් පහසු එකක් වේවි.මේ ජයග්‍රහණයේ සතුට අහිංසකව විඳගන්නට අපටද අවස්ථාවක් ලැබේවි.අපේ දරුවන් බලාපොරොත්තු සහගතව අනාගතයට මුහුණ දේවි.අපේ සහාය නොලැබුණහොත් සමහරවිට ජයග්‍රහණය පෙනෙන මානයේ සිට ඔවුන්ට පරාජය වන්නට සිදුවේවි.එහෙම වුනොත් නැවත ගොඩ ගන්නට බැරි තරම් ප්‍රපාතයකට මේ රට ඇද වැටේවි.අලුත් බලාපොරොත්තු කිසිවක් නැතිව අපේ දරුවන් මේ රට අතහැරල යාවි.මහල්ලන් සහ රෝගීන් පමණක් ඉතිරි වන මහලු මඩමක් බවට මේ රට පත් වේවි.
මේ වෙලාවේ අපි හැමෝම සියලු වාද භේද සැක සංකා පසෙකලා මේ වෙනස කරන්නට වෙර දරන ඒ ජව සම්පන්න විශ්වාසවන්ත නායකත්වයට අවස්ථාවක් දෙමු.මෑත කාලයේ හැට නම ලක්ෂයක් ඡන්දය දීල අපේක්ෂා කළ පරිවර්තනය මෙය විය හැකියි.ගෝල්ෆේස් අරගලකරුවන් ඉල්ලා සිටි පරිවර්තනය විය හැකියි.අපේ සහය උපරිමයෙන්ම ඔවුන්ට ලබා දෙමු.අපේ දරුවන්ට හිමිවන සුන්දර රටක් ගැන සිහින දකිමු.සුන්දර පොහොසත් රටක් ගොඩනගන්නට පෙළ ගැහෙන මේ මහා ජන බලවේගයේ අපිද පංගුකාරයන් වෙමු.
මේ මතවාදය සමග ඔබ එකඟවන බව මම විශ්වාස කරනව.වඩාත් වැදගත් වන්නේ ඔබේ සමීපතමයන් හට මේ මතවාදය සමීපකරවීමයි.ඒ සඳහා මේ ලිපිය උදව් කර ගත හැකි බව මම විශ්වාස කරනව.

ඩබ්ලිව්.එම්.එස්.වීරසේකර

Math Home-ගණිත නිවහන-Weerasekara Mathamatics for all students and teachers.

සා.පෙළ විභාගයට යන දරුවන්ට විභාගයට යන්න කලින් මේ වීඩියෝව බලන්න සලස්වන්න.ආත්ම විශ්වාසය ගොඩනගා ගන්න, ගණිතය දිනන මග හඳුනාගන්න, විභාගය සඳහා අවශ්‍ය පූර්ව සූදානම ඇතිකරගන්න එයාලට ඒක ලොකු උදව්වක් වේවි.මාව දකින්නත් පුළුවන්.❤️❤️❤️

ගණිතය සමඟ සා.පෙළ දිනමු | How to get 9A's | How to pass O/L | How to get maths A | math home | සිහින සැබෑකරන නිවැරදිම මගපෙන්වීම. ගණිතය සමඟ සා.පෙළ දිනමු | How to get 9A's | How to pass O/L | How to get maths A | math home |