ປະກາດ Pakaad

ໃຜແນ່ເຄີຍເຮັດ
ເວລາເຮັດເມນູຕໍາ ລະຕ້ອງໃສ່ເປືອກໝາກນາວລົງນໍາ ?
ບາງຄົນກໍ່ວ່າ :
*ເສຍດາຍນໍ້າມັນອອກບໍ່ໝົດ
*ມັນຊ່ວຍເພີ່ມຄວາມຫອມໃຫ້ອາຫານ
*ມັນຊ່ວຍເພີ່ມສີສັນໃຫ້ອາຫານ

ແມ່ນແລ້ວ ທ່ານຄິດຖືກ
ແຕ່ທ່ານຕ້ອງລ້າງໃຫ້ສະອາດກ່ອນຈຶ່ງຈະປອດໄພແທ້.
ເພາະເຮົາບໍ່ຮູ້ດອກວ່າ ພາຍໃນເປືອກໝາກນາວທີ່ເຮົາເຫັນມັນກ້ຽງ ມັນເຫຼື້ອມງາມນັ້ນ ມັນໄດ້ເຊື່ອງຊ້ອນ ສານເຄມີ ສານຂ້າແມງໄມ້ ຂີ້ຝຸ່ນຂີ້ດິນ ແລະ ອື່ນໆ
ທີ່ສົ່ງຜົນສະທ້ອນຕໍ່ຮ່າງກາຍໄດ້ເຊັ່ນ : ຖອກທ້ອງ ວິນວຽນ ເປັນຕົ້ນ.

ຊົມເຊີຍ ນ້ອງນຸ່ງລູກຫຼານ ທີ່ ສໍາເລັດ ເສັງຈົບ ມ.7 ມື້ສຸດທ້າຍມື້ນີ້! ຂໍອວຍພອນ ໃຫ້ໄດ້ຄະແນນສູງໆ ແລະ ກະກຽມຄວາມພ້ອມ ເສັງເຂົ້າ ມະຫາວິທະຍາໄລ ແລະ ສາຍວິຊາຊີບຕ່າງໆ

ຂີ່ລົດໄວໂພດ ຈົນລົດປີ້ນອອກທາງໄປຄໍ້າໃສ່ຕົ້ນໄມ້
👇👇👇

ຕໍາຫຼວດໄທ ສົ່ງຕົວຜູ້ຕ້ອງຫາຄະດີຢາເສບຕິດ ແລະ ເຂົ້າເມືອງຜິດກົດໝາຍໃຫ້ ເຈົ້າຫນ້າທີລາວ
...........
ວັນທີ 17 ມິຖຸນາ 2026 ທີ່ດ່ານຂົວມິດຕະພາບ ລາວ-ໄທ ແຫ່ງທີ 2 (ສະຫວັນນະເຂດ-ມຸກດາຫານ), ເຈົ້າໜ້າທີ່ກວດຄົນເຂົ້າເມືອງ (ຕມ) ແຂວງມຸກດາຫານ ໄດ້ສົ່ງມອບຕົວຜູ້ຕ້ອງຫາທ້າວ ຈັນທະລັງສີ ວົງມະສອນ ອາຍຸ 32 ປີ ປະຊາຊົນແຂວງສະຫວັນນະເຂດ ໃນຄະດີ ຕາມໝາຍຈັບຂອງ ສປປ ລາວ (ຄະດີຢາເສບຕິດ-ຢາບ້າ) ທີ່ໄດ້ຫລົບໜີການຈັບກຸມເຂົ້າມາອາໄສຢູ່ໃນຣາຊະອານາຈັກໄທ, ເຈົ້າໜ້າທີ່ຝ່າຍໄທນຳໂດຍ ພັນຕຳຫລວດເອກ ທະນິສອນ ແສງທ່ານັ່ງ ຫົວໜ້າດ່ານກວດຄົນເຂົ້າເມືອງແຂວງມຸກດາຫານ, ເຈົ້າໜ້າທີ່ຝ່າຍລາວນຳໂດຍ ພົນຈັດຕະວາ ລຳໂພງ ໄຊທອງ ຫົວໜ້າກອງບັນຊາການປ້ອງກັນຄວາມສະຫງົບ (ປກສ) ແຂວງສະຫວັນນະເຂດ ແລະ ພາກສ່ວນກ່ຽວຂ້ອງທັວສອງຝ່າຍເຂົ້າຮ່ວມ.

ຜູ້ຖືກຫາດັ່ງກ່າວ, ໄດ້ຫລົບໜີມາລີ້ຊ່ອນຢູປະເທດໄທ ໂດຍບໍ່ໄດ້ຮັບອະນຸຍາດ ຜ່ານຊ່ອງທາງທໍາມະຊາດ, ບໍ່ມີໜັງສືຜ່ານແດນ (Passport) ແລ້ວມາຫລົບພັກອາໄສຢູ່ເຮືອນບໍ່ມີເລກທີ ໝູ່ທີ 10 ບ້ານສີແກ້ວ, ຕຳບົນສີແກ້ວ, ອໍາເພີເລີງນົກທາ, ຈັງຫວັດຍະໂສທອນ ແລະ ຖືກຈັບກຸມຕົວຢູ່ເຮືອນຫລັງດັ່ງກ່າວ. ຜູ້ກ່ຽວຮັບສາລະພາບວ່າ: ໄດ້ເຂົ້າມາໃນລາຊະອານາຈັກໄທ ເມື່ອເດືອນເມສາ 2026 ຊ່ວງຫລັງວັນສົງການ (ຈື່ວັນທີບໍ່ໄດ້).

ເຈົ້າໜ້າທີ່ຊຸດຈັບກຸມຈຶ່ງໄດ້ຄວບຄຸມຕົວຜູ້ຕ້ອງຫາ ພ້ອມແຈ້ງຂໍ້ກ່າວຫາວ່າ "ເປັນບຸກຄົນຕ່າງດ້າວເຂົ້າມາ ແລະ ພັກອາໄສຢູ່ໃນລາຊະອານາຈັກໄທ ໂດຍບໍ່ໄດ້ຮັບອະນຸຍາດ" ພ້ອມທັງແຈ້ງສິດ ແລະ ຂໍ້ກ່າວຫາໃຫ້ຜູ້ຕ້ອງຫາຊາບ ກ່ອນນຳຕົວສົ່ງພະນັກງານສອບສວນເພື່ອດຳເນີນຄະດີຕໍ່ໄປ.
ຈາກນັ້ນ, ເຈົ້າໜ້າທີ່ກວດຄົນເຂົ້າເມືອງແຂວງມຸກດາຫານ ຈຶ່ງໄດ້ສົ່ງມອບຕົວ ທ້າວ ຈັນທະລັງສີ ວົງມະສອນ ໃຫ້ກັບເຈົ້າໜ້າທີ່ສືບສວນ-ສອບສວນ ຂອງກອງບັນຊາການ ປກສ ແຂວງສະຫວັນນະເຂດ ເພື່ອນຳຕົວກັບໄປດຳເນີນຄະດີຕາມກົດໝາຍຂອງ ສປປ ລາວ ຕໍ່ໄປ.
ທີ່ມາ : ຂ່າວເສດຖະກິດສັງຄົມ

ບຸນບັ້ງໄຟລ້ານປະຈຳປີ2026 ຂອງເມືອງເຟືອງ ແຂວງວຽງຈັນ ຈະຈັດຂຶ້ນວັນທີ 27-28/6/2026ນີ້ ພາຍໃນງານຈະໄດ້ພົບກັບຂະບວນເຊີ້ງບັ້ງໄຟຂອງແຕ່ລະບ້ານຢ່າງຍິ່ງໃຫ່ຍ ແລະ ພົບກັບບັ້ງໄຟລ້ານ, ບັ້ງໄຟແສນ,ບັ້ງໄຟຫມື່ນ ຈາກທົ່ວສາລະທິດທີ່ຈະນຳມາຈູດບູຊາ ພະຍາແຖນ ເພຶ່ອຂໍຟ້າຂໍຝົນໃຫ້ຕົກຕາມລະດູການ ໃຫ້ປະຊາຊົນໄດ້ທຳການຜະລິດ. ຢ່າລືມຢ່າພາດຫາໂອກາດໄປຮ່ວມມ່ວນຊື່ນນຳກັນເດີທຸກທ່ານ.
ທີ່ມາ : ໂທລະພາບນະຄອນຫຼວງວຽງຈັນ

ເມືອງສາມັກຄີໄຊ ທຳລາຍສິນຄ້າໝົດອາຍຸ ແລະ ເສື່ອມຄຸນນະພາບຫຼາຍລາຍການ

___________________________
ເມື່ອຕອນບ່າຍວັນທີ 18 ມິຖຸນາ 2026 ນີ້, ຫ້ອງການອຸດສາຫະກຳ ແລະ ການຄ້າ ເມືອງສາມັກຄີໄຊ ແຂວງອັດຕະປື, ຮ່ວມກັບພະແນກອຸດສາຫະກຳ ແລະ ການຄ້າແຂວງ, ໄດ້ຈັດພິທີທຳລາຍສິນຄ້າອຸ ປະໂພກ-ບໍລິໂພກ ທີ່ໝົດອາຍຸການນຳໃຊ້ ແລະ ເສື່ອມຄຸນນະພາບ ທີ່ຍຶດມາໄດ້ຈາກການລົງກວດກາ ຕາມທ້ອງຕະຫຼາດ ແລະ ບັນດາຫ້າງຮ້ານພາຍໃນເມືອງ, ເຂົ້າຮ່ວມໃນພິທີທໍາລາຍສິນຄ້າດັ່ງກ່າວມີທ່ານ ລັດສະໝີ ບຸດຕະວົງ ຮອງປະທານຄະນະກຳມະການປົກຄອງເມືອງສາມັກຄີໄຊ, ມີ ທ່ານ ພູໄຊ ວໍລະລາດ ຮອງຫົວໜ້າພະແນກອຸດສະຫະກຳ ແລະ ການຄ້າແຂວງ, ພ້ອມດ້ວຍແຂກທີ່ຖືກເຊີນຈາກອ້ອມຂ້າງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ຄຳສະຫວ່າງ ທອງປະເສີດ ຮອງຫົວໜ້າຫ້ອງການອຸດສາຫະກຳ ແລະ ການຄ້າເມືອງ ໄດ້ລາຍ ງານວ່າ: ສິນຄ້າທີ່ນຳມາທຳລາຍໃນຄັ້ງນີ້ ແມ່ນໄດ້ມາຈາກການລົງເຄື່ອນໄຫວຕິດຕາມ, ກວດກາ ຂອງເຈົ້າໜ້າທີ່ກວດກາການຄ້າ ຮ່ວມກັບພາກສ່ວນທີ່ກ່ຽວຂ້ອງ ຢູ່ຕາມຮ້ານຄ້າຂາຍຍົກ-ຂາຍຍ່ອຍ ແລະ ຕະຫຼາດທົ່ວເມືອງສາມັກຄີໄຊ. ເຊິ່ງປະເພດສິນຄ້າທີ່ນຳມາທຳລາຍນີ້ ປະກອບມີ: ສິນຄ້າໝົດອາຍຸ, ສິນຄ້າເສື່ອມຄຸນນະພາບ, ສິນຄ້າເກືອດຫ້າມ ແລະ ສິນຄ້ານອກລະບົບ ເປັນຕົ້ນແມ່ນ ເຂົ້າໜົມ, ເຄື່ອງສຳອາງ, ເບຍ, ເຄື່ອງດື່ມຊູກຳລັງ, ໝີ່ສຳເລັດຮູບ, ເຄື່ອງປຸງລົດຊາດ, ເຄື່ອງໃຊ້ປະຈຳວັນ, ແຊມພູ, ຄີມບຳລຸງຜິວ, ໝື້ແກັບ, ໂສ້-ບາ-ຝາດຶງສະຕາດຈັກສະຕິນ, ຊິງຊັ່ງ, ໄພ້ຢາງໄພ້ເຈ້ຍ, ຢາສູບອີຊີ, ຢາສູບຈີນ ແລະ ເຄື່ອງໃຊ້ທີ່ເສື່ອມຄຸນນະພາບອື່ນໆລວມທັງໝົດ ມີ 115 ລາຍການ, ຄິດເປັນມູນຄ່າຄວາມເສຍຫາຍຫຼາຍກວ່າ 114 ລ້ານກີບ.

ວິທີການທຳລາຍແມ່ນໄດ້ປະຕິບັດຕາມຫຼັກການຮັກສາສິ່ງແວດລ້ອມ ໂດຍການຈູດທຳລາຍ ຢູ່ທີ່ ສະ ໜາມຂີ້ເຫຍື້ອຂອງເມືອງ ເພື່ອບໍ່ໃຫ້ສົ່ງຜົນກະທົບຕໍ່ສະພາບແວດລ້ອມ ແລະ ຊຸມຊົນອ້ອມຂ້າງ.
ທັງນີ້ ກໍເພື່ອເປັນການຮັບປະກັນຜົນປະໂຫຍດຄວາມປອດໄພຂອງຜູ້ຊົມໃຊ້ຈາກຜົນກະທົບທາງລົບ, ອັນເນື່ອງມາຈາກການຊົມໃຊ້ສິນຄ້າ ແລະ ການບໍລິການ, ທັງເປັນການສົ່ງເສີມການຜະລິດພາຍໃນ, ການນຳເຂົ້າ, ການຈຳໜ່າຍສິນຄ້າ ແລະ ການບໍລິການ ໃຫ້ມີຄຸນນະພາບໄດ້ມາດຕະຖານ, ຖືກຕ້ອງ ແລະ ສອດຄ່ອງກັບລະບຽບກົດໝາຍ, ແນໃສ່ເຮັດໃຫ້ສັງຄົມມີຄວາມຍຸດຕິທຳ, ຄວາມສະຫງົບ, ຄວາມເປັນລະບຽບຮຽບຮ້ອຍ, ເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າດີຂຶ້ນ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ.

ຂ່າວ-ພາບ: ຂາວພອນ.
ທີ່ມາ : ຂ່າວສານອອນລາຍ ອັດຕະປື

ຈະພັດທະນາເຂດເສດຖະກິດທ່າແຂກ ເປັນແຫຼ່ງການຄ້າ ແລະ ການທ່ອງທ່ຽວ
ເພື່ອດຶງດູດນັກລົງທຶນ

ໃນວັນທີ 17 ມິຖຸນາ 2026 ທີ່ນະຄອນຫຼວງວຽງຈັນ. ກົມສິ່ງແວດລ້ອມ, ກະຊວງກະສິກໍາ ແລະ ສິ່ງແວດລ້ອມ (ກສ) ໄດ້ຈັດກອງປະຊຸມປຶກສາຫາລືແບບມີສ່ວນຮ່ວມ ຂັ້ນສູນກາງ ກ່ຽວກັບບົດລາຍງານການປະເມີນຜົນກະທົບຕໍ່ສິ່ງແວດລ້ອມ ພ້ອມທັງແຜນຄຸ້ມຄອງ ແລະ ຕິດຕາມກວດກາສິ່ງແວດລ້ອມ, ສໍາລັບໂຄງການພັດ ທະນາເຂດເສດຖະກິດທ່າແຂກ. ໂດຍການເປັນປະທານ ຂອງທ່ານ ປອ. ໄຊນະຄອນ ອິນທະວົງ ຮອງລັດຖະມົນຕີ ກະຊວງກະສິກໍາ ແລະ ສິ່ງແວດລ້ອມ, ມີທ່ານຫົວໜ້າກົມສິ່ງແວດລ້ອມ, ທ່ານຫົວໜ້າກົມຄຸ້ມຄອງທຸລະກິດການທ່ອງທ່ຽວ, ທ່ານຫົວໜ້າຫ້ອງວ່າການປົກຄອງແຂວງ ຄໍາມ່ວນ, ປະທານຄະນະກໍາມະການປົກຄອງ ເມືອງທ່າແຂກ, ທ່ານຮອງຫົວໜ້າພະແນກກະສິກໍາ ແລະ ສິ່ງແວດລ້ອມແຂວງ, ບໍລິສັດຜູ້ລົງທຶນ, ບໍລິສັດທີ່ປຶກສາໂຄງການ, ບັນດາທ່ານຜູ້ຕາງໜ້າຈາກຂະແໜງການທີ່ກ່ຽວຂ້ອງຂັ້ນສູນກາງ, ພະແນກການທີ່ກ່ຽວຂ້ອງຂອງແຂວງ, ຈາກເມືອງທ່າແຂກ, ອຳນາດການປົກຄອງ 9 ບ້ານ ພາຍໃນເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໂຄງການດັ່ງກ່າວ ແມ່ນບໍລິສັດ ຄໍາມ່ວນ ອີມພອດ-ເອັກພອດ ຈຳກັດ ເຊິ່ງໄດ້ເຊັນບົດບັນທຶກຄວາມເຂົ້າໃຈ (MOU) ກັບລັດຖະບານ ໃນວັນທີ 1 ພະຈິກ 2023 ຜ່ານມາ, ໃນຮູບແບບການລົງທຶນ BOT (Build-Operate-Transfer) ຮູບແບບການຮ່ວມສັນຍາລະຫວ່າງລັດຖະບານກັບເອກະຊົນ. ໃນເນື້ອທີ່ 1,258 ເຮັກຕາ 9,376 ຕາແມັດ ນອນໃນເຂດເມຶືອງທ່າແຂກ, ແຂວງຄໍາມ່ວນ. ຄາດຄະເນມູນຄ່າການລົງທຶນ 1,479,551,040 ໂດລາສະຫະ ລັດ, ສັນຍາສໍາປະທານ 50 ປີ, ໄລຍະກໍ່ສ້າງ 11 ປີ. ທາງໂຄງການຈະໄດ້ດຳເນີນການ ກໍ່ສ້າງພື້ນຖານໂຄງລ່າງ ລະບົບຫົນທາງ, ໄຟຟ້າ, ນໍ້າປະປາ ແລະ ຫຼັງຈາກນັ້ນ ຈະກ້າວໄປເຖິງການກໍ່ສ້າງຕຶກອາຄານ ສວນທາລະນະ, ໂຮງແຮມ, ສະໜາມກິລາ, ສູນການຄ້າ, ຮ້ານອາຫານ ລວມໄປເຖິງສິ່ງອໍານວນຄວາມສະດວກຕ່າງໆ. ພ້ອມນີ້, ກໍ່ໄດ້ມີແບບແຜນໃນການຈັດການ ບໍລິຫານ ບັນຫາດ້ານສິ່ງແວດລ້ອມ, ຄຸ້ມຄອງສິ່ງແວດລ້ອມຢ່າງເປັນລະບົບ. ສິ່ງເສດເຫຼືອ, ນໍ້າເປື້ອນຕ່າງໆ ຈາກທາງບໍລິສັດທີ່ປຶກສາໂຄງການ.

ໃນພິທີທ່ານປະທານກອງປະຊຸມກ່າວວ່າ:ໂຄງການດັ່ງກ່າວຈະສ້າງຜົນປະໂຫຍດຫຼາຍໃນການປະກອບສ່ວນຕໍ່ການພັດທະນາເສດຖະກິດ-ສັງຄົມ ຂອງ ສປປ ລາວ ເວົ້າລວມ, ເວົ້າສະເພາະແມ່ນພາຍໃນແຂວງຄໍາມ່ວນ ກໍ່ຄືປະຊາຊົນທີ່ຢູ່ພາຍໃນແຂວງ ແລະ ເຂດໂຄງການ. ແຕ່ຄຽງຄູ່ກັນນັ້ນ, ການພັດທະນາຍ້ອມຈະສ້າງຜົນກະທົບຕໍ່ສິ່ງແວດລ້ອມ, ທໍາມະຊາດ ແລະ ສັງຄົມ. ໂດຍສະເພາະ ສິດນໍາໃຊ້ທີ່ດິນ ແລະ ຊັບສິນຂອງປະຊາຊົນ, ບັນຫາສິ່ງແວດລ້ອມຕ່າງໆ. ຕໍ່ຜົນກະທົບດັ່ງກ່າວຮຽກຮ້ອງໃຫ້, ເຈົ້າຂອງໂຄງການຕ້ອງໄດ້ດໍາເນີນການສຶກສາ, ເກັບກໍາຂໍ້ມູນ ແລະ ປະເມີນຜົນກະທົບຈາກໂຄງການ ໃຫ້ສອດຄ່ອງຕາມລະບຽບການ, ກົດໝາຍທີ່ວາງອອກ. ການວິເຄາະ ແລະ ຄາດຄະເນຜົນກະທົບທີ່ອາດເກີດຂຶ້ນຈາກການດໍາເນີນໂຄງການ ພ້ອມທັງກໍານົດມາດການປ້ອງກັນ ແລະ ແກ້ໄຂຜົນກະທົບດັ່ງກ່າວ. ດ້ວຍການປະສານສົມທົບ ແລະ ເຮັດວຽກຮ່ວມກັນ ໃນການສະໜອງຂໍ້ມູນທີ່ຈໍາເປັນໃຫ້ແກ່ຜູ້ມີສ່ວນກ່ຽວຂ້ອງຕ່າງໆ ໃນການຕັດສິນໃຈ ແລະ ເປີດໂອກາດໃຫ້ປະຊາຊົນ ທີ່ໄດ້ຮັບຜົນກະທົບ ໄດ້ມີສ່ວນຮ່ວມໃນການສະແດງຄວາມຄິດເຫັນ ແລະ ການກວດກາການຈັດຕັ້ງປະຕິບັດໂຄງການ.

ໃນຕອນທ້າຍຂອງກອງປະຊຸມ, ບັນດາທ່ານທີ່ເຂົ້າມາຮ່ວມໄດ້ປະກອບຄຳຄິດ ຄຳເຫັນຢ່າງກົງໄປກົງມາ ຈາກຂະແຫນງການທີ່ກ່ຽວຂ້ອງ, ຈາກແຂວງ, ເມືອງ ແລະ ບ້ານທີ່ໂຄງການຕັ້ງຢູ່ ເພື່ອໃຫ້ໂຄງການດັ່ງກ່າວ ໄດ້ດຳເນີນໄປຢ່າງມີປະສິດທິພາບ ແລະ ປະສິດທິຜົນ. ນຳຜົນປະໂຫຍດທີ່ແທ້ຈິ່ງມາສູ່ປະເທດຊາດ, ປະຊາຊົນ ແລະ ຜູ້ພັດທະນາໂຄງການ.

ພາບ-ຂ່າວໂດຍ: ຂັນວິຈິດ
ເຜີຍແຜ່ໂດຍ: ພະແນກເຕັກໂນໂລຊີ ຂໍ້ມູນ-ຂ່າວສານ, ຫ້ອງການ ກະຊວງກະສິກຳ ແລະ ສິ່ງແວດລ້ອມ.