ලොකු teacher ගෙ පිටුව

මැතිවරණ සාරිය.

මැතිවරණ රාජකාරී සඳහා සහභාගී වන කාන්තාවන්ට සාරිය අනිවාර්යයි කියලා චක්‍රලේඛයක් තියෙනවද කියන්න මං දන්නෙ නෑ. එහෙම එකක් තිබුනත් ඒක හදපු එකා ඒක හැදුවෙ මොන මගුලකටද කියලා අහන්න හයවෙනිදා ඡන්ද වැඩ වලට සහභාගී වෙච්ච වෙලාවේ නම් මට හිතුණා.

උදේ හතරට යාර හය පටලවාගෙන රෑ එකොළහ වෙනකම් ඔය මල හත්තිලව්ව පෙරවාගෙන ඉඳලා ඊයේ නම් මගේ හොඳ පණ ගියා. ඇත්තටම කියනවනම් සමහරු ඕක ඇඳගන්න ඇත්තේ ඊටත් කලින්. කට්ටිය නම් හිතාගෙන ඇති ඔය යාර හය පෙරවාගෙන පුටුවක වාඩිවෙලා ඉන්න එක මහ ලොකු දෙයක්ද කියලා. ඒත් අපේ වගේ රටක තියෙන උෂ්ණාධික දේශගුණේ නිසා මේක පෙරවගෙන පුටුවක වාඩිවෙලා ඉන්න එකත් මල වදයක් තමයි.

උඩින් යාර හයක් පටලවගෙන යටින් තව ඇඳුම් දෙක තුනක් ඇඳගෙන පැය හත අටක් ඉන්නවා කියන එක ඇත්තටම ගෑනියෙකුට දඬුවමක් වගේ. තව දෙයක් මේ වෙද්දි ජ්‍යෙෂ්ඨ ඡන්ද ස්ථානාධිපති විදියට කාන්තාවොත් වැඩ කරනවා. දන්න විදියට නම් ඒ අය ඡන්ද මධ්‍යස්ථානයේ නවතින්න ඕනෑ. සමහරවිට සුදුසු නවාතැනක් පිළියෙල කරලා දෙනවත් ඇති. නමුත් මං හිතන්නෙ නෑ උදේ පාන්දරකට හරි හමන් විදියට සාරියක් ඇඳගන්න ඒ තැන්වල පහසුකම් තියේවිය කියලා.

ඊළඟට ඡන්ද ගණන් කරන එක රෑ තිස්සේ ඔය යාර හයත් එක්ක දාඩියෙන් තැම්බි තැම්බි නිදිමරන එක සෙල්ලමක් කියලා කට්ටිය හිතනවා ඇති.

ඊයේ මම ගෙදර එද්දි රෑ එකොළහයි. එච්චර වෙලා ඡන්ද ගණන් කෙරුවද කියලා අහන්න නම් එපා. ඒත් මට එන්න බස් තිබුණේ නෑ. හන්දියෙන් බහිද්දී සාරිය බාගෙට ගැලවිලා. කොණ්ඩ ගෙඩිය ලෙහිලා කොණ්ඩ කැරැල්ලක් මූනටත්ත් වැටිලා. .මං හිටියේ හොඳටම හෙම්බත් වෙලා. .බස් එකෙන් බැහැලා කිලෝ මීටර් භාගයක් විතර මට පයින් යන්න ඕනේ.මම මහත්තයට මගට එන්න කිව්වා. ඒ මං තනියම යන්න බය නිසා නෙවෙයි. ඒ කළුවරේ මාව දැකලා කවුරුහරි මෝහිනියි කියලා බය වුණොත් කියන බයට

ඇත්තටම මේ වගේ රාජකාරියකට සාරිය ඇරෙන්න කාන්තාවන්ට සුදුසු ඇඳුමක් ඇත්තෙම නැද්ද. ඇයි බැරි මැතිවරණ රාජකාරියටත් සුදු ටී ෂර්ට් එකයි කලිසමයි නිල හැදුනුම්පතකුයි ලබා දෙන්න බැරි. ඒක කොච්චර පහසුද. හැදුනුම්පත ටිකක් ලොකුවට හදලා බෙල්ලෙ එල්ල ගත්තහම මිනිස්සු දන්නවනේ මේ ඉන්නේ මැතිවරණ රාජකාරී කරන පිරිසය කියලා. එහෙම නැත්නම් දැන් ඕනෙම ආයතනයක තියෙනවා ආයතනය නියෝජනය කරන ටී ෂර්ට් එකක්. මේ වෙද්දි ඒක පාසැල් වලත් තියෙනවා. ඉතින් සුදු ටී ෂර්ට් බැරි නම් ආයතනයේ ටී ෂර්ට් එකෙන් හරි එන්න අවසර දෙන්න පුළුවන්නේ. ඒ ඇඳුමට චන්ද රාජකාරි හැඳුනුම්පත භාවිත කරන්න පුළුවන්. රජයට වුණත් ඔය නිල හැදුනුම්පත් ටික කාලයක් භාවිත කරන්න පුළුවන් ආකාරයට හදාගන්න මහ ලොකු වියදමක් යන්නේ නෑනේ.

මෙව්වා වෙනස් වෙන්න ඕනෑ දේවල්. රාජකාරිය මනින්නේ ඇඳුමෙන් කියන හනමිටි අදහස දැන් වෙනස් කරන්න කාලෙ ඇවිත්. සාරිය ඔසරිය කියන්නේ අපේ ජාතික ඇඳුම. ඒක රාජකාරියත් එක්ක පටලවා ගන්නේ නැතුව ඔය ඇඳුම අඳින්න ඕනෑ තැන් පැහැදිලිව තීරණය කරගත්තා නම් හොඳ නැද්ද. රටේ ජාතික ඇඳුම රාජකාරිය සඳහා පටලවා ගන්නා මේ මානසිකත්වය වෙනස් වෙන්න ඕනේ.

දැන් ඉතින් සාරි අඳින මහත්තුරුයි රස්සාවකට නොයා සාරිය පෙරවාගෙන ගෙදරට වෙලා බුදියගෙන ඉන්න නෝනා මහත්වරුයි. මේක දැකලා වැලලෙන්න ගනී. හැබැයි ඊයෙනම් මට මේ සාරිය මොන සාපයක්ද මොන කරුමයක්ද මොන මගුලක්ද කියලා දැනුනා

සමහර විට රජයේ සේවකයෙක් විදියට මේ මං සහභාගී වුණ අවසාන මැතිවරණ රාජකාරිය වෙන්න පුළුවන්. ඒත් මේ සාරි මගුලෙන් මිදිලා කාන්තාවන්ට නිලධාරීන් විදියට බොහොම සැහැල්ලුවෙන් රාජකාරියට යන්න හැකි වෙනවා නම් එදාට විශ්‍රාමිකයෙක් විදියට මටත් සතුටු වෙන්න පුළුවන්

ලොකු teacher

මේ දවස්වල සාරිය ගැන නිතරම මතක් වෙන නිසා නින්ද යන්නේද නැත. ඒ නිසා පාන්දර දෙකහමාරේ සිට නැගිටගෙන සාරිය ගැන ලියමි. මේ සාරිය ගැන ඔබ දැනගත යුතු මිත්‍යා මත කිහිපයකි

1. ගුරුවරිය පිළිබඳ සංකල්පය සාරිය සමඟ බද්ධ වී ඇත
මෙය කිසිසේත්ම විය නොහැකිය මේ සම්බන්ධයෙන් හොඳ උදාහරණ කිහිපයක් හෝඩි පොතෙන් මතු කරගත හැක. .හෝඩි පොතේ ආච්චී යනුවෙන් දක්වා ඇති රූපය බලන්න. රෙද්ද හැට්ටේ ඇඳ කොණ්ඩය පුළුන් කුල්ලක් මෙන් වූ හොකු බැහැපු ආච්චිලා අද ලොවෙත් නැත
අද සිටින්නේ කලිසම් අඳින කොණ්ඩය ඩයි කරන රූපලාවණ්‍ය භාවිතා කරන ජීම් යන ආච්චි වර්ෂන් එකකි. ඒත් දරුවාට ආච්චි යනු ආච්චිමය. කලිසම් ආච්චිවත් දරුවා ආදරයෙන් තුරුල් කර කර ගනී

එම හෝඩි පොතේම අම්මා යනු කොණ්ඩය බැඳ සාරියක් ඇඳ දරුවා වඩාගෙන ඉන්නා කාන්තාවකි. ඒත් එවැනි අම්මලා දරුවන්ට සිටින්නේ නම්, ඒ ඔය සාරිය ඇඳගෙන වැඩට යෑම අනිවාර්ය වී ඇති කාන්තාවන්ගේ දරුවන්ට පමණි. බොහොමයක් දරුවන්ගේ අම්මලා ගෙදරට ගහගෙන ඉන්නේ ජංගි කොටයකි. හේතුව ගෙදරක කළ යුතු කුදු මහත් කටයුතු කිරීමට එය පහසු ඇඳුමක් නිසාය. ඒත් ජංගි කොටයක් ඇන්දත් දරුවාට අම්මා නම් ආදරණීය අම්මාමය. ඒ නිසා සාරිය නොඇන්දා කියා දරුවාගේ හදවතේ ගුරුවරිය කෙරේ උපන් ආදර ගෞරවය අඩු වන්නේ නැත.

2. සාරියට වඩා පහසු ඇඳුමක් ලෙස ගුරුවරියන් බිකිණිය හෝ නයිට්ටිය තෝරාගත හැක

ගුරු වෘත්තියට පැමිණ ඇත්තේ ස්පාවල වැඩ කරමින් සිටි අය නොවේ. තමාට ගැලපෙන සුදුසු ඇඳුම තෝරා ගැනීමට බුද්ධිමත් භාවයක් ඔවුනට ඉතාමත් හොඳින් පවතී. සාරි හැඳි ගුරුවරියක් පාසලට බිකිනියකින් හෝ නයිටියකින් සැරසී ඒයැයි කවුරුන් හෝ සිතන්නේ නම් එක්කෝ ඔහු උන්මත්තකයෙකි එහෙම නැතිනම් පට්ට කුහකයෙකි.

3. මිහිකත නලවාලා යාමට යාර හයක් අවශ්‍යම වේ

අතීතයේ නම් ඔය කියන ආකාරයට නලව නළවා යාමට ගුරුවරියන්ට හැකියාවක් තිබෙන්නට ඇත. හේතුව පත්වීම ගේ ළඟ පාසලකටය. දුෂ්කර සේවානැත .ගුරු භූමිකාවේ කාර්යභාරය සරලය. නමුත් අද වනවිට ගුරු භූමිකාව ඉතාම සංකීර්ණ තත්ත්වයකට පත්වී ඇත.අනෙක් කරුණ කිලෝමීටර පනහක් හැටක් කට කැපූ සෙනග සිටින බසයකින් යාමට ගුරුවරියට සිදුවී ඇත. එම නිසා ඔය යාර හය බාගයක් ඇගේ ඔතාගෙන බාගයක් අතේ අරගෙන නලවන්නට ගියොත් ගුරුවරියට කෙලවෙයි.

4. කුලකාන්තාවන්ට සුදුසුම ඇඳුම සාරිය හෝ ඔසරිය වේ.
හැබෑය. ඉස්සර නම් කුලක කාන්තාවන් ගෙදරටත් ඇන්දේ සාරිය හා ඔසරියයි. එවැනි කුලකතුන්ට අතට පයට වැඩ කර දීමට පිරිස සිට ඇත. ඒත් අද කාන්තාව ජීවන සටනට බැස ඇති බැවින් කුලකාන්තාව භූමිකාව වෙනස් වී ඇත. එම නිසා දැන් ඇයට අවශ්‍ය තම කාර්යභාරය පහසු කරවන සුදුසු ඇඳුමකි.

5. සාරිය ඇඳගෙන කරන්නට බැරි දෙයක් නැත.

තැනක වේගයෙන් නටන ගුරුතුමියකි. තව තැනක උඩ පැන වොලිබෝල් ක්‍රීඩාවේ ඩෑෂ් පහරවල් ගසන ගුරුවරියකි. තවත් තැනක පොඩි උන් සමග ලිස්සන බෝට්ටු පදින ගුරුවරියකි. මේ සියලු දෙනාම සැරසී සිටින්නේ සාරි සහ ඔසරි වලිනි. මෙවැනි වීඩියෝ පෙන්වීම තුළින් අදහස් කරන්නේ මේ ඕනෑම කාර්යයක් මේ රෙද්ද සමඟ කළ හැකි යන මොට්ට මෝල් අදහසයි. නමුත් නිකමටවත් මේ වීඩියෝ පටවලට පෙනී සිටි ගුරුවරියන්ගෙන් ඇසුවොත් මේ රෙද්ද නැතුව වෙනත් සුදුසු පහසු ඇඳුමක් තිබුණා නම් මට කොච්චර දෙයක් කරන්න පුළුවන්දැයි කියනු ඇත

සාරිය ඇඳගෙන රිලේ දුවන ගුරුවරියන්ගේ වීඩියෝවක් මෑතකදී මුහුණු පොතේ සංසරණය විය මෙහිදී එම ක්‍රියාව අගය කරමින් සුන්දර මතකයන් යැයි කියූ අයද සිටිනවා දැක්කෙමි. එහෙත් ගුරුවරියන් රෙද්ද කරට ගෙන කලවා පෙන්වමින් දිවීම තරම් අශෝභන දර්ශනයක් තවත් නැත.කවුරුන් හෝ මෙයට හුරේ දමමින් ලස්සන යැයි කියනවා නම් ඒ තැනැත්තාට ඇත්තේ විකෘති ලිංගික ආශාවක් විය හැක.

6 ගුරු වෘත්තීයේ ගෞරවය පවතින්නේ යාර හයේ ඒතීගෙනය

අප මේ වන විට ගනුදෙනු කරන්නේ ඇල්ෆා ජෙනරේසමේ දරුවන් සමගය. ඔවුනට අවශ්‍ය වන්නේ අදාළ කාර්යය නියමාකාරයෙන් ඉටුකරන ගුරුවරයෙකු මිස ඔහුගේ ඇඳුම නොවේ. ඔවුන් ගෞරව කරන්නේ ගුරුවරයෙකුගේ ආදරය හා මග පෙන්වීම නිසි ලෙස ලබා දෙන පුද්ගලයාට මිස ඇඳුමකට නොවේ. ගුරුවරියක් උනේ සාරියට තියෙන ආසාවෙන් කියන බොළඳ තර්කය තවදුරටත් මේ දරුවන් විෂයෙහි වලංගු නැත. ඒ නිසා ඇය පාට පාට මල් වැටිච්ච සාරි අඳිනවා...... යන ලදරු කල්පනාවෙන් මිදෙන්න. අපෙ ගුරුතුමා යැයි තාමත් ඉස්කෝලේ ...
.ගුරුසඳ ........යන සම්භාව්‍ය ගණයේ ගීතවල කිසිදු තැනක ගුරුවරයාගේ ඇඳුම ගැන කතා කර නැත. එහිදී මතුකර දක්වන්නේ ඔහුගේ කාර්යභාරයයි.

නෙත් අඳ වීලයි ඔබවිත ආවේ ඔබයි එළියදුන්නේ

මේ ගුරුවරයා ගැන කියන ගීතයක මගේ හිත තදින් පැහැර ගත වැකියකි. එසේ නම් දරුවාගේ අවිදු අඳුර බිඳ දමා ආලෝකය ලබා දීමට යාර හයක් අත්‍යාවශ්‍යම නැති බව ඔබට පෙනෙනු ඇත.

මේ ඔබට හිතන්නට යමක් පමණි. මෙහි කිසිදු තැනක සාරිය ගැලවීමට අදහස් කර නැත. සාරියට කැමැත්තෝ සාරියෙන් සැරසී පැමිණෙත්වා.නමුත් වර්තමාන ගුරුවරියකගේ කාර්යභාරය පහසු කරවන සුදුසු පහසු ඇඳුමක් ඇයට අවශ්‍ය බව පමණක් මගේ හැඟීමයි.

ලොකු teacher

අම්මපා කිව්වහම ඇත්තම තමයි මේ දවස්වල දැවෙනම පුරස්නේ ඔය සාරියම තමයි ආයිබෝං. ඒ මොකෑ මේ ඇඳගෙන ඉන්නවා වගේ එව්වා එකක් ගන්න රුපියල් හත් අටදාහක් වැය වෙනවාමයි.තනිකඩ කාලේ නම් ඔව්වා පුරස්න නෙවෙයි. ඒත් දැන් පවුල් බර වැඩියි. ආර්ථිකේ එන්න එන්නම අමාරුයි. මොකෑ සල්ලි හැදෙන ගස් අපේ පෝච්චි වල පැලවෙන්නෙ නෑ නෙව

අනික දැන් ඉස්සර වගේ නොවෙයි කාලගුණේ දේශගුණෙත් බොහෝම පුරස්න තියෙනවා. එව්වත් හිටිහැටියේ වෙනස් වෙලා. හිටි ගමන් ගිනිගහන්න පායනවා. ඊළඟට තොරතෝංචියක් නැතිව බැඳගෙන වහිනවා. ඕං ඔය වෙලාවටත් මේ කෙහෙල් මල් සාරිය මහ වාතයක්ම තමයි.

ලෝකෙ වෙනස් වෙලාලු . අලුත් අදහස් වලට තැනක් තියෙනවලු, සිස්ටම් චේන්ජ් කොරන්ඩ ඕනෙලු. ඔය වගේ නහුතයක් කයි කතන්දර කරළියට ඇවිල්ලා තියෙන මේ වකවානුවේ මේ මලහත්තිව්වත් පොඩ්ඩක් හරි වෙනස් කොරන්ට අවසරයක් දීපල්ලකො මයෙ දෙයියෝ.

හැබැයි ඉතින් පහසු සැහැල්ලු කැමති කැමති ඇඳුම් නම් අඳින්ට බෑ ගොයියෝ. මොකක් හරි එක විදිහක ඩ්‍රේස්කෝඩ් එකක් තිබුණොත් හොඳයි.රෝහල්වල කාර්ය මණ්ඩලයට දීල තියෙන නිල ඇඳුම වගේ එකක් නං හුඟාක්ම හොඳයි කියල මටත් හිතෙනවා. ඕන නම් ඉතින් ඒ උඩට අඳින කබාය තව චූට්ටිත්තක් ඉතර දිගට අඳින්න උනත් පුළුවන්නෙව පස්ස පැත්ත වැහෙන්නම.

දැන් ඉතින් ලොකු ටීචර්ටත් මල පැනගෙනම තමයි එන්නේ. ඒ මොකද මේ පැන්සොන් යන්න තියෙන අවුරුදු කීපය ඇතුළත මාත් බලාන ඉන්නේ ඔය සැහැල්ලු ඇඳුමෙන් සැරසිලා එක්ක දවසක් හරි ඉස්කෝලෙට එන්න.අනේ ඉතිං අපේ පොඩි ටීචර්ලා ඔය තරමටම අරගල කොරන එකේ ඔන්න ඕක දීල දාහල්ලකො.සාරිය තහනම් කොරන එකක් ගැන කියනවා නෙවෙයිනෙව. මිහිකත නලවාලා යන්ඩ තාමත් කැමතියි ගුරු කුලවමියන්ට සාරිය දිගටම ඇන්දහැකි. හදවතින් තරුණව ඉන්න මං වගේ නාකි උන්දැලටත් ඔය දෙක මික්ස් කොර කොර හරි අඳින්න බැරියැ සුමානෙටම.අපේ තරුණ ගුරු ගැටිස්සියන්ට කැමති විදිහට කොරන කාර්යයට අනුකූලව ඕක අඳින්න පුළුවන් නෙව.

අපේ සාරි අඳින මහත්තුරු මේකට කිසිසේත්ම කලබල වෙන්ට ඕනේ නෑ. උන්නැහේලටත් ඉඳ හිටලා සාරිය රසවිඳින්න පුළුවන්.අධ්‍යාපන පද්ධතියෙන් සාරිය අයින් කොරන්නම කියලා චක්‍කරලේඛ ගහන්න කියලා ඉල්ලන ඉල්ලීමක් නෙවෙයිනෙ මේක.

ලොකු teacher