04/09/2020
பல வருடங்கள் பழமை வாய்ந்த எமது பாடசாலையானது சொந்தவிடத்தில் இயங்கிய போது சுமார்-417 மாணவர்களுடன் இயங்கி வந்தது. கடந்த கால யுத்த சூழ்நிலை காரணமாக கடந்த-1988 ஆம் ஆண்டு முதல் இந்தப் பாடசாலை அறவே இயங்காதிருந்தது.
கடந்த-2017 ஆம் ஆண்டு நவம்பர் மாதம் இந்தப் பாடசாலை முன்னர் இயங்கி வந்த வயாவிளான் உத்தரிய மாதா தேவாலயத்தை அண்டிய பகுதிகள் விடுவிக்கப்பட்டன.
எனினும்,யுத்தம் காரணமாகப் பாடசாலை கடுமையாகச் சேதமடைந்த காரணத்தால் பாடசாலையை உடனடியாகச் சொந்தவிடத்தில் மீள இயக்க முடியாத இக்கட்டான நிலையேற்பட்டது.
கடந்த-2018 ஆம் ஆண்டு ஜனவரி மாதம் உரும்பிராயில் இயங்கி வந்த ஸ்ரீவேலுப்பிள்ளை வித்தியாலயத்தின் ஒரு பகுதியில் இந்தப் பாடசாலை முதலாம் தரத்தை மட்டும் கொண்டதாக இயங்க ஆரம்பித்தது.
பின் 2018 ஆம் ஆண்டு ஒக்ரோபர் மாதம் முதல் வயாவிளான் மத்திய கல்லூரியின் ஒரு பகுதியில் இந்தப் பாடசாலை தற்காலிகமாக இயங்க ஆரம்பித்துப் பல்வேறு சிரமங்களின் மத்தியில் இயங்கி வந்தது.
இந்நிலையில் கடந்த வருடம் பாடசாலையை சொந்தவிடத்தில் மீண்டும் இயங்க வைப்பதற்கான பல்வேறு முயற்சிகள் மேற்கொள்ளப்பட்டு வந்தது. இதற்காக கல்வியமைச்சின் பல மில்லியன் ரூபா நிதி ஒதுக்கீட்டில் இந்தப் பாடசாலைக்குப் புதிய இரண்டு மாடிக் கட்டடம் நிர்மாணிக்க தீர்மாணிக்கப்பட்டது.
2019ஆம் ஆண்டு அதிபர் ந.இரவீந்திரன் தலைமையில் சொந்தவிடத்தில் இடம்பெற்ற அடிக்கல் நாட்டு நிகழ்வில் வலிகாமம் வலயக் கல்விப் பணிப்பாளர் செல்வரட்ணம் சந்திரராஜா பிரதம விருந்தினராகக் கலந்து கொண்டு சம்பிரதாயபூர்வமாக அடிக்கல் நாட்டி வைத்தார்.
வயாவிளான்-அச்சுவேலி பங்குத் தந்தை எம்.ஜெயக்குமார், அருட்தந்தை சிங்காராஜர்,தெல்லிப்பழை கோட்டக் கல்விப் பணிப்பாளர் மா.ஆனந்தகுமார், மாணவர்கள், ஆசிரியர்கள், பெற்றோர்கள்,அயற்பாடசாலை அதிபர்,ஆசிரியர்கள் எனப் பலரும் கலந்து கொண்டனர்.
பாடசாலையின் அதிபர் ந.இரவீந்திரன் இதுதொடர்பில் அன்றைய நாள் விசேடமாகக் கருத்துத் தெரிவிக்கையில்,
வயாவிளான் றோமன் கத்தோலிக்க தமிழ்க் கலவன் பாடசாலை வரலாற்றில் இந்த நாள் பொன்னெழுத்துக்களால் பொறிக்கப்பட வேண்டிய நன்னாளாகும்.
கடந்த- 1988 ஆம் ஆண்டு இராணுவ நடவடிக்கை காரணமாக இடம்பெயர்ந்த இந்தப் பாடசாலையின் கட்டடங்கள் அழிவுற்ற நிலையில் காணப்படுகிறது. இந்நிலையில் பல வருடங்களாக இயங்காத நிலையிலிருந்த இந்தப் பாடசாலை கடந்த இரண்டு வருடங்களாக பலவித கஸ்டங்களின் மத்தியில் இந்தப் பாடசாலை வயாவிளான் மத்திய கல்லூரியில் தற்காலிகமாக இயங்கி வருகிறது.
இந்தப் பாடசாலைக்கென புதிய இரண்டு மாடிக் கட்டடத்தை அமைப்பதற்காக பல மில்லியன் ரூபா நிதி ஒதுக்கப்பட்டுள்ளது என்றார்.
பின் எமது பாடசாலையானது 2020ஆம் ஆண்டு கௌரவ வடக்கு ஆளுநர் திருமதி சார்ள்ஸ் அவர்களினால் உத்தியோக பூர்வமாக சொந்த இடத்தில் திறந்து வைக்கப்பட்டது.
தற்போது எமது பாடசாலையில் கல்வி செயற்பாடுகள் சிறந்த முறையில் மேற்கொள்ளப்பட்டு வருகின்றது.
