Department of Probation and Childcare -WP

2026.02.12 වෙන දින රම්මුතුගළ සහතික කළ පාසලේ නේවාසිකව රැකවරණය ලබන දරුවන්ගේ පෞරුෂත්ව සංවර්ධනය සහ ජීවන ඉලක්ක සකස් කිරීම අරමුණු කර ගනිමින් උපදේශන හා ජීවන කුසලතා වැඩසටහනක් දෙපාර්තමේන්තු නිලධාරීන්ගේ සම්පත් දායකත්වයෙන් පවත්වන ලදී. ඒ සඳහා පාසලේ පාසල්පතිතුමියද සහභාගි වූ අතර මෙම වැඩසටහනට දරුවන් ඉතා උනන්දුවෙන් උද්යෝගයෙන් සහභාගි වීම සුවිශේෂී කරුණකි.
එම වැඩසටහනෙහි ඡායාරූප කිහිපයක් මෙසේ දැක්විය හැකිය.

ලෝක ළමා දින සැමරුම වෙනුවෙන් බස්නාහිර පළාත් පරිවාස හා ළමාරක්ෂණ සේවා දෙපාර්තමේන්තුවේ පාලනය හා අධීක්ෂණය යටතේ ක්‍රියාත්මක ආයතනගත සහ ළමා සංවර්ධන මධ්‍යස්ථානවල රැකවරණය ලබන දරුවන්ගේ කලා කුසලතා ඇගයීම අරමුණු කර ගනිමින් සංවිධාන කරන ලද “වීර චාරිකා” ළමා දින උළෙල බස්නාහිර පළාත් ගරු ආණ්ඩුකාර හනීෆ් යූසුෆ් මහතාගේ ප්‍රධානත්වයෙන් නෙළුම් පොකුණ රඟහලේදී 2025.11.18 දින උත්කර්ෂවත් අයුරින් පවත්වනු ලැබිණ. කුතුහලය, නොපසුබස්නා උත්සාහය හා කැපවීම තුළින් ජීවන චාරිකාව සුන්දරව ජයග්‍රහණය කිරීමට දරුවෙකු සතු ශක්‍යතාව ඉස්මතු කිරීම අරමුණු කර ගනිමින් මෙවර ළමා දින කලා උළෙල “වීර චාරිකා ” ලෙස නම් කරනු ලැබිණ. මෙම දෙපාර්තමේන්තුවේ අධීක්ෂණය හා පාලනය යටතේ පවතින ළමා සංවර්ධන මධ්‍යස්ථාන 101 හි සහ ආයතනවල දරුවන් 2300කට ආසන්න පිරිසක් නේවාසිකව රැකවරණය ලබති. එම දරුවන්ගේ කලා කුසලතා අගයමින් ගායන, නර්තන, වාදන , රංගන, චිත්‍ර,අත්කම් නිර්මාණ , පද්‍ය නිර්මාණ, කෙටිකතා, ගද්‍ය රචනා, නිවේදන , වීදි නාට්‍ය ආදි තරඟ ඉසව් රැසක් දිස්ත්‍රික් මට්ටමින් සහ පලාත් මට්ටමින් පවත්වන ලද අතර ජයග්‍රාහකයින් 1051 දෙනෙකු මෙහිදී ඇගයීමට ලක් කෙරිණි .දරුවන්ගේ කුසලතා වර්ධනය කරමින් තරඟ ජයග්‍රාහකයින් ඇගයීමට ලක් කිරීම හා තරඟ ඉසව්වලට ඉදිරිපත් වූ දරුවන් අභිප්‍රේරණය කිරීම මෙහිදී සිදු කරනු ලැබිණ. පාර්ලිමේන්තු මන්ත්‍රී සමන්මලී ගුණසිංහ මහත්මිය සහ බස්නාහිර පළාත් ප්‍රධාන ලේකම් කේ.ජී.ප්‍රදීප් පුෂ්පකුමාර, මුදල් කොමිෂන් සභාවේ ලේකම් ඒ.ටී.එම්.යූ.ටී.බී.තෙන්නකෝන්, බස්නාහිර පළාත් සෞඛ්‍ය අමාත්‍යාංශයේ ලේකම් එල්.ඒ.කළුකපුආරච්චි , මුදල් කොමිෂන් සභාවේ සභාපති සුමිත් අබේසිංහ, ජනාධිපති කාර්යාලයේ මහජන සම්බන්ධතා අංශයේ අධ්‍යක්ෂ ජනරාල් ධර්මසිරි යන මහත්වරුන් ඇතුළු රජයේ නිලධාරීන් රැසක් මෙම කලා උළෙල සඳහා සහභාගී වූහ.

දිවයින පුරා සේවයේ නියුතු පරිවාස නිලධාරීන්ගේ දැනුම යාවත්කාලීන කිරීම හා අත්දැකීම් හුවමාරු කිරීම අරමුණු කරගනිමින් UNICEF මූල්‍ය අනුග්‍රහය මත බාස්නාහිර පලාත් පරිවාස හා ළමාරක්ෂක සේව දෙපාර්තමේන්තුව මගින් සංවිධාන කළ දෙදින පුහුණු වැඩමුළුව (පරිවාස නිලධාරීන්ගේ සංස්කරණ සම්මේලනය) 2026.01.17 සහ 2026.01.18 යන දෙදින කැළණිය, රෝයල් ග්‍රෑන්ඩ් පැරඩයිස් ෙහෝටල් පරිශ්‍රයේදී ඉතා සාර්ථකව පවත්වනු ලැබිණ. 2019 වසරෙන් පසුව දිවයිනේ සමස්ත පරිවාස නිලධාරීන් එක්රැස් කරමින් පවත්වන ලද සංස්කරණ සම්මේලනය මෙය වන අතර, මෙවර එහි සත්කාරක පළාත ලෙස බස්නාහිර පළාත කටයුතු කරනු ලැබිණි. මේ සඳහා පළාත් නියෝජනය කරමින් පළාත් පරිවාස කොමසාරිස්වරුන් ,පරිවාස නිලධාරීන් ඇතුළු නිලධාරීන් සහභාගී විය. පරිවාස නිලධාරීන්ගේ රාජකාරි කටයුතු සඳහා අත්‍යවශ්‍ය අණපනත්, නව සංශෝධන , ළමා අයිතිවාසිකම් හා නීතිය , පරිවාස නිලධාරීන්ගේ පෝෂණ සහ මානසික සෞඛ්‍ය යහපැවැත්ම, පරිවාස භාරයේ සිටින දරුවන්ගේ පෝෂණ සහ සෞඛ්‍ය යහපැවැත්ම ප්‍රවර්ධනය කිරීමෙහිලා පරිවාස නිලධාරීන්ගේ කාර්යභාර්යය ආදී විෂය ක්ෂේත්‍ර නියෝජනය කරමින් ඒ ඒ විෂය ක්ෂේත්‍රයන්හි ප්‍රවීණ සම්පත්දායකයින්ගෙන් දේශන පවත්වනු ලැබිණි. දැනුම යාවත්කාලීන කිරීම, දැනුම හුවමාරුව සහ පළාත් අතර අන්තර් සබඳතා වර්ධනය කිරීමට මෙම දෙදින පුහුණු වැඩමුළුව මහෝපකාරී විය.මෙම වැඩමුළුව තුල පවත්වන ලද පරිවාස නිලධාරින්ගේ සුහද හමුව සදහා මුදල් කොමිෂන් සභාවේ ලේකම් ඒ.ටී.එම්.යූ.ටී.බී.තෙන්නකෝන් සහ ජනාධිපති නීතිඥ සුහද ගම්ලත් යන මහත්වරු විශේෂ ආරාධිතයින් ලෙස සහභාගි වූහ .

බස්නාහිර පළාත් පරිවාස හා ළමාරක්ෂක සේවා දෙපාර්තමේන්තුවේ පාලනය හා අධීක්ෂණය යටතේ පවතින ආයතනවල සහ ළමා සංවර්ධන මධ්‍යස්ථානවල නේවාසිකව රැකවරණය ලබන දරුවන් වෙනුවෙන් සංවිධාන කළ පළාත් ක්‍රීඩා උළෙල දියගම මහින්ද රාජපක්ෂ ක්‍රීඩාංගණයේදී 2025.12.23 වන දින උත්කර්ෂවත් අයුරින් පැවැත්විණි .දිස්ත්‍රික් මට්ටමින් පවත්වන ලද තරගවල ජයග්‍රාහකයින් පළාත් මට්ටමින් තරග කළ අතර ,දිස්ත්‍රික් සහ පළාත් මට්ටමින් ජයග්‍රහණය කළ දරුදැරියන් 978 සදහා සහතික ,සම්මාන සහ ත්‍යාග මෙහිදී ප්‍රදානය කරන ලදී.බස්නාහිර පළාතේ ළමා ස‍ංවර්ධන මධ්‍යස්ථාන 101ක් පවතින අතර ඒ තුළ දරුවන් 2300කට ආසන්න පිරිසක් මේ වන විට නේවාසිකව රැකවරණය ලබති.දරුවන්ගේ ලෝකයට යහපත් හෙට දවසක් නිර්මාණය කිරීම දැක්ම කරගත් පළාත් පරිවාස දෙපාර්තමේන්තුව මගින් දරුවන්ගේ කුසලතා සංවර්ධනය කිරීම සදහා වසර පුරා විවිධ වැඩසටහන් ස‍ංවිධාන කරන අතර ,වසරක් පාසා පවත්වන ක්‍රීඩා උළෙල ඒ තුළ සුවිශේෂී වේ.අභියෝග ,ඉලක්ක ජය ගැනීමත්,මනා හික්මීමකින් යුතු කණ්ඩායම් හැගීමෙන් කටයුතු කළ හැකි දරුවෙකු සමාජගත කිරීමට අවැසි පරිසරය නිර්මාණය කිරීම ක්‍රීඩා උලෙළක් පැවත්වීමේ ප්‍රධාන අරමුණයි .මුදල් කොමිෂන් සභාවේ ලේකම් ඒ.ටී.එම්.යූ.ටී.බී. තෙන්නකෝන්,බස්නාහිර පළාත් සෞඛ්‍ය අමාත්‍යාංශයේ ලේකම් එල්.ඒ.කළුකපුආරච්චි යන මහත්වරුන් සහ බස්නාහිර පළාත් පරිවාස හා ළමාරක්ෂක සේවා දෙපාර්තමේන්තුවේ කොමසාරිස් නීතිඥ ඒ.තමරිකා හර්ෂනී මහත්මිය ඇතුළු රාජ්‍ය නිලධාරින් පිරිසක් ක්‍රීඩා උළෙල සදහා සහභාගි වුහ.

පරිවාස හා ළමාරක්ෂක සේවා දෙපාර්තමේන්තුවේ ආයතන ගතව සහ ළමා සංවර්ධන මධ්‍යස්ථානවල නේවාසිකව රැකවරණය ලබන 2025 අපොස සාමාන්‍ය පෙළ විභාගය සඳහා 2026 පෙබරවාරි මස පෙනී සිටින දරු දැරියන් හට
සිංහල ගණිතය විද්‍යාව ඉතිහාසය දෙමළ හා ඉංග්‍රීසි යන ප්‍රධාන විෂයන් සඳහා සිංහල හා දෙමළ මාධ්‍යයෙන් ඉදිරිපත් වන දරුවන් වෙනුවෙන් මාර්ගගත ඉගැන්වීම් ක්‍රමය ඔස්සේ සම්මන්ත්‍රණ ඉතා සාර්ථක සහභාගිත්වයක් සමඟ පැවැත්වේ.

ශ්‍රීලංකා බලදක්ෂිකා සංගමයේ ප්‍රජා බලදක්ෂිකා අංශය විසින් සංවිදානය කරන ලද බාලිකා නිවාස වල දැරියන්ගේ ජාතික දැනුම මිනුම තරගා වලියේ අවසන් තරග වටය ශ්‍රීලංකා බලදක්ෂිකා මුලස්ථානයෙදී පවත්වනලදී.
මේ සඳහා රන්මුතුකල බාලිකා නිවාසයේ දෑරියන්ද දැඩි උනන්දුවකින් හා උද්යෝගයකින් සහභාගී වන ලදී.

රම්මුතුගල සහතික කළ පාසලේ නේවාසික දරුවන් සඳහා මාස 03 ක කෙටි කාලීන වෘත්තීය පුහුණු පාඨමාලාවන් ලෙස රෙදි පින්තාරු පාඨමාලාවක්, මෘදු සෙල්ලම් භාණ්ඩ නිෂ්පාදන පාඨමාලාවක්, වුල් නුල් නිෂ්පාදන පාඨමාලාවක්, ඇඳ රෙදි හා තිර රෙදි නිෂ්පාදන පුහුණු පාඨමාලාවක් හා ටෙඩි බෙයාර් නිෂ්පාදන පුහුණු පාඨමාලාවක් 2025 වර්ෂයේදී රම්මුතුගල සහතික කළ පාසලේදී ඉතා සාර්ථක අන්දමින් පවත්වන ලදී.

මාකොළ සහතික කළ පාසලේ නේවාසික දරුවන් සඳහා මාස 03 ක කෙටි කාලීන වෘත්තීය පුහුණු පාඨමාලාවන් ලෙස උළු මැටි ආශ්‍රිත විසිතුරු මැටි භාණ්ඩ නිෂ්පාදන පාඨමාලාවක් හා කේක් හා පේස්ට්‍රි නිෂ්පාදන පුහුණු පාඨමලාවක් මාකොළ සහතික කළ පාසලේදී ඉතා සාර්ථක අන්දමින් පවත්වන ලදී.