St. Sebastian Sunday School, Enderamulla, Wattala

07/05/2026

එඬේරමුල්ල ශාන්ත සෙබස්තියන් දේවස්ථානයේ දහම් ගුරු මණ්ඩලය හා ශිෂ්‍ය නායක දෙමව්පිය සංගමය මගින් සංවිධානය කළ "සිංහල අවුරුදු ක්‍රීඩා උළෙල" හි සොඳුරු මතක කැමරා ඇසින්...

22/04/2026

එඬේරමුල්ල ශාන්ත සෙබස්තියන් දේවස්ථානයේ දහම් ගුරු මණ්ඩලය ශිෂ්‍ය නායක දෙමව්පිය සංගමය මඟින් සංවිධානය කරනු ලබන
"සිංහල අවුරුදු ක්‍රීඩා උළෙල"
මැයි මස 01 සිකුරාදා උදෑසන 8.00 සිට කානිවල් භූමියේදී පැවැත්වේ.

අප දහම් පාසල් දරුවන්ට හා අප මීසම්වාසී කතෝලික ජනතාවට මෙම අවුරුදු ක්‍රීඩා උත්සවය සඳහා ගෞරවයෙන් ඇරයුම් කරමු.

26/01/2026

26/10/2025

Scintilla 2025

31/07/2025

--- සමරිසි විවාහය, කතෝලික දහමේ ඉගැන්වීම සහ කාදිනල් තුමා ---

"පිරිමි පිරිමි දෙන්නෙක් විවාහ වෙනවා. ගැහැනු ගැහැනු දෙන්නෙක් විවාහ වෙනවා... කොහොම ද පිරිමි දෙන්නෙක් පවුලක් හදන්නේ? කොහොම ද දරුවෝ ලබන්නේ? ගැහැනු දෙන්නෙක් කොහොම ද දරුවෙක් හදන්නේ? අද මිනිස් සමාජය ගිහිල්ලා තියෙන ගමන් මාර්ගය නිසා මේ විවාහ සංස්ථාව සම්පූර්ණයෙන් ම, ඉතාමත් ම දූෂිත තත්ත්වයකට ඇද දමන ක්‍රමවේදයක් ලෝකය තුළත් අපේ රට තුළත් ඇති වෙමින් පවතිනවා."

බේරුවල, සාන්ත ආනා දේවස්ථානයේ ජූලි 26 වන දා පැවති මෙහෙයේ දී කාදිනල් හිමියන් සිය දේශනාව අතරතුර සමරිසි විවාහ සම්බන්ධයෙන් සිදු කළ ඒ ප්‍රකාශය ගැන සමාජයේ විවිධ අදහස් පල වෙනවා.

ඒ ඇතැම් විවේචන වල ඇත්තේ ඉතා දැඩි (ඇතම්විට අවිනීත) ප්‍රතිවිරෝධයක්: "එයා එනවා රට හදන්න! එයාට ඕන විදියට මේ රටේ ජනතාව ජීවත් වෙන්න ඕන ද?", "කාදිනල්ට හෝමෝෆෝබියාව", "කාදිනල් තමන්ගේ සීමාවේ දැනගෙන කතා කළොත් හොඳයි", "'කාදිනල් ලංකාවේ සමකාමී ප්‍රජාවගෙන් සමාව ගන්න ඕනේ", "ඉස්සෙල්ලා තමන්ගේ සුවාමිලා, සිස්ටර්ලව හදා ගන්නේ නැතිව උන් මඟුල් නටද්දී මෙයා එනවා අපිව හදන්න"...

බැලූ බැල්මට පෙනී යන කරුණක් තමයි, ඔවුන් කාදිනල් තුමාගේ අදහස් දැක්වීම අර්ථකථනය කරගෙන ඇත්තේ "දේශපාලන" ප්‍රකාශයක් ලෙස මිසක "ආගමික" ප්‍රකාශයක් හැටියට නොවෙයි. එතුමා මෙම ප්‍රකාශය කරන්නේ දේවස්ථානයක දේශනාවක් අතරතුර කතෝලිකයන්ට පමණක් බව හැමෝටම අමතක වී ඇති බවයි හැඟෙන්නේ. රූපවාහිනී නාලිකා වල ගිය වීඩියෝ කොටස අර ඉහත කී ආන්දෝලනයට තුඩු දුන් ප්‍රකාශයත් සමඟම අවසන් වෙනවා. නමුත් ඉන් පසුව ඒ සමඟම එම දේශනයේ එන්නේ මේ වදන් පෙළ යි:

"විවාහය කියන්නේ සක්‍රමේන්තුවක්. දෙවියන් වහන්සේ හදන දෙයක්, එය අබිරහසක්. එය දේව සැලැස්මේ කොටසක් කියලා තේරුම් ගන්නට බැරි භෞතික පැවැත්ම ගැන පමණක් හිතන ආයතනයක්, සංස්ථාවක් ලෙස සලකන නිසා මිනිස් සමාජයට අද මේ තත්ත්වය උදා වේගෙන එනවා."

ඉතින් පැහැදිලිව පෙනෙන පරිදි, ඒ මොහොතේ කාදිනල් හිමි අමතන්නේ කතෝලික බැතිමතුන් මිසක, සමස්ත ශ්‍රී ලාංකිකයන් නොවෙයි. මාධ්‍ය වල ප්‍රසිද්ධ කළ පමණින්, එය හැමටම අදාලව කියූ කරුණක් ලෙස වටහා ගැනීම කොතරම් වැරදි ද? දේශනාවක් තුළ, තමන් අදහන ධර්මයේ ඉගැන්වීම අද සමාජයට ගැලපෙන පරිදි තම ආගමිකයනට ඉදිරිපත් කිරීම ඕනෑම ආගමික පැවිද්දෙකු විසින් සිදුකරන්නක්. එතුමන්ගේ ප්‍රකාශයට ද පදනම් වන්නේ කතෝලික ධර්මයේ ඉගැන්වීමයි.

සමරිසි පුද්ගලයින් සම්බන්ධයෙන් කතෝලික සභාවේ නිල ස්ථාවරය කොටස් දෙකකින් විග්‍රහ කරන්න මම කැමතියි.
1. ධාර්මික උගැන්වීම (Doctrine)
2. ප්‍රායෝගික ප්‍රවේශය (Pastoral approach)

1. *ධාර්මික උගැන්වීම (Doctrine)*

# සමලිංගික ක්‍රියාවන් ගැන (Homosexual Acts):- සමලිංගික ක්‍රියාවන් යනු "සහජයෙන්ම ස්වාභාවික නීතියට පටහැනි" ("intrinsically contrary to the natural law.") දෙයක් බවයි කතෝලික දහමේ නිල ඉගැන්වීම. "ප්‍රජනනය" (procreation) තුළින් දෙවියන් වහන්සේගේ මැවීමේ ක්‍රියාවලිය ඉදිරියට ගෙන යන්නට උන්වහන්සේ තෝරාගනු ලැබුවේ, මිනිසාගේ පමණක් නොව සෑම ජීවියෙකුගේම, පිරිමියා සහ ගැහැණිය අතර සිදුවන (heterosexual) ක්‍රියාවලියක් මිසක සමලිංගික ක්‍රියාවලියක් නොවෙයි. එනිසා කතෝලික දහමට අනුව, මිනිසා එම දේව කැමැත්තට පිටුපා යාම, "පාපයක්" ලෙස සලකනවා. සමලිංගික විවාහයන් ද පාපයක් ලෙස සැලකීමේ පදනම එය යි. මේ ඉගැන්වීම පිළිගන්නා කතෝලික නොවන අන් කිතුනු සභාවන් පවා නිතරම භාවිතා කරන උද්‍යෝග පාඨයක් තමයි මේ - God created Adam and Eve; not Adam and Steve!

# සමලිංගික නැඹුරුව / දිශානතිය ගැන (Homosexual Inclination/Orientation):- සමලිංගික ක්‍රියාවන් පාපයක් වුවත්, යම් කෙනෙකුට සමලිංගික නැඹුරුවක් ඇත්නම්, එම නැඹුරුව කිසි ලෙසකත් පාපයක් ලෙස කතෝලික දහම අර්ථ දක්වන්නේ නැහැ. සමලිංගික ක්‍රියා වලින් වැළකී සිටින එවැන්නෙක්ව "පවුකාරයෙක්" ලෙස හංවඩු ගැහීමට කතෝලික සභාව එක හෙලාම විරුද්ධ යි.

2. *ප්‍රායෝගික ප්‍රවේශය (Pastoral approach)*
කෙසේ හෝ සමරිසි සබඳතාවන් සම්බන්ධයෙන් කිතුනුවාගේ දැක්ම සහ ප්‍රවේශය සැමවිටම ප්‍රේමයේ අත්තිවාරම මත ගොඩ නැගිය යුත්තක් බව සභාව පැහැදිලිව ප්‍රකාශ කරනවා.

# ගෞරවය සහ සංවේදීතාව:- සමරිසි පුද්ගලයන්ට පවා එකම මානව ගරුත්වයෙන් සැලකීම ගැනත්, ඔවුන් කෙරේ ප්‍රේමයේ සහ දයාවේ හස්තය දිගු කිරීම ගැනත්, ඔවුන්ට වෙනස්කම් කිරීම (discriminate) හෝ පීඩනයට ලක් කිරීම (persecute) සමාජයේ සිදු නොවිය යුත්තක් බවත් කතෝලික දහමේ උගන්වන්නේ අද ඊයෙක සිට නොවේ. කෙසේ වුවත්, ඔවුන්ට මානව ගරුත්වයෙන් සැලකීමෙන්, සමලිංගික ක්‍රියාවන් හෝ එවැනි විවාහයන් වලට එකඟ වීමක් අර්ථ ගැන්වෙන්නේ නැහැ.

# සමරිසි යුවල් ආශිර්වාදය:- 2023 දෙසැම්බර් මාසයේ දී වතිකානුවේ විශ්වාසය පිලිබඳ පර්ෂදය එළිදැක්වූ "Fiducia Supplicans" නම් නිල ප්‍රකාශනය තුළින් සමරිසි යුවල් වලට පවා "දේව ආශිර්වාදය ලබා දීමේ" හැකියාව කතෝලික පියතුමන්ලා වෙත ලබා දී තිබෙනවා. වරදවා වටහා නොගන්නා පිණිස, ඉතා පැහැදිලිව එම ප්‍රකාශනයේ දක්වන පරිදි, ඔවුන් දෙපලට එම ආශිර්වාදය ලබා දෙන්නේ ඔවුන් ද දේව දරුවන් ලෙස සලකා මිසක, ඔවුන්ගේ "විවාහක" එකමුතුවට නොවෙයි. එලෙසම එම ආශිර්වාදය, පූජනීය විවාහ චාරිත්‍රයකට සමාන නොවිය යුතු බවත් එහි පැහැදිලිව සඳහන් වෙනවා.

# සංක්‍රාන්ති ලිංගික පුද්ගලයන්ට සක්‍රමේන්තු සම්බන්ධයෙන් ඇති අයිතිය:- "සක්‍රමේන්තු" හෙවත් ප්‍රසාද නිධාන යනු කතෝලික සභාව විසින් ඇදහිලිවන්තයන්ට ලබා දෙන, දේව වරප්‍රසාදයෙන් අනූන සුවිශේෂී පිළිවෙත් සප්තකයකට යි. සංක්‍රාන්ති සමාජභාවී පුද්ගලයන්ට (Transgender Individuals) බෞතීස්මය ලබන්නටත්, ආත්මික මාපියන් (godparents) වීමටත්, විවාහයන් හි සාක්ෂිකරුවන් වීමටත් කතෝලික සභාව තුළ හැකියාව තිබෙනවා.

# සමරිසි ක්‍රියාවන් පාපයක් (sin) මිස "අපරාධයක්" (crime) නොවන බව:- අති උතුම් ෆ්‍රැන්සිස් පාප් වහන්සේ කිහිප විටකදීම සමලිංගික ක්‍රියාවන් සාපරාධීකරණයට ලක්කිරීම ප්‍රතික්ෂේප කළා. දහමට අනුව එය පාපයක් ලෙස විග්‍රහ කළත්, නීතිය ඉදිරියේ දඬුවම් දිය යුතු සාපරාධී ක්‍රියාවක් බව කතෝලික දහම කිසිවිටෙකත් උගන්වන්නේ නැහැ.

# ධර්මය තුළ සමරිසි ප්‍රජාව කැටුව ගමනක යෙදීම (accompaniment):- LGBTQ+ කතෝලික කණ්ඩායම් රාශියක් ලොව විවිධ ස්ථානයන් හි තිබෙනවා. ඔවුන් ප්‍රධාන ලෙසම කතෝලික සභාවෙන් ඉල්ලන්නේ ඔවුන්ව ප්‍රේමයෙන් වැළඳ ගන්නා ලෙසයි. අන් කවරදාටත් වඩා අද වන විට, සමලිංගික නැඹුරුවක් ඇත්තන්ව කතෝලික සභාව දෑත් දිගහැර සභාව තුළට පිළිගෙන (making them inclusive) කිතුනු ජීවිත ක්‍රමයකට ප්‍රේමයෙන් කැඳවනවා. ඒ හැර, ලිංගික අනන්‍යතාව මත ඔවුන්ව දෙවන පෙළේ කතෝලිකයන් ලෙස හංවඩු ගැසීම හෝ හුදෙකලා කිරීම සිදු කරන්නේ නැහැ.

------------------

ඉතින්, ඉහත දැක්වූයේ කතෝලික ධර්මයේ සමරිසි සබඳතා පිලිබඳ කතෝලික දහමේ එන ඉගැන්වීමේ සංක්ෂිප්තය යි.

එනම්, වෛවාහික ලිංගික ජීවිතය යනු පිරිමියා සහ ගැහැණිය වෙනුවෙන් දෙවියන් වහන්සේ විසින් දායාද කරන ලද්දක් මිසක පිරිමි යුගලයකට හෝ ගැහැණු යුගලයකට දෙන ලද්දක් නොවෙයි. එම නිසා සමලිංගික විවාහය සහ සමලිංගික ක්‍රියාවන් කතෝලික දහම දේව සැලැස්මට සහ ස්වාභාවික නීතියට විරුද්ධව කරන පාපයක් ලෙස විග්‍රහ කරනවා. නමුත් පාපය සහ පාපය සිදුකරන්නා (sin and the sinner) වෙන් වෙන්ව හඳුනාගනිමින්, සමරිසි නැඹුරුව සහිත පුද්ගලයන්ව කිසිසේත් ප්‍රතික්ෂේප නොකර, දයාවේ ගමනක ඔවුන් කැටුව යනවා. එවැනි නැඹුරුවක් තිබීම ගැන කිසි ලෙසකත් විවේචනය නොකරන අතර, එම පාපකාරී ක්‍රියාවෙන් පමණක් වැළකී සිටීමට ආරාධනා කරනවා.

එදා කාදිනල් හිමි මාධ්‍ය / කැමරා ඉදිරිපිට එතුමන් තෝරාගත් වචන සහ ඉදිරිපත් කිරීමේ හැඩය සම්බන්ධයෙන් ඇතැමෙකුට සාධාරණ විවේචනයක් තිබිය හැකියි. ඒ කෙසේ වුවත්, ඉන් ඔබ්බට ගොස්, ඒ මොහොතේ එම වදන් වලට පාදක වූ සමරිසි සබඳතා පිලිබඳ කතෝලික දහමේ ඉගැන්වීම ගැන දැනුවත් වන්නටත්, ඒ පිලිබඳ ගැඹුරු කතිකාවතක් ඇතිකර ගන්නටත්, විශේෂයෙන් කිතුනුවන් හට මෙය මහඟු අවස්ථාවක් බවයි මගේ හැඟීම.

24/07/2025

28/12/2024

වත්තල දිසා දහම් ගුරු නත්තල් එකතුව 2024 🎅🎅🎅🎄🎄🦌🦌⛄⛄⛄⛄🎁🎁🎁

25/11/2024

උපුටා ගැනීමකි...

ක්‍රිස්තියානි යැයි කියා ගන්නා, කතෝලික සභාවෙන් වෙන් වූ ඇතැම් කණ්ඩායම්වල නොමනා ක්‍රියාකලාපය හා ෆෝන් චාජ්කරන, ක්‍රිකට් මැච් දිනවන, පඳුරකට පයින් ගැසූ විට සොයාගත හැකි හතු පිපෙන්නාක් මෙන් මතුවන පාස්ටර්ලා හා දිවැසිවරුන් යැයි කියා ගන්නා අයගේ හැසිරීම කරණකොට ගෙන දිනෙන් දින සුරංගනා කතා ගොඩක එකතුවක් වෙමින් පවතින අති උත්තරීතර කිතු දහමේ නාමයෙන් මෙය ලිවීමට සිතුවෙමි.

ටිකක් දිගයි. සුපුරුදු ලෙස කැමති නම් කියවන්න..🤗

ප්‍රථමයෙන් කිව යුත්තේ කිතු දහම, කිතුනු දර්ශනය හා සාර ධර්ම පද්ධතිය (Christian philosophy and Moral Theology) නීති රීති සමුදායක් මත නොව ක්‍රිස්තු අනුගාමිකත්වය (Sequela Christi) මත රඳා පවතින බවයි. එනම් කිතු දහම යනු ක්‍රිස්තුන් වහන්සේ ම වන බවයි. (Christianity is Christ himself) මෙයට හේතුව දාර්ශනික ව ගත් කල අතිශයින් ගැඹුරු ය. කිතු දහමේ මූලික සත්‍යයක් වන මාංශගත වීමේ අභිරහස (The Mistery of Incarnation) මේ හා තඳින් සබැඳි ය. ලොව පවතින සියලු ආගම්වල ශාස්තෲවරු ලෝක සත්ත්වයාගේ යහපත වෙනුවෙන් ඔවුන් අවබෝධ කළ විශ්වයේ සත්‍යය මනුෂ්‍යයාට දේශනා කළ හ. ඔවුන් අවබෝධ කළ දහම හා එම දහම දේශනා කිරීම අතර ඇති මහා පවුරක් සියලු ශාස්තෲවරු දුටහ. එනම් එම දහම දේශනා කිරීමට සිදුවන සීමා සහිත, කාලික හා අසංතතික ව්‍යවහරයේ පැවති භාෂාව සහ සංස්කෘතික දැනුම් පද්ධතිය ය (cultural knowledge). මන්දයත්, විශ්වයේ සත්‍යය නම් අති විශාල අකාලික ප්‍රඥාව, සීමා සහිත භාෂාවකට පරිවර්ථනය කිරීමේ දී එය අසන්නාට එහි අවබෝධයේ හිඩැස් ඇති විය හැකි නිසා ය. වෙනත් වචනවලින් කිවහොත් ශාස්තෲවරයාගේ අවබෝධය හා අසන්නාගේ අවබෝධය අතර හිඩැසක් ඇතිවිය හැකි වීමයි. එම හිඩැසට හේතුව එය "දෙසන්නට සිදුවන" භාෂාවේ සීමාන්තික බවයි. අප මහා ගෞතම බුදු රජාණන් වහන්සේ ද මෙම හිඩැස දැක තමා අවබෝධ කළ දහම දේශනා කිරීමට ආරම්භයේ දී මැළිකමක් දැක් වූ බව ආයාචන සූත්‍රයේ සඳහන් වේ (He was inclined not to preach). නිසැකම කිව යුත්තේ මෙම මැළිකම ආත්මාර්ථකාමී සිතුවිල්ලක් නම් නොවේ.

කිතුනු දර්ශනයට අනුව මේ විශ්වය නිර්මාණයට මූලික වූ මහා ප්‍රඥාව, ග්‍රීක භාෂාවට අනුව logos, වෙන කිසිවක් නොව ශුද්ධ වූ ත්‍රිත්වයේ දෙ වන තෙම වන ක්‍රිස්තුන් වහන්සේ ම ය. ජොහාන්තුමන්ගේ සුවිශේෂයේ ආරම්භයේ දී සඳහන් වන අන්දමට, මාංසගත වූයේ මෙකී logos ය. ශුද්ධ වූ පාවුලුතුමා කොලෙස්සිවරුන්ට යැවූ ලිපියේ 1:16හි මෙය ඉතා ගැඹුරින් විග්‍රහ කරයි: "සියලු දේ උන් වහන්සේ කරණකොටගෙන ද උන් වහන්සේ උදෙසා ද මවා තිබේ". එනම් එම මෙම විශ්වය මවා මවා වදාළ මහා ප්‍රඥාව, කිතුනු ව්‍යවහරයට අනුව "ධර්මයාණෝ" ම, ලෝක සත්ත්වයාගේ ගැලවීම පිණිස මිනිස්බව ගත් සේක. එනම් විශ්ව සත්‍යය හා මිනිස් අවබෝධය අතර තිබූ, මා කලින් සඳහන් කළ මහා පවුර, ශුද්ධ වූ ත්‍රිත්වයේ දෙවන තෙම වන ක්‍රිස්තුන් වහන්සේ, සිය මාංසගත වීම කරණකොට ගෙන බිඳ දැමූ සේක. මෙය දාර්ශනික ව ගත් කල මහා ගැඹුරු ය. මෙම මහා "අභිරහස්මය" සත්‍යයට (අභිරහස්මය යැයි මා සඳහන් කරන්නේ මෙය මිනිස් මනසට තේරුම්ගෙන අවසාන කොට නොහැකි නිසා ය) අනුව ධර්මය හා ක්‍රිස්තුන් වහන්සේ අතර වෙනසක් නැත. එහෙයින් කිතු දහම "යමක් පිළිපැදීමකට" වඩා "යමෙක් අනුගමනය" කිරීමකි. එහෙයින් කිතු දහමේ සඳහන් "ගැලවීම" ක්‍රිකට් මැච් දිනවන, ෆෝන් චාර්ජ් කරන සිල්ලර සංකල්පයක් නො වේ. එය දේව ප්‍රේමයේ අග්‍ර ඵලයයි. මන්දයත් ස්වකීය ප්‍රේමය කරණකොට මනුබව ගත් දෙවියන් වහන්සේ, සිය දුක් විඳීම, මරණය හා උත්ථානයේ අනුහසින් ලෝකයේ පාපී ස්වභාවයට (Ton hamartheon tou Kosmou in greek) සිය රුධිරයෙන් වන්දි ගෙවූ සේක. මෙම මහා ගැලවීමේ කර්ත්‍යවය අවසානයේ "සියල්ල සම්පූර්ණ ය"යි පවසමින් ක්‍රිස්තුන් වහන්සේ සිය ප්‍රාණය පියාණන් වහන්සේට බාර කළ සේක. මතෙව්තුමාගේ සුවිශේෂයට අනුව ඒ මොහොතේ "දේව මාලිගාවේ තිරය ඉහළ පටන් පහළ දක්වා දෙකඩ ව ඉරුණේ ය" (මතෙව් 27:51). මෙම සිදුවීම සංකේතාත්මක ව මිනිසාගේ පාපි ස්වභාවය හා දේවත්වය අතර මෙතෙක් තිබූ මා කලින් සඳහන් කළ මහා අනවබෝධයේ පවුර බිඳ දැමීම කි. එම සිදුවීම, දේව ප්‍රේමය කිසිවකට ලඝු කළ නො හැකි බවටත්, තාප්ප හෝ වැටවල් හෝ කර්ටන් දමා හෝ වෙන් කළ නොහැකි බවටත් සංකේතයක් විය. මෙසේ අභෞතික ව වැඩ සිටි දෙවියන් වහන්සේ මිනිසාට පෙනෙන, දැනෙන හා ඇසෙන ලෙස "භෞතික" වූ සේක. අවසානයේ මිනිසාගේ රසේන්ද්‍රය ද පෝෂණය කොට පංචේන්ද්‍රයට ම ගෝචර වනු වස් දිව්‍ය සත්ප්‍රසාද වහන්සේ තුළ තමාවම අඹරා කැවූ සේක. දෙවියන් වහන්සේ ක්‍රිස්තුන් වහන්සේ තුළ කිසිත් නොසඟවා අනාවරණය වූ සේක (මෙයින් දෙවියන් වහන්සේ ස්වකීය අභිරහස්මය ස්වභාවයට හානි කර නොගනී). මෙසේ ක්‍රිස්තුන් වහන්සේ ස්වකීය මාංසගත වීමේ හා පාස්කු අභිරහස කරණකොට ගෙන ධර්මය හා පුද්ගලයා අතර ඇති හිඩැස වසා දැමූ සේක. මෙය මිනිස් ඉතිහාසය සසල කළ සිදුවීමකි.

එහෙයින් යමෙක් මේ මහා ගැලවීමේ අභිරහස සිල්ලර කරන්නේ නම් එය මහා බොරුවකට මුල පිරීම කි. පුදුමයට කරුණ නම් අනාගතයේ දී මේ මහා ප්‍රේමය සිල්ලර කරන, උන් වහන්සේගේ නාමයෙන් මිනිසුන්ගේ දුක විකුණාගෙන කන බොරුකාරයන් මේ මහ පොළොවේ ම පහළ වන බව උන් වහන්සේ ම දේශනා කිරීම යි: "බොරු දිවැසිවරයන්ගෙන් පරෙස්සම් වන්න. පිටතින් බැටළු වෙස් ගෙන පැමිණියත්, ඔව්හු ඇතුළතින් රෞද්‍ර වෘකයෝ ය." (මතෙව් 7:15). තවදුරටත් වදාරමින්, ''ඔබ කිසිවෙකු අතින් මුළා නොවන හැටියට බලාගන්න. මන්ද, බොහෝ දෙනෙක්, 'මම ක්‍රිස්තුස් වෙමි' කියමින් මාගේ නාමයෙන් ඉදිරිපත් වී බොහෝ දෙනෙකු මුළා කරති" (මතෙව් 24:5-6).

ප්‍රාතිහාර්‍යයන් ගැන කිතුනු ඉගැන්වීම සාහසික ලෙස පටලවා ගන්නා මෙවැනි බොරු "දිවැසිවරු" එය තමාගේ පසුම්බිය සරි කරගැනීමේ මාර්ගයක් කොට යොදාගනිති. ක්‍රිස්තුන් වහන්සේගේ මහා පෞර්ෂ්‍යය ස්වකීය සෑම ප්‍රාතිහාර්‍යයකින් ම අනතුරු ව වදාළ යමක් ගැන වෙනදාට වඩා අද මෙනෙහි කළ යුතු ව ඇත. එය මිනිසාට මහා අභියෝගයකි:
"ඒ බව කිසිවෙකුට නොකියන්න උන් වහන්සේ ඔවුන්ට අණ දුන් සේක" (මාක් 7:39). මෙයින් පැහැදිලි වන්නේ උන්වහන්සේ ස්වකීය ප්‍රාතිහාර්‍ය, අනුගාමිකයන් ගණන වැඩි කරගැනීම සඳහා හෝ සිය දහම පතළ කිරීම සඳහා හෝ මාධ්‍යයක් වශයෙන් භාවිතා නොකළ බවයි. කිතුනු ඉගැන්වීමේ කේන්ද්‍රයේ පවතින්නේ එකම එක නොවෙනස් වන සදාකාලික ප්‍රාතිහාර්‍යයකි. එනම් ආදරය කරණකොට ගෙන සුදු පූපයක් තුළ උන් වහන්සේව ම අපට කන්න දෙන්නට සැරසෙන ක්‍රිස්තුන් වහන්සේ ය. මන්දයත් මිනිස් රසේන්ද්‍රය පිනවීමට මෙලොව සියල්ලට නුපුලුවන. (නිදසුනක් වශයෙන් තණකොළවලට රසක් තිබුණ ද එයට මිනිස් රසේන්ද්‍රය පෝෂණය කොට ජීර්ණය වීමට නොහැක). එනමුදු ක්‍රිස්තුන් වහන්සේ අවසාන කොට තමන් වහන්සේගේ ප්‍රේමයේ නාමයෙන් එය ද කළ සේක. ඉතින් උන් වහන්සේට තව කුමක් කරන්නට ඉතිරි ව ඇත් ද? පුදුමයට කරුණ නම්, අනෙකුත් සියලුම ප්‍රාතිහාර්‍යයවලට හුරේ දැමූවන්ගේ ප්‍රතිචාරය උන් වහන්සේ මෙම ප්‍රේමයේ ප්‍රාතිහාර්‍යය දේශනා කිරීමේ දී නොතිබීම ය. සුබ අස්න ම එයට කදිමට සාක්ෂි දරයි: "එවිට ජුදෙව්වරු ඔවුනොවුන් අතර විවාද කරමින්, 'මේ මිනිසා, ඔහුගේ මාංසය අනුභව කරන පිණිස අපට දෙන්නේ කෙසේ ද...මෙය දරාගන්නට බැරි කීමකි, එතුමාණන්ට සවන් දී සිටිය හැක්කේ කාට ද?'...මේ නිසා එවක් පටන් උන් වහන්සේගේ ශ්‍රාවකයන්ගෙන් බොහෝ දෙනෙක් පසුබට වී, තවත් උන් වහන්සේ අනුව නොගියහ" (ජොහාන් 6 : 52, 60, 66). අද ද අවාසනාවට සිදු වන්නේ මෙය ම නො වේ ද? මෙම ප්‍රාතිහාර්‍යය ජීවමාන ව සිදුවන දිව්‍ය පූජාව පසෙකලා, උන් වහන්සේ, කීමට පවා තහනම් කළ ප්‍රාතිහාර්‍ය අද ප්‍රසිද්ධියේ සිදු කරන පාස්ටර්ලාගේ සුව මෙහෙයයන් වෙත ඇදීයාම විහිළුවක් නොවේ ද? එය කිතු දහමේ හරය වන ප්‍රේමයේ විකෘති පිළිබිඹුවකි.

මේ සියල්ල තුළ, මිනිසාගේ ම නිදහස පිණිස පහළ වූ ආගම් හා ධර්මයන් මිනිසාට ම මහා බරක් වී ඇත. බොහෝ අය නිරාගමික වීමේ ප්‍රවරණතාවයට හේතුව වන්නේ බොහෝ විට මෙම ආගම් තමන් සතුකරගැනීමේ කූට ව්‍යාපාරිකයන් මිනිසාගේ දුක විකුණා කන ක්‍රියාකලාපය ය. ක්‍රිස්තුන් වහන්සේ හෝ මොනයම් ශාස්තෘවරෙයකු ලොවට සත්‍යය වූ ධර්මය දෙසන්නේ මිනිසාගේ සුගතිය සඳහා ම ය. මෙහි දී අති නිර්මල බුදු දහම හා අනෙකුත් සියලු ම "ප්‍රේමය මූලික කරගත් ධර්මයන්" සඳහන් කිරීමට කැමැත්තෙමි. යමෙක් සිය ධර්මයට ගරු කරන්නේ යැයි පවසමින් අනෙකුත් ධර්මයන් විවේචනය කරන්නේ නම් එය ධාර්මික ව උඩබලා කෙළ ගසා ගැනීමකි. එහෙයින් "ආගම් යුද්ධ" මහා විහිළුවකි.

දැන්වත් මේ විහිළුවට සංවේදී වී නවතා දමමු. ආගම අබිං වීමට ඉඩ නොදෙමු (කාල් මාක්ස්) බොරු දිවැසිවරුන්ගෙන් ප්‍රවේසම් වෙමු. සියලු ධර්මයන්හි ඒවාට ආවේණික මධ්‍යම ප්‍රතිපදාවක් ඇත. ක්‍රිස්තුන් වහන්සේ සියලු ආගම් භක්තික (pietism) ප්‍රේමයට පටහැනි අන්තවාද ප්‍රතික්ෂේප කළ සේක. ප්‍රේමය ම පමණක් උන් වහන්සේගේ ධර්මය වන සේක. මන්දයත් දෙවියන් වහන්සේ ප්‍රේමය වන සේක (1 ජුවාම් 4:8). ප්‍රේමය නිසා උන්වහන්සේ වැඩිය සේක; ප්‍රේමය නිසා උන් වහන්සේ මළ සේක; ප්‍රේමය නිසා උන්වහන්සේ අදටත් ජීවත් වන සේක. එහෙයින් යමෙක් ප්‍රේමයෙන් හා ආදරයෙන් (agape in greek) තොර දහමක් සිය පෞද්ගලික අභිලාෂන් අරඹයා තනන්නේ නම් එය බොරුවකි; බොරු ගොඩක එකතුවකි.

මේ ගැන තව ලිවිය හැක. නමුත් මෙතැනින් නවතිමි. ඉතින් මෙම ගැඹුරු දහම අවබෝධ කරගෙන ළඟ එන ප්‍රේමයේ මංගල්‍යය වන නත්තල වෙනුවෙන් අධ්‍යාත්මික ව සූදානම් වෙමු.
ඔබට ජේසු පිහිටයි.❤️

දේශාන් ද අල්මේදා

(ප.ලි: ආගම් අන්තවාදය හා මත් ද්‍රව්‍යය අතර වැඩි වෙනසක් නැත.).

17/10/2024

ළමා දිනය Funfair කානිවල් අවස්ථාවේ සෑමරූ ආකාරය...

07/10/2024

ඉපදුණු දවසෙම අම්මා
මගේ පුංචි දෙතොලට තියලා
ආයේ කොට්ටේ යටින් තිබ්බ
ආදරණිය කොන්තය..

නොදන්නවා වුනත් හිමිට
කොට්ටේ යටින් අත දාලා අරන්
කටේ දාගෙන මුලින්ම සෙල්ලම්
කරපු කොන්තේ....

පවූලේ අය එක්ක වාඩිවෙලා
කෑ ගසමින් මුලින්ම තරගෙට කිව්ව
කොන්තේ,
කාලයත් එක්කම ජිවිතේ කොටසක් වෙලා...
ජේසු අම්මගේ උණුසුමට මාව ලං කරපු කොන්තේ..

කිසිදෙයක් කරකියා ගන්න නැතුව
අඩනකොට බලාපොරොත්තු
ජීවිතේට එකතු කරපු මගේ ආදරය කොන්තේ..
කදුළු බිදුණු ඇති කොනතේ ඇට ගානටත් වැඩියෙන් අමාරුවෙන් ජීවිතේ ගෙවනු දිනවල..
යන එන හැම ගමනේ මගේ තනියට
ජේසු අම්මා එක්ක මා ගෙන ගිය මගේ කොන්තේ...
හැමදාම ජේසුටම මාව ලං කර මගේ හිතමිතුරු කොන්තේ...

අදත් මරණයේ ගනදුර මැදින් යනකොට
මාත් එකම යන්න එනවද
ජේසු අම්මගේ මගේ අත්වැල
මගේ ආදරය කොන්තේ♥️

📸✍️-A.R.Perera

30/09/2024

ලෝක ළමා දිනය අපිත් එක්ක සමරන්න... ඔක්තෝබර් මස 05 වන දින සවස 04ට සා.සෙබස්තියන් දේවස්ථානයේ කානිවල් භූමියට ඔබත් එන්න... *ඇතුල්වීම සම්පූර්ණයෙන්ම නොමිලේ* ...