SL Knowledge Bank

18/03/2026

🚨 පෝලිම්වල සතුටින් සිටින කියුබානුවන්ගේ අනාගතය !

පසුගිය සදුදා දිනයේ සිට කියුබාව විදුලි බලය නොමැති තත්වයට පත්ව ඇති අතර අගනුවර වන හවානා ඇතුළු සියළු ප්‍රදේශයන් අදුරු රාත්‍රියන් බවට පත්ව ඇත.

මාස තුනක කාලසීමාවක් තුල කිසිදු තෙල් නැවක් කියුබාව වෙත පැමිණ නොමැති වීම හේතුවෙන් විදුලි අර්බුදය උත්සන්න වී ඇත. එසේම කියුබාවේ විදුලි පද්ධතියේ යටිතල පහසුකම් ඉතා පැරණි යල්පැනගිය තත්වයට පත්ව තිබීමද මෙම විදුලි අර්බුදය සදහා හේතුවී ඇත.

විදුලි අර්බුදය සමග ආහාර පාන ඇතුළු අත්‍යවශ්‍ය ද්‍රව්‍ය මිළ ගනන් ඉහළ යෑම,ජල හිගය ඇතුළු විශාල ගැටළු ප්‍රමාණයකට කියුබානු ජනතාව මේ වන විට මුහුණ දී ඇත. පීඩනයට පත්ව ඇති කියුබානු ජනතාව කියුබානු රජයට එරෙහිව වීදි බැස විරෝධතා දක්වන වීඩියෝ දර්ශණ විදෙස් මාධ්‍ය පසුගිය සතියේදී වාර්තාකර තිබුණි.

තෙල් හිගය සදහා මූලිකවම වෙනිසියුලාවේ පාලනය වෙනස් වීම බලපා ඇති බව සදහන් වේ. නිකොලොස් මදුරෝව පසුගිය ජනවාරි මාසයේදී ඇමරිකානු ආරක්ෂක අංශ විසින් අත්තඩංගුවට ගෙන ඇමරිකාවට රැගෙන යාම සමග මදුරෝගේ පාලනය විසින් කියුබාවට ඉතා අඩු මිළ ගනන් යටතේ ලබාදුන් තෙල් සැපයුම් නතර වීම තෙල් හිගය සදහා මූලික හේතුව බවට පත්ව ඇත. වාර්තාවන්හි දැක්වෙන ආකාරයට කියුබාවේ දිනක තෙල් පරිභෝජනයෙන් (බැරල් 35,000) හරි අඩකට ආසන්න ප්‍රමාණයක් වෙනිසියුලාව විසින් සපයා ඇති බව වාර්තාවන්හි දැක්වේ. එසේම, ඇමරිකාව විසින් කියිබාවට තෙල් සැපයුම් ලැබීම නැවැත්වීම සදහා තෙල් සපයන රටවල් වලට නව බදු පනවන බවට තර්ජනය කර ඇත.

ඇමරිකාව කියුබානු පාලන තන්ත්‍රය වෙනස් කිරීම වෙනුවෙන් කටයුතු කරමින් සිටින බව ඩොනල්ඩ් ට්‍ර්ම්ප් ජනාධිපතිවරයා සදහන් කර ඇත. කෙසේ නමුත් කියුබාව සම්බන්ධයෙන් කටයුතු කිරීමට පෙර ඉරාන ගැටළුව විසදා ගතයුතු බව ඔහු පසුගිය දිනක සදහන්කරන ලදි.

මෙවන් පසුබිමක, කියුබාන ජනාධිපති Miguel Diaz - Canel ප්‍රකාශයක් නිකුත් කරමින් ඇමරිකාව සමග සාකච්ඡා පැවැත්වීමට මූලික පියවරයන් ගනිමින් සිටින බව ප්‍රකාශ කර ඇත.

විදෙස් විශ්ලේෂකයන්ට අනුව ඇමරිකාව කියුබානු පාලන තන්ත්‍රය සහමුලින් වෙනස් නොකර ඇමරිකාවට විශ්වාස කල හැකි මට්ටමේ පුද්ගලයකු බලයට පත්කර ගැනීමට බලාපොරොත්තු වන බව අනුමාන කෙරේ. එය ඇමරිකාව විසින් වෙනිසියුලාවේ නව පාලනයක් පිහිටවූ ආකාරයට සමාන ආකාරයක් විය හැකි බව අනුමානයන්හි දැක්වේ.

රාවුල් කස්ත්‍රෝගේ මුණුබුරා වන Raul Guillermo Castro (අවුරුදු 41) පිළිබදව ඇමරිකාව උනන්දුවකින් පසුවන අතර ඇමරිකානු රාජ්‍ය ලේකම් මාර්කෝ රූබියෝ පසුගිය දිනකදී ඔහු සමග රහස් දුරකථන සංවාදයක නිරත වී ඇති බව Axio මාධ්‍ය ආයතනය විසින් පලකල ලිපියක සදහන් වේ.

ඇමරිකානු රාජ්‍ය ලේකම් මාර්කෝ රූබියෝගේ දෙමව්පියන් කියුබාවේ සිට සංක්‍රමණය වූ යුවළක් වන අතර රූබියෝ සමාජවාදී මතවාදයන්ට දැඩි විරුද්ධත්වයක් දක්වන්නකු බව ප්‍රකට කාරණාවකි.

- SL Knowledge Bank

09/03/2026

🚨 ඇමරිකාවත් පුදුම වූ ඊශ්‍රායල ගුවන් ප්‍රහාරය.

ඊශ්‍රායලය විසින් සිය ප්‍රහාරක ගුවන් යානා යොදා ගනිමින් සෙනසුරාදා දිනයේදී ඉරානයේ ටෙහෙරාන් ඇතුළු ප්‍රදේශ කිහිපයක ඉරාන තෙල් ගබඩා සංකීර්ණ ඉලක්ක කර ප්‍රහාරයන් දියත් කරන ලදි. වාර්තා වන ආකාරයට තෙල් ගබඩා සංකීර්ණ 30 කට පමණ මෙලෙස ඊශ්‍රායල ගුවන් ප්‍රහාර එල්ලවී ඇත.

එම ප්‍රහාර වලින් පසුව ඉරානයෙන් නිකුත් වූ වීඩියෝ පටවලින් අහසට නැගෙන ඉතා විශාල ගිනි ජාලාවන් දිස්වූ අතර ටෙහෙරාන් නගරයට ඉහළ අහස දැඩි අදුරු ස්වභාවයක් ගෙන දෙන තරම් මහා පරිමාණ හානියක් සිදුව තිබුණි.

මෙලෙස ප්‍රහාර එල්ල කිරීමට පෙර ඊශ්‍රාලය විසින් ඇමරිකානු පාර්ශවය දැනුවත් කර මෙම ප්‍රහාර එල්ල කර තිබූ නමුත් ඇමරිකානු පාර්ශ්වය බලාපොරොත්තු වූ මට්ටම ඉක්මවා ගිය ප්‍රහාරයක් ඊශ්‍රායලය විසින් එල්ල කර ඇති බව වාර්තා වේ. ඒ අනුව මෙම යුද්ධය ආරම්භ වූ අවස්ථාවේ සිට ඉතාමත් සහ සහයෝගයෙන් කටයුතු කල ඊශ්‍රාල හා ඇමරිකානු පාර්ශ්වයන් අතර පළමු වරට මෙම ප්‍රහාරය සම්බන්ධයෙන් යම් නොඑකගතාවයක් මතුව ඇති බව සදහන් වේ.

විදෙස් මාධ්‍ය වාර්තාවන්හි දැක්වෙන ආකාරයට ඊශ්‍රායලය විසින් එල්ල කල ප්‍රහාරයන්හි විශාලත්වය පිළිබදව ඇමරිකානු පාර්ශ්වය විශ්මයට පත්ව ඇත. එමෙන්ම මෙලෙස ඉරාන තෙල් සංකීර්ණ ඉලක්ක කිරීම උපායමාර්ගික වශයෙන් ඉදිරියේදී අවාසිදායක තත්ත්වයන් මතුවීමට හේතු කාරණාවක් වනු ඇති බවට ඇමරිකානු පාර්ශවය විශ්වාස කරන බව සදහන්ය.

ඊට හේතු ලෙස, ඉරාන සාමාන්‍ය ජනතාව අතර මෙම ප්‍රහාරයන් පිළිබදව විරෝධාකල්ප ඇතිවීමට හැකියාවක් තිබීම මගින් ඉරාන රෙජිමයට පක්ෂපාති ආකල්ප මතුවීමට ඇති හැකියාව හා තෙල් මිල ගණන් ඉහළ යාමට මෙය සෘජු හේතුවක් වීමට බෝහෝ සෙයින් හැකියාවක් තිබීම ලෙස දැක්විය හැක.

මේ අතර මෙම ප්‍රහාරයන් පිළිබදව ඉරාන පාර්ශවයෙන්ද අදහස් දැක්වීම සිදු වූ අතර ඉරාන රෙජිමයේ ඉහළ මට්ටමේ නිළධාරියෙක්ගේ අදහස් දැක්වීමකට අනුව , මෙලෙස ඉරාන තෙල් ගබඩා සංකීර්ණ ඉලක්ක කර ප්‍රහාර දිගින් දිගටම එල්ල වන්නේ නම් ඉරානයද ඒ හා සමාන ආකාරයෙන් ප්‍රතිචාර දැක්වීමට පසුබට නොවන බවයි. එසේ වුවහොත් බොරතෙල් බැරලයක මිල ඇමරිකානු ඩොලර් 200 ක් දක්වා වුවද ඉහළ යා හැකි බව ඔහු සදහන් කර ඇත.

(මූලාශ්‍රය - AXIO වාර්තාවක් උපුටා ගනිමින් මෙම ලිපිය සකස් කර ඇත)

- SL KNOWLEDGE BANK

09/03/2026

🚨 ඉරානය දන ගස්වන ඇමරිකානු ඊශ්‍රායල සැලසුම !

ඉරානයට ප්‍රහාර එල්ල කිරීමට ඇමරිකා එක්සත් ජනපදය පාර්ශවයෙන් ඉදිරිපත් වූ මූලිකම හේතු කාරණාව වූයේ ඉරානය දිගින් දිගටම න්‍යෂ්ටික අවියක් අත්පත් කරගැනීමේ ක්‍රියාවලියේ නිරත වන බවත් ඒ සදහා අවශ්‍ය වන යුරේනියම් සුපෝෂණ මට්ටමට ආසන්න වෙමින් පවතින බවයි.

පසුගිය වසරේ ජූනි මාසයේදී ඊශ්‍රායලය හා ඉරානය අතර හටගත් දින 12 යුද්ධයේදී ඊශ්‍රායලය විසින් ඉරාන න්‍යෂ්ටික වැඩසටහනේ ක්‍රියාකාරී විද්‍යායින් කිහිපදෙනෙකුම ඉලක්ක කර ප්‍රහාර එල්ල කල අතර ඇමරිකා එක්සත් ජනපදය 'OPERATION MIDNIGHT HAMMER ' නම් මෙහෙයුම ක්‍රියාත්මක කරමින් සිය දිගු දුර බෝම්බ හෙලන B - 2 යානා මගින් ඉරාන න්‍යෂ්ටික මධ්‍යස්ථාන වන FORDO , NATANZ හා ISFAHAN වෙත පහර දෙන ලදි.

පසුගිය ජූනී මාසයේදී එල්ල කරන ලද ප්‍රහාරයෙන් න්‍යෂ්ටික මධ්‍යස්ථාන වෙත හානි සිදු වුවද සුපෝෂණය කරන ලද යුරේනියම් පොළොව අභ්‍යන්තරයේ තවමත් ගබඩා කර ඇති බව ඇමරිකා එක්සත් ජනපද බුද්ධි අංශ විසින් එරට බළධාරීන් වෙත වාර්තාකර ඇති බව විදෙස් මාධ්‍යවල සදහන් වේ. ඒ අනුව මූලිකවම Isfahan න්‍යෂ්ටික මධ්‍යස්ථාන පරිශ්‍රයේ භූගතව මෙම යුරේනියම් ගබඩා කර ඇති බවට ඇමරිකානු බුද්ධි අංශ විශ්වාස කරන බව වාර්තා වී ඇත. ඉරානය රෙජීමය සතුව 60% ක මට්ටමකට සුපෝෂණය කල යුරේනියම් 450 Kg පමණ පවතින බව වාර්තාවන්හි දැක්වේ. මෙම ප්‍රමාණය 90% ක සුපෝෂණ මට්ටමකට ළගා වුවහොත් එය න්‍යෂ්ටික බෝම්බ 11ක් අත්පත් කර ගැනීමට තරම් සෑහෙන බව සදහන් වේ.

ඒ අනුව ඉරානය සතුව පවතින මෙම යුරේනියම් අත්පත් කර ගැනීමට ඉරාන භූමිය තුලට විශේෂ හමුදා බලකායන් යෙදවීමට ඇති හැකියාව සම්බන්ධයෙන් ඇමරිකාව හා ඊශ්‍රායල පාර්ශවයන් සළකා බලමින් සිටින බව වාර්තා වී ඇත. ඒ අනුව මෙම මෙහෙයුම ඊශ්‍රායලය විසින් ක්‍රියාත්මක කරන්නේද නැතිනම් ඇමරිකානු - ඊශ්‍රායල ඒකාබද්ධව මෙහෙයුමක් ලෙස ක්‍රියාත්මක කරන්නේද යන්න පිළිබදව දෙරටේ බළධාරීන් සාකච්ඡා කරමින් සිටින බව සදහන් වේ. කෙසේ නමුත් මෙවැනි අති අවදානම් මෙහෙයුමක් සිදු කිරීමට පෙර ගුවන් ප්‍රහාර මගින් ඉරාන ආරක්ෂක අංශ තවදුරටත් දුර්වල තත්ත්වයට පත් කිරීම අනිවාර්ය වී ඇත.

ප්‍රහාර ආරම්භ වූ මුල් දින කිහිපයේදී ඇමරිකාව හා ඊශ්‍රායලය Natanz හා Isfahan මධ්‍යස්ථාන ඉලක්ක කර ප්‍රහාර එල්ල කර ඇති අතර යුරේනියම් එම මධ්‍යස්ථාන වලින් ඉවත් කර ගැනීම මෙම ප්‍රහාරයන්හි අරමුණ වී ඇත.

මෙම සැලසුම සදහා ඇමරිකානු පාර්ශවය ප්‍රධාන විකල්ප දෙකක් පිළිබදව සිය අවධානය යොමුකර ඇත. පළමු වැන්න නම් ඉරානය සතුව පවතින සුපෝෂණ කල යුරේනියම් සම්පූර්ණයෙන් ඉරානයෙන් ඉවත් කිරීමයි. දෙවැනි විකල්පය ලෙස , න්‍යෂ්ටික තාක්ෂණය පිළිබද විශේෂ්‍යයන් යොදවා ඉරානයට ඉදිරියේදී න්‍යෂ්ටික අවියක් නිෂ්පාදනය කිරීමට භාවිතා කල නොහැකි මට්ටමකට ඔවුන් සතු සුපෝෂණය කල යුරේනියම් දුර්වල කිරීම වේ. භෞතිකව මෙම යුරේනියම් තොග රැගෙන එනවාද නැතිනම් දුර්වල කිරීම සිදු කරනවාද යන්න ඇමරිකානු ජනාධිපතිවරයාගේ හා ඇමරිකානු යුධ දෙපාර්තමේන්තුවේ තීරණයක් වනු ඇති බව වාර්තාවන්හි දැක්වේ.

යුරේනියම් අත්පත් කර ගැනීමට අමතරව ඉරාන යුද්ධයේ සම්පූර්ණ හැරවුමක් සනිටුහන් විය හැකි මෙහෙයුමක් සිදු කිරීමට ඇමරිකාව බලාපොරොත්තු වන බව වාර්තා වේ. එනම් ඉරාන බොරතෙල් නිෂ්පාදනයෙන් 90% පමණ හසුරවන ඉරානයට අයත් Kharg දූපතට ඇමරිකානු හමුදා යොදවා එය අත්පත්කර ගැනීමයි. Kharg දූපත ඉරාන ප්‍රධාන භූමියේ වෙරළේ සිට 25 KM පමණ දුරකින් හා හෝමෝස් සමුද්‍ර සන්ධියට 483 KM ක් උතුරින් පිහිටා ඇත.

ප්‍රමාණයෙන් ඉතා කුඩා දූපතක් වුවද ඉරාන බොරතෙල් නිෂ්පාදනයන්ගෙන් 90% පමණ මෙම දූපතේ ඇති පර්‍යන්තයන් මගින් හසුරන වන අතර මෙම දූපත අල්ලා ගැනීම මගින් ඉරානයේ ප්‍රධානම ආදායම් මාර්ගය අහිමි කිරීම මගින් ඉරානයට දරුණු බලපෑමක් එල්ල කිරීම මෙම සැලසුමේ අරමුණ වී ඇත.

කෙසේ නමුත් මෙවැනි මෙහෙයුමක් ඉතාමත් අවදානම් සහගත වන හෙයින් ඊට පෙර ඉරාන ආරක්ෂක අංශයන් හි මිසයිල එල්ල කිරීමට ඇති හැකියාව දුර්වල කිරීම අත්‍යවශ්‍ය වී ඇත. එනම් ඇමරිකානු හා ඊශ්‍රායල පාර්ශවයන් දෙකටම ඉරාන හමුදාවන්ගෙන් දරුණු ප්‍රතිචාරයක් එල්ල නොවන බවට විශ්වාසයක් ඇති වූ පසු මෙවැනි මෙහෙයුමක් ක්‍රියාත්මක විය හැකි බව විශිවාස කල හැක.

- SL KNOWLEDGE BANK

08/03/2026

🚨 IRAN NEW SUPREME LEADER HAS BEEN ANNOUNCED !

🚨 BREAKING - IRAN NEW LEADER

ඉරානයේ නව අධ්‍යාත්මික නායකයා ලෙස මොජ්ටාබා කමේනි තෝරාපත් කරගත් බව ඉරාන මාධ්‍ය වාර්තාකාර ඇත.

ඔහු ඝාතනයට ලක්වූ අයතුල්ලා අල් කමේනිගේ පුත්‍රයා වේ.

08/03/2026

🚨 ඇමරිකාවට හා ඊශ්‍රායලයට හිසරදයක් වන මොසැයික් යුධ උපක්‍රමය.

පසුගිය 28 වෙනිදා දින ඉරානයේ ටෙහෙරාන් අගනුවර පිහිටා තිබූ ඉරාන අධ්‍යාත්මික නායක අයතුල්ලා අල් කමේනීගේ පෞද්ගලික නිවහන ඉල්ලක්ක කර ඊශ්‍රායල ගුවන් ප්‍රහාරයක් එල්ලවූ අතර එම ප්‍රහාරයෙන් අයතුල්ලා අල් කමේනී හා ඉරාන පාලන තන්ත්‍රයේ ඉහළම නායකයින් ගණනාවක් ජීවිතක්ෂයට පත්වූ වූ බව ඔබ හැම දෙනාම දන්නා කරුණක්.

අද අප කතා කිරීමට සූදානම් වන්නේ එම ප්‍රහාරයෙන් පසුව ඉරාන රජය විසින් ක්‍රියාත්මක කිරීමට බලාපොරොත්තු වන බවට පැවසෙන හා මේ වන විටත් ක්‍රියාත්මක වෙමින් පැවතෙන බව ඉගි පලවන ඉරාන විශේෂ ආරක්ෂක යුධ උපක්‍රමයක් පිළිබඳවයි. එනම් මොසැයික් (MOSAIC) යුධ උපක්‍රමය පිළිබඳවයි.

ඉරානයේ හමුදාව ප්‍රධාන වශයෙන් කොටස් දෙකකින් සමන්විත වේ. එනම් ඉරාන විප්ලවවාදී ආරක්ෂක හමුදාව හා රජයේ සාමාන්‍ය හමුදාව වේ. (ISLAMIC REVOLUTIONARY GUARDS & REGULAR ARMY). මේ අතරින් වඩාත් ප්‍රබළම හමුදාව IRGC හෙවත් ඉරාන විප්ලවවාදී ආරක්ෂක හමුදාව වන අතර එම හමුදාව ඉරානයේ රජයට විශේෂයෙන් ආගමික පාලන තන්ත්‍රයට දැඩි පක්ෂපාතීත්වයක් දක්වනු ලබයි. 1979 වසරේදී ඇතිවූ ඉරාන විප්ලවයෙන් පසුව බලයට පැමිණි පළමු ඉරාන ආධ්‍යාත්මික නායක Ayatollah Ruhollah Khomeoni විසින් ඉරාන විප්ලවය ආරක්ෂා කර ගැනීමට මෙම විශේෂ ආරක්ෂක හමුදාව පිහිටුවනු ලැබීය. IRGC ය හමුදා සාමාජිකයන් 150,000 - 200,000 පමන පිරිසකගෙන් සමන්විත බව වාර්තාවන්හි දැක්වේ.

මොසැයික් ආරක්ෂක උපක්‍රමයට අනුව සතුරු පාර්ශවකින් ඉල්ල වන ප්‍රහාරයක් හෝ ආක්‍රමණයක් හේතුවෙන් ඉරාන පාලන තන්ත්‍රයේ හා ආරක්ෂක අංශයන්හි ඉහළ නායකයන් හා නිළධාරීන් ඝාතනය වී හමුදාවන්ට මධ්‍යම නියෝග ලබාදීමේ ජාලයේ බාධාවීම් ඇති වූ තත්වයකදී ඉරාන ආගමික පාලන තන්ත්‍රය ආරක්ෂා කරගනිමින් සතුරන්ට දරුණු ප්‍රතිප්‍රහාර එල්ල කිරීමට මෙම ආරක්ෂක උපක්‍රමය සකස් කර ඇත.

ඉරාන භූමිය ප්‍රදේශ 31 කට බෙදා වෙන්කර ඇති අතර එම සෑම ප්‍රදේශයකම ඉරාන විප්ලවවාදී හමුදාවේ මූලස්ථානයක් ,ප්‍රාදේශීය හමුදා නායකයන් කණ්ඩායමක් හා අණ හා නියෝග ලබාදීමේ ජාලයක් සකස් කර ඇත. මොසැයික් ආරක්ෂක උපක්‍රමයට අනුව ඉරානයේ ටෙහෙරානයෙන් මධ්‍යම නියෝග නොලැබෙන තත්වයකදී එම ප්‍රාදේශීය නායකයන් හට සතුරන්ට එරෙහිව ප්‍රහාර සැලසුම් කිරීමට හා ක්‍රියාත්මක කිරීමට සම්පූර්ණ බලතල හිමිවේ. ඒ අනුව මොසැයික් කණ්ඩායම් 31 තනි තනිව ප්‍රහාරයන් සැලසුම් කරමින් දීර්ඝ කාලීන යුද්ධයක් පවත්වාගෙන යාමට උත්සහ දරනු ලබයි.

මෙම උපක්‍රමය ක්‍රියාත්මක වන විට IRGC හි සෙබළුන් මෙම කණ්ඩායම් 31 වෙත වෙන්වන අතර විශේෂයෙන්ම ඉරානයේ සිටින බසීජ් (Basij) කණ්ඩායම් හෙවත් පැරා මිලිටරි කණ්ඩායම්හි සාමාජිකයන් මෙම මොසැයික් කණ්ඩායම් වෙත සක්‍රීය සේවය සදහා කැදවනු ලෑබේ. වාර්තාවන්හි දැක්වෙන ආකාරයට ඉරාන තුල බසීජ් සෙබළුන් මිලියනයක් පමණ සිටින බව සදහන් වේ. ඔවුන් සමස්ථ ඉරානයේ සෑම නගරයක් පාසා පැතිරී සිටින අතර මනා අවි පුහුණුවක් ලබාගත් සෙබළුන් වේ. වඩා වැදගත්ම කාරණාව වන්නේ IRGC සෙබළුන් හා බසීජ් සෙබළුන් දැඩි ආගමික මතවාදය දරන්නන් හා ඉරාන ආගමික පාලන තන්ත්‍රයට දැඩි පක්ෂපාතී පිරිසක් වීම හා තමන් විශ්වාස කරන ඇදහීම් හා දර්ශනයන් වෙනුවෙන් ඉල්ලා සිටින ඕනෑම දැඩි කැපකිරීමක් වුවද ඉටු කිරීමට සූදානම් පිරිසක් වීමයි.

ඒ අනුව ඉරානය තුල හා ගල්ෆ් කලාපීය රටවල් හිදී විශේෂයෙන් HIT & RUN පන්නයේ ප්‍රහාර එල්ල කිරීමට ඔවුන්ට හැකියාව ලැබෙන අතර එමගින් සැලකිය යුතු කාලසීමාවක යුද්ධයකට මුහුණ දීමට හා සතුරු පාර්ශවයන්ට දරුණු හානි සිදු කිරීමට හැකියාව ඇත.

ඇමරිකාව හා ඊශ්‍රායලය ඉරාන භූමිය තුලට සිය හමුදා යොදවා ගොඩබිම් ආක්‍රමණයක් සිදු නොකිරීමට මූලික හේතුවක් ලෙස මෙය හැදින්විය හැක. ඉරාන භූමිය ප්‍රමාණයෙන් වඩා විශාල වීම , විශාල කදු හා සානු වලින් සමන්විත විවිධ භූ විෂමතාවලින් සමන්විත වීම , ඉරාන ආරක්ෂක අංශ විසින් මනා ලෙස සකස් කර ඇති භූගත උමං මාර්ග හා ඉරානය විසින් ක්‍රියාත්මක කිරීමට බලාපොරොත්තු වන මොසැයික් ආරක්ෂක උප්ක්‍රමය ඉරානයට එරෙහි ගොඩබිම් ආක්‍රමණයකදී දීර්ඝ කාලයක් සතුරන්ට මුහුණදී සතුරන්ට දැඩි හානි සිදු කිරීමට මග පාදනු ලබයි.

ඉරාන විදේශ අමාත්‍යවරයා සදහන් කරන ආකාරයට දැනටමත් මොසැයික් ආරක්ෂක උපක්‍රමය ක්‍රියාත්මක කර ඇත. ඊට උදාහරණයක් ලෙස් යුද්ධය ආරම්භ වී පළමු දින කිහිපය තුලදී ඕමානය වෙත ප්‍රහාරයක් එල්ල වූ අතර එම ප්‍රහාරය පිළිබඳව අදහස් දැක්වූ විදේශ අමාත්‍යවරයා , එම ප්‍රහාරය තම රජයේ තේරීමක් නොවන බවත් ඉරාන හමුදා හුදකලාවී ස්වාධීන ක්‍රියාත්මක වීමට ආරම්භ විී ඇති හෙයින් මෙවැනි ප්‍රහාරයක් එල්ල වූ බව ඔහු ප්‍රකාශ කරන ලදි. ඇමරිකාව හා ඉරානය අතර මැදිහත්කරු ලෙස ඕමානය විශාල භූමිකාවක් පසුගිය කාලසීමාව පුරාම ඉටුකරන ලදි.

- SL KNOWLEDGE BANK

07/03/2026

🚨 WORTH WATCHING

29/01/2026

අතුරුදන් වූ ඇමරිකානු ගම්මානය !

ඇමරිකානු ඉතිහාසයේ පැරණිතම හා තවමත් විසදී නොමැති අභිරහසක් ගැන තමයි අද මේ කතාව.

වර්තමානයේ ඇමරිකා එක්සත් ජනපදය ලෙස අපි විසින් හදුන්වන ලෝක බලවතා ප්‍රාන්ත 50 කින් සෑදුන විශාල භූමි ප්‍රදේශයකට හිමිකම් කියනු ලැබේ. නමුත් අද මේ කතාවට පසුබිම් වන්නේ එංගලන්ත ජාතිකයන් විසින් ඇමරිකානු භූමියට මුහුදු මාර්ගයන් ඔස්සේ පැමිණ ඉංග්‍රීසි ජනාවාස පිහිටුවීමට උත්සහා කල මුල් අවධියයි.

එකල එංගලන්තයේ මහා ධනවතෙක් වූ වෝල්ටර් රැලේගේ (Walter Raleigh) මූල්‍ය අනුග්‍රහය සහිතව 1585 වසරේදී බ්‍රිතාන්‍ය ජාතිකයන් පිරිසක් නෞකාවකින් ඇමරිකාවේ වර්තමානයේ නම් උතුරු කැරොලීනා ‍ප්‍රදේශයේ රැනෝකේ (Roanoke) නම් ප්‍රදේශයට පැමිණ කොලනියක් පිහිටුවා ගැනීමට කටයුතු කරන ලදි. කොලනිය පිහිටුවා ගත්තද ආහාර පාන ඇතුළු අත්‍යවශ්‍ය සැපයුම් නිසි ආකාරයෙන් නොමැති වීම හේතුවෙන් උත්සාහය අතහැර දැමූ මෙම කණ්ඩායමට නැවත එංගලන්තය කරා යෑමට සිදුවී ඇත.

ඇමරිකාවේ කොලනියක් පිහිටුවන උත්සහය අත්නොහැරි වෝල්ටර් රැලේ නැවතත් ඔහුගේ මූල්‍ය අනුග්‍රහය යටතේ 1587 වසරේදී පුද්ගලයන් 115 දෙනෙකුගෙන් සමන්විත කණ්ඩායමක් නැවතත් රැනෝකේ ප්‍රදේශයට එවීමට කටයුතු කර ඇත. මෙම කණ්ඩායමට මෙම අවස්ථාවේදී නායකත්වය දී ඇත්තේ කපිතාන් ජෝන් වයිට් නම් පුද්ගලයෙක් විසිනි.

නැවත වතාවක් රැනෝකේ ප්‍රදේශයේ කොලනියක් පිහිටුවීමට කටයුතු කරන මෙම පිරිස නිවාස හා ආරක්ෂිත වැටවල් වලින් සමන්විත ගම්මානයක් ඉදිකර ඇත. එම කොළනියේ නායකයා වූයේ කලින් සදහන් කල කපිතාන් ජෝන් වයිට්ය.

කොලනිය නැවත පිහිටුවීමෙන් වසරකට පසු එනම් 1588 දී නැවත සැපයුම්හි හිගතාවයන් පැන නැගීම හේතුවෙන් නැවත සැපයුම් රැගෙන ඒමේ අරමුණ ඇතිව ජෝන් වයිට් එංගලන්තය බලා නැව්නැගීමට කටයුතු කර ඇත.

මෙලෙස එංගලන්තය කරා යන ජෝන් වයිට් හට බලාපොරොත්තු වූ ආකාරයට නැවත රැනෝකේ කරා ඒමට හැකි නොවන අතර ඊට හේතුව වන්නේ ඔහු එංගලන්තයට ආ සැනින්ම එංගලන්ත හා ස්පාඤ්ඤ හමුදා අතර විශාල මුහුදු සටනක් ඇති වීමත් ඔහුගේ නාවික ගමනට අවශ්‍ය නෞකාවක් සොයා ගැනීමට ඔහු අසමත් වීමත් වේ. මෙම යුද්ධය සදහා එංගලන්තයේ තිබූ සියළුම නෞකාවන් යොදවන ලෙස පළවෙනි එළිසබෙත් රැජිණ නියෝග කිරීම නිසා මෙලෙස ඔහු හට නෞකාවක් සොයා ගැනීම අපහසු වී ඇත.

කෙසේ නමුත් අවසානයේදී වසර දෙකකට පසුව එනම් 1590 වසරේදී ජෝන් වයිට් නැවත රැනෝකේ කොලනියට පා තබන අතර තමන් විසින් කොලනියේ නවතා ගිය තම බිරිඳ ,දියණිය හා ඔහුගේ මිණිබිරිය දැකීමේ ආසාවෙන් කොලනියට එන ජෝන් වයිට් පුදුමයෙන් පුදුමයට පත්වී ඇත. මීට වසර තුනකට පෙර තමන් සමග කොලනිය පිහිටුවීමට ආ 115 දෙනා ඇතුළු පිරිස ඉතා අභිරහස් ලෙස අතුරුදහන් වූ පාළුවට ගිය කොලනිය පමණක් ඔහුට හමුවී ඇත.

කොලනිය හා ඒ අවට කෙතරම් පරීක්ෂා කලත් කොලනියේ ජීවත් වූ අය පිළිබදව කිසිදු සළකුණක් සොයා ගැනීමට ජෝන් වයිට් හට හැකි වී නොමැත. කොලනියේ ඉදිකර තිබූ නිවාස මේ වන විට විනාශ වෙමින් තිබු නමුත් කිසිදු ආක්‍රමණයක් හෝ යම් ප්‍රහාරයක් එල්ල වූ ලක්ෂණ කොලනිය දෙසින් දිස්වී නොමැත. එසේම කොලනිය වටා ඉදිකල වැට ඉතා ආරක්ෂිතව මේ වනතෙක් තිබීම නිසාවෙන් යම් අමෙරිකානු ස්වදේශීය කණ්ඩායමක් හෝ යම් වෙනත් කණ්ඩායක් විසින් ප්‍රහාරයක් එල්ල වූ බවටද විශ්වාස කිරීමට නොහැකි වී ඇත.

මෙසේ තම පිරිස පිළිබදව පරීක්ෂා කරමින් යන ජෝන් වයිට් හට කොලනියේ ගසක සළකුණු කර තිබූ යම් වචනයක් දක්නට ලැබී ඇති අතර මෙහි ඉංග්‍රීසි අකුරු වලින් 'Cro' ලෙස පමණක් සදහන්කර තීබී හමුවී ඇත. කොලනියේ ඉතිරිවී තිබූ එකම සළකුණ මෙය වීමත් සමග එහි ජීවත් වූ පිරිසට අත්වූ ඉරණම අදටත් නොවිසිදුන අභිරහසක් ලෙස ඉතිහාසයට එක්විය.

මෙම අභිරහස පිළිබදව සොයා බැලූ ගවේෂකයන්ට අනුව ගසේ කොටා තිබූ 'Cro' යන වචනය එම කාලසීමාවේ එම ආශ්‍රිත ප්‍රදේශයේ ජීවත් වූ Croatoan නම් ස්දේශීක ජන කණ්ඩායම පිළිබදව යම් සදහන් කිරීමක් විය හැකි බවට මතයන් පලවී තිබුනත් කොලනියේ සිටි ජනතාව ඔවුන් අතින් ඝාතනය වූ බවට හෝ ඔවුන් සමග මිත්‍ර සබදතාවයන් ගොඩනගාගෙන ඔවුන් සමග ජීවත් වූ බවට හෝ කිසිදු සාක්ෂියක් සොයා ගැනීමට මේ වන තෙක් නොහැකි වී ඇත. මේ හේතුවෙන් සියවස් කිහිපයක් තිස්සේ මෙම අතුරුදන් වීම සම්බන්ධයෙන් විවිධ මතවාදයන් ගොඩ නැගී ඇති අභිරහස් ගම්මානයක් බවට රැනෝකේ ගම්මානය පත්වී ඇත.

මෙම සිදුවීමෙන් වසර 17 කට පමණ පසු ඇමරිකානු ඉතිහාසයේ ඉතාම වැදගත් ඉංග්‍රීසි කොලනිය වන ජේම්ස් ටවුන් රැනෝකේ ගම්මානයට තරමක් උතුරින් පිහිටුවීමට එංගලන්ත ජාතිකයන් පිරිසක් කටයුතු කරන ලදි. ඇමරිකානු ජානාවාසකරණයේ ඉතාමත් වැදගත් මං සලකුණක් ලෙස ජේම්ස් ටවුන් ඉතිහාසගත වී ඇත.

- SL Knowledge Bank

04/01/2026

ඇමරිකානු හමුදා අත්තඩංගුවට පත්වූ පැනමා මිලිටරි නායකයා.

පසුගිය 3 වෙනිදා ලොවම උණුසුම් කරපු ප්‍රවෘත්තිය උනේ වෙනිසියුලානු ජනාධිපතිවරයාව ජීවග්‍රහයෙන් වෙනිසියුලාව තුලදීම අත්අඩංගුවට ගෙන ඇමරිකාවට රැගෙන ඒම වීම පුදුමයක් නෑ..ඒක ඒ තරම් විශිෂ්ට මෙහෙයුමක්.

නමුත් මේ විදිහට තවත් රටක බලයේ සිටන රාජ්‍ය නායකයෙක් අත්අඩංගුවට ගෙන රැගෙන යාම ලෝක සම්මුතීන්ට කෙතරම් ගැලපෙනවාද කියන එක මේ වන විට ගොඩක් ලොකු සාකච්ඡාවක් වෙලා තියෙනවා. කොහොම නමුත් මේ විදිහට වෙනත් රටක පාලකයන් බලයෙන් පහ කිරීම නම් ඇමරිකාවට අළුත් දෙයක් නම් නෙමෙයි.

මීට හරියටම අවුරුදු 36 කට පෙර එනම් 1990 ජනවාරි 3 වෙනිදා පැනමාවේ හිටපු පාලකයා වූ Manuel Noriega අත්තඩංගුවට ගැනීමත් මේ අකාරයෙන් ඇමරිකාව සිදුකල තවත් මෙහෙයුමක්.

1934 උපත ලබපු Noriega පළමුව පැනමාවේ හමුදාවට සම්බන්ධ වෙනවා..ටිකෙන් ටික හමුදාවේ ඉහළට යාමට සමත් වෙන Norega 1968 දී පැනමාවේ සිදුවූ හමුදා කුමන්ත්‍රයෙන් පසු බලයට පත් වුන Omar Torrijos ගේ සමීපතයෙක් විදිහට වැඩකටයුතු කරමින් ඉන්නවා.

1968 දී ජාතික ආරක්ෂක බළමුළුවේ නිළධාරීන් විසින් ක්‍රියාත්මක කල මෙම කුමන්ත්‍රණයෙන් පසු එරට පාලකයා වෙන්නේ අපි කලින් සදහන් කරපු Omar Torrijos. ඔහු 1968 සිට 1981 දී ගුවන් අනතුරකින් මිය යන තෙක් එරට පාලකයා ලෙස (මිලිටරි නායකයෙක්) එරට පාලනය රැගෙන යාමට සමත් වෙනවා. ඔහුගේ ළගම සමීපතමයෙන් උන Noriega පැනමාවේ ප්‍රධාන බුද්ධි අංශ නිළධාරියා විදිහට රාජකාරි කටයුතු කරනවා.

කොහොම උනත් Noriega කියන්නේ පැනමාවේ බුද්ධි අංශ නිළධාරියෙක් විතරක් නෙමෙයි. වාර්තා වල දැක්වෙන විදිහට 1950 පමණ සිට ඔහු ඇමරිකානු CIA සංවිධානයේ වටිනාම බුද්ධි තොරතුරු සපයන්නෙක් විදිහටත් රහසේ කටයුතු කරමින් ඉදලා තියෙනවා.

1983 වසරේදී පැනමාවේ පාලකයා ලෙස පත්වෙන Noriega පැනමාව තුල විරුද්ධ මතවාදීන් දැඩි ලෙස මර්ධනය කරමින් දැඩි පාලනයක් පවත්වාගෙන යාමට කටයුතු කරනවා. කොහොම නමුත් මේ අතරවාරයේදී ඇමරිකාවේ සුවච කීකරු පුද්ගලයෙක් වූ Noriega හා ඇමරිකාවේ දීගය ටිකෙන් ටික නරක අතට හැරෙනවා.

Noriega ට එරෙහිව මත්ද්‍රව්‍ය ජාවාරම් චෝදනා හා Noriega ගේ ප්‍රබල විවේචකයෙක් වූ එරට ප්‍රසිද්ධ දේශපාලන ක්‍රියාකාරිකයෙක් වූ Hugo Spadafora කෲර ලෙස ඝාතනය කිරීම සම්බන්ධයෙන් චෝදනා එල්ල වෙනවා.

ඇමරිකාවට කොකේන් ප්‍රවාහනය කිරීමේදී පැනමාව හරහා පහසුකම් සැලසීම වගේම ප්‍රබල මත්ද්‍රව්‍ය ජාවාරම්කරුවෙකු වූ Pablo Escorba සමග කටයුතු කිරීම වගේ ප්‍රබල චෝදනා රැසක් ඔහුට එරෙහිව ඇමරිකාව දෙසින් එල්ල වීමට පටන් ගන්නවා.

1988 දී ඇමරිකාවේ මියාමිහි විනිසුරු මඩුල්ලක් මගින් Noreiga ට එරෙහිව මත්ද්‍රව්‍ය වෙළදාම,මුදල් විශුද්ධීකරණය හා අනීතික මුදල් ඉපයීම් යන චෝදනා යටතේ අධිචෝදනා ගොනු කිරීමට කටයුතු කරනවා.

මේ අතරම 1989 වන විට පැනමාව තුල දේශපාලන තත්ත්වය නරක අතට හැරීමට පටන් ගන්නවා. මූලිකවම 1989 පැවැත්වුනු ජාතික මැතිවරණයේදී විපක්ෂ අපේක්ෂකයා වූ Guillermo Endara පැහැදිලි ලෙස මැතිවරණය ජයග්‍රහණය කලත් එම ජයග්‍රහණය ප්‍රතික්ෂේප කරමින් Noriega බලයේ රැදී සිටීමට කටයුතු කිරීමට මීට හේතු වෙනවා.

මේ සියළු කරුණු කාරනා සිදුවූ පසුබිමකදී 1989 දෙසැම්බර් 15 වෙනිදා Noriega විසින් ඇමරිකා එක්සත් ජනපදය සමග පැනමාව යුධමය තත්වයක සිටින බව නිවේදනය කිරීමට කටයුතු කිරීම ඔහුගේ අවසානය සීඝ්‍රයෙන් ලගාවීමට මග පාදා දෙනවා.

මීට ප්‍රතිචාරයක් ලෙස ඇමරිකා එක්සත් ජනපදය 1989 දෙසැම්බර් 20 දින පැනමාවට එරෙහිව ආක්‍රමණයක් දියත් කිරීමට කටයුතු කරනවා. මෙහෙයුම හැදින්වුනේ "Operation Just Cause " ලෙසයි. 27,000 ක පමණ ඇමරිකානු හමුදාවක් පැනමාව ආක්‍රමණය කරන අතර පසුගිය මැතිවරණයේදී ජයග්‍රහණය කල විපක්ෂ අපේක්ෂකයා වූ Guillermo Endara ඇමරිකානු යුධ කදවුරක් තුලදී එදිනම පැනමාවේ ජනාධිපතිවරයා ලෙස දිවිරුම් දෙනවා.

ආක්‍රමණය සමග සැගවෙන Noriega 1989 දෙසැම්බර් 24 වෙනිදා පැනමාවේ වතිකානු තානාපති කාර්‍යාලයේ ආරක්ෂාව ලබාගන්නවා. නමුත් ඇමරිකාවේ දැඩි පීඩනය හමුවේ 1990 ජනවාරි 3 වෙනිදා ඔහුට ඇමරිකානු හමුදාවන් වෙත යටත් වීමට සිද්ධ වෙනවා.

යටත් වූ Noriega ඉක්මනින් ඇමරිකාවට රැගෙන යාමට කටයුතු කරනවා වගේම 1992 වසරේදී මත්ද්‍රව්‍ය වෙළදාම ඇතුළු චෝදනා වලට වසර 40ක සිරදඩුවමක් ඇමරිකානු අධිකරණය විසින් ලබාදෙනවා. පසුකාලීනව වෙනත් නඩු විභාග සදහා ප්‍රංශයට රැගෙන යන Noriega අවසානයේදී 2011 වසරේදී සිය මව් රටට රැගෙන විත් මානව හිමිකම් උල්ලංඝන චෝදනා වලට නැවත සිරදඩුවම් ලබනවා.

පැනමාවේ සිරදඩුවම් අතරතුරදීම 2017 වසරේදී සිය 83 වැනි වියේදී මිය යනවා.
නිකොලායි මදුරෝගේ ඉරණම කොහොම විසදෙවීද කියලා අපි බලන් ඉමු !!!!!

- SL Knowledge Bank

06/12/2025

අනාගතය දැක්ක මිනිහෙක් - රෝහණ විජේවීර

05/12/2025

සම්පූර්න ආපදා සහන පැකේජ් එක සංශිප්තව

1. ගංවතුරෙන් හානිවූ සෑම නිවසකටම පිරිසිඳු කරගැනීම සඳහා රුපියල් 25,000යි

2. නැවත පදිංචි වූ නිවාස වල අත්‍යාවශ්‍ය භාණ්ඩ මිළදී ගැනීම සඳහා රුපියල් 50,000යි

3. නායගිහිං නිවාසය අහිමිවී අවතැන් කඳවුරක සිටීනම් රජයේ වියදමින් සියලු පහසුකම් ලබාදෙනව. එසේ නොමැතිව වෙනත් ස්තානයකට කුලියට යාමට කැමති නම් එවන් නිවසකට මාසෙකට රුපියල් 25,000 බැගින් මාස තුනක්. මෙය මාස හය දක්වා දීර්ග කිරීමටත් අපේක්ශා කරනව.

4. ඉහත කාණ්ඩයට අයත් පිරිසට අහිමි වී ගිය ජීවනෝපාය සකස් කරගන්න තෙක් මාසෙකට රුපියල් 50,000 බැගින් මාස තුනකට දීමනාවක් ලබා දෙනව. (පවුලේ සිටින්නේ දෙන්නෙක් නම් රු 25,000යි. දෙන්නට වැඩිනම් 50,000)

5. විනාස වූ වී හා ධ්‍යාන්‍ය කුඹුරු සඳහා හෙක්ටයාරයකට රු 150,000යි

6. විනාස වූ එළවළු කොටු සඳහා හෙක්ටයාරයකට රු200,000යි

7. ලියාපදිංචි සෑම සත්ව පාලන ගොවිපොලක් සඳහා ලක්ශ 2ක්

8. ලියාපදිංචිකොට ඇති සෑම සුලු හා මධ්‍ය පරිමාන ව්‍යාපාරයකටම ව්‍යාපාරය නැවත ආරම්භ කිරීමට ලක්ශ 2ක්

9. විනාස වුනු ධීවර බෝට්ටුවක් සඳහා ලක්ශ 4ක්

10. ආපදාවට ලක් වුනු පාසැල් සිසුන්ට භාණ්ඩාගාරයෙන් 15,000යි. ජනාදිපති අරමුදලින් 10,000යි. ඔක්කොම 25,000යි

11. හානිවී ඇති ව්‍යාපාරික ආයතනකයට තක්සේරුව අනුව උපරිම ලක්ශ 50ක්

12. පූර්න වශයෙන් හානියට ලක් වුනු නව නිවසකට ලක්ශ 50යි.

13. ඉඩමක් නැත්නම් රජයේ ඉඩමක් ලබාදෙනව. රජයේ ඉඩම් ලබාදීමට බැරිනම් ඉඩමක් ලබාගැනීම ලක්ශ 50 දක්වා දීමනාවක් ලබාදෙනව

14. අර්ධ වශයෙන් හානිවූ නිවාසයක් සඳහා උපරිම ලක්ශ 25 දක්වා. මෙය ලක්ශ 10, 15, 20, 25 වැනි කාණ්ඩ හතරකට දීමට යෝජිතයි

15. මියගිය එක් අයෙක් සඳහා ලක්ශ 10යි

මීට
තඹුත්තේගම රන්බණ්ඩගෙ කොල්ල ❤️👊

Copied from Pandula Nayana Bandara

28/11/2025

Surveyor Department එකෙන් සකස් කර ඇති මේ මැප් එකේ 2016 වසරේදී ගංවතුර කැළණි මිටියාවතට බලපාපු ආකාරය දැක්වෙනවා.

අදාල බළධාරීන් සදහන් කරන ආකාරයට 2016 වසරට වඩා දරුනු ජල ගැලීමක් පැමිණීමට නියමිතව තියෙනවා. ඒ නිසා තමන්ගේ හා තමන්ගේ පවුලේ ජීවිත ගැන හිතලා හැකි ඉක්මනින් ආරක්ෂිත ස්ථාන කරා ගමන් කරන්න. ඔබගේ පුරවැසි වගකීම ඉටුකරන්න !

පහල Link එකෙන් මැප් එක පැහැදිලිව බලන්න පුළුවන්.

https://survey.gov.lk/sdweb/pdf/flood_map/Flood_Map_2016_June_03_kelaniya.pdf