ສະຖາບັນຂົງຈື ມຊ

18/08/2026

ພິທີເປີດປ້າຍທຶນການສຶກສາສິດເກົ່າຄູສອນພາສາຈີນສາກົນທີ່ ສປປ ລາວ
ໃນວັນທີ 17 ສິງຫາ 2026, ສະຖາບັນຂົງຈືໄດ້ຈັດພິທີເປີດປ້າຍ ທຶນການສຶກສາສິດເກົ່າຄູສອນພາສາຈີນສາກົນທີ່ ສປປ ລາວ ໄດ້ຈັດຂຶ້ນຢ່າງເປັນທາງການທີ່ສະໂມສອນໃຫຍ່ ສະຖາບັນຂົງຈື ມະຫາວິທະຍາ ໄລແຫ່ງຊາດລາວ. ໃຫ້ກຽດເຂົ້າຮ່ວມໃນງານມີ ທ່ານ ຢາງໂຈວ, ຮອງຫົວໜ້າສູນຮ່ວມມືແລກປ່ຽນພາສາຈີນ-ຕ່າງປະເທດ ກະຊວງສຶກສາທິການ ສປ ຈີນ, ທ່ານ ຮສ.ປອ. ສິນທະວອນ ດາລາວົງ ຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ, ທ່ານ ຄໍາຮຸ່ງ ຈັນທະວົງ, ທ່ານ ເຝິງກວາງຫົວ ຫົວໜ້າສະຖາບັນຂົງຈືສອງຝ່າຍ ລາວ-ຈີນ ມະຫາວິທະຍາ ໄລແຫ່ງຊາດ. ທ່ານ ຈີ ຫົງຈຽງ ຫົວໜ້າສະຖາບັນຂົງຈື ຝ່າຍຈີນ ມະຫາວິທະຍາໄລສຸພານຸວົງ,ນອກຈາກນັ້ນ ຍັງມີບັນດາຄະນະທີ່ມາຈາກສູນຮ່ວມມືແລກປ່ຽນພາສາຈີນ-ຕ່າງປະເທດ, ຜູ້ຄຸ້ມຄອງອາສາສະໝັກຈີນຢູ່ ສປປ ລາວ, ບັນດາທ່ານຕາງໜ້າຫ້ອງການສັງລວມ ແລະ ພົວພັນຕ່າງປະເທດ, ຫ້ອງການຈັດຕັ້ງ-ພະນັກງານ ແລະ ກວດກາ, ບັນດາທ່ານຮອງຫົວໜ້າສະຖາບັນ, ຫົວໜ້າພາກ, ຮອງຫົວໜ້າພາກ, ຫົວໜ້າພະແນກ, ຮອງຫົວໜ້າພະແນກ, ພະນັກງານ ແລະ ຄູອາຈານສອງຝ່າຍລາວ-ຈີນ ແລະ ນ້ອງນັກສຶກສາກໍໃຫ້ກຽດເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ຮສ. ປອ. ສິນທະວົງ ດາລາວົງ ຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ ໄດ້ກ່າວສະແດງຄວາມຍິນດີຕ້ອນຮັບຢ່າງອົບອຸ່ນຕໍ່ການມາຢ້ຽມຢາມຂອງທ່ານ ຢາງ ໂຈວ ແລະ ຄະນະພ້ອມທັງຕີລາຄາສູງຕໍ່ການຊຸກຍູ້ການສຶກສາພາສາຈີນຢູ່ລາວ ແລະ ເພີ່ມພູນການແລກປ່ຽນດ້ານມະນຸດສາດລະຫວ່າງລາວ-ຈີນ. ໃນໂອກາດປີແຫ່ງມິດຕະພາບລາວ-ຈີນ, ຄົບຮອບ 65 ປີແຫ່ງການສ້າງຕັ້ງສາຍພົວພັນການທູດລາວ-ຈີນ ແລະ ຄົບຮອບ 30 ປີແຫ່ງການສ້າງຕັ້ງມະຫາວິທະຍາໄລແຫ່ງຊາດລາວ, ການສ້າງຕັ້ງທຶນການສຶກສາສິດເກົ່າຄູສອນພາສາຈີນສາກົນທີ່ ສປປ ລາວ ຈະກາຍເປັນຂົວເຊື່ອມແຫ່ງໃໝ່ສຳລັບການແລກປ່ຽນບຸກຄະລາກອນດ້ານການສຶກສາພາສາຈີນລະຫວ່າງສອງປະເທດ ເຮັດໃຫ້ບຸກຄະລາກອນດ້ານການສຶກສາພາສາຈີນໃຫ້ເຂັ້ມແຂງຂຶ້ນ. ທ່ານຍັງໄດ້ເນັ້ນອີກວ່າ ສະມາຄົມຈະມີບົດບາດສຳຄັນໃນການເຕົ້າໂຮມບັນດາຜູ້ໄດ້ຮັບທຶນການສຶກສາຄູສອນພາສາຈີນສາກົນ ລວມເຖິງນັກສຶກສາຫຼັກສູດຄູພາສາຈີນ “2+2” ທີ່ໄດ້ໄປສຶກສາຢູ່ ສປ ຈີນ ພາຍໃຕ້ໂຄງການທຶນດັ່ງກ່າວ ແລະ ຫວັງວ່າ ສະມາຄົມຈະກາຍເປັນເວທີເຊື່ອມໂຍງສິດເກົ່າ, ສົ່ງເສີມການພົບປະແລກປ່ຽນຮຽນຮູ້ ແບ່ງປັນປະສົບການ ພັດທະນາອາຊີບ ແລະ ຊ່ວຍເຫຼືອເຊິ່ງກັນແລະກັນ, ເພື່ອຮ່ວມກັນປະກອບສ່ວນເຂົ້າໃນການສ້າງປະຊາຄົມຮ່ວມຊາຕາກຳລາວ-ຈີນ.
ຈາກນັ້ນ, ທ່ານ ຢາງ ໂຈວ ຮອງຫົວໜ້າສູນຮ່ວມມືແລກປ່ຽນພາສາຈີນ-ຕ່າງປະເທດ ກະຊວງສຶກສາທິການ ສປ ຈີນ ໄດ້ມີຄໍາເຫັນ ໂດຍສະແດງຄວາມຊົມເຊີຍຕໍ່ການສ້າງຕັ້ງສະມາຄົມ ແລະ ຂອບໃຈທຸກພາກສ່ວນທີ່ໄດ້ໃຫ້ການສະ ໜັບສະໜູນການພັດທະນາການສຶກສາພາສາຈີນຢູ່ລາວຕະຫຼອດມາ. ສູນ ໃນຖານະເປັນອົງການທີ່ໃຫ້ບໍລິການແກ່ການພັດທະນາການສຶກສາພາສາຈີນສາກົນທົ່ວໂລກ ມີການສະໜັບສະໜູນການສ້າງລະບົບການສຶກສາພາສາຈີນທີ່ສອດຄ່ອງກັບສະພາບທ້ອງຖິ່ນຂອງແຕ່ລະປະເທດມາໂດຍຕະຫຼອດ. ຫວັງຢ່າງຍິ່ງວ່າການສ້າງຕັ້ງສະມາຄົມທຶນການສຶກສາສິດເກົ່າຄູສອນພາສາຈີນສາກົນທີ່ ສປປ ລາວ ຈະສາມາດສ້າງເວທີໃຫ້ແກ່ບັນດາສິດເກົ່າໃນການພົບປະແລກປ່ຽນ, ພ້ອມທັງເປັນຂົວເຊື່ອມການສື່ສານທີ່ໃກ້ຊິດຍິ່ງຂຶ້ນລະຫວ່າງສູນຮ່ວມມືດ້ານພາສາ, ສະຖາບັນການສຶກສາຂອງຈີນ ແລະ ລາວ ກໍຄືພາກສ່ວນຕ່າງໆຂອງສອງປະເທດ, ເພື່ອຮ່ວມກັນຊຸກຍູ້ການສຶກສາພາສາຈີນໃນລາວໃຫ້ມີຄຸນນະພາບສູງຂຶ້ນ, ສືບຕໍ່ສ້າງບຸກຄະລາກອນຮຸ່ນສືບທອດແຫ່ງມິດຕະພາບບ້ານໃກ້ເຮືອນຄຽງຈີນ-ລາວ ແລະ ຜູ້ສ້າງສາປະຊາຄົມຮ່ວມຊະຕາກຳຈີນ-ລາວໃນຍຸກໃໝ່. ພາຍໃຕ້ການເປັນສັກຂີພິຍານຂອງແຂກຜູ້ມີກຽດທຸກທ່ານ ໄດ້ມີການຈັດພິທີເປີດປ້າຍສະມາຄົມທຶນການສຶກສາສິດເກົ່າຄູສອນພາສາຈີນສາກົນທີ່ ສປປ ລາວ ຢ່າງເປັນທາງການ.
ຕາງໜ້ານັກສຶກສາ ນາງ ສຸດາພອນ ຕັນເສລີ, ໄດ້ຂຶ້ນກ່າວຄຳເຫັນ, ແບ່ງປັນປະສົບການການເຕີບໂຕໃນການຮຽນຮູ້ຢູ່ສະຖາບັນຂົງຈື ແລະ ການໄປສຶກສາຕໍ່ຢູ່ ສປ ຈີນຫຼັງຈາກໄດ້ຮັບທຶນຈາກສູນຮ່ວມມືແລກປ່ຽນພາສາຈີນ-ຕ່າງປະເທດ ໄປສຶກສາທີ່ມະຫາວິທະຍາໄລຊົນເຜົ່າກວາງຊີ, ພ້ອມທັງສະແດງຄວາມມຸ່ງຫວັງທີ່ຈະອຸທິດຕົນໃຫ້ແກ່ວຽກງານການສຶກສາພາສາຈີນ ແລະ ສືບທອດສາຍສຳພັນມິດຕະພາບອັນດີງາມລະຫວ່າງລາວ-ຈີນ.
ຈາກນັ້ນ, ຮອງຫົວໜ້າຫ້ອງການຈັດຕັ້ງ-ພະນັກງານ ແລະ ກວດກາ ມະຫາວິທະຍາໄລແຫ່ງຊາດ ໄດ້ອ່ານດຳລັດຂອງນາຍົກລັດຖະມົນຕີ ວ່າດ້ວຍການມອບໃບຍ້ອງຍໍຂັ້ນລັດຖະບານໃຫ້ແກ່ ອາຈານ ລູ້ຢ້າ, ຄູສອນພາສາຈີນທີ່ປະຈໍາການຢູ່ສະຖາບັນຂົງຈື. ທ່ານ ຮສ.ປອ. ສິນທະວອນ ດາລາວົງ ໃຫ້ກຽດມອບໃບຍ້ອງຍໍດັ່ງກ່າວ ເພື່ອຍ້ອງຍໍການອຸທິດຕົນຕະຫຼອດ 11 ປີ ໃນການສິດສອນພາສາຈີນ ແລະ ປະກອບສ່ວນຕໍ່ການກໍ່ສ້າງ-ພັດທະນາສະຖາບັນຂົງຈື ກໍຄືການສົ່ງເສີມການແລກປ່ຽນດ້ານພາສາ ແລະ ວັດທະນະທຳລາວ-ຈີນ.
ອາຈານ ລູ້ຢາ ໄດ້ກ່າວຄວາມຮູ້ສຶກວ່າ ການໄດ້ຮັບໃບຍ້ອງຍໍຈາກລັດຖະບານລາວ ເປັນຂອງຂວັນອັນລໍ້າຄ່າຢ່າງຍິ່ງໃນຊີວິດ, ປະສົບການ 11 ປີໃນການປະຕິບັດໜ້າທີ ແລະ ສິດສອນທີ່ສະຖາບັນຂົງຈື, ກໍ່ເປັນຊ່ວງເວລາອັນມີຄຸນຄ່າໃນຊີວິດເຊັ່ນດຽວກັນ. ພ້ອມທັງສະແດງຄວາມຂອບໃຈຢ່າງຈິງໃຈຕໍ່ຄະນະນຳຂອງສູນຮ່ວມມືດ້ານພາສາ, ຄະນະນຳຂອງມະຫາວິທະຍາໄລແຫ່ງຊາດລາວ ແລະ ມະຫາວິທະຍາໄລຊົນເຜົ່າກວາງຊີ, ຄະນະຜູ້ອຳນວຍການຝ່າຍລາວ ແລະ ຝ່າຍຈີນຂອງສະຖາບັນຂົງຈື, ພ້ອມທັງຂອບໃຈເພື່ອນຮ່ວມງານທຸກຄົນທີ່ໄດ້ຮ່ວມສູ້ ແລະ ເຮັດວຽກຄຽງບ່າຄຽງໄຫຼ່ກັນມາຕະຫຼອດ. ດ້ວຍການສະໜັບສະໜູນຢ່າງເຕັມທີ່ ແລະ ການຮ່ວມມືຈາກທຸກຝ່າຍທີ່ເຮັດໃຫ້ວຽກງານການສຶກສາພາສາຈີນໃນລາວສາມາດກ້າວໜ້າໄປຢ່າງໝັ້ນຄົງ.

18/08/2026

ກຽມຕົວເດີ້ ມື້ນີ້ຕອນເຊົ້າທີ18 ສິງຫາ ເຮົາມີລົງທະບຽນຮຽນສໍາລັບນັກສຶກສາໃໝ່ຜູ້ບໍ່ມີພື້ນຖານພາສາຈີນເດີ້.ລາຍລະອຽດວິທີສະໝັກຂໍໃຫ້ເບີ່ງຕາມແຈ້ງການຄັດຕິດມານໍານີ້ເດີ້.

16/08/2026

ສະຖາບັນຂົງຈື ມະຫາວິທະຍາໄລແຫ່ງຊາດ ຈັດສອບເສັງຄັດເລືອກນັກສຶກສາ ລະດັບປະລິນຍາຕີສາຂາຄູພາສາຈີນ ສົກປີ 2026-2027.
ໃນວັນທີ 15 ສິງຫາ ສະຖາບັນຂົງຈື (ສຂຈ) ມະຫາວິທະຍາໄລແຫ່ງຊາດໄດ້ຈັດການສອບເສັງຄັດເລືອກເອົານັກສຶກສາເຂົ້າຮຽນສາຂາຄູພາສາຈີນລະດັບປະລິນຍາຕີ, ເຊິ່ງມີທ່ານ ຮສ. ປອ. ສິນທະວອນ ດາລາວົງ ຜູ້ອໍານວຍການໃຫຍ່ ມະຫາວິທະຍາໄລແຫ່ງຊາດ, ທ່ານ ຮສ. ປອ. ອຸ່ນຫຼ້າ ສີວັນເພັງ ຮອງຜູ້ອໍານວຍການໃຫຍ່ ມະຫາວິທະຍາໄລແຫ່ງຊາດ, ທ່ານ ຮສ. ປອ. ໄກສອນ ເພັງໂສພາ ຫົວໜ້າກົມການສຶກສາຊັ້ນສູງ, ທ່ານ ຄໍາເຟືອງ ລໍວັນໄຊ ຫົວໜ້າຄະນະວິຊາສຶກສາສາດ, ທ່ານ ປອ. ນາງ. ທອງມາລາ ໂພສີຄໍາ ຫົວໜ້າຄະນະວິຊາ ອັກສອນສາດ ໄດ້ໃຫ້ກຽດລົງມາຕິດຕາມການສອບເສັງ, ທ່ານ ນາງ ບຸນນໍາ ຊົມວິມານ ຮອງຫົວຫນ້າຫ້ອງການວິຊາການ ມຊພ້ອມດຽວກັນນັ້ນ, ຍັງມີອ້າຍນ້ອງປ້ອງກັນ ແລະ ກໍາລັງ ປກສ ແລະ ທ່ານໝໍຈາກ ໂຮງໝໍວິທະຍາເຂດ ມຊ ມາຊ່ວຍໃນການຮັບປະກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍ. ຄະນະກໍາມະການໃນການຍາມຫ້ອງສອບເສັງໃນຄັ້ງນີ້, ແມ່ນມາຈາກຄະນະສຶກສາສາດ, ອັກສອນສາດ, ວິທະຍາສາດສັງຄົມ ແລະ ວິທະຍາສາດທໍາມະຊາດມາຊ່ວຍໃນການປະຕິບັດວຽກງານການສອບເສັງ. ທ່ານ ຄໍາຮຸ່ງ ຈັນທະວົງ ຫົວໜ້າສະຖາບັນຂົງຈື ຝ່າຍລາວ, ທ່ານ ເຟິງກວາງຫວາ ຫົວໜ້າສະຖາບັນຂົງຈືຝ່າຍຈີນ ກໍ່ໄດ້ໃຫ້ການຕ້ອນຮັບ ແລະ ລາຍງານການກະກຽມ ແລະ ສະພາບການຈັດສອບເສັງຄັດເລືອກນັກສຶກສາໃນປີນີ້, ເຊິ່ງມີນັກຮຽນນັກສຶກສາສະໝັກສອບເສັງທັງໝົດ 681 ຄົນ, ການສອບເສັງແບ່ງອອກເປັນສອງພາກຄື: ຕອນເຊົ້າສອບເສັງພາກຂຽນໂດຍມີ ພາສາລາວ-ວັນນະຄະ+ພູມສາດ+ປະຫວັດສາດ+ຄະນິດສາດ ເປັນ 1 ຫົວບົດ ແລະ ພາກພາສາຈີນ+ອັງກິດ ເປັນ 1 ຫົວບົດ. ຕອນບ່າຍມີການສໍາພາດແບບເຊິ່ງໜ້າໂດຍແມ່ນອາຈານຈີນເປັນຄົນສໍາພາດດ້ວຍພາສາຈີນ, ນັກສຶກສາທີ່ຈະສາມາດເຂົ້າຮຽນສາຂາຄູພາສາຈີນໄດ້ນັ້ນແມ່ນຈະຕ້ອງມີພື້ນຖານພາສາຈີນດີລະດັບໃດໜຶ່ງ. ຫຼັກສູດປະລິນຍາຕີສາສາຂາຄູພາສາຈີນ ທີ່ສະຖາບັນຂົງຈື ແມ່ນຫຼັກສູດການຮ່ວມມຶລະຫວ່າງມະຫາວິທະຍາໄລຊົນເຜົ່າກວາງຊີ ສປ. ຈີນ ແລະ ມະຫາວິທະຍາໄລແຫ່ງຊາດລາວ, ນັກສຶກສາທີ່ຮຽນຈົບປິທີ 2 ແລະ ມີເງື່ອນໄຂຕາມມາດຕະຖານດ້ານຜົນການຮຽນ ແລະ ລະດັບພາສາຈີນ ຈະສາມາດໄປຮຽນຕໍ່ ປີ 3-4 ທີ່ມະຫາວິທະຍາໄລຊົນເຜົ່າກວາງຊີ ດ້ວຍທຶນການສຶກສາ 100% ແລະ ເມື່ອຈົບແມ່ນຈະໄດ້ໃບປະກາດຈາກມະຫາວິທະຍາໄລແຫ່ງຊາດ ແລະ ມະຫາວິະທະຍາໄລຊົນເຜົ່າກວາງຊີ.
ການສອບເສັງໄດ້ສໍາເລັດໃນວັນດຽວກັນເວລາ 16:30 ນາທີ, ຄາດວ່າຜົນການສອບເສັງຈະອອກໃນທ້າຍເດືອນສິງຫານີ້ ແລະຈະເປີດການຮຽນການສອນໃນກາງເດືອນກັນຍາ 2026.

10/08/2026

ປະກາດຮັບນັກສຶກສາໃໝ່ຜູ່ສົນໃຈຮຽນພາສາຈີນ‼️ຂໍໃຫ້ອ່ານລະອຽດ

ສະຖາບັນຂົງຈື ມະຫາວິທະຍາໄລແຫ່ງຊາດ ຈະເປີດລົງທະບຽນຮັບນັກສຶກສາໃໝ່ຜູ້ບໍ່ມີພື້ນຖານພາສາຈີນ ຊຸດທີ 33 ໂດຍມີລາຍລະອຽດດັ່ງລຸມນີ້:

1. ເປີດຮັບສະໝັກນັກສຶກສາໃໝ່ຊຸດທີ 33 (ຜູ້ບໍ່ມີພື້ນຖານ):
ວັນທີ 18/08/2026 ຕອນເຊົ້າ ເຊິ່ງລະບົບຈະເລີ່ມເປີດແຕ່ເວລາ 09:00 ໂມງ ເປັນຕົ້ນໄປ ດ້ວຍລະບົບອອນລາຍ ເຊິ່ງສະໝັກຜ່ານລິ້ງ: https://enroll.cinuollaos.com/register-new (ການຮັບສະໝັກມີຈໍານວນຈໍາກັດ, ຖ້າຕົວເລກສະຫມັກເຕັມແລ້ວ ຜູ້ສະໝັກບໍ່ທັນຈະຢູ່ໃນຖານຂໍ້ມູນລາຍຊື່ສໍາຮອງ).

2. ວັນ ແລະ ເວລາການຮຽນ-ການສອນ ຫຼັກສູດບໍາລຸງພາສາຈີນ ຊຸດທີ 33:
- ວັນເສົາ-ວັນອາທິດ (ພາກເຊົ້າ ແລະ ພາກບ່າຍ) ເລີ່ມຮຽນວັນທີ 19/9/2026.
- ວັນຈັນ-ວັນພະຫັດ (ພາກເຊົ້າ, ພາກບ່າຍ ແລະ ພາກຄໍ່າ) ເລີ່ມຮຽນວັນທີ 21/9/2026;
ສະນັ້ນ, ຂໍໃຫ້ຜູ້ທີ່ສົນໃຈຮຽນຈົ່ງສະໝັກຕາມເວລາທີ່ແຈ້ງ, ຂໍໃຫ້ຕິດຕາມເພດສະຖາບັນຂົງຈື ມຊ ຢ່າງໃກ້ຊິດ ຫຼື ສາມາດໂທສອບຖາມຂໍ້ມູນໄດ້ທີ່ເບີໂທ: 020 28555311 (ໃນໂມງລັດຖະການ)
💫💥ຂໍ້ແນະນໍາ(ຂໍໃຫ້ອ່ານລະອຽດ)❗️:
1. ເບີໂທລະສັບ 1 ເບີ ແລະ email ຈະສາມາດລົງທະບຽນໄດ້ພຽງຄັ້ງດຽວ, ຖ້າໃຜຍັງບໍ່ທັນສະໝັກ email ອາດຕັ້ງແບບງ່າຍໆເຊັ່ນ: ຊື່+ຕົວເລກ, ຕົວຢ່າງ: [email protected]
2. ຕ້ອງຮັບປະກັນວ່າໃນບັນຊີມີເງິນພຽງພໍຈ່າຍສໍາລັບຄ່າຮຽນ, ຄ່າຮຽນແມ່ນ 1.280.000 ກີບ ເຊິ່ງໃນນີ້ລວມມີ: ຄ່າປື້ມຕໍາລາ, ຄ່າເສື້ອ ແລະ ຄ່ານໍ້າ E-CO Campus ຂອງ ມຊ.
3. ຕ້ອງຮັບປະກັນວ່າອິນເຕີເນັດສະຖຽນ ແລະ ໄວພໍ, ແນະນໍາໃຫ້ໃຊ້ເວັບບຣາວເຊີ Google Chrome ເວີຊັ້ນອັບເດດຫຼ້າສຸດ.
4. ສໍາລັບນັກຮຽນມັດທະຍົມ, ເວລາຮຽນຢູ່ຂົງຈືເໝາະສົມທີ່ສຸດແມ່ນຕອນຢູ່ ມໍ.4 ເພາະລະບົບການຮຽນຢູ່ຂົງຈືແມ່ນ 3 ປີ, ຮຽນຕອນ ມໍ.4 ແລ້ວຈະຈົບຕອນ ມໍ.7 ພໍດີ. ຖ້າຮຽນໄວ ແລະອາດຈົບຕອນຢູ່ ມໍ.5 ຫຼື ມໍ6 ຈະເຮັດໃຫ້ລືມພາສາຈີນ, ເມືອຈົບຢູ່ຂົງຈືແລ້ວອາດໄປຕໍ່ບ່ອນອື່ນບໍ່ໄດ້ (ເພາະຖືວ່າແຂງສຸດແລ້ວ). ສະນັ້ນ ກ່ອນ ມໍ.4 ແມ່ນໃຫ້ເນັ້ນໜັກພາສາອັງກິດ, ເພາະເວລາຮຽນຢູ່ຈີນກໍໄດ້ໃຊ້ພາສາອັງກິດນໍາຄົນຕ່າງປະເທດ.
ຂໍໃຫ້ເບິ່ງວິດີໂອສາທິດການລົງທະບຽນນັກສຶກສາໃໝ່

21/07/2026

ຄະນະຜູ້ບໍລິຫານການສຶກສາ ມະຫາວິທະຍາໄລແຫ່ງຊາດ ເຂົ້າຮ່ວມທັດສະນະສຶກສາ “ຂົວພາສາຈີນ” ແລະຢ້ຽມຢາມ ມະຫາວິທະຍາໄລຊົນເຜົ່າກວາງຊີ

ວັນທີ 15-19 ກໍລະກົດ 2026, ຄະນະຜູ້ບໍລິຫານການສຶກສາ ມະຫາວິທະຍາໄລແຫ່ງຊາດ ເຂົ້າຮ່ວມທັດສະນະສຶກສາ “ຂົວພາສາຈີນ” ແລະຢ້ຽມຢາມ ມະຫາວິທະຍາໄລຊົນເຜົ່າກວາງຊີ, ຈຸດປະສົງການຢ້ຽມຢາມໃນຄັ້ງ
ນີ້ແມ່ນເພື່ອແລກປ່ຽນດ້ານການສຶກສາ ແລະ ວັດທະນະທຳເປັນເວລາ 05 ວັນ. ນໍາພາໂດຍ ທ່ານ ຈີນດາວົງ ໄຊຍະສິນ ຮອງຫົວຫນ້າສະຖາບັນຂົງຈື ຝ່າຍລາວ, ນອກນັ້ນຍັງມີຄະນະຜູ້ບໍລິຫານການສຶກ ທີ່ມາຈາກ ໂຮງຮຽນການເມືອງ-ການປົກຄອງແຫ່ງຊາດ, ສະຖາບັນຊັບພະຍາກອນມະນຸດລາວ-ຍີ່ປຸ່ນ ມຊ, ໂຮງຮຽນມັດທະຍົມສົມບູນວຽງຈັນ, ໂຮງຮຽນມັດທະຍົມສົມບູນສາທິດ, ຕົວແທນເຈົ້າໜ້າທີ່ຈາກຫົວໜ່ວຍການສຶກສາຕ່າງໆຂອງລາວ ແລະ ມີພະນັກງານຕິດຕາມ ແລະ ມີຜູ້ເຂົ້າຮ່ວມທັງຫມົດ 10 ທ່ານ.

ໃນຕອນເຊົ້າຂອງວັນທີ 16 ກໍລະກົດ 2026, ຄະນະຜູ້ບໍລິຫານການສຶກສາ ມະຫາວິທະຍາໄລແຫ່ງຊາດ ຢ້ຽມຢາມມະຫາວິທະຍາໄລຊົນເຜົ່າກວາງຊີ, ໃຫ້ກຽດຕ້ອນຮັບໂດຍທ່ານ GAO XINGYU ຮອງອະທິການບໍດີ ມະຫາວິທະຍາໄລຊົນເຜົ່າກວາງຊີ, ທ່ານ ນ. HE SHANYAN ຮອງຄະນະບໍດີ ອັກສອນສາດ, ທ່ານ ນ. ZHOU YANXIAN ຫົວຫນ້າຫ້ອງການພົວພັນ ແລະຕ່າງປະເທດ, ທ່ານ LUO MING ຮອງຫົວຫນ້າຫ້ອງການພົວພັນ ແລະ ຕ່າງປະເທດ, ພ້ອມດ້ວຍຄະນະ ແລະ ພາກສ່ວນອື່ນໆທີ່ກ່ຽວຂ້ອງຂອງມະຫາວິທະຍາໄລຊົນເຜົ່າກວາງຊີ ໄດ້ຈັດການພົບປະສົນທະນາກັບ ຄະນະທີ່ມາຢ້ຽມຢາມ. ຫຼັງຈາກກອງປະຊຸມສໍາເລັດແລ້ວ ຄະນະຜູ້ຢ້ຽມຢາມ, ໄດ້ຢ້ຽມຊົມວິທະຍາເຂດ, ການວາງສະແດງປະຫວັດສາດຂອງໂຮງຮຽນ, ຜົນສຳເລັດອາຊຽນ ແລະ ພິພິທະພັນພາສາ.

ໃນລະຫວ່າງການຢ້ຽມຢາມຄັ້ງນີ້, ຄະນະຜູ້ຢ້ຽມຢາມໄດ້ໄປຢ້ຽມຊົມພິພິທະພັນຊົນເຜົ່ານະ
ຄອນໜານໜິງ, ວັດຂົງຈື ແລະ ຖະໜົນສາມສາຍ, ສອງຊອຍ ຢູ່ນະຄອນໜານໜິງ, ຈາກນັ້ນເດີນທາງໄປແຂວງຫູໜານເມືອງຊາງຊາ, ໄດ້ເຂົ້າຢ້ຽມຊົມພິພິທະພັນຫູນານ, ເກາະໝາກກ້ຽງ ເຊິ່ງເປັນສະຖານທີ່ທ່ອງທ່ຽວທາງດ້ານປະຫວັດສາດ ແລະ ມະນຸດສະທຳ, ໄດ້ຮັບຮູ້ເຖິງພະລັງອັນທັນສະໄໝ ແລະ ຄວາມມີເອກະລັກຂອງຊົນເຜົ່ານະຄອນໜານໜິງ ໃນຖານະເປັນເມືອງແຖວໜ້າແຫ່ງການເປີດກວ້າງ ແລະ ຮ່ວມມືກັບອາຊຽນ, ພ້ອມທັງໄດ້ຊື່ນຊົມກັບຄວາມຊົງຈຳທາງດ້ານປະຫວັດສາດ ແລະ ວັດທະນະທຳຂອງນະຄອນຊາງຊາ.
ນອກຈາກນັ້ນ ການທັດສະນະສຶກສາຂອງຄະນະຜູ້ບໍລິຫານການສຶກສາໃນຄັ້ງນີ້, ບໍ່ພຽງແຕ່ໄດ້ເສີມສ້າງຄວາມເລິກເຊິ່ງ ແລະ ຄວາມເຂົ້າໃຈລະຫວ່າງສະຖາບັນຂົງຈື ມະຫາວິທະຍາໄລແຫ່ງຊາດລາວ ກັບ ມະຫາວິທະຍາໄລຊົນເຜົ່າກວາງຊີ, ແຕ່ຍັງເຮັດໃຫ້ ຄະນະຜູ້ຢ້ຽມຢາມໄດ້ຮັບຮູ້ດ້ວຍຕົນເອງເຖິງການພັດທະນາການສຶກສາຊັ້ນສູງຂອງຈີນ ແລະ ວັດທະນະທຳດັ້ງເດີມອັນດີງາມຂອງຈີນ. ສະຖາບັນຂົງຈື ມະຫາວິທະຍາໄລແຫ່ງຊາດລາວ ຈະສືບຕໍ່ເປັນຂົວຕໍ່ເຊື່ອມສາຍພົວພັນ, ຊຸກຍູ້ໃຫ້ການຮ່ວມມືດ້ານພາສາ ແລະ ວັດທະນະທຳ ຈີນ-ລາວ ໃຫ້ເລິກເຊິ່ງຂຶ້ນ, ປະກອບສ່ວນກຳລັງຂອງສະຖາບັນຂົງຈື ເຂົ້າໃນການສ້າງປະຊາຄົມຮ່ວມຊະຕາກຳ ຈີນ-ລາວໃຫ້ມີອານາຄົດຮ່ວມກັນ.

18/07/2026

ສະຖາບັນຂົງຈື ມຊ ຈັດພິທີລ້ຽງສົ່ງຄູອາຈານ-ອາສາສະໝັກຈີນ ທີ່ໝົດວາລະ
ວັນທີ 17 ກໍລະກົດ ສະຖາບັນຂົງຈື ມຊ ໄດ້ຈັດພິທີລ້ຽງສົ່ງຄູອາຈານ-ອາສາສະໝັກຈີນທີ່ໝົດວາລະ ໂດຍການເຂົ້າຮ່ວມເປັນປະທານຂອງ ທ່ານ ຮສ.ປອ. ສິນທະວອນ ດາລາວົງ ຜູ້ອໍານວຍການໃຫຍ່ ມຊ, ທ່ານ ຄໍາຮຸ່ງ ຈັນທະວົງ, ທ່ານ ເຝິງກວາງຫົວ ຫົວໜ້າສະຖາບັນຂົງຈືສອງຝ່າຍ ລາວ-ຈີນ ແລະ ແຂກທີ່ຖືກເຊີນຈາກກົມໃຫຍ່ສັນຕິບານ ກະຊວງປ້ອງກັນຄວາມສະຫງົບ, ຫ້ອງຮຽນຂົງຈືທັງ 5 ແຫ່ງ ແລະ ພະນັກງານຄູອາຈານ ກໍເຂົ້າຮ່ວມຢ່າງພ້ອມພຽງກັນ.
ໃນພິທີ ທ່ານ ຄໍາຮຸ່ງ ຈັນທະວົງ ໄດ້ຂື້ນກ່າວສະແດງຄວາມຊົມເຊີຍ ແລະ ຂອບໃຈມາຍັງຄູອາຈານ-ອາສາສະໝັກຈີນ ທີ່ໄດ້ທຸ່ມເຫື່ອເທແຮງ ແລະ ສະຕິປັນຍາເຂົ້າໃນການສິດສອນພາສາຈີນ ແລະ ຈັດກິດຈະກໍາ ເຊິ່ງໄດ້ສ້າງຜົນງານໃຫ້ແກ່ສະຖາບັນ.
ທ່ານ ເຝິງກວາງຫົວ ໄດ້ກ່າວສະແດງຄວາມຫ່ວງໃຍ ແລະ ຕີລາຄາສູງຕໍ່ຜົນງານຂອງພະນັກງານຄູອາຈານຈີນ ແລະ ໄດ້ສະແດງຄວາມຂອບໃຈມາຍັງການນໍາມະຫາວິທະຍາໄລ ແລະ ສະຖາບັນທີ່ໄດ້ເອົາໃຈໃສ່ພະນັກງານຄູອາຈານຈີນ.
ທ່ານ ນາງ ເຊ້ຍເໝີຍຖິງ ອາສາສະໝັກຈີນໄດ້ຕາງໜ້າຄູອາຈານຈີນຂື້ນກ່າວ ເຊິ່ງໄດ້ສະແດງຄວາມຮູ້ສຶກຕໍ່ປະເທດລາວ, ຕໍ່ນັກສຶກສາລາວ ເຊິ່ງເບື້ອງຕົ້ນຕອນມາໃໝ່ໆເພີ່ນມີແຜນທີ່ປະຈໍາການພຽງໜຶ່ງປີ, ແຕ່ຍ້ອນນັກສຶກສາລາວ ຍ້ອນສັງຄົມລາວ ແລະ ບັນຍາກາດການເຮັດວຽກທີ່ດີບວກກັບເພື່ອນຮ່ວມງານທັງຝ່າຍລາວ ແລະ ຈີນກໍສາມັກຕິກັນ ຈົນເຮັດໃຫ້ເພີ່ນສຶບຢູ່ຕໍ່ຈົນຮອດປີທີ 3 ແລະກໍເປັນປີອາສາສະໝັກຈີນສາມາດປະຕິບັດໜ້າທີ່ຢູ່ຕ່າງປະເທດໄດ້(ສູງສຸດ 3 ປີ), ປະສົບການຊີວິດຢູ່ ສປປ ລາວ ຢູ່ ສຂຈ ຈະເປັນປະສົບການທີ່ບໍ່ສາມາດລືມໄດ້ໃນຊີວິດນີ້.
ສຸດທ້າຍ ຕາງໜ້ານ້ອງນັກສຶກສາ ສຂຈ ໄດ້ຂື້ນກ່າວສະແດງຄວາມຂອບໃຈ ແລະ ຮູ້ບຸນຄຸນຕໍ່ຄູອາຈານ, ຄະນະນໍາທັງສອງຝ່າຍລາວຈີນທີ່ໄດ້ຝຶກຝົນຫຼໍ່ຫຼອມຈົນສາມາດເວົ້າສາຈີນໄດ້ຢ່າງແຂ່ງຂັນ ແລະ ຫຼ່ຽນໄຫຼ. ພ້ອມທັງໄດ້ສອນຄຸນສົມບັດ, ການຢູ່ຮ່ວມກັນ, ການເຮັດກິດຈະກໍານໍາກັນກັບໝູ່ຄູ່ນໍາກັນ.
ຫຼັງຈາກນັ້ນ ທ່ານ ຮສ.ປອ. ສິນທະວອນ ດາລາວົງ ໄດ້ຂື້ນມອບໃບຍ້ອງຍໍຂັ້ນລັດຖະມົນຕີກະຊວງສຶກສາ ແລະ ກິລາໃຫ້ແກ່ຄູອາຈານ-ອາສາສະໝັກຈີນທີ່ຢູ່ຄົບ 3 ປີ ຈໍານວນ 9 ທ່ານ, ທ່ານ ຄໍາຮຸ່ງ ຈັນທະວົງ ໄດ້ມອບໃບຍ້ອງຍໍຂັ້ນຜູ້ອໍານວຍການໃຫຍ່ ມຊ ໃຫ້ແກ່ຄູອາຈານ-ອາສາສະໝັກຈີນທີ່ສິດສອນ 2 ປີ.
ໃນຕອນທ້າຍໄດ້ມີພາເຂົ້າສາມັກຄີຮ່ວມກັນ ເຊິ່ງຄູອາຈານຕາງກໍພາກັນເບີກບານມ່ວນຊື່ນ ແລະ ກໍມີຈໍານວນໜຶ່ງຮ້ອງໃຫ້ອາໄລອາວອນເຊິ່ງກັນ ແລະ ກັນ.

17/07/2026

ສະຖາບັນຂົງຈື ມະຫາວິທະຍາໄລແຫ່ງຊາດ ຂໍແຈ້ງມາຍັງນັກຮຽນ-ນັກສຶກສາ ຜູ້ທີມີພື້ນຖານພາສາຈີນດີລະດັບໜຶ່ງ ທີ່ຕ້ອງການສະໝັກສອບເສັງຄັດເລືອກເຂົ້າຮຽນຫຼັກສູດປະລິນຍາຕີ ສາຂາຄູພາສາຈີນ ທີ່່ສະຖາບັນຂົງຈື ມຊ, ເຊິ່ງມີລາຍລະອຽດດັ່ງນີ້:
1. ກໍານົດວັນສອບເສັງ: ວັນທີ 15 ສິງຫາ 2026;
2. ເປີດລົງທະບຽນ: ວັນທີ 17 ກໍລະກົດ - 13 ສິງຫາ 2026 (ລົງທະບຽນຜ່ານລະບົບອອນລາຍຕາມລິ້ງ)
ຕາມລິ້ງ: https://enroll.cinuollaos.com/register/examination
3. ເມື່ອລົງທະບຽນຜ່ານລະບົບອອນລາຍສໍາເລັດແລ້ວ, ໃຫ້ນັກຮຽນທຸກຄົນດາວໂຫຼດບັດເຂົ້າຫ້ອງສອບເສັງ, ໃບບິນຈ່າຍເງິນ, ຄູ່ມືແນະນໍາການສອບເສັງ. ມື້ສອບເສັງໃຫ້ປີ້ນບັດເຂົ້າຫ້ອງສອບເສັງເພື່ອຢັ້ງຢືນເຂົ້າຫ້ອງສອບເສັງ. ຂໍໃຫ້ຜູ້ສະໝັກສໍາເລັດ ສະແກນ QR code WhatsApp ເພື່ອເຂົ້າກຸ່ມ, ເຊິ່ງ ສຂຈ ຈະມີການແຈ້ງຂໍ້ມູນຂ່າວສານຕ່າງໆໃຫ້ນັກຮຽນຮັບຊາບຢ່າງລະອຽດ;
4. ລາຍລະອຽດໃນການສະໝັກສາມາດເຂົ້າເບິ່ງໄດ້ທີ່ ເອກະສານຄັດຕິດ ແລະ ວິດີໂອ;
5. ວັນເວລາການສອບເສັງ: ວັນທີ 15 ສິງຫາ 2026 ແບບເຊິ່ງໜ້າ ທີ່ ສະຖາບັນຂົງຈື ມຊ. ຂໍໃຫ້ນັກສອບເສັງມາຮອດກ່ອນເວລາເສັງຢ່າງໜ້ອຍ 30 ນາທີ ເພື່ອກວດເບິ່ງຫ້ອງເສັງຂອງຕົນເອງ.

17/07/2026

ປະກາດ ເຖິງນັກສຶກສາເກົ່າ ແລະ ນັກສຶກສາໃໝ່ຜູ່ສົນໃຈຮຽນພາສາຈີນ
ເລື່ອງ: ການລົງທະບຽນຮັບນັກສຶກສາເກົ່າ ແລະເປີດຮັບນັກສຶກສາໃໝ່ ‼️
ສະຖາບັນຂົງຈື ມະຫາວິທະຍາໄລແຫ່ງຊາດ ຈະເປີດລົງທະບຽນຮັບນັກສຶກສາເກົ່າ ຊຸດທີ 32 ແລະ ເປິດຮັບນັກສຶກສາໃໝ່ຜູ້ບໍ່ມີພື້ນຖານພາສາຈີນ ຊຸດທີ 33 ໂດຍມີລາຍລະອຽດດັ່ງລຸມນີ້:
1. ເປີດຮັບລົງທະບຽນນັກຮຽນເກົ່າຊຸດທີ 32:
ເປີດລົງທະບຽນຜ່ານລະບົບອອນລາຍ ໃນວັນທີ 21/07/2026 ເລີ່ມແຕ່ເວລາ 09:00 ໂມງ ແລະ ປິດລະບົບລົງທະບຽນໃນວັນທີ 04/08/2026 ເວລາ 16:00 ໂມງ ດ້ວຍລະບົບອອນລາຍໂດຍຜ່ານລິ້ງ: https://enroll.cinuollaos.com/register-old , ເຊິ່ງນັກສຶກສາເກົ່າສາມາດລົງທະບຽນຜ່ານລະບົບອອນລາຍ ແມ່ນຂໍໃຫ້ປະຕິບັດຕາມຂັ້ນຕອນທີ່ໄດ້ແນະນໍາ ແລະຂໍໃຫ້ນັກສຶກສາເກົ່າຕິດຕາມກຸ່ມ WhatsApp ຂອງຫ້ອງຕົນເອງຢ່າງໃກ້ຊິດ.
2. ເປີດຮັບສະໝັກນັກສຶກສາໃໝ່ຊຸດທີ 33 (ຜູ້ບໍ່ມີພື້ນຖານ):
ວັນທີ 18/08/2026 ຕອນເຊົ້າ ເລີ່ມແຕ່ເວລາ 09:00 ໂມງ ເປັນຕົ້ນໄປ ດ້ວຍລະບົບອອນລາຍ ຜ່ານລິ້ງ: ສ(ການຮັບສະໝັກມີຈໍານວນຈໍາກັດ, ຖ້າຕົວເລກສະຫມັກເຕັມແລ້ວ ຜູ້ສະໝັກບໍ່ທັນຈະຢູ່ໃນຖານຂໍ້ມູນລາຍຊື່ສໍາຮອງ).
3. ວັນ ແລະ ເວລາການຮຽນ-ການສອນ ຫຼັກສູດບໍາລຸງພາສາຈີນ ຊຸດທີ 33:
- ວັນເສົາ-ວັນອາທິດ (ພາກເຊົ້າ ແລະ ພາກບ່າຍ) ເລີ່ມຮຽນວັນທີ 12/9/2026.
- ວັນຈັນ-ວັນພະຫັດ (ພາກເຊົ້າ, ພາກບ່າຍ ແລະ ພາກຄໍ່າ) ເລີ່ມຮຽນວັນທີ 14/9/2026;
ສະນັ້ນ, ຂໍໃຫ້ຜູ້ທີ່ສົນໃຈຮຽນຈົ່ງສະໝັກຕາມເວລາທີ່ແຈ້ງ, ຂໍໃຫ້ຕິດຕາມເພດສະຖາບັນຂົງຈື ມຊ ຢ່າງໃກ້ຊິດ ຫຼື ສາມາດໂທສອບຖາມຂໍ້ມູນໄດ້ທີ່ເບີໂທ: 020 28555311 (ໃນໂມງລັດຖະການ)
# ໝາຍເຫດ: ຖ້າວ່ານັກສືກສາເກົ່າຊຸດທີ 32 ລົງທະບຽນບໍ່ໄດ້ຍ້ອນພົບບັນຫາດ້ານຄະແນນ ຫຼື ເຂົ້າລະບົບບໍ່ໄດ້ ສາມາດປະສານງານນໍາອາຈານທີ່ຮັບຜິດຊອບຕາມລາຍຊື່ດັ່ງນີ້:
- ອຈ. ວຽງສະໄໝ ເບີໂທ: 020 94246577 ຮັບຜິດຊອບ ເທີມ 2,3,4,5,6 (ໃນໂມງລັດຖະການ),

💫💥ຂໍ້ແນະນໍາ❗️: ສໍາລັບນັກຮຽນມັດທະຍົມ, ເວລາຮຽນຢູ່ຂົງຈືເໝາະສົມທີ່ສຸດແມ່ນຕອນຢູ່ ມໍ.4 ເພາະລະບົບການຮຽນຢູ່ຂົງຈືແມ່ນ 3 ປີ, ຮຽນຕອນ ມໍ.4 ແລ້ວຈະຈົບຕອນ ມໍ.7 ພໍດີ. ຖ້າຮຽນໄວ ແລະອາດຈົບຕອນຢູ່ ມໍ.5 ຫຼື ມໍ6 ຈະເຮັດໃຫ້ລືມພາສາຈີນ, ເມືອຈົບຢູ່ຂົງຈືແລ້ວອາດໄປຕໍ່ບ່ອນອື່ນບໍ່ໄດ້ (ເພາະຖືວ່າແຂງສຸດແລ້ວ). ສະນັ້ນ ກ່ອນ ມໍ.4 ແມ່ນໃຫ້ເນັ້ນໜັກພາສາອັງກິດ, ເພາະເວລາຮຽນຢູ່ຈີນກໍໄດ້ໃຊ້ພາສາອັງກິດນໍາຄົນຕ່າງປະເທດ.

ລາຍລະອຽດຂໍໃຫ້ອ່ານຕາມໜັງສືແຈ້ງການຕື່ມ ຂອບໃຈ.

08/07/2026

ພິທີປ້ອງກັນບົດຈົບຊັ້ນຫຼັກສູດປະລິນຍາຕີ ສາຂາຄູພາສາຈີນ ຮຸ່ນທີ 2 (2022-2026) ທີ່ສະຖາບັນຂົງຈື ມະຫາວິທະຍາໄລແຫ່ງຊາດ
ໃນວັນທີ 7 ກໍລະກົດ 2026 ສະຖາບັນຂົງຈືມະຫາວິທະຍາໄລແຫ່ງຊາດ ໄດ້ຈັດພິທີປ້ອງກັນບົດຈົບຊັ້ນຫຼັກສູດປະລິນຍາຕີ ສາຂາຄູພາສາຈີນ ຮຸ່ນທີ 2 (2022-2026) ທີ່ ຫ້ອງຮຽນ B104 ສະຖາບັນຂົງຈື ໃຫ້ກຽດເປັນປະທານໂດຍ ທ່ານ ຈິນດາວົງ ໄຊຍະສິນ ຮອງຫົວໜ້າສະຖາບັນຂົງຈື, ທ່ານ ນາງ ນິພາພອນ ກັນຍາວົງ ຮອງຫົວໜ້າສະຖາບັນຂົງຈື, ພ້ອມດ້ວຍຫົວຫນ້າພາກວິຊາ,ຮອງຫົວຫນ້າພາກວິຊາ, ຫົວຫນ້າພະແນກ,ຮອງພະແນກ, ຄູອາຈານ-ພະນັກງານຝ່າຍລາວ-ຈີນ ແລະ ນັກສຶກສາປະລິນຍາຕີ ສາຂາຄູພາສາຈີນ ກໍເຂົ້າຮ່ວມຢ່າງພ້ອມພຽງ.
ໃນພິທີດັ່ງກ່າວ ທ່ານ ຈິນດາວົງ ໄຊຍະສິນ ຮອງຫົວໜ້າສະຖາບັນຂົງຈື ໄດ້ກ່າວສະແດງຄວາມຍິນດີ ແລະຄວາມພາກພູມໃຈຕໍ່ນັກສຶກສາປີທີ 4 ທີ່ສາມາດເຂົ້າຮ່ວມການປ້ອງກັນບົດຈົບຊັ້ນໄດ້ຢ່າງພ້ອມພຽງ. ທ່ານໄດ້ອວຍພອນໃຫ້ນັກສຶກສາທຸກຄົນສາມາດຜ່ານການປ້ອງກັນບົດດ້ວຍຜົນສຳເລັດ ແລະສຳເລັດການສຶກສາຕາມແຜນການທີ່ວາງໄວ້. ພ້ອມກັນນັ້ນ ທ່ານຍັງໄດ້ກ່າວຢ້ອນເຖິງເສັ້ນທາງການຮຽນຮູ້ຂອງນັກສຶກສານັບແຕ່ວັນທຳອິດທີ່ເຂົ້າມາສຶກສາໃນຫຼັກສູດນີ້. ໃນໄລຍະເລີ່ມຕົ້ນ, ຄວາມຮູ້ພາສາຈີນຂອງນັກສຶກສາສ່ວນໃຫຍ່ຍັງຢູ່ໃນຂັ້ນພື້ນຖານ, ແຕ່ດ້ວຍຄວາມເອົາໃຈໃສ່ໃນການສິດສອນຂອງຄະນະອາຈານທັງຝ່າຍຈີນ ແລະຝ່າຍລາວ, ຄວບຄູ່ກັບຄວາມພາກພຽນໃນການຄົ້ນຄວ້າຮ່ຳຮຽນ ແລະການຝຶກຝົນພັດທະນາຕົນເອງຢ່າງສະໝ່ຳສະເໝີ, ມາຮອດປັດຈຸບັນນັກສຶກສາໄດ້ພັດທະນາທັກສະພາສາຈີນຢ່າງຊັດເຈນ, ສາມາດສື່ສານໄດ້ຢ່າງຄ່ອງແຄ້ວ ແລະນຳໃຊ້ພາສາຈີນເຂົ້າໃນການປະຕິບັດວຽກງານຕ່າງໆໄດ້ເປັນຢ່າງດີ. ທ່ານໄດ້ສະແດງຄວາມຫວັງວ່າ ນັກສຶກສາທີ່ຈະສຳເລັດການສຶກສາໃນປີນີ້ ຈະສາມາດນຳຄວາມຮູ້, ທັກສະ ແລະປະສົບການທີ່ໄດ້ສັ່ງສົມມາໄປປະຍຸກໃຊ້ໃນວຽກງານຕົວຈິງ, ສະແດງສັກກະຍະພາບຂອງຕົນຢ່າງເຕັມທີ່, ສ້າງຜົນງານທີ່ໂດດເດັ່ນ ແລະມີສ່ວນຮ່ວມອັນສຳຄັນໃນການຮັບໃຊ້ສັງຄົມ.
ພິທີປ້ອງກັນບົດຈົບຊັ້ນຫຼັກສູດປະລິນຍາຕີ ສາຂາຄູພາສາຈີນ ມີນັກສຶກສາປີ 4 ເຂົ້າຮ່ວມທັງຫມົດ 11 ຄົນ, ຈໍານວນ 6 ກຸ່ມ. ສຶກສາຄົ້ນຄ້ວາໃນຂົງເຂດເຕັກນິກວິທີການສິດສອນພາສາຈີນ, ສຶກສາບັນຫາຂໍ້ຫຍຸ້ງຍາກ, ແນວທາງໃນການປັບປຸງການຮຽນ-ການສອນພາສາຈີນ. ນັກສຶກສາກໍ່ໄດ້ເອົາໃຈໃສ່ໃນການນໍາສະເຫນີບົດຄົ້ນຄ້ວາຂອງຕົນເອງຢ່າງເຕັມຄວາມສາມາດໂດຍໃຊ້ພາສາຈີນໃນການປ້ອງກັນ ແລະສາມາດຜ່ານການປ້ອງກັນບົດໃນຄັ້ງນີ້ໄດ້ຫມົດທຸກກຸ່ມ. ນີ້ຖືເປັນຜົນສໍາເລັດອີກຂັ້ນໃນການກໍ່ສ້າງບຸກຄະລະກອນຄູພາສາຈີນໃນປະເທດລາວ.

03/07/2026