01/04/2024
இன்று புதிதாக தெரிவுசெய்யப்பட்ட யாழ்ப்பாணம் இந்து கல்லூரி பழைய மாணவர் சங்க தலைவரின் உரை
ஓம் நமசிவாய
எல்லாம் வல்ல இறை சிவனை நினைந்து, கல்லூரி வளாகத்தில் எழுந்தருளி அருள்பாலித்துக் கொண்டிருக்கும் ஞானலிங்கேச்சரப் பெருமானையும், சிவஞான வைரவப் பெருமானையும் மனதிலிருத்தி வணங்கி எனது உரையினை தொடர்கின்றேன்.
இங்கு எமது இந்து அன்னையின் பெயரால் குழுமியிருக்கும் அதிபர் அவர்கட்கும், ஏனைய இந்துவின் மைந்தர்கள் அனைவருக்கும் எனது வணக்கங்கள்.
சைவத் தமிழ் தேசியத்தின் எழுச்சியாக, அடையாளமாக ஏறத்தாழ 135 ஆண்டு கால வரலாற்றைக் கொண்ட எமது இந்துக் கல்லூரி விவேகானந்தர் முதலான மகான்கள் கால்பதித்த பெருமை கொண்டது, அதே போல மகான்களையும், தியாகிகளையும், பெரும் வீரர்களையும், அறிஞர்களையும் ஆளுமைகளையும் பிரசவித்து இந்த மண்ணிற்கு சேவையாற்ற அனுப்பிய பெருமையையும் கொண்டது. இக்கல்லூரியில் இவ்வன்னையின் புதல்வர்களால் அன்னைக்கு நன்றிக் கடன் செலுத்த 120 வருடத்திற்கு முன்னர் உருவாக்கப்பட்டது எமது பழைய மாணவர் சங்கம். உலக ஓட்டத்தின் ஒழுங்கில் நாடு முழுவதும், சர்வதேசங்களிலும் எமது பழையமாணவர்கள் வியாபித்தமையினால் தத்தமது இடங்களில் பல பழைய மாணவர் சங்கங்களை அமைத்தனர். இதன் மூலம் எமது சங்கம் தாய்ச்சங்கமாகவும் ஏனையவை கிளைச் சங்கங்களாகவும் மிளிர்ந்தன.
கால ஓட்டங்களினாலும், புற அக சூழல்களினாலும் கல்லூரியும் சங்கமும் பல மாற்றங்களை உள்வாங்கி இன்று பயணிக்கின்றது. அந்தவகையில் எமது கல்லூரி அன்னை தமிழ் தேசத்தின் முதன்மைக் கல்லூரியாக தமிழர் தலை நிமிர் கழகமாக மிடுக்கோடு நிமிர்ந்து நிற்கின்றது. எனினும் காலத்திற்கு காலம் சைவத்தையும், தமிழையும் கலி சூழ்வதும் அதனால் எமது கல்லூரியும் பாதிப்படைவதும் அதனை இறை துணையுடனும் மனவுறுதியுடனும் எம் மண்ணின் மைந்தர்கள் எதிர்கொண்டு கடந்து பயணிப்பதும் கண்கூடு.
களத்திலே கல்லூரியுடனே இருப்பதால் எமது தாய்ச்சங்கத்திற்கு கல்லூரி அன்னைக்கு செயற்பாட்டு ரீதியாகவும், நிதி ரீதியாகவும் என அனைத்து வழிகளிலும் செயற்பட வேண்டிய பொறுப்பும் கடமையும் உள்ளது. இதனை அனைவரும் அறிவீர்கள். எமது பழையமாணவர் சங்கம் வரலாற்றில் பல சவால்களையும் நெருக்கடிகளையும் சந்தித்து அவற்றினை நேரடி நடவடிக்கைகள் மூலமும் தந்திரோபாய நடவடிக்கைகளை மேற்கொண்டும் வெற்றிகரமாக கையாண்டு தடம்மாறாமல் பயணித்து கல்லூரி அன்னைக்கு பணிபுரிந்துள்ளது. உடனடியாக அதன் செயல்கள் விமர்சிக்கப்பட்டாலும் காலம் கடந்து அதன் கனதி உணரப்பட்டுள்ளது.
அதே போல மாறிவரும் உலக ஒழுங்கு, தொழிநுட்ப மாற்றம் என்பவற்றிற்கேற்ப எனது தலைமையின் கீழும் கல்லூரி நிர்வாகத்துடன் இணைந்து தேவைப்பாடுகளுக்கேற்ப நடைமுறைச் சாத்தியமான வழிமுறைகளில் கல்லூரி அன்னையின் வளர்ச்சிக்கும், சைவத் தமிழ் வளர்ச்சிக்கும், சமூக நன்மைக்கும் எம்மாலான செயற்பாடுகளை இறை சிவனதும், எமது செயற்குழுவினரதும், பழைய மாணவர்களினதும் துணையுடன் முன்னெடுப்பேன் என்பதை இவ்விடத்தில் கூறி, இறை சிவனுக்கும், அனைவருக்கும் நன்றி கூறி அமர்கின்றேன்.
எவ்விடமேகினும் எத்துயர் நேரினும் எம்மன்னை நின்னலம் மறவோம்
தமிழரெம் வாழ்வினிற் தாயென மிளிரும் தனிப்பெருங் கலையகம் வாழ்க!
வாழ்க! வாழ்க! வாழ்க!
வணக்கம்
தலைவர்
பழைய மாணவர் சங்கம்
யாழ்ப்பாணம்
31.03.2024
