Vahan Tekeyan School in Lebanon

Swipe to see the transformation!!💙

Ուրբաթ, 5 Յունիս 2026-ին, վարժարանիս շրջափակին մէջ տեղի ունեցաւ վարժարանիս 75 ամեակին նուիրուած մարզական օր։ Օրուան ընթացքին աշակերտները մասնակցեցան բազմազան մարզական մրցումներու եւ խաղերու՝ դրսեւորելով իրենց կարողութիւնները, համագործակցութեան ոգին եւ յաղթանակի ձգտումը։
Այս առիթով, վարժարանիս հիմնադրութեան 75-ամեակին նուիրուած յոբելենական ձեռնարկներու ծիրէն ներս, աշակերտներուն բաժնուեցան յատուկ պատրաստուած յիշատակի վերնաշապիկներ եւ գլխարկներ:
Ձեռնարկին յատուկ շուք հաղորդեց օրուան հիւրը՝ Թէքէեանցի նախկին շրջանաւարտ Գէորգ Գէորգը, որ իր մարզական ձեռքբերումներով կը շարունակէ պատիւ բերել իր դպրոցին:
Ուրախութեամբ կը նշենք նաեւ, որ մարզական օրուան ներկայ էին վարժարանիս բազմաթիւ նախկին սաներ, որոնց մասնակցութեամբ օրը վերածուեցաւ գեղեցիկ հանդիպման մը՝ ամրապնդելով վարժարանիս սերունդներուն միջեւ գոյութիւն ունեցող կապը եւ պատկանելիութեան ոգին։

Հինգշաբթի, 4 Յունիս 2026-ին, մեր վարժարանի Յակոբ Պարսամեան սրահին մէջ հանդիսաւոր մթնոլորտի մէջ նշուեցաւ վարժարանիս «Վերջին Զանգ»-ը։ Այս յուզիչ եւ յիշարժան առիթին համար` շրջանաւարտ Միջն. Գ. դասարանի աշակերտները պատրաստած էին խորհրդանշական ու բովանդակալից յայտագիր մը, որուն մէջ ամփոփեցին իրենց դպրոցական տարիներու գեղեցիկ յուշերն ու ձեռքբերումները։
Նոյն օրը նաեւ տեղի ունեցաւ ձեռային աշխատանքներու ցուցադրութիւն եւ վարժարանիս բոլոր աշակերտները շրջեցան սեղաններուն վրայ ցուցադրուած իրենց ձեռային աշխատանքներուն շուրջ, հիացմունքով դիտեցին զանոնք եւ յաւերժացուցին օրը դասարանային խմբանկարներով: