Department of Probation and Childcare -WP

07/08/2026

ආයතනගත දරුවන්ගේ වෘත්තීය කුසලතා නගා සිටුවීම අරමුණු කරගනිමින් NVQ 03 වන මට්ටමේ වෘත්තීය පුහුණු පාඨමාලාවක් ලෙස මාකොළ සහතික කළ පාසලේ නේවාසික දරුවන් සඳහා විධිමත් බේකරි ශිල්පී පාඨමාලාවක් හා රම්මුතුගල සහතික කළ බාලිකා පාසලේ දැරියන් සඳහා විධිමත් රූපලාවන්‍ය ශිල්පී පාඨමාලාවක් ඉදිරියේදී ආරම්භ කිරීමට නියමිතය.
ඒ සඳහා වන අවබෝධතා ගිවිසුම් වලට අදාලව වසර 03 ක කාල සීමාවක් සඳහා බලපැවැත්වෙන පරිදි ශ්‍රී ලංකා වෘත්තීය පුහුණු අධිකාරියේ සභාපති හා පරිවාස හා ළමාරක්ෂක සේවා දෙපාර්තමේන්තුවේ කොමසාරිස් විසින් 2026.07.31 දින ශ්‍රී ලංකා වෘත්තීය පුහුණු අධිකාරියේදී අත්සන් තබන ලදී.

05/08/2026

බස්නාහිර පළාතේ පිහිටි දිවා සුරැකුම් මධ්‍යස්ථානවල තොරතුරු එක් රැස් කිරීම

21/07/2026

මාකොළ හා රන්මුතුගල සහතික කළ පාසැල්වල නේවාසික රැකවරණය ලබන දරුදැරියන්ගේ වෘත්තීය නිපුණතා සංවර්ධනය වෙනුවෙන් කෙටි කාලීන සූපවේදී පාඨමාවක් ආරම්භ කෙරිණ . මූලික සහතික පත්‍ර පාඨමාලාවක් ලෙස සූපවේදී ක්ෂේත්‍රයේ වෘත්තීයක නියැලීමට අවශ්‍ය පසුබිම සකස් කිරීම අරමුණු කර ගනිමින් මාකොල සහතික කළ පාසලේ බේකරි අංශයේ දී 2026/05/19 හා 2026/05/27 වන දින ආරම්භ කරන ලද පැය 72 ක කෙටි කාලීන සූපවේදී පාඨමාලාව ආයතන දෙකට වෙන් වෙන් ලෙස පැවැත්වේ .

21/07/2026

ආයතනගත දරුවන්ගේ රසවින්දන පරාසය පුළුල් කිරීමේ අරමුණින් සංවිධාන කළ" සුසර හර" අධ්‍යාපනික හා නිර්මාණ කුසලතා සංවර්ධන වැඩසටහන රම්මුතුගල සහතික කළ පාසලේදි 2026.06.12 දින පවත්වන ලදී.බාහිර කථිකාචාර්ය කිත්සිළු ධනජ වික්‍රමසිංහ මහතා ඇතුළු කණ්ඩායම විසින් මේ සදහා සම්පත්දායකත්වය දක්වන ලදී.

21/07/2026

සිංහල හින්දු අලුත් අවුරුදු උත්සවය හා බැඳී ජනසංස්කෘතිය, සංස්කෘතිකාංග, චාරිත්‍ර වාරිත්‍ර, ජන ක්‍රීඩා, පිළිබඳව දරුවන්ට අවබෝධයක් ලබාදීමත් , දරුවන්ගේ ඉදිරිපත්වීමේ හැකියාව වර්ධනය කිරීමත්, මානසික සුවතාවය මෙන්ම අන්තර් පුද්ගල සබඳතා වර්ධනය කිරීමේ අරමුණින් ආයතනගත දරුවන් වෙනුවෙන් සංවිධාන කළ සූර්ය මංගල්‍යය අලුත් අවුරුදු උත්සවය 2026.04.24 වන දින සෞඛ්‍ය දේශීය වෛද්‍ය සමාජ සුභසාධන පරිවාස හා ළමාරක්ෂක සේවා කාන්තා කටයුතු හා සභා කටයුතු අමාත්‍යාංශ ලේකම් එල්. ඒ. කළුකපුආරච්චි මැතිතුමාගේ ප්‍රධානත්වයෙන් මාකොළ සහතික කළ පාසලේදි පවත්වන ලදී. බස්නාහිර පළාත් පරිවාස කොමසාරිස්තුමිය ඇතුළු රජයේ නිලධාරීන් පිරිසක් මෙම අවස්ථාවට සහභාගි වූහ .

30/06/2026

පානදුර රජයේ ළමුන් භාර ගැනීමේ මධ්‍යස්ථානයේ නේවාසිකව රැකවරණය ලබන දරුවන්ට පාරිසරික හා සාමාජීය අධ්‍යාපනය ලබා දීම හා නිසි සමාජානු යෝජනය මෙන්ම බුද්ධි සංවර්ධනය අරමුණු කර ගනිමින් 2026.6.23 දින දෙහිවල සත්වෝද්‍යානය වෙත අධ්‍යයන චාරිකාවක් රැගෙන යන ලදී. මේ සඳහා නේවාසිකව සිටින දරුවන් විසි දෙනෙකු සහභාගී විය. දරුවන්ගේ සතුට විනෝදය රැදුණු මෙම චාරිකාව සදහා බස්නාහිර පලාත් පරිවාස හා ළමාරක්ෂක සේවා කොමසාරිස් එච්.ඒ.හිමාලි පී.විමලසේන මහත්මිය ඇතුළු ප්‍රධාන කාර්යාලයේ නිලධාරීන් සහ ප්‍රජාපතී ආයතනයේ නිලධාරින් සහභාගි විය. නේවාසිකව රැකවරණය ලබන මෙම දරුවන් මෙවැනි අධ්‍යයන චාරිකාවකට මෙන්ම දෙහිවල සත්වෝද්‍යානය වෙත රැගෙන ගිය ප්‍රථම අවස්ථාව ද මෙය වේ.

15/06/2026

සෞන්දර්ය හා මෘදු කුසලතා සංවර්ධනය තුළින් මනා පෞරුෂයෙන් හා සහකම්පනයෙන් යුත් යහපත් පුරවැසියකු සමාජගත කිරීම අරමුණු කර ගනිමින් මාකොළ බාලක රැදවුම් නිවාසයේ පුනරුත්ථාපනය වන දරුවන් වෙනුවෙන් සංවිධාන කළ මනෝ සමාජීය කුසලතා හා පෞරුෂත්ව සංවර්ධන වැඩසටහන් මාලාවේ පළමු වැඩසටහන 2026.05.21
වන දින මාකොළ රැදවුම් නිවාසයේදී පවත්වන ලදී. මේ සදහා සම්පත්දායකත්වය ලබා දෙන ලද්දේ ශ්‍රී ලංකා පදනම් ආයතනයේ අධ්‍යක්ෂ (අධ්‍යයන)ආචාර්ය සමන් වීරවංශ මහතා විසිනි.

15/06/2026

රම්මුතුගල සහතික කළ බාලිකා පාසලේ දැරියන් ශ්‍රී ලංකා බාලදක්ෂිකා සංගමයේ ප්‍රජා බාලදක්ෂිකාවන් ලෙස නවක පෙළ පදක්කම් පැළඳවීමේ උත්සවය ප්‍රජා බාලදක්ෂිකා සංගමයේ කොමසාරිස් වත්සලා එන්. නාරන්දෙණිය මහත්මියගේ හා බස්නාහිර පළාත් පරිවාස හා ළමාරක්ෂක සේවා දෙපාර්තමේන්තුවේ කොමසාරිස් එච්.ඒ.හිමාලි පී.විමලසේන මහත්මියගේ ප්‍රධානත්වයෙන් 2026.05.19 වන දින රම්මුතුගල සහතික කළ පාසලේදි පවත්වන ලදී.

09/06/2026

වෙසක් සද නැගී සොමිරැස් කිරණ ගලා
මෙත් කරුණා ගුණෙන් සැම සිත් එලිය වෙලා
අසමසම වූ සම්බුදු ගුණ සිහි කරලා
දූ දරු කැළම මුණි පුදනට සැරසීලා

සම්බුදු තෙමගුල සිහිකරමින් වෙසක් පුන් පොහෝ දින පරිවාස දෙපාර්තමේන්තුවේ ආයතනවල රැකවරණය ලබන දුවා දරුවන් ආමිස හා ප්‍රතිපත්ති පූජාවල නිරත වූ අයුරු

21/03/2026