14/06/2026
පෙර පාසල් වියේ පසුවන දරුවන් කියන්නේ හරියට පුංචි කැමරා වගේ. ගෙදරදී අම්මා, තාත්තා හැසිරෙන විදිහ, කතා කරන වචන, සහ නිවසේ ඇති වන සුළු හෝ වෙනස්වීම් ඔවුන් ඉතා ඉක්මනින් ග්රහණය කරගන්නවා. ඊටත් වඩා පුදුමයට කරුණ නම්, ඔවුන් ඒ හැම දෙයක්ම කිසිම හැංගිමුත්තමක් නැතිව තමන්ගේ පෙර පාසල් ගුරුතුමිය සමඟ පවසන්නට පෙළඹීමයි.
"අපිට වැඩිය ගෙදර සිද්ද වෙන දේවල් දන්නේ පෙර පාසල් ටීචර්" කියලා සමාජයේ පොදු මතයක් හැදිලා තියෙන්නේ මේ නිසයි. දරුවා ඔබ (දෙමාපියන්) ගැන කොතරම් අවධානයෙන්ද සහ ඔවුන් තුළින් නිවසේ පරිසරය ගුරුතුමිය වෙත නිරාවරණය වන්නේ කෙසේද යන්න පිළිබඳවයි මේ ලිපිය.
1. දරුවා ඔබ දෙස බලා සිටින "රහස් කැමරාව"
දරුවන් තමන්ගේ මව්පියන්ව දකින්නේ ඔවුන්ගේ ලෝකයේ වීරයන් හැටියටයි. ඒ නිසාම ඔවුන් මව්පියන්ගේ සෑම ක්රියාවක්ම ඉතාම සියුම්ව නිරීක්ෂණය කරනවා.
අනුකරණය (Copying): අම්මා දුරකථනයෙන් කතා කරන විලාසය, තාත්තා කේන්ති ගිය විට බනින වචන, හෝ දෙන්නා අතර ඇති වන සුළු අමනාපකම් දරුවා තදින් සිතට ගනියි.
හැඟීම් හඳුනාගැනීම: ඔබ සිනාසුණත් සිතින් පසුවන්නේ දුකකින් හෝ ආතතියකින් නම්, දරුවාට එය වහාම දැනේ. ඔවුන් ඔබේ මුහුණේ ඉරියව් සහ කටහඬේ වෙනස්වීම් මත ඔබ සිටින මානසික මට්ටම තේරුම් ගැනීමට උත්සාහ කරයි.
2. පෙර පාසල් ටීචර් මේවා දැනගන්නේ කොහොමද?
ළමා මනෝවිද්යාවට අනුව, දරුවෙකු නිවසින් බැහැරව වැඩිපුරම කාලය ගත කරන සහ තමන්ට ආරක්ෂාව දැනෙන මීළඟ ස්ථානය පෙර පාසලයි. එහිදී ඔවුන් තමන් දකින දේ බාහිර ලෝකයට මුදාහරින්නේ ප්රධාන ක්රම 3ක් ඔස්සේය:
අ) අසීමිත කතාබහ (Spontaneous Chats)
පුංචි දරුවන්ට රහස් රකින්නට තේරෙන්නේ නැත. "ඊයේ රෑ අම්මයි තාත්තයි රණ්ඩු වුණා", "තාත්තා අම්මට බැන්නා", "අම්මා ඊයේ රෑ ඇඬුවා" වැනි නිවසේ සිදුවන අතිශය පෞද්ගලික දේවල් පවා ඔවුන් ඉතාම අහිංසක ලෙස ටීචර් සමඟ පවසන්නේ කිසිදු චකිතයකින් තොරවය.
ආ) රඟපෑම් සහ සෙල්ලම් (Role Play)
පෙර පාසලේ 'ගෙදර සෙල්ලම්' (Dollhouse play) කරන විට දරුවා හැසිරෙන ආකාරයෙන් නිවසේ පරිසරය මනාව පිළිඹිබු වේ.
උදාහරණයක් ලෙස, දරුවා බෝනික්කාට ආදරයෙන් සලකන්නේ නම් නිවසේ ආදරණීය පරිසරයක් ඇති අතර, බෝනික්කාට කෑගසමින් දඬුවම් කරන්නේ නම් නිවස තුළ පවතින්නේ ආතති සහගත වටපිටාවකි.
ඇ) චිත්ර සහ නිර්මාණ (Drawings)
දරුවන් අඳින චිත්රවලින් ඔවුන්ගේ යටිසිත කියවිය හැකිය. මව්පියන් ඈතින් අඳින දරුවන්, කළු හෝ තද වර්ණ වැඩිපුර භාවිතා කරන දරුවන් තුළින් නිවසේ පවතින යම් නොසන්සුන්බවක් පෙන්නුම් කරන අතර, එය ගුරුතුමියට පහසුවෙන් හඳුනාගත හැකිය.
3. දරුවාගේ අවධානය අපට කියන පණිවිඩය කුමක්ද?
දරුවා ඔබ දෙස මේ තරම් අවධානයෙන් සිටීමෙන් පැහැදිලි වන්නේ ඔවුන් නිවසේ පරිසරයෙන් දැඩි ලෙස පෝෂණය වන හෝ පීඩාවට පත්වන බවයි.
යහපත් බලපෑම: නිවස තුළ ආදරය, ගෞරවය සහ සාමකාමී බව පවතින විට, දරුවා පෙර පාසලේදී ඉතා සතුටින්, සාමකාමීව සහ මිත්රශීලීව හැසිරේ. ඔවුන් ගුරුතුමියට පවසන්නේ "තාත්තා ඊයේ අම්මට මලක් දුන්නා" වැනි සුන්දර කතාය.
අයහපත් බලපෑම: නිවස තුළ නිතර අඬදබර, කෑකෝ ගැසීම් හෝ නොසලකා හැරීම් පවතී නම්, දරුවා පෙර පාසලේදී නොසන්සුන් වීම, හුදෙකලා වීම හෝ ප්රචණ්ඩකාරී ලෙස හැසිරීම පෙන්වයි.
දෙමාපියන් ලෙස අප සතු වගකීම
"ටීචර් හැමදේම දැනගන්නවා" කියා දරුවාට දෝෂාරෝපණය කිරීම හෝ දරුවා බිය ගැන්වීම නොකළ යුතුය. දරුවා යනු නිවසේ කැඩපතයි.
එබැවින්, පෙර පාසල් ගුරුතුමිය ඉදිරියේ ඔබේ පවුලේ ගෞරවය රැක ගැනීමටත් වඩා, දරුවාගේ මානසික සුවතාවය වෙනුවෙන් සැමවිටම නිවස තුළ සුදුසු, ආදරණීය සහ ආදර්ශමත් පරිසරයක් නිර්මාණය කිරීමට දෙමාපියන් වගබලා ගත යුතුය. ඔබ දරුවාට දෙන හොඳම දායාදය වන්නේ සතුට පිරි නිවසකි.
lilani Jayawickrama පවුල් සෞඛ්ය සේවා නිලදාරීනී සටහනක්...
