Zhubanov University

ҒЫЛЫМИ КЕҢЕСТЕ ТӘРБИЕ ЖҰМЫСЫНЫҢ НӘТИЖЕЛЕРІ ҚОРЫТЫНДЫЛАНДЫ

Ғылыми кеңестің кезекті отырысында университеттің әлеуметтік және жастар саясатының жүзеге асырылу мәселелері қаралды. Жиын барысында Басқарма мүшесі, Әлеуметтік және тәрбие жұмысы жөніндегі проректор Нарқозы Қартжан 2025–2026 оқу жылында атқарылған тәрбие жұмыстарының нәтижелері, әлеуметтік бастамалардың тиімділігі және мемлекеттік идеологиялық басымдықтардың университеттің тәрбие кеңістігімен интеграциялануы туралы мазмұнды баяндама жасады. Баяндамада білім алушылардың азаматтық жауапкершілігін қалыптастыру, құқықтық мәдениетін арттыру, әлеуметтік бейімделуін қамтамасыз ету және жастардың құндылықтық бағдарларын нығайту бағытында жүйелі жұмыстар жүргізілгені атап өтілді.

«Заң және тәртіп» тұжырымдамасы аясында құқық қорғау органдары өкілдері және менторлар институтының бірлесе жүргізген профилактикалық жұмыстары нәтижесінде білім алушылар арасындағы құқықбұзушылық көрсеткішінің төмендеуі тіркеліп, университеттің қауіпсіз әрі қолайлы әлеуметтік-психологиялық ортасын қалыптастыруға оң ықпал еткені айқындалды.

«Таза Қазақстан» республикалық экологиялық акциясы шеңберінде университет қауымдастығының белсенді қатысуымен 2500 тоннаға жуық қағаз қалдықтары тапсырылып, 6500 тонна пластик қайта өңдеуге жіберілді. Сондай-ақ, 8500 шаршы метр аумақ жерге санитарлық тазалу жұмыстары жүргізіліп, 200 түп ағаш отырғызылды.

Сонымен қатар, 30 студенттік клуб пен ұйымның қызметі білім алушылардың университет ортасына бейімделуіне, олардың белсенді азаматтық ұстанымын қалыптастыруға және жан-жақты дамуына ықпал ететін тәрбие жұмысының маңызды әрі тиімді үлгісі ретінде танылды.

Ғылыми кеңес қорытындысында жүргізілген әлеуметтік және тәрбие жұмыстарының тиімділігі сараланып, жастар саясатының институционалдық тетіктерін жетілдіру, білім алушылардың әлеуметтік әл-ауқатын қамтамасыз ету бағытындағы жұмыстарды жүйелі түрде жалғастырудың басым бағыттары белгіленді.

АҚТӨБЕДЕ ҚЫТАЙ ТІЛІН МЕҢГЕРГЕН ЖАСТАРДЫҢ РЕСПУБЛИКАЛЫҚ САЙЫСЫ ӨТТІ

Бүкіләлемдік бастауыш, орта мектеп оқушылары мен студенттер арасындағы «Қытай тілі көпірі» байқауының Қазақстан Республикасы бойынша іріктеу финалы қорытындыланды.

Байқау барысында қатысушылар қытай тілін меңгеру деңгейі, сондай-ақ Қытайдың мәдениеті, тарихы, музыкасы мен өнері бойынша білімдерін көрсетті. Іс-шара Қытай Халық Республикасының Қазақстан Республикасындағы Елшілігі мен өңірлік консулдықтың қолдауымен, Конфуций институтының ұйымдастыруымен өтті. Бағдарлама аясында қытай халқының ұлттық дәстүрлері мен өнері таныстырылды.

Шараға Қытай Халық Республикасының Ақтөбе қаласындағы Бас консулдығының өкілдері, сондай-ақ Әл-Фараби атындағы Қазақ ұлттық университеті, Л.Н. Гумилев атындағы Еуразия ұлттық университеті, Әбілқас Сағынов атындағы Қарағанды техникалық университеті, Абылай хан атындағы Қазақ халықаралық қатынастар және әлем тілдері университеті және Қ. Жұбанов атындағы Ақтөбе өңірлік университеті жанындағы Конфуций институттарының Қазақстан және Қытай тарапынан директорлары қатысты.

Қ. Жұбанов атындағы Ақтөбе өңірлік университеті жанындағы Конфуций институты – Қазақстанның батыс өңіріндегі қытай тілін оқыту және қытай мәдениетін насихаттау бағытында жұмыс істейтін орталықтардың бірі. Институттың негізгі мақсаты – Қазақстан мен Қытай арасындағы білім және ғылым саласындағы ынтымақтастықты дамыту, қытай тілін оқыту және екі ел арасындағы достық қарым-қатынасты нығайту.

ЖОҒАРЫ ОҚУ ОРЫНДАРЫНДАҒЫ САПАНЫ ҚАМТАМАСЫЗ ЕТУ МӘСЕЛЕЛЕРІ ТАЛҚЫЛАНДЫ

Жұбанов университетінде жоғары білім беру жүйесіндегі деректерге негізделген шешім қабылдау мәселелеріне арналған «Жоғары оқу орындарындағы сапаны қамтамасыз ету: мүдделі тараптардың тәжірибесін жақсарту үшін деректерді тиімді пайдалану» тақырыбындағы IV институционалдық зерттеулер форумы өтті.

Форум Nazarbayev University, KIMEP University, SDU University, UIB, QyzPU және DKU (Германия) сынды университеттерді біріктіретін институционалдық зерттеушілердің кәсіби қауымдастығымен бірлесіп ұйымдастырылды. Форумға қатысқан еліміздің батыс өңіріндегі жоғары оқу орындары қатарында Ш. Есенов атындағы Каспий технологиялар және инжиниринг университеті, Халел Досмұхамедов атындағы Атырау университеті, Марат Оспанов атындағы Батыс Қазақстан медицина университеті бар.

Форум барысында институционалдық зерттеулерді дамыту, деректер негізінде басқарушылық шешімдер қабылдау, білім сапасын арттыру және халықаралық тәжірибені жоғары оқу орындарының қызметіне енгізу мәселелері кеңінен талқыланды.

Қатысушылар қазіргі таңда деректерді талдау мен тиімді пайдалану университеттердің стратегиялық дамуының маңызды құралына айналып отырғанын атап өтті. Бұл білім беру ұйымдарына қоғамның өзгермелі талаптарына бейімделуге және бәсекеге қабілеттілігін арттыруға мүмкіндік береді.

КӨРНЕКТІ ҒАЛЫМ МҰХТАР АРЫНҒА АРНАЛҒАН ТҰҢҒЫШ МОНОГРАФИЯ ЖАРЫҚ КӨРДІ

Көрнекті ғалым, педагог, қоғам қайраткері Мұхтар Арынның 90 жылдық мерейтойына орай өткен ғылыми-тәжірибелік конференцияда ғалымға арналған «Мұхтар Арын: ұлттық құндылықтар және тәрбие тұтастығы» атты тұңғыш монография таныстырылды.

Қайраткердің тағылымды ғұмыры мен еңбегі ұлықталған шараға облыстық басқарма басшылары, университет басшылығы, қоғам қайраткерлері мен ғылыми қауымдастық өкілдері, профессор-оқытушылар құрамы, сондай-ақ отбасы мүшелері мен шәкірттері қатысты.

Мұхтар Арын – тіл мен дінді, тарих пен дәстүрді, туған жерді қазақтың тірегі, ұлттық руханияттың бес асылы деп белгілеп, білім мен тәрбие жүйесіне бар ғұмырын сарп еткен ойшыл ұстаз.

Еңбекте Мұхтар Арын идеяларының халықтық педагогикамен сабақтастығы, ұлттық құндылықтарды дәріптеудегі орны, тәрбие үдерісіндегі маңызы кеңінен қарастырылған. Сондай-ақ профессор мұрасын жоғары оқу орындарының білім беру үдерісінде тиімді пайдалану бағыттары мен оның еңбектерінің қазіргі тәрбие жұмыстары мазмұнындағы көрінісі ғылыми негізде зерделенген.

Монография ғалымның ғылыми-педагогикалық мұрасын насихаттауға, ұлттық тәрбие құндылықтарын дәріптеуге және жас ұрпақтың рухани-адамгершілік тәрбиесін нығайтуға бағытталған маңызды еңбек ретінде бағаланды.

МЕМЛЕКЕТТІК ҚЫЗМЕТКЕ ЖОЛ: СТУДЕНТТЕР МЕН ЖАУАПТЫ САЛА ӨКІЛДЕРІ БАС ҚОСТЫ

Мемлекеттік қызмет саласындағы кадрлық әлеуетті дамыту және жас мамандарды мемлекеттік басқару жүйесіне тарту мақсатында университеттің Тарих және география факультетінде диалог алаңы ұйымдастырылды. Іс-шараға Қазақстан Республикасы Мемлекеттік қызмет істері агенттігінің төрағасы Жазықбай Дархан Медеғалиұлы, университет ректоры Лаура Қарабасова, облыс әкімінің орынбасары Әбдікәрімов Абзал Әлиұлы, сондай-ақ өңірдің мемлекеттік қызметшілері мен бітіруші түлектер қатысты.

Диалог алаңында мемлекеттік қызметтің ел дамуындағы стратегиялық маңызы, ашықтық пен тиімділік қағидаттары, сондай-ақ кәсіби біліктілік пен жауапкершіліктің рөлі жан-жақты талқыланды. Жас кадрлардың мемлекеттік басқару жүйесін жетілдірудегі үлесіне ерекше назар аударылды.

Дархан Жазықбайдың айтуынша, биыл Ақтөбе облысы бойынша мемлекеттік қызметке қабылданған 62 жас түлектің 24-і Жұбанов университетінің түлегі. Бұл дерек оқу орнының өңірдегі білікті кадр даярлаудағы нақты үлесін көрсетеді.

2016 жылдан бері Мемлекеттік қызмет істері агенттігінің облыстық департаменті бастамасымен университет базасында Мемлекеттік қызмет мектебі жұмыс істейді. Бұл алаң студенттердің кәсіби дағдыларын дамытуға және мемлекеттік қызметке бейімделуіне мүмкіндік беріп келеді. Сонымен қатар университет пен департамент арасындағы меморандум аясында студенттер жыл сайын мемлекеттік органдарда өндірістік тәжірибеден өтеді.

Шара барысында қатысушылар мемлекеттік қызметке орналасу тәртібі, кадрлық іріктеу талаптары және кәсіби даму мүмкіндіктері бойынша сұрақтарына нақты жауап алды.

ҒЫЛЫМ ЖӘНЕ ӨНДІРІС: ИННОВАЦИЯЛЫҚ СЕРІКТЕСТІК ФОРУМЫ

Университетте ғылым, инновация және өндірістік сектор арасындағы өзара ықпалдастықты дамытуға бағытталған форум өтті. Іс-шара ғылыми-зерттеу нәтижелерін коммерцияландыру, инновацияларды өндіріске енгізу үдерістерін жетілдіру және қолданбалы әзірлемелерді индустриялық ортаға енгізу мәселелерін кешенді талқылауға арналды.

Форумның ғылыми сессиясында қауымдастырылған профессор, философия докторы (PhD) Ербол Шабанов «Академиялық және зерттеу артықшылық орталығының өндірістік секторға интеграциялану мүмкіндіктері», «Мұнай-газ ісі» кафедрасының доценті, философия докторы (PhD) Гузель Абилова «Жоғары дәлдікті аналитикалық құрал-жабдықтар негізінде табиғи және техногендік объектілерді кешенді зерттеу», Биология кафедрасының доценті, философия докторы (PhD) Арман Исимов «Ірі қара малдың нодулярлық дерматиті бойынша эпидемиологиялық және генетикалық талдау», философия докторы (PhD) Әбілқайыр Исақұлов «Полиэтилен қалдықтарын қайта өңдеу арқылы құрылыс материалдарын алу технологиялары», «Мұнай-газ ісі» кафедрасының доценті Риза Оразбекова «Құрамында хром бар өндірістік қалдықтарды экологиялық қауіпсіз материалдарға қайта өңдеу әдістері», Физика-математика факультетінің 1-курс докторанты Бибінұр Ізтілеуова «Полимерлік композиттер лабораториясы» тақырыптарындағы жобаларын таныстырды.

Бағдарлама шеңберінде ұйымдастырылған панельдік пікірталаста ғылыми әзірлемелерді коммерцияландырудың институционалдық тетіктері, бизнес-құрылымдармен кооперация және индустриялық әріптестік мәселелері жан-жақты талқыланды. Сонымен қатар, қолданбалы жобалар көрмесі ұйымдастырылып, ғылыми-инновациялық экожүйені дамытуға бағытталған бірқатар бастамалар ұсынылды.

Форум жұмысына университет жобаларына қызығушылық танытатын, серіктестік орнатуға және бірлесе жұмыс істеуге дайын өңірдегі жоғары оқу орындарының өкілдері, сондай-ақ облыстық кәсіпкерлер палатасы мен мұнай-газ, өндіріс, құрылыс және қызмет көрсету салаларындағы 75-тен астам кәсіпорын өкілдері қатысты. Шара ғылым мен өндіріс арасындағы синергияны күшейтуге, инновациялық жобалардың нарыққа шығуын жеделдетуге және өңірлік экономиканың технологиялық жаңғыртылуына ықпал ететін маңызды коммуникациялық алаңға айналды.

ҒЫЛЫМ АЙЫ: ЖАС ҒАЛЫМДАРҒА АРНАЛҒАН ТӘЖІРИБЕ МЕН ЖАҢА МҮМКІНДІКТЕР

Ғылым айы аясында ғылыми-зерттеу қызметінің тиімділігін арттыруға, гранттық әлеуетті дамытуға және жас зерттеушілердің кәсіби құзыреттерін жетілдіруге бағытталған бірқатар қонақ дәрістері өткізілді.

Білім беру саясаты және жоғары білім саласының халықаралық деңгейдегі зерттеушісі, Канададағы Калгари университетінің Werklund School of Education факультетінің қауымдастырылған профессоры Алия Кужабекова «Халықаралық және ұлттық гранттар: идеяны жүзеге асырудан жеңіске дейін» тақырыбында семинар өткізді. Семинар барысында қатысушыларға халықаралық және отандық гранттық жобалардың негізгі түрлері таныстырылып, гранттық қаржыландырудың ерекшеліктері жан-жақты түсіндірілді. Спикер әртүрлі бағдарламаларға өтінім беру жолдарын нақты тәжірибелік мысалдар арқылы көрсетті. Сонымен қатар, гранттық конкурстарға қатысу кезеңдері, ғылыми идеяны қалыптастырудан бастап оны толыққанды жобаға айналдыру үдерісі талқыланды. Қатысушыларға өтінім құжаттарын сапалы әзірлеуге қатысты практикалық ұсынымдар берілді.

Heriot-Watt University халықаралық кампусының деканы, философия докторы (PhD) Жадыра Махметова «PhD Research Seminar Series» аясында «Knowledge Management for Researchers» тақырыбында баяндама жасап, ғылыми зерттеулерді тиімді ұйымдастыру және білімді басқару тәжірибесімен бөлісті. Баяндамада зерттеу процесін жүйелеу, ақпаратты тиімді пайдалану және ғылыми нәтижелердің сапасын арттыру тетіктері қарастырылды.

Миннесота университетінің постдокторанты Жұлдыз Аманкуловамен бірлесіп «Effective time-management for PhDs, early career researchers» тақырыбында өткен семинарда ғылыми ортадағы уақытты басқарудың негізгі қағидалары ұсынылды. Спикерлер PhD докторанттары мен жас зерттеушілердің ғылыми жұмысын тиімді жоспарлау, басымдықтарды дұрыс айқындау және зерттеу мен жеке өмір арасындағы тепе-теңдікті сақтау мәселелеріне тоқталды. Сонымен қатар, ұзақ мерзімді мақсаттарды қысқа мерзімді міндеттерге бөлу, дедлайндармен жұмыс істеу стратегиялары және алаңдататын факторларды азайту тәсілдері талқыланды.

БАТЫС АЙМАҚТА ЖОҒАРЫ БІЛІМ САЛАСЫНДА АЛҒАШ РЕТ – ASIIN АККРЕДИТАЦИЯСЫ

Физика-математика факультетінің білім беру бағдарламалары инженерлік, жаратылыстану және математикалық білім беру бағдарламаларының сапасын қамтамасыз ету саласындағы Еуропадағы жетекші агенттіктердің бірі – ASIIN (Германия) агенттігі тарапынан халықаралық аккредитациядан сәтті өтті.

3-4 желтоқсан аралығында жүргізілген сараптама барысында оқу бағдарламаларының халықаралық стандарттарға сәйкестігіне және білім беру сапасына жан-жақты талдау жүргізіліп, физика және математика білім беру бағдарламалары жеке кластер ретінде қарастырылды. Әр кластер құрамында University of Vechta, Leibniz University Hannover, Regensburg University of Applied Sciences, Koblenz University of Applied Sciences, Әл-Фараби атындағы Қазақ ұлттық университеті, М. Әуезов атындағы Оңтүстік Қазақстан университеті және Назарбаев Зияткерлік мектебі өкілдері болды.

Аккредитация рәсімі шеңберінде университеттің 6B01512 – Физика, 6B05301 – Физика, 7M01502 – Физика, 7M05301 – Физика, 8D05301 – Физика, 6B01501 – Математика, 6B05401 – Математика, 7M01501 – Математика, 7M05401 – Математика, 8D05401 – Математика білім беру бағдарламаларының мазмұнын, оқу-әдістемелік қамтамасыз етілуін, профессор-оқытушылар құрамының ғылыми әлеуетін, сондай-ақ материалдық-техникалық және ғылыми-зерттеу инфрақұрылымын қамтитын кешенді сыртқы аудит жүргізілді. Профессор-оқытушылар құрамының ғылыми әлеуетінің жоғары деңгейі, жарияланымдық белсенділігі және халықаралық ғылыми жобаларға қатысуы атап өтілді.

Білім беру бағдарламаларының халықаралық аккредитациядан сәтті өтуі – оқу орны қызметінің жоғары деңгейде ұйымдастырылғанын және халықаралық сапа талаптарына толық сәйкес келетінін көрсетеді. Бұл жетістік университеттің жаһандық білім беру кеңістігіндегі бәсекеге қабілеттілігін арттырып, оның халықаралық академиялық қауымдастықтағы беделін нығайта түседі.