08/07/2026
ຄູອາຈານ ວິທະຍາໄລຄູສາລະວັນ ນຳພານັກສຶກສາທົດລອງການກວດສອບຄຸນນະພາບນ້ຳ
------------------------------
ວິທະຍາໄລຄູສາລະວັນ ໄດ້ຈັດການທົດລອງການກວດສອບຄຸນນະພາບນ້ຳ ສໍາລັບພາກພັກສິ້ນປີຮຽນ ສາຍຊີວະ - ຄະນິດສາດ ເປັນການຫັນເອົາທິດສະດີສູ່ການປະຕິບັດຕົວຈິງ, ໄດ້ຈັດຂຶ້ນໃນວັນທີ 8 ກໍລະກົດ 2026, ຢູ່ທີ່ສະໂມສອນວິທະຍາໄລຄູສາລະວັນ, ໂດຍການເຂົ້າຮ່ວມຂອງ ທ່ານ ອຸດຕະມະ ແສງອາລຸນ ຮອງຜູ້ອຳນວຍການວິທະຍາໄລຄູສາລະວັນ, ມີຫົວໜ້າ ແລະ ຮອງຫົວໜ້າພາກວິຊາ, ຊ່ຽວຊານອາສາສະໝັກຢີ່ປຸ່ນ, ຄູອາຈານໃນພາກວິຊາ ຕະຫຼອດຮອດນັກສຶກສາໃນສາຍຊີວະສາດ, ຄະນິດສາດ ໃນພາກຕໍ່ເນື່ອງພັກສິ້ນປີຮຽນ ເຂົ້າຮ່ວມ.
ທ່ານ ນາງ ຮິໂລະມິ ສຸກິມຸລະ ຊ່ຽວຊານດ້ານສາທາລະນະສຸກ ປະຈຳໂຮງໝໍຈຳປາສັກ ໄດ້ບັນລະຍາຍ ແລະ ຍົກໃຫ້ເຫັນເຖີງຄວາມສຳຄັນຢ່າງຍິ່ງຕໍ່ການດໍາລົງຊີວິດ ໂດຍສະເພາະການນຳໃຊ້ທີ່ນ້ຳສະອາດ, ມີຄຸນນະພາບ ຊ່ວຍສ້າງພູມຄຸ້ມກັນ, ຫຼຸດຜ່ອນອັດຕາການເຈັບປ່ວຍຈາກພະຍາດທາງເດີນອາຫານ ແລະ ສົ່ງເສີມໃຫ້ທຸກຄົນໃນຊຸມຊົນມີສຸຂະພາບທີ່ດີ ແລະ ຫຼຸດຜ່ອນຈາກການເກີດເປັນພະຍາດຕ່າງໆໄດ້ ແລະ ຖ້າຫາກໄດ້ດື່ມ ຫຼື ນ້ຳໃຊ້ນ້ຳທີ່ເປິເປື້ອນ ຈະພາໃຫ້ເກີດພະຍາດຖອກທ້ອງ, ເຈັບທ້ອງ, ຮາກ, ເປັນໄຂ້, ພະຍາດໃບໄມ້ໃນເລືອດ, ພະຍາດຕັບອັກເສບ, ພາວະຂາດອົກຊີໃນກະແສເລືອດ ແລະ ພາວະພິດສະສົມ. ສໍາລັບວິທີການປ້ອງກັນ ທີ່ທຸກຄົນມີສ່ວນຮ່ວມ ແລະ ສາມາດປະຕິບັດໄດ້ຄື: ຟື້ນຟູສະພາບແວດລ້ອມທາງທໍາມະຊາດ, ການຖີ້ມຂີ້ເຫຍື້ອຊະຊາຍຕາມສະຖານທີ່ຕ່າງໆ, ຕາມແຄມແມ່ນຳ້ ເປັນຕົ້ນ: ເສດອາຫານ, ຂີ້ເຫຍື້ອພຣາສະຕິກ, ລ້າງມືດ້ວຍສະບູກ່ອນແຕ່ງກິນ ແລະ ອື່ນໆ. ນອກນັ້ນ ໄດ້ຊົມໃຊ້ນໍ້າປະປາ ແລະ ລະບົບລະບາຍນໍ້າເສຍໃຫ້ໄດ້ມາດຕະຖານ, ບຳບັດນໍ້າເສຍຈາກຄົວເຮືອນຢ່າງຖືກວິທີ, ປະຊາຊົນຄວນມີສ່ວນຮ່ວມໃນການຕິດຕາມກວດກາການບຳບັດນໍ້າເສຍຈາກໂຮງງານອຸດສາຫະກຳ ແລະ ອື່ນໆ.
ໂອກາດດັ່ງກ່າວ, ກໍໄດ້ນໍາພາຄູອາຈານ ແລະ ນັກສຶກສາ ປະຕິບັດການທົດລອງກວດສອບຄຸນນະພາບນ້ຳ ເປັນຕົ້ນ: ຊອກຫາຄ່າ pH ວັດແທກວ່ານ້ຳເປັນກົດ ຫຼື ເປັນດ່າງ, COD ປະລິມານອົກຊີໃນນ້ຳ, ຊອກເຊື້ອພະຍາດ E-coli ແມ່ນເຊື້ອພະຍາດໃນອາຈົມ ແລະ ກລໍ ທີ່ສາມາດຂ້າເຊື້ອແບັກທີເຮັຍໄດ້ ໂດຍໄດ້ນຳໃຊ້ນ້ຳຈາກ 5 ແຫຼ່ງນ້ຳ ຄື: 1) ນ້ຳເປື້ອນຈາກຕະຫຼາດ, 2) ນ້ຳເຊໂດນ, 3) ນ້ຳປະປາ, 4) ນ້ຳບາດານ ແລະ 5) ນ້ຳດື່ມ ທີ່ຈຳໜ່າຍໃນຕະຫຼາດ ໂດຍການນຳພາປະຕິບັດຂອງຄູອາຈານພາຍໃນວິທະຍາໄລຄູສາລະວັນ ເພື່ອໃຫ້ນັກສຶກສາໄດ້ຮຽນຮູ້ຂະບວນການວິເຄາະກວດສອບສິ່ງເຈືອປົນ ແລະ ສານເຄມີຕ່າງໆ ທີ່ມີຢູ່ໃນນ້ຳ ແນໃສ່ບົ່ງບອກໄດ້ເຖິງຄວາມປອດໄພໃນການນຳໃຊ້ ແລະ ເປັນການເຝົ້າລະວັງບັນຫາສິ່ງແວດລ້ອມພາຍໃນຊຸມຊົນໄປພ້ອມໆກັນ. ທັງເປັນການເກັບກຳບົດຮຽນ, ຄວາມຮູ້ໃໝ່ໆ ເພື່ອຈະນຳເອົາຄວາມຮູ້ດ້ານວິທະຍາສາດ ແລະ ການອະນຸລັກສິ່ງແວດລ້ອມ ໄປຖ່າຍທອດໃຫ້ແກ່ນັກຮຽນ ແລະ ຊຸມຊົນໃນອະນາຄົດ.
----------------------------------
ພາບ:ວິທະຍາໄລຄູສາລະວັນ
ຂ່າວ: ນັກຂ່າວໂທລະພາບແຂວງສາລະວັນ
