21/09/2026
ໃນວັນທີ 16 ກັນຍາ 2026, ຢູ່ທີ່ຫ້ອງປະຊຸມ 101 ຄະນະເສດຖະສາດ ແລະ ການທ່ອງທ່ຽວ (ຄສທ), ມະຫາວິທະຍາໄລສຸພານຸວົງ, ໄດ້ມີການຈັດພິທີມອບ-ຮັບທຶນການສຶກສາ ສົກສຶກສາ 2026-2027 ຢ່າງເປັນທາງການ ໃຫ້ແກ່ນັກສຶກສາລະດັບປະລິນຍາຕີ ໃນສາຂາວິຊາ ບໍລິຫານການທ່ອງທ່ຽວ, ບໍລິຫານການໂຮງແຮມ, ເສດຖະສາດ ແລະ ບໍລິຫານການທ່ອງທ່ຽວ (ຫຼັກສູດນານາຊາດ) ຈຳນວນທຶນທັງໝົດ 24 ທຶນ, ມູນຄ່າລວມ: 60,000,000 ກີບ. ທຶນການສຶກສາດັ່ງກ່າວໄດ້ຮັບການສະໜັບສະໜູນໂດຍ ສະມາຄົມ The MANRIHYUN Community Scholarship Association & SIS ທີ່ຂຶ້ນກັບໂຮງຮຽນນານາຊາດຊາຣອນຈໍາກັດຜູ້ດຽວ ນະຄອນຫຼວງວຽງຈັນ. ພິທີດັ່ງກ່າວໄດ້ຈັດຂຶ້ນໂດຍການເຂົ້າຮ່ວມຂອງ ຮສ. ປອ. ນ. ວິໄລພອນ ສົມສະໝອນ ຮັກສາການ ຫົວໜ້າຄະນະວິຊາ, ພ້ອມດ້ວຍປະທານສະມາຄົມຜູ້ໃຫ້ທຶນ, ຄູ-ອາຈານ, ແຂກຖືກເຊີນ ແລະ ນັກສຶກສາຜູ້ທີ່ໄດ້ຮັບທຶນຢ່າງພ້ອມພຽງ. ການມອບທຶນໃນຄັ້ງນີ້ ມີຈຸດປະສົງເພື່ອສົ່ງເສີມ ແລະ ສະໜັບສະໜູນໂອກາດທາງການສຶກສາ ໃຫ້ແກ່ນັກສຶກສາທີ່ມີຜົນການສຶກສາດີເດັ່ນ ແລະ ມີຄວາມດຸໝັ້ນ-ຫ້າວຫັ້ນ ເພື່ອພັດທະນາຕົນເອງໃຫ້ເປັນກຳລັງສໍາຄັນຂອງຊາດໃນອະນາຄົດ.
#ມະຫາວິທະຍາໄລສຸພານຸວົງ #ຄະນະເສດຖະສາດແລະການທ່ອງທ່ຽວ #ທຶນການສຶກສາ
