ພະແນກສຶກສາທິການແລະກິລາແຂວງໄຊຍະບູລີ

21/08/2026

ສະມາຄົມພັດທະນາເດັກ ແລະ ໄວໜຸ່ມລາວ
ຈັດກອງປະຊຸມສຳມະນາເພື່ອຢັ້ງຢືນຜົນການວິໄຈ ແລະ ຮ່ວມກັນອອກແບບກິດຈະກຳຕົວແບບ..........................................................
ໃນຕອນເຊົ້າຂອງວັນທີ 20 ສິງຫາ 2026 ນີ້ ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ ໄດ້ຈັດກອງປະຊຸມສຳມະນາເພື່ອຢັ້ງຢືນຜົນການວິໄຈ ແລະ ຮ່ວມກັນອອກແບບກິດຈະກຳຕົວແບບ ໂດຍເປັນປະທານຮ່ວມຂອງທ່ານ ນາງ ສີທອນ ຄຳອ່ອນ ຮອງຫົວໜ້າພະແນກສຶກສາທິການ ແລະ ກິລາແຂວງ , ທ່ານ ວິລະໄຊ ທຳມະວົງ ຜູ້ອຳນວຍການສະມາຄົມພັດທະນາເດັກ ແລະ ໄວໜຸ່ມລາວ ມີຕາງໜ້າສະຫະພັນແມ່ຍິງແຂວງ, ຊາວໜຸມແຂວງ, ຊາວໜຸ່ມເມືອງ, ສະຫະພັນແມ່ຍິງເມືອງ, ສູນບໍລິການປະຕູດຽວ, ຫ້ອງການສຶກສາທິການ ແລະ ກິລາເມືອງ, ຜູ້ອຳນວຍການໂຮງຮຽນ, ຄູອາຈານ ແລະ ນ້ອງນັກຮຽນເຂົ້າຮ່ວມ.
ທ່ານ ນາງ ສີທອນ ຄຳອ່ອນ ໄດ້ກ່າວເປີດກອງປະຊຸມຢ່າງເປັນທາງການ ແລະ ສະແດງຄວາມຕ້ອນຮັບຕໍ່ທີມງານສະມາຄົມພັດທະນາເດັກ ແລະ ໄວໜຸ່ມລາວ ທີ່ໄດ້ສະຫຼະເວລາອັນມີຄຸນຄ່າຈັດກອງປະຊຸມສຳມະນາເພື່ອງຢັ້ງຢືນຜົນການວິໄຈ ແລະ ຮ່ວມກັນອອກແບບກິດຈະກຳຕົວແບບໃນຄັ້ງນີ້. ຖືວ່າແຂວງໄຊຍະບູລີ ກໍເປັນແຂວງໜື່ງ ທີ່ທາງສະມາຄົມພັດທະນາເດັກ ແລະ ໄວໜຸ່ມລາວໄດ້ໃຫ້ການຊ່ວຍເຫຼືອ ນັ້ນສະແດງໃຫ້ເຫັນເຖິງຄວາມເອົາໃຈໃສ່, ຄວາມເປັນຫ່ວງເປັນໄຍຂອງສະມາຄົມ ທີ່ຢາກໃຫ້ນ້ອງນັກຮຽນມີການພັດທະນາທາງດ້ານທັກສະຊີວິດ ແລະ ການກະກຽມພ້ອມທາງດ້ານອາຊີບ. ເຊິ່ງໄວໜຸ່ມແມ່ນກຳລັງແຮງຕົ້ນຕໍ ແລະ ເປັນອານາຄົດຂອງຊາດ ຮັບປະກັນໃຫ້ໄວໜຸ່ມມີ ທັກສະຊີວິດທີ່ເຂັ້ມແຂງ ແລະ ການກຽມພ້ອມທາງດ້ານອາຊີບທີ່ທັນສະໄໝ ເປັນປັດໃຈຕັດສິນໃນການສ້າງອານາຄົດທີ່ຍືນຍົງ. ໄລຍະຜ່ານມາ ພະແນກສຶກສາທິການ ແລະ ກິລາ ຮ່ວມກັບສະມາຄົມພັດທະນາເດັກ ແລະ ໄວໜຸ່ມລາວ ໄດ້ດຳເນີນ ການຄົ້ນຄ້ວາແບບມີສ່ວນຮ່ວມ ໂດຍເປີດໂອກາດໃຫ້ໄວໜຸ່ມໄດ້ມີສ່ວນຮ່ວມ ຢ່າງແທ້ຈິງໃນການຮວບຮວມ, ວິເຄາະ ,ສະທ້ອນບັນຫາ ແລະ ສິ່ງທ້າທາຍທີ່ເຂົາເຈົ້າກຳລັງປະເຊີນຢູ່, ເພື່ອໃຫ້ການວິໄຈນີ້ ສະທ້ອນເຖິງຄວາມເປັນຈິງ ແລະ ນຳໄປໃຊ້ໄດ້ຢ່າງມີປະສິດທິພາບ. ກອງປະຊຸມໃນຄັ້ງນີ້ຈຸດປະສົງກໍ່ແມ່ນເພື່ອລາຍງານຜົນການຄົ້ນຄວ້າແບບມີສ່ວນຮ່ວມ(PAR) ຈາກການປະເມີນຄວາມຕ້ອງການຂອງໄວໜຸ່ມ 100 ຄົນ ໃນເມືອງໄຊຍະບູລີ, ແຂວງໄຊຍະບູລີຮ່ວມກັບພະແນກສຶກສາທິການ ແລະ ກິລາແຂວງ, ຂະແໜງການພາກລັດທີ່ກ່ຽວຂ້ອງ ແລະ ພາກສ່ວນຕ່າງໆ. ເປັນການເປີດເວທີປຶກສາຫາລື, ຖາມ-ຕອບ ແລະຮັບຮອງເອົາຜົນການຄົ້ນຄວ້າວິໄຈ ເພື່ອເປັນພື້ນຖານໃຫ້ໄວໜຸ່ມ ໃນການຂຽນແຜນທົດລອງກິດຈະກຳຂະໜາດນ້ອຍ ເພື່ອເຄື່ອນໄຫວກິດຈະກຳພາຍໃນໂຮງຮຽນ ຫຼື ຊຸມຊົນ. ການກຳນົດວຽກງານບູລິມະສິດ ແລະ ວິທີທາງແກ້ໄຂ ທີ່ສາມາດປະຕິບັດໄດ້ຕົວຈິງໂດຍອີງໃສ່ຜົນການວິໄຈຮ່ວມກັບໄວໜຸ່ມນັກຄົ້ນຄ້ວາ. ຮ່ວມກັນອອກແບບ ແລະ ສະເໜີໂຄງການ( ກິດຈະກຳຂະໜາດນ້ອຍ) ໃຫ້ສຳເລັດ 3 ກິດຈະກຳທີ່ຈະນຳພາປະຕິບັດໂດຍໄວໜຸ່ມ. ກອງປະຊຸມຈະໄດ້ຮັບຟັງການນຳສະເໜີຜົນການຄົ້ນຄວ້າວິໄຈທີ່ຜ່ານມາ, ມີຄຳເຫັນ ຖາມ-ຕອບ ແລະ ຮັບຮອງຜົນການຄົ້ນຄວ້າວິໄຈ ເພື່ອເປັນພື້ນຖານໃຫ້ໄວໜຸ່ມສ້າງໂຄງການ ແລະ ໄວໜຸ່ມເປັນຜູ້ນຳພາ. ກອງປະຊຸມດັ່ງກ່າວຈະໃຊ້ເວລາ 1 ວັນຈຶ່ງສຳເລັດ.

19/08/2026

14/08/2026

ເມືອງໄຊສະຖານ ດໍາເນີນກອງປະຊຸມຄູພັກສິ້ນປີຮຽນ ທົ່ວເມືອງ ປະຈໍາສົກຮຽນ 2025-2026
……………………..
ວັນທີ 12 ສິງຫາ 2026 ນີ້ ເມືອງໄຊສະຖານ ແຂວງໄຊຍະບູລີ ໄດ້ດໍາເນີນກອງປະຊຸມຄູໄລຍະພັກສິ້ນປີຮຽນ ປະຈໍາສົກຮຽນ 2025-2026 ຂື້ນຢ່າງເປັນທາງການ ຢູ່ທີ່ຫ້ອງປະຊຸມໃຫຍ່ຂອງເມືອງ ໂດຍການເປັນກຽດເຂົ້າຮ່ວມຂອງທ່ານເອກ ເກດຕາໄຊ ຮອງປະທານຄະນະກໍາມະການປົກຄອງເມືອງ, ມີ ທ່ານ ບຸນທະວີ ໂສພາ ຮອງຫົວໜ້າພະແນກສຶກສາທິການ ແລະ ກິລາແຂວງ, ພາຍໃຕ້ການເປັນປະທານຂອງທ່ານ ບຸນຍ້າຍ ດວງດີ ກໍາມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງ, ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ອົງການ, ກົມກອງ, ຜູ້ອໍານວນການໂຮງຮຽນ, ພະນັກງານຄູ-ອາຈານທົ່ວເມືອງເຂົ້າຮ່ວມທັງໝົດ 139 ທ່ານ, ຍິງ 59 ທ່ານ.
…………………..
ຂ່າວ: ຄ.ອ.ມ ໄຊສະຖານ.
.XBL

11/08/2026

ສູນການສຶກສານອກໂຮງຮຽນພາກເໜືອຝຶກອົບຮົມໃຫ້ແຂວງໄຊຍະບູລີ ຫົວຂໍ້
“ການສອນຈິດຕະສາດການສຶກສາຜູ້ໃຫຍ່ ເພື່ອເພີ່ມປະສິດທິພາບໃນການຈັດການຮຽນການສອນນອກໂຮງຮຽນ”......................................
ໃນຕອນເຊົ້າວັນທີ 10 ສິງຫາ 2026 ນີ້ ສູນການສຶກສານອກໂຮງຮຽນພາກເໜືອຮ່ວມກັບຂະແໜງການສຶກສານອກໂຮງຮຽນເປິດກອງປະຊຸມຝຶກອົບຮົມການສອນຈິດຕະສາດການສຶກສາຜູ້ໃຫຍ່ໃຫ້ສູນການສຶກສານອກໂຮງຮຽນແຂວງໄຊຍະບູລີ, ເມືອງໄຊຍະບູລີ, ເມືອງພຽງ, ເມືອງເງິນ ແລະ ເມືອງຫົງສາ ໂດຍເປັນປະທານຮ່ວມຂອງ ທ່ານ ຈັນທະວີ ວັນນະພາຜົນ ຮອງພະແນກສຶກສາທິການ ແລະ ກິລາແຂວງ, ທ່ານ ນາງ ກອງມະນີ ວັນນະສີ ຮອງຜູ້ອຳນວຍການ ສູນການສຶກສານອກໂຮງຮຽນພາກເໜືອ. ມີບັນດາຫົວໜ້າຂະແໜງການ,ຄະນະຮັບຜິດຊອບສູນການສຶກສານອກໂຮງຮຽນພາກເໜືອ,ຄະນະຮັບຜິດຊອບຂັ້ນແຂວງ,ຂັ້ນເມືອງ,ຄູຝຶກ ແລະ ນັກສຳມະນາກອນເຂົ້າຮ່ວມ 26ທ່ານ ຍິງ 7ທ່ານ .
ໂອກາດດັ່ງກ່າວ ທ່ານ ຈັນທະວີ ວັນນະພາຜົນ ໄດ້ກ່າວເປີດຊຸດຝຶກອົບຮົມຢ່າງເປັນທາງການ ພ້ອມທັງສະແດງຄວາມຍິນດີຕ້ອນຮັບ ແລະ ຍ້ອງຍໍຊົມເຊີຍ ຕໍ່ທີມງານສູນການສຶກສານອກໂຮງຮຽນພາກເໜືອ, ຄູຝຶກ ແລະ ນັກສຳມະນາກອນທຸກທ່ານທີ່ເຂົ້າຮ່ວມກອງປະຊຸມ. ການຝຶກອົບຮົມໃນຄັ້ງນີ້ຖືວ່າມີບົດບາດສຳຄັນໃນການສ້າງໂອກາດການຮຽນຮູ້ໃນການດຳລົງຊີວິດຂອງປະຊາຊົນ ເຖິງຢ່າງໃດກໍ່ຕາມການສອນຜູ້ໃຫຍ່ ແມ່ນມີຄວາມທ້າທາຍ ແລະ ແຕກຕ່າງຈາກການສອນເດັກນ້ອຍຫຼາຍ ດັ່ງນັ້ນ, ການສອນຜູ້ໃຫຍ່ເຊິ່ງມາພ້ອມກັບປະສົບການຊີວິດ ແລະ ປະສົບການເຮັດວຽກຫຼາຍຢ່າງ, ມີຄວາມຕ້ອງການໃນການຮຽນຮູ້ເພື່ອນຳໄປແກ້ໄຂບັນຫາໃນຊີວິດປະຈຳວັນ ຫຼື ສ້າງລາຍຮັບໂດຍກົງໃຫ້ກັບຕົນເອງ ແລະ ຄອບຄົວ, ເພື່ອເປັນການສ້າງແຮງຈູງໃຈຈາກພາຍນອກ ແຕ່ໃນຄະນະດຽວກັນນັ້ນກໍ່ຍັງມີພາລະ ແລະ ພັນທະທີ່ສຳຄັນໃນຄອບຄົວ. ການຈັດການຮຽນການສອນ ໃຫ້ເຂົ້າເຖິງຈິດໃຈ ຄວາມຄິດ, ອາລົມ ແລະ ພຶດຕິກຳ ຂອງຜູ້ຮຽນໄດ້ນັ້ນ ບໍ່ພຽງແຕ່ຕ້ອງມີຄວາມຮູ້ໃນວິຊາທີ່ສອນເທົ່ານັ້ນ ແຕ່ການເຂົ້າໃຈຈິດຕະສາດ ແມ່ນເປັນກຸນແຈສຳຄັນ ທີ່ຈະປ່ຽນແປງໃຫ້ເປັນພື້ນທີ່ໃນການແລກປ່ຽນຄຳຄິດຄຳເຫັນ, ໃຫ້ກຽດກັນ ແລະ ສ້າງແຮງບັນດານໃຈເຊິ່ງກັນ ແລະ ກັນ . ຈຸດປະສົງກອງປະຊຸມດັ່ງກ່າວແມ່ນຈະສ້າງຄວາມເຂົ້າໃຈເຮັດໃຫ້ຄູອາຈານ ເຂົ້າໃຈຫຼັກການຈິດຕະສາດການຮຽນຮູ້ຂອງຜູ້ໃຫຍ່, ວິທະຍາສາດ ແລະ ຂະບວນວິວັດທະນາການ ແລະ ຄວາມແຕກຕ່າງລະຫວ່າງການສອນເດັກນ້ອຍກັບຜູ້ໃຫຍ່, ການພັດທະນາເຕັກນິກ ມາພ້ອມກັບເຄື່ອງມື, ເຕັກນິກການສອນ, ການສ້າງບັນຍາກາດ, ການຮຽນຮູ້ແບບມີສ່ວນຮ່ວມ ແລະ ການໃຫ້ຄຳປຶກສາ, ການແລກປ່ຽນບົດຮຽນ ແລະ ເປິດໂອກາດໃຫ້ຄູອາຈານໄດ້ຖອດຖອນບົດຮຽນຕົວຈິງຈາກປະສົບການທີ່ຜ່ານມາ ເພື່ອນຳໄປປັບໃຊ້ໃນເຂດພື້ນທີ່ ແລະ ຄວາມຮັບຜິດຊອບຂອງຕົນເອງອິກດ້ວຍ. ການຝຶກອົບຮົມໃນຄັ້ງນີ້ໄດ້ລົງເລິກຫົວຂໍ້ຫຼັກດັ່ງນີ້: ຈິດຕະສາດຂອງຜູ້ໃຫຍ່, ການຮຽນຮູ້ຕະຫຼອດຊີວິດ, ຂະບວນການຄົ້ນຄິດ,ວິທີສອນຜູ້ໃຫຍ່, ເຕັກນິກການສອນ, ການປະເມີນຜົນການຈັດການຮຽນການສອນ ເຊິ່ງຈະໄດ້ດຳເນີນເປັນເວລາ 5 ວັນ (ວັນທີ 10-14 ສິງຫາ 2026) ຈຶ່ງສຳເລັດ.
ໃນຕອນທ້າຍຂອງພິທີ, ປະທານກອງປະຊຸມ ໄດ້ໃຫ້ກຽດໂອ້ລົມ ແລະ ເນັ້ນໜັກໃຫ້ບັນດານັກສຳມະນາກອນ ຈົ່ງເອົາໃຈໃສ່ຕິດຕາມວາລະກອງປະຊຸມຢ່າງເຂັ້ມງວດ, ເຄົາລົບໂມງເວລາ, ຮັກສາສຸຂະພາບ, ພ້ອມທັງຕັ້ງໜ້າແລກປ່ຽນບົດຮຽນ ແລະ ຕັ້ງຄໍາຖາມແບບເປີດໃຈ ໂດຍໃຫ້ຕິດພັນກັບ 5 ຫຼັກມູນການສຶກສາຢ່າງເໝາະສົມ.

07/08/2026

ຂະແໜງພັດທະນາຄູ ພະແນກສຶກສາທິການ ແລະ ກິລາແຂວງ
ເປິດກອງປະຊຸມຝຶກອົບຮົມຄູສອນຄະນິດສາດຊັ້ນປະຖົມສຶກສາທົ່ວແຂວງໄຊຍະບູລີ.......................................................
ໃນຕອນເຊົ້າຂອງວັນທີ 6 ສິງຫາ 2026 ນີ້, ຢູ່ທີ່ສະໂມສອນ ພະແນກສຶກສາທິການ ແລະ ກິລາ ແຂວງໄຊຍະບູລີ, ຂະແໜງພັດທະນາຄູ ໄດ້ຈັດກອງປະຊຸມປະຖົມນິເທດການວາງແຜນຈັດຕັ້ງປະຕິບັດກິດຈະກຳການພັດທະນາວິຊາຊີບຄູແບບຕໍ່ເນື່ອງ (CPD) ວິຊາຄະນິດສາດ ຊັ້ນປະຖົມສຶກສາ ທົ່ວແຂວງ. ກອງປະຊຸມດັ່ງກ່າວ ໄດ້ຈັດຂຶ້ນໂດຍການເປັນປະທານຮ່ວມຂອງ ທ່ານ ທອງພັນ ສິງແກ້ວ ຮອງຫົວໜ້າພະແນກສຶກສາທິການ ແລະ ກິລາ ແຂວງໄຊຍະບູລີ, ທ່ານ ຢາສຶມາຊະ ນາໂອກະ (Yasumasa Naoka) ຊ່ຽວຊານດ້ານນະໂຍບາຍການສຶກສາ ອົງການໄຈກາ (JICA) ປະຈຳ ສປປ ລາວ ແລະ ທ່ານ ນາງ ໂທໂມມິ ນາກາໂອະ (Tomomi Nagao) ຜູ້ຮັບຜິດຊອບວຽກງານ CPD ອົງການໄຈກາ ປະຈຳ ສປປ ລາວ. ໂດຍມີຕາງໜ້າຈາກພະແນກຄຸ້ມຄອງໂຄງການ ຫ້ອງການກະຊວງສຶກສາທິການ ແລະ ກິລາ, ກົມພັດທະນາຄູ ແລະ ການບໍລິຫານການສຶກສາ, ກົມສາມັນສຶກສາ (ຜູ້ຮັບຜິດຊອບໂຄງການ ITEAM2), ຄູຝຶກຈາກວິທະຍາໄລຄູ ຫຼວງພະບາງ, ຄູຝຶກປະຈຳແຂວງ ພ້ອມດ້ວຍນັກສຳມະນາກອນຈາກຫ້ອງການສຶກສາທິການ ແລະ ກິລາ 11 ເມືອງ ທົ່ວແຂວງ ເຂົ້າຮ່ວມ ທັງໝົດ 37 ທ່ານ ຍິງ 12 ທ່ານ.
ໂດຍປະຕິບັດຕາມຂໍ້ຕົກລົງຂອງລັດຖະມົນຕີ ກະຊວງສຶກສາທິການ ແລະ ກິລາ ສະບັບເລກທີ 3342/ສສກ, ລົງວັນທີ 19 ກໍລະກົດ 2022 ວ່າດ້ວຍການພັດທະນາວິຊາຊີບຄູແບບຕໍ່ເນື່ອງ (CPD) ແລະ ອີງຕາມທິດຊີ້ນຳຂອງຄະນະຮັບຜິດຊອບໂຄງການສ້າງຄວາມເຂັ້ມແຂງໃຫ້ແກ່ຄູສອນຄະນິດສາດ ຊັ້ນປະຖົມສຶກສາ ໄລຍະທີ 2 (ITEAM2) ໃນການຈັດຕັ້ງຜັນຂະຫຍາຍຜົນສຳເລັດ ກອງປະຊຸມສ້າງຄວາມສາມາດສຳລັບການຈັດຕັ້ງປະຕິບັດ CPD ວິຊາຄະນິດສາດ ທີ່ປະເທດຍີ່ປຸ່ນ ໃນວັນທີ 2-16 ກໍລະກົດ 2025 ທີ່ຜ່ານມາ. ຈຸດປະສົງຫຼັກແມ່ນເພື່ອສ້າງຄວາມເຂັ້ມແຂງ ແລະ ເພີ່ມທັກສະຄວາມເຂົ້າໃຈກ່ຽວກັບກິດຈະກຳ CPD ໃຫ້ກັບພະນັກງານຫ້ອງການສຶກສາທິການ ແລະ ກິລາເມືອງ, ໂດຍສະເພາະແມ່ນຫົວໜ້າໜ່ວຍງານພັດທະນາຄູ ແລະ ຜູ້ຮ່ວມງານສຶກສານິເທດຂັ້ນເມືອງ, ເພື່ອນຳເອົາຄວາມຮູ້ຄວາມສາມາດໄປເຜີຍແຜ່ຕໍ່ໃຫ້ກັບຄູ-ອາຈານພາຍໃນເມືອງຂອງຕົນ. ນອກຈາກນີ້, ຍັງໄດ້ເນັ້ນໃສ່ການແບ່ງປັນບົດຮຽນ, ການສ້າງແຜນກິດຈະກຳ CPD ສະເພາະຂອງແຕ່ລະໂຮງຮຽນ, ພ້ອມທັງແນະນຳກົນໄກການຕິດຕາມ ແລະ ຊຸກຍູ້ການປະຕິບັດງານໂດຍນຳໃຊ້ເຕັກໂນໂລຊີອອນລາຍ ເຊັ່ນ: Google Form, Google Spreadsheet, ລະບົບຖານຂໍ້ມູນ (Dashboard) ແລະ ແອັບພລິເຄຊັນ WhatsApp. ຊຸດຝຶກອົບຮົມດັ່ງກ່າວ ຈະໄດ້ດຳເນີນເປັນເວລາ 2 ວັນ (ວັນທີ 6-7 ສິງຫາ 2026) ໂດຍນັກສຳມະນາກອນຈະໄດ້ຮຽນຮູ້ຫຼາຍຫົວຂໍ້ສຳຄັນ ເປັນຕົ້ນແມ່ນ: ຄວາມເຂົ້າໃຈ ແລະ ພາລະບົດບາດຂອງ CPD, ການກະກຽມ ແລະ ຈັດກອງປະຊຸມຂັ້ນເມືອງ, ການຊຸກຍູ້ຊ່ວຍເຫຼືອໂຮງຮຽນຕະຫຼອດສົກຮຽນ ແລະ ການວາງແຜນກິດຈະກຳຂັ້ນເມືອງ.
ໃນຕອນທ້າຍຂອງພິທີ, ປະທານກອງປະຊຸມໄດ້ໃຫ້ກຽດໂອ້ລົມ ແລະ ເນັ້ນໜັກໃຫ້ບັນດານັກສຳມະນາກອນ ເອົາໃຈໃສ່ຕິດຕາມ, ເຄົາລົບລະບຽບໂມງເວລາ, ສຸມສະຕິປັນຍາເຂົ້າໃນການຮ່ວມໃນຄັ້ງນີ້ ເພື່ອເກັບກຳເອົາຄວາມຮູ້, ທັກສະ ແລະ ປະສົບການ ທີ່ໄດ້ຮັບຈາກການຝຶກອົບຮົມໃນຄັ້ງນີ້ ໄປຈັດຕັ້ງປະຕິບັດ ແລະ ຜັນຂະຫຍາຍເຂົ້າໃນງານຕົວຈິງຢູ່ທ້ອງຖິ່ນຂອງຕົນໃຫ້ມີປະສິດທິພາບ ແລະ ເກີດຜົນປະໂຫຍດສູງສຸດ.

06/08/2026

ຂະແໜງການສຶກສາກ່ອນໄວຮຽນ ພະແນກສຶກສາທິການ ແລະ ກິລາແຂວງຝຶກອົບຮົມຍົກລະດັບຄວາມຮູ້ ໃຫ້ຄູສອນຊ່ວຍຊັ້ນການສຶກສາກ່ອນໄວຮຽນ..................................................
ໃນຕອນເຊົ້າຂອງວັນທີ 5 ສິງຫາ 2026 ຜ່ານມານີ້ ຢູ່ທີ່ຫ້ອງປະຊຸມ ພະແນກສຶກສາທິການ ແລະ ກິລາ ແຂວງໄຊຍະບູລີ ໄດ້ເປີດຊຸດຝຶກອົບຮົມຍົກລະດັບຄວາມຮູ້ ແລະ ເຕັກນິກການສອນ ໃຫ້ແກ່ຄູທີ່ມາສອນຊ່ວຍ ໃນຊັ້ນການສຶກສາກ່ອນໄວຮຽນ. ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ທອງພັນ ສິງແກ້ວ ຮອງຫົວໜ້າພະແນກສຶກສາທິການ ແລະ ກິລາ ແຂວງໄຊຍະບູລີ ມີບັນດາ ຫົວໜ້າ-ຮອງຂະແໜງ, ຄູຝຶກ, ພ້ອມດ້ວຍນັກສຳມະນາກອນເຂົ້າຮ່ວມ .
ໂອກາດດັ່ງກ່າວ ທ່ານ ທອງພັນ ສິງແກ້ວ ໄດ້ກ່າວເປີດຊຸດຝຶກອົບຮົມຢ່າງເປັນທາງການ ພ້ອມທັງສະແດງຄວາມຍິນດີຕ້ອນຮັບ ແລະ ຍ້ອງຍໍຊົມເຊີຍ ຕໍ່ທີມງານຄູຝຶກ ແລະ ນັກສຳມະນາກອນທຸກທ່ານ. ການຝຶກອົບຮົມໃນຄັ້ງນີ້ມີນັກສຳມະນາກອນທີ່ເປັນຄູສອນຊ່ວຍ ຕາງໜ້າຈາກ 5 ເມືອງ ຄື: ເມືອງເງິນ, ເມືອງຫົງສາ, ເມືອງພຽງ, ເມືອງປາກລາຍ ແລະ ເມືອງບໍ່ແຕນ ເຂົ້າຮ່ວມ ທັງໝົດ 21 ທ່ານ, ຍິງ 17 ທ່ານ. ເຊິ່ງຈະໄດ້ຈັດຂຶ້ນເປັນເວລາ 3 ວັນ (ລະຫວ່າງວັນທີ 5-7 ສິງຫາ 2026). ສຳລັບເນື້ອໃນທີ່ນຳມາຝຶກອົບຮົມ ແມ່ນຈະໄດ້ລົງເລິກຫຼາຍຫົວຂໍ້ສຳຄັນ ເຊັ່ນ: ການສະເໜີຫຼັກສູດອະນຸບານ ແລະ ຫຼັກສູດຫ້ອງກຽມປະຖົມ, ວິທີການຈັດການຮຽນ-ການສອນ ຊັ້ນອະນຸບານ ແລະ ຫ້ອງກຽມປະຖົມ, ຄວາມໝາຍຂອງກິດຈະກຳການຮຽນ-ການສອນ, ການແຕ່ງສ້າງແຜນການສອນ, ການສ້າງບົດສອນ, ການວິເຄາະບົດສອນ ແລະ ການສອນສາທິດປະຕິບັດຕົວຈິງ. ໃນຕອນທ້າຍປະທານກອງປະຊຸມ ຍັງໄດ້ເນັ້ນໜັກໃຫ້ຜູ້ເຂົ້າຮ່ວມ ເອົາໃຈໃສ່ຕິດຕາມ, ເຄົາລົບລະບຽບໂມງເວລາ, ສຸມສະຕິປັນຍາເຂົ້າໃນການຮ່ວມໃນຄັ້ງນີ້ ເພື່ອເກັບກຳເອົາຄວາມຮູ້, ທັກສະ ແລະ ປະສົບການ ຈາກທີມງານຄູຝຶກໃຫ້ໄດ້ຫຼາຍທີ່ສຸດ ແລ້ວນຳໄປຈັດຕັ້ງປະຕິບັດ ເຂົ້າໃນການພັດທະນາການຮຽນ-ການສອນ ຢູ່ໂຮງຮຽນຂອງຕົນ ໃຫ້ມີປະສິດທິພາບ ແລະ ໄດ້ມາດຕະຖານ.

29/07/2026

ສສກ ຮ່ວມກັບ ລັດຖະບານອົດສະຕຣາລີ ສົ່ງເສີມຄວາມເປັນຜູ້ນຳຂອງແມ່ຍິງ ແລະ ການປົກປ້ອງເດັກ ໃນຂະແໜງ ການສຶກສາ
++++++++++++++++++++++++++++++++++
ກະຊວງສຶກສາທິການ ແລະ ກິລາ (ສສກ) ແຫ່ງ ສປປ ລາວ ຮ່ວມກັບ ລັດຖະບານອົດສະຕຣາລີ ຜ່ານແຜນງານບີຄວາ (BEQUAL) ໄດ້ຈັດພິທີສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຢ່າງຟົດຟື້ນ ພ້ອມຈັດກິດຈະກຳຝຶກອົບຮົມເພື່ອສົ່ງເສີມຄວາມສະເໝີພາບຍິງ-ຊາຍ, ຄວາມເປັນຜູ້ນຳຂອງແມ່ຍິງ ແລະ ການປົກປ້ອງເດັກ ໃນຂະແໜງການສຶກສາ, ວິທະຍາສາດ ແລະ ກິລາ ໃນລະຫວ່າງວັນທີ 27-28 ກໍລະກົດ 2026 ທີ່ນະຄອນຫຼວງວຽງຈັນ ພາຍໃຕ້ການເປັນປະທານຮ່ວມໂດຍ ທ່ານ ປອ ນາງ ດາລາວອນ ກິດຕິພັນ ຮອງລັດຖະມົນຕີກະຊວງສຶກສາທິການ ແລະ ກິລາ ແລະ ທ່ານ ນາງ ເບັນນິຕາ ຊຳເມີວິວ (Benita Sommerville) ຮອງເອກອັກຄະລັດຖະທູດອົດສະຕຣາລີ ປະຈຳ ລາວ. ໂດຍມີແຂກຖືກເຊີນຈາກພາກສ່ວນຕ່າງໆ, ຫົວໜ້າຫ້ອງການກະຊວງ, ຫົວໜ້າ-ຮອງຫົວໜ້າກົມ, ສະມາຊິກສະຫະພັນແມ່ຍິງລາວ, ຕົວແທນອົງການຈັດຕັ້ງມະຫາຊົນ, ຜູ້ອຳນວຍການສຳນັກຂ່າວ ແລະ ສື່ມວນຊົນຂັ້ນສູງກາງ ແລະ ທ້ອງຖິ່ນເຂົ້າຮ່ວມ 200 ກວ່າທ່ານ.
ໃນພິທີເປີດ, ທ່ານ ປອ ນາງ ດາລາວອນ ກິດຕິພັນ ໄດ້ຍົກໃຫ້ເຫັນເຖິງຄວາມສຳຄັນຂອງການຮ່ວມມື ເພື່ອສົ່ງເສີມຄວາມສະເໝີພາບຍິງ-ຊາຍ ແລະ ການປົກປ້ອງເດັກ ໂດຍທ່ານໄດ້ກ່າວວ່າ: "ງານໃນມື້ນີ້ ຍັງເປັນວາລະສຳຄັນເພື່ອຢ້ຳຄືນເຖິງຄວາມສຳຄັນຂອງວຽກງານຄວາມສະເໝີພາບຍິງ-ຊາຍ ແລະ ການປົກປ້ອງເດັກ ວ່າແມ່ນຄວາມຮັບຜິດຊອບຂອງທຸກຄົນ. ສິ່ງດັ່ງກ່າວເປັນສ່ວນໜຶ່ງຂອງການປະຕິບັດປະຈຳວັນໃນໂຮງຮຽນ, ໃນສະຖາບັນ ແລະ ໃນວິທີທີ່ພວກເຮົາເຮັດວຽກຮ່ວມກັນ ເພື່ອອະນາຄົດຂອງເດັກທຸກຄົນ. ການຮ່ວມມືນີ້ ສະທ້ອນໃຫ້ເຫັນເຖິງຄວາມມຸ່ງໝັ້ນຂອງກະຊວງສຶກສາທິການ ແລະ ກິລາ ໃນການຫັນນະໂຍບາຍໄປສູ່ການຈັດຕັ້ງປະຕິບັດຈິງ ດ້ວຍເຄື່ອງມືທີ່ນຳໃຊ້ໄດ້, ການຮ່ວມມືທີ່ເຂັ້ມແຂງ ແລະ ຄວາມຮັບຮູ້ຂອງສັງຄົມທີ່ເພີ່ມຂຶ້ນ. ພວກເຮົາຂໍສະແດງຄວາມຂອບໃຈຕໍ່ການສະໜັບສະໜູນຢ່າງຕໍ່ເນື່ອງຂອງອົດສະຕຣາລີ ຕໍ່ວຽກງານບຸລິມະສິດທີ່ສຳຄັນເຫຼົ່ານີ້."
ດ້ານ ທ່ານ ນາງ ເບັນນິຕາ ຊຳເມີວິວ ກໍໄດ້ກ່າວເນັ້ນໜັກວ່າ: "ລັດຖະບານອົດສະຕຣາລີ ມີຄວາມພາກພູມໃຈທີ່ໄດ້ຢືນຢູ່ຄຽງຂ້າງກະຊວງສຶກສາທິການ ແລະ ກິລາ ໃນການສະໜັບສະໜູນວຽກງານການປົກປ້ອງເດັກ, ຄວາມສະເໝີພາບຍິງ-ຊາຍ ແລະ ຄວາມເປັນຜູ້ນຳຂອງແມ່ຍິງໃນຂະແໜງການສຶກສາ. ສິ່ງທີ່ເຮັດໃຫ້ການຮ່ວມມືນີ້ມີຄຸນຄ່າຫຼາຍ ບໍ່ແມ່ນພຽງແຕ່ໄລຍະເວລາການຮ່ວມມືທີ່ມາຍາວນານ, ແຕ່ຍ້ອນຄວາມສາມາດໃນການຫັນປ່ຽນໃຫ້ໂຮງຮຽນ ແລະ ຊຸມຊົນ ເຫັນໄດ້ເຖິງຄຸນຄ່າທີ່ສຳຄັນຂອງວຽກງານທີ່ໄດ້ຮ່ວມມືກັນພັດທະນາ."
ກິດຈະກຳໃນຄັ້ງນີ້ ໄດ້ສະແດງໃຫ້ເຫັນເຖິງບົດບາດສຳຄັນຂອງແມ່ຍິງໃນຂະແໜງການສຶກສາ, ວິທະຍາສາດ ແລະ ກິລາ ໃນຖານະຜູ້ນຳທາງຄວາມຄິດ, ຜູ້ຕັດສິນໃຈ ແລະ ເປັນຕົວແທນຂອງການປ່ຽນແປງ. ຄະນະນຳຂອງສະຫະພັນແມ່ຍິງ ກະຊວງສຶກສາທິການ ແລະ ກິລາ ໄດ້ນຳສະເໜີຍຸດທະສາດ, ແຜນງານ 5 ປີ ແລະ ນຳພາຜູ້ເຂົ້າຮ່ວມຊົມງານວາງສະແດງກ່ຽວກັບປະຫວັດສາດຂອງສະຫະພັນແມ່ຍິງ.
ພ້ອມດຽວກັນນີ້, ຍັງໄດ້ເປີດໂອກາດໃຫ້ໂຄງການໃໝ່ “ແມ່ຍິງໃນການເປັນຜູ້ນຳ” (Women In Leadership: WIL) ຂອງກະຊວງສຶກສາທິການ ແລະ ກິລາ ໄດ້ຮັບການຈັດຕັ້ງປະຕິບັດ. ໂຄງການ WIL ໄດ້ເລີ່ມຕົ້ນໃນເດືອນພຶດສະພາ 2026 ດ້ວຍການສະໜັບສະໜູນຈາກລັດຖະບານອົດສະຕຣາລີ ເພື່ອສະໜັບສະໜູນກຸ່ມສະມາຊິກຫຼັກໃນທົ່ວກະຊວງ ເສີມສ້າງການເຊື່ອມໂຍງວຽກງານຄວາມສະເໝີພາບຍິງ-ຊາຍ, ຄວາມພິການ ແລະ ການສຶກສາຮຽນຮ່ວມ (GEDSI) ຜ່ານວິທີການຝຶກອົບຮົມຄູຝຶກ (TOT). ໃນງານ, ສະມາຊິກສະຫະພັນແມ່ຍິງ 19 ທ່ານ ຂອງໂຄງການ WIL ໄດ້ຈັດການຝຶກອົບຮົມກ່ຽວກັບຄວາມສະເໝີພາບຍິງ-ຊາຍ ແລະ ການປົກປ້ອງເດັກ ໃຫ້ແກ່ສະມາຊິກ ຈຳນວນ 75 ທ່ານ ຈາກກະຊວງສຶກສາທິການ ແລະ ກິລາ.
ໃນໂອກາດດັ່ງກ່າວ, ສູນໂຄສະນາຂ່າວສານການສຶກສາ ແລະ ກິລາ ຮ່ວມກັບ ພະແນກຄວາມກ້າວໜ້າຂອງແມ່ຍິງ ໄດ້ນຳສະເໜີ ວິດີໂອໃໝ່ “ການປົກປ້ອງ ແລະ ຮັກສາຄວາມປອດໄພສຳລັບເດັກ” ເປັນຄັ້ງທຳອິດ. ວິດີໂອດັ່ງກ່າວສ້າງຂຶ້ນໂດຍອີງໃສ່ຄຳແນະນຳກ່ຽວກັບການປົກປ້ອງເດັກ ຂອງກະຊວງສຶກສາທິການ ແລະ ກິລາ (ເຜີຍແຜ່ໃນເດືອນກໍລະກົດ 2024), ໂດຍໃຊ້ພາບອະນິເມຊັນ (Animation) ເພື່ອສື່ສານຂໍ້ຄວາມ "ສິ່ງທີ່ຄວນເຮັດ ແລະ ຫ້າມເຮັດ" ຢ່າງປອດໄພ, ເຂົ້າໃຈງ່າຍ ແລະ ເໝາະສົມ.
ນອກຈາກນັ້ນ, ລັດຖະບານອົດສະຕຣາລີ ຍັງໄດ້ມອບອຸປະກອນຜະລິດວິດີໂອ ແລະ ອຸປະກອນໄອທີ (IT) ມູນຄ່າ 37,662 ໂດລາອົດສະຕຣາລີ (ປະມານ 585,793,000 ກີບ) ເພື່ອສະໜັບສະໜູນວຽກງານຂອງທີມງານສື່ສານ ກະຊວງສຶກສາທິການ ແລະ ກິລາ.
ຫຼັງຈາກພິທີທາງການ, ໄດ້ມີການຈັດຝຶກອົບຮົມໃຫ້ແກ່ທີມງານສື່ມວນຊົນຂັ້ນສູນກາງ, ທ້ອງຖິ່ນ ແລະ ນັກຂ່າວ ເພື່ອເສີມສ້າງຄວາມເຂົ້າໃຈກ່ຽວກັບການລາຍງານຂ່າວທີ່ມີຄວາມຮັບຜິດຊອບ, ການປົກປ້ອງເດັກ, ການຖ່າຍຮູບ-ວິດີໂອເດັກຢ່າງປອດໄພ ແລະ ການສື່ສານທີ່ສົ່ງເສີມຄວາມສະເໝີພາບຍິງ-ຊາຍ ໂດຍຄູຝຶກຈາກພະແນກຄວາມກ້າວໜ້າຂອງແມ່ຍິງ ແລະ ມະຫາວິທະຍາໄລແຫ່ງຊາດ.
ທ່ານ ປອ. ນາງ ດາລາວອນ ກິດຕິພັນ ໄດ້ກ່າວສະຫຼຸບວ່າ: “ພວກເຮົາມາຮ່ວມແຮງຮ່ວມໃຈກັນໃນທົ່ວກະຊວງສຶກສາທິການ ແລະ ກິລາ, ສະຫະພັນແມ່ຍິງ, ສື່ມວນຊົນ ແລະ ຄູ່ຮ່ວມງານທັງໝົດ ເພື່ອຫັນຄຳແນະນຳໄປສູ່ການຈັດຕັ້ງປະຕິບັດ, ສ້າງຄວາມຮັບຮູ້ທີ່ເຂັ້ມແຂງ ກ່ຽວກັບຄວາມສະເໝີພາບຍິງ-ຊາຍ ແລະ ສ້າງໂຮງຮຽນໃຫ້ເປັນສະຖານທີ່ໆ ປອດໄພ ແລະ ສົ່ງເສີມການຮຽນຮ່ວມ ເພື່ອເດັກທຸກຄົນ.”
ທ່ານ ນາງ ເບັນນິຕາ ຊຳເມີວິວ ໄດ້ກ່າວຕື່ມວ່າ: "ງານນີ້ ສະແດງໃຫ້ເຫັນວ່າ ການຮ່ວມມືທີ່ເຂັ້ມແຂງ ສາມາດບັນລຸໝາກຜົນໄດ້ຢ່າງແທ້ຈິງ. ລັດຖະບານອົດສະຕຣາລີ ມີຄວາມຍິນດີທີ່ຈະສະໜັບສະໜູນຄວາມພະຍາຍາມຂອງກະຊວງສຶກສາທິການ ແລະ ກິລາ ທີ່ໄດ້ຖືເອົາຄວາມເປັນຜູ້ນຳຂອງແມ່ຍິງ, ການປົກປ້ອງເດັກ ແລະ ຄວາມສະເໝີພາບຍິງ-ຊາຍ ມານຳສະເໜີຮ່ວມກັນ ເພື່ອຮ່ວມກັນຮັບຮູ້ ແລະ ຈັດຕັ້ງປະຕິບັດໃຫ້ປະກົດຜົນເປັນຈິງ."
#ຂ່າວ ແລະ Face ໂດຍ: ຂ່າວສຶກສາ, ວິທະຍາສາດ ແລະ ກິລາ / Education Science And Sport News

27/07/2026

ສູນການສຶກສານອກໂຮງຮຽນ ແຂວງໄຊຍະບູລີ
ປິດການຝຶກອົບຮົມການຜະລິດຫົວເຊື້ອເຫັດນາງຟ້າ-ນາງລົມ.............................
ໃນຕອນເຊົ້າຂອງວັນທີ 24 ກໍລະກົດ 2026 ນີ້, ຢູ່ທີ່ສູນການສຶກສານອກໂຮງຮຽນ ພະແນກສຶກສາທິການ ແລະ ກິລາ ແຂວງໄຊຍະບູລີ ໄດ້ຈັດພິທີປິດການຝຶກອົບຮົມການຜະລິດຫົວເຊື້ອເຫັດນາງຟ້າ-ນາງລົມ ໃຫ້ແກ່ນັກສຳມະນາກອນຈາກສູນການສຶກສານອກໂຮງຮຽນແຂວງໄຊຍະບູລີ ແລະ ໜ່ວຍງານການສຶກສານອກໂຮງຮຽນເມືອງໄຊຍະບູລີ ,ເມືອງພຽງ. ພິທີດັ່ງກ່າວໄດ້ຈັດຂຶ້ນໂດຍການໃຫ້ກຽດເຂົ້າຮ່ວມຂອງ ທ່ານ ທອງພັນ ສິງແກ້ວ ຮອງຫົວໜ້າພະແນກສຶກສາທິການ ແລະ ກິລາ ແຂວງໄຊຍະບູລີ. ມີບັນດາຫົວໜ້າຂະແໜງ, ຫົວໜ້າ ແລະ ຮອງຫົວໜ້າໜ່ວຍງານ, ຄະນະຮັບຜິດຊອບ, ຄູຝຶກຈາກສູນການສຶກສານອກໂຮງຮຽນພາກເໜືອ ພ້ອມດ້ວຍນັກສຳມະນາກອນເຂົ້າຮ່ວມ.
ໃນພິທີ ທ່ານ ພອນໄຊ ສົມສະນິດ ຕາງໜ້າຄະນະຮັບຜິດຊອບການຝຶກອົບຮົມ ໄດ້ຂຶ້ນຜ່ານບົດລາຍງານໂດຍຫຍໍ້ກ່ຽວກັບຜົນການດຳເນີນງານຕະຫຼອດ 5 ວັນທີ່ຜ່ານມາ ທ່ານໄດ້ຍົກໃຫ້ເຫັນວ່າ: ຂະບວນການຮຽນ-ການສອນແມ່ນໄດ້ເນັ້ນໃສ່ການຮຽນຮູ້ແບບມີສ່ວນຮ່ວມ ໂດຍຄູຝຶກໄດ້ນຳໃຊ້ຫຼາຍວິທີການ ເຊັ່ນ: ການລະດົມສະໝອງ, ການສາທິດ ແລະ ການປະຕິບັດຕົວຈິງ. ພ້ອມດຽວກັນນັ້ນ, ຍັງໄດ້ມີການປະເມີນຜົນ ແລະ ທົດສອບຄວາມຮູ້ດ້ານວິຊາການ ທັງກ່ອນ ແລະ ຫຼັງການຝຶກອົບຮົມ ເພື່ອວັດແທກລະດັບຄວາມຮັບຮູ້ຂອງຜູ້ເຂົ້າຮ່ວມ. ເຊິ່ງຜົນການປະເມີນປະກົດວ່າ ນັກສຳມະນາກອນສ່ວນຫຼາຍແມ່ນມີຄວາມເຂົ້າໃຈດີ, ສາມາດກຳໄດ້ເນື້ອໃນທິດສະດີ ພ້ອມທັງເຂົ້າໃຈບົດບາດ-ໜ້າທີ່ ແລະ ຂັ້ນຕອນການປະຕິບັດຕົວຈິງໄດ້ດີ, ເຊິ່ງສາມາດສະຫຼຸບຕົວເລກປະເມີນຜົນໄດ້ດັ່ງນີ້: ດ້ານທິດສະດີ ບັນລຸໄດ້ 80%, ດ້ານພາກປະຕິບັດຕົວຈິງ ບັນລຸໄດ້ 85%, ຜົນຜະລິດທີ່ຮ່ວມກັນເຮັດໄດ້ ສາມາດຜະລິດຫົວເຊື້ອວຸ້ນໄດ້ 14 ແກ້ວ ແລະ ຜະລິດວຸ້ນໃສ່ເຂົ້າໄດ້ 18 ແກ້ວ ເຊິ່ງຖືວ່າບັນລຸຕາມຈຸດປະສົງ ແລະ ຄາດໝາຍທີ່ວາງໄວ້. ໃນໂອກາດດັ່ງກ່າວ, ປະທານກອງປະຊຸມຍັງໄດ້ໃຫ້ກຽດມອບໃບຍັ້ງຍືນການຝຶກອົບຮົມໃຫ້ແກ່ນັກສຳມະນາກອນທັງໝົດ 18 ທ່ານ , ຍິງ 3 ທ່ານ.
ໃນຕອນທ້າຍພິທີ ທ່ານ ທອງພັນ ສິງແກ້ວ ໄດ້ໃຫ້ກຽດໂອ້ລົມ ແລະ ສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດຊອບ, ຄູຝຶກ ແລະ ນັກສຳມະນາກອນທຸກທ່ານ. ພ້ອມນີ້, ທ່ານຍັງໄດ້ເນັ້ນໜັກໃຫ້ຜູ້ເຂົ້າຮ່ວມຝຶກອົບຮົມນຳເອົາບົດຮຽນທີ່ໄດ້ຮັບໄປລາຍງານຕໍ່ຄະນະນຳ, ກົມກອງຂອງຕົນ ເພື່ອສ້າງແຜນຜັນຂະຫຍາຍລົງສູ່ກຸ່ມເປົ້າໝາຍໃນຊຸມຊົນ. ນອກຈາກນັ້ນ, ທ່ານຍັງໄດ້ຊີ້ນຳໃຫ້ໜ່ວຍງານການສຶກສານອກໂຮງຮຽນທັງ 2 ເມືອງ ເລັ່ງຂຶ້ນແຜນຫົວຂໍ້ຝຶກອົບຮົມ ເຂົ້າໃນແຜນປະຈຳປີ 2027, ມຸ່ງເນັ້ນການສ້າງຄວາມເຂັ້ມແຂງເພື່ອນຳເອົາຄວາມຮູ້ໄປຈັດຕັ້ງຜັນຂະຫຍາຍ, ການຊອກຫາຜູ້ປະກອບການເຂົ້າຮ່ວມ ແລະ ການສົ່ງເສີມໃຫ້ປະຊາຊົນນຳໃຊ້ວິຊາຊີບນີ້ໄປຂະຫຍາຍຜົນ ເພື່ອສ້າງວຽກເຮັດງານທຳ, ເພີ່ມລາຍໄດ້ ແລະ ສ້າງເປັນຄອບຄົວຕົວແບບໃນອະນາຄົດ.

22/07/2026

ສູນການສຶກສານອກໂຮງຮຽນ ແຂວງໄຊຍະບູລີ ຈັດຝຶກອົບຮົມການຜະລິດຫົວເຊື້ອເຫັດ
ນາງຟ້າ-ນາງລົມ ໃຫ້ບຸກຄະລາກອນ ສູນການສຶກສານອກໂຮງຮຽນ ຂັ້ນແຂວງ ແລະ ຂັ້ນເມືອງ........................................................
ໃນຕອນເຊົ້າວັນທີ 20 ກໍລະກົດ 2026 ນີ້, ຢູ່ທີ່ ສູນການສຶກສານອກໂຮງຮຽນ ພະແນກສຶກສາທິການ ແລະ ກິລາ ແຂວງໄຊຍະບູລີ ໄດ້ມີພິທີເປີດການຝຶກອົບຮົມການຜະລິດຫົວເຊື້ອເຫັດນາງຟ້າ-ນາງລົມ ໃຫ້ແກ່ວິຊາການສູນການສຶກສານອກໂຮງຮຽນ ແຂວງ ແລະ ໜ່ວຍງານ ສູນການສຶກສານອກໂຮງຮຽນ ເມືອງ ໂດຍການເປັນປະທານຮ່ວມຂອງ ທ່ານ ທອງພັນ ສິງແກ້ວ ຮອງຫົວໜ້າພະແນກສຶກສາທິການ ແລະ ກິລາ ແຂວງໄຊຍະບູລີ ແລະ ທ່ານ ຈັນທະວົງ ມະນີພອນ ອຳນວຍການສູນການສຶກສານອກໂຮງຮຽນພາກເໜືອ. ມີບັນດາຫົວໜ້າຂະແໜງ, ຫົວໜ້າ-ຮອງຫົວໜ້າໜ່ວຍງານ, ຄະນະຮັບຜິດຊອບ, ຄູຝຶກຈາກສູນການສຶກສານອກໂຮງຮຽນພາກເໜືອ ພ້ອມດ້ວຍນັກສຳມະນາກອນຈາກສູນການສຶກສານອກໂຮງຮຽນ ແຂວງ, ໜ່ວຍງານສູນການສຶກສານອກໂຮງຮຽນ ເມືອງໄຊຍະບູລີ ແລະ ເມືອງພຽງ ເຂົ້າຮ່ວມທັງໝົດ 30 ທ່ານ.
ໃນໂອກາດດັ່ງກ່າວ ທ່ານ ທອງພັນ ສິງແກ້ວ ໄດ້ໃຫ້ກຽດກ່າວເປີດພິທີ ແລະ ສະແດງຄວາມຕ້ອນຮັບຢ່າງອົບອຸ່ນຕໍ່ຄະນະທີມງານຈາກສູນການສຶກສານອກໂຮງຮຽນພາກເໜືອ ພ້ອມທັງນັກສຳມະນາກອນທຸກທ່ານ ເຊິ່ງທ່ານໄດ້ເນັ້ນໃຫ້ເຫັນເຖິງຄວາມສຳຄັນຂອງການພັດທະນາຊັບພະຍາກອນມະນຸດ ເພື່ອຍົກລະດັບຄຸນນະພາບຊີວິດຂອງປະຊາຊົນໃຫ້ດີຂຶ້ນ. ພ້ອມ ທັງລະບຸວ່າ: ການຝຶກອົບຮົມຄັ້ງນີ້ ມີຈຸດປະສົງເພີ່ມຄວາມເຂັ້ມແຂງ ແລະ ສ້າງຂີດຄວາມສາມາດໃຫ້ກັບບຸກຄະລາກອນ ສູນການສຶກສານອກໂຮງຮຽນ ແຂວງ ແລະ ເມືອງ ໃຫ້ມີຄວາມຮູ້, ຄວາມຊຳນານ ໃນການຜະລິດຫົວເຊື້ອເຫັດ, ເພື່ອນຳເອົາບົດຮຽນ ແລະ ເທັກນິກວິຊາການທີ່ໄດ້ຮັບ ໄປຖ່າຍທອດ-ຂະຫຍາຍຜົນ ໃຫ້ແກ່ປະຊາຊົນ ແລະ ໜ່ວຍງານໃນຂົງເຂດຮັບຜິດຊອບຂອງຕົນໃນອະນາຄົດ. ການຝຶກອົບຮົມໃນຄັ້ງນີ້ມີນັກສຳມະນາກອນທັງໝົດ 18 ທ່ານ ຫຼັກສູດການຝຶກອົບຮົມຈະໄດ້ດຳເນີນເປັນເວລາ 5 ວັນ ( ວັນທີ 20–24 ກໍລະກົດ 2026) ເຊິ່ງນັກສຳມະນາກອນຈະໄດ້ຮຽນຮູ້ທັງພາກທິດສະດີ ແລະ ພາກປະຕິບັດຕົວຈິງ ກ່ຽວກັບ: ຄຸນປະໂຫຍດຂອງການຜະລິດຫົວເຊື້ອເຫັດ, ຂັ້ນຕອນການຜະລິດຫົວເຊື້ອເຫັດ, ການກະກຽມສະຖານທີ່ຫ້ອງເຂ່ຍເຊື້ອເຫັດ, ການກະກຽມວັດສະດຸອຸປະກອນ, ສູດການຜະລິດອາຫານວຸ້ນ, ຂັ້ນຕອນການຜະລິດອາຫານ, ການໜື້ງວຸ້ນ ແລະ ການຜະລິດຫົວເຊື້ອເຫັດໃສ່ເມັດເຂົ້າ. ໃນຕອນທ້າຍຂອງການຝຶກອົບຮົມ ຈະມີການສະຫຼຸບປະເມີນຜົນ ພ້ອມທັງມອບໃບຍັ້ງຢືນ ໃຫ້ແກ່ນັກສຳມະນາກອນ ທີ່ສຳເລັດການຝຶກອົບຮົມອິກດ້ວຍ.

21/07/2026

ປະກາດ ໂຮງຮຽນເຕັກນິກວິຊາຊີບແບບປະສົມແຂວງໄຊຍະບູລີ ເປີດຮັບສະຫມັກນັກຮຽນ-ນັກສຶກສາ ສົກຮຽນ 2026-2027 ເລີ່ມແຕ່ມື້ນີ້ຈົນຮອດວັນທີ 1/10/2026. ສາມາດເລີ່ງລາຍລະອຽດສາຂາຮຽນ ແລະ ເບີໂທຕິດຕໍ່ດ້ານລຸ່ມໄດ້