09/09/2024
٢٣ كبسولة مضاد حيوي:
١- أمك خير مالوش حدود. كلمها كل يوم, في موعد هي عارفاه. ميفوتش يوم, ولو كنت متضايق وحزين كلمها برضو. لو كنت برة البلد كلمها برضو, لو مش عايشة كلم الست اللي في مقام أمك. اشتكي لها بعض مشاكل ومش كل مشاكلك. خليها تحس بأهميتها في حياتك. أمك خير مالوش حدود. لو واتس أب مش شغال كلمها علي فايبر, كلمها عالفيسبوك فيستايم .لو كلهم بايظين كلمها دولي, المهم كل يوم.
٢- مراتك كنز. كفاية أنها استحملتك وبتربي ولادك, لكن مينفعش تتحط في موقف قدام أمك. هنا دور السياسة والدهاء.
٣- ولادك عجينة, والشاشات وحش كاسر. مغتصب فاجر وشيطان رجيم. احمي ولادك من الموبايلات والشاشات. حدد وقتهم, شيل الفيشة أو نيم التليفونات في السرير . اقضي مع ولادك وقت والعب معاهم العاب حقيقية شاركهم فيها, العاب جماعية. ذكائهم ونموهم العاطفي والاجتماعي أمانة في ايدك بتضيعها لما ترضخ لرغباتهم وشهواتك في أنك تاخد المي تايم بتاعك. فقط في مطعم دافع فيه فلوس كتير ممكن يكون عندك مي تايم عشان تعرف تاكل اديهم الموبايل ساعة مثلا. لكن في البيت وانت موجود, ولادك وهما وجودك ومستقبلك. متخليش أي شاشة تاخدهم منك.
٤- شغلك ركز فيه, بس مينفعش يروّح البيت معاك. سيبه هناك. هيشتغل نفسه لغاية ما ترجع له. هي النتيجة واحدة اشتغلت أو مشتغلتش علي فكرة. لا طبعا, النتيجة مش واحدة, لكن سلامك النفسي أهم حاجة. اشتغل سبعتاشر ساعة في مكان الشغل بس بيتك له حُرمة والشغل ميقربش منه. ولو بتشتغل من البيت فمحدش ييجي مكان شغلك غير لما تخلص. احترم شغلك واحترم بيتك وحياتك.
٥- كلم مراتك اتطمن عليها كل يوم أثناء الشغل ولو غصب عنك. الكلام ليكم ولنفسي.
٦- جاهد نفسك في أخواتك وأهلك. دول خير مالوش تمن والخصام معاهم ندم وألم.
٧- الصاحب ساحب.
٨- لو نجحت في حياتك علي أي مستوي فيه ناس هتكره لك الخير. تفاداهم. دول عندهم مشاكل كتير. لو زاد أذاهم ادعي الدعاء الجميل ده: اللهم أكفنيهم بما شئت وكيف شئت إنك علي كل شئ قدير.ولو أذاهم عدي وفاض ادعي الدعاء الجميل ده: اللهم من أرادني بسوء فاشغله بنفسه واجعل كيده في نحره واجعل تدبيره تدميره. متدعيش عليهم لأن ده في رأيي تضييع وقت. ممكن مش هما اللي بيحاولوا يأذوك وحد تاني حطك في دماغه. ممكن كلها أوهام وهوس شيطان.ومهم أوي تواظب علي ذكر الله والاحتساب لأن الوقت ده الشيطان بيشتغل جامد أوي عشان يوقعك ويكئبك لأنه مخلوق كئيب ومٌقرف.
سمع نفسك بصوت عالي حسبي الله ونعم الوكيل كتير. هتُظبُط باذن الكريم.
٩- لما تحب بنت متصاحبهاش. يا أما انت جاهز تمشي في ارتباط يا اما انت مش جاهز وحبها من بعيد لبعيد. قلبك في ايد الرحمن. اطلب منه أنه يريحك بس متلعبش بقلب حد. اللي مترضاهوش لأختك مترضاهوش لحد. طلع طاقتك في ممارسة لعبة جديدة. اكتب, ارسم,اشتغل , ذاكر, اخرج كُل مع صحابك, روح السينما. بش متلعبش ببنات الناس تحت أي مسمي ومهما اتغير المجتمع والزمن , ولو البنات هما اللي عاوزينك تصاحبهم. متعملش حاجة قلبك ودينك بيقولولك أنها غلط. مادام مش جاهز متضيعش وقتك عشان هتتعب وترجع تغني لعمرو دياب. بس اصحي وفوق. انت مش هضبة.
١٠- الأفلام والمقاطع الإباحية مشكلة هتسبب لك اكتئاب وضعف جنسي. فيه دراسة شهيرة بتقول أن في سن الأربعين تقل الطاقة الجنسية ١٠ في المية, بعدها بعشر سنين عشرة في المية وهكذا لغاية ما تفطس . ركز في الرياضة والحركة والخروج من البيت ولو كنت بتشتغل كتير لوحدك اشتغل برة البيت ونفّع سيلانترو وستار باكس.
١١- العادة السرية هتتعبك النهاردة وهتتعبك بكرة وهتتعبك طول العُمر. ابدأ النهاردة. اليوم واحد وعد الأيام لما توصل لمية. لو ضعفت عد الأيام تاني. جاهد نفسك ومتيأسش.
١٢- السجاير هتحرقك بدري. اتعب وبطلها النهاردة
١٣- مرة تانية, الصاحب ساحب.
١٤- اوعي تمد ايدك علي ولادك أو مراتك. ندم مالوش لازمة. خليك مشرق كدة وفرفوش. الكلام ليا قبل ما يكون ليكم.
١٥- أمك وأبوك وأهلك أسيادك وتاج راسك. بس لو رأيهم السياسي مختلف عنك ملهمش مكان عندك علي فيسبوك. ودهم وحبهم بس خليك حاسم في ساحات التواصل الاجتماعي. متقاوحش أرجوك؟
١٦- نصيبك مقسوم لك وهو مش اربعة وعشرين قيراط ولا قيراط ولا ميت قيراط. نصيبك قدرك ممكن يبقي ألف قيراط أو ولا قيراط, ارضي بيه واتعامل وخلاص. قدرك من ربك وافتكر مهما أزّمت أن كله رايح.
١٧- لما تتزنق أوي وتتحارب اوي وتنهزم أوي اعمل حاجتين: طلع صدقه فُك بيها كرب حد, ودور علي حد احتاج منك خدمة انت مأجله اعملهاله واعمل كدة بنية أنك بتساعد الناس عشان ربنا يعينك. الإخلاص مهم أوي. لما يشكرك اللي كنت سبب في عونه اشكره انه وثق فيك. اشكره بامتنان حقيقي. وربنا هيعينك وهيحلهالك مهما اتعقدت. والله هيحلهالك لأنه الكبير.
١٨- حوش متحوشّ, المهم تسافر كل شوية عشان السفر انبساط مالوش مثيل, لا هتعوضه عربية حلوة ولا بنت حلوة ولا أي حاجة حلوة. السفر حلو في حد ذاته. بعربية بمركب بأتوبيس بطيارة. وسافر مع ناس بتحبهم. وأوعي تسافر وانت في نيتك تعمل حاجة غلط. السفرية دي خطر أوي لأنك ممكن تموت في الطريق. هتموت بنية معصية؟ دي موتة وحشة أوي.
١٩- مرة كمان. الصاحب ساحب.
٢٠- لما قلبك يقول لك علي حاجة لأ ارفضها. قلبك أقوي من عقلك وشايف حاجة مهمة أوي امشي وراها.
٢١- لما تفعصك الحياة علّم الناس حاجة جديدة. المعلم ده أهم واحد في الدنيا. شارك في تدريس أطفال أو علّم حد معاك في الشغل حاجة جديدة ميعرفهاش, أو حتي علّم مراتك أو ولادك. كله هيبقالك بركة في صبرك وجهدك وولادك لأن المعلم ده هو البرنس وهو اللي هيقُش الحسنات كلها يوم القيامة.
٢٢- لما تواجه موقف محتاج وقفة رجالة اقف زي الأسد وقول للأوغاد زي ما قال عمر ابن الخطاب لما قرر الهجرة للمدينة: من أراد أن تثكله أمه ويوتم ولده ويرمل زوجته ، فليلقني وراء هذا الوادي.
أخدت موقف حق قدام باطل مترجعش فيه. والموقف هيعيش لك في عينيك طول العُمر وهياخدك محطة جديدة وليفل جديد في حياتك. مش ليفل الوحش. ليفل أهل الحق..
٢٣- لما شغفك ياخدك مكان روح, لما يبطل الشغف شغّل الصبر والإصرار ولما الشغف ميرجعش متخاطرش غير لما يكون عندك خطة , ولما يكون عندك خطة نفذها كأن واحد حط راسك في حوض مية والوسيلة الوحيدة عشان تعيش وتتنفس هو أنك تنازع وتحارب العالم كله عشان تتنفس وتعيش. ساعتها شغفك هيتحول لحلم, والحلم هيكبر كل يوم تاخد فيه خطوة ناحية حلمك الحلم هتخاف عليه كأنه بامبينو صغير من صلبك. الحلم هيكبر وانت هتكبر معاه, وعمرك ما هتندم. الشغف لوحده ميأكلش عيش. بس الأحلام بيعيش عليها كل المخلوقات.وانت بتعيش حلمك هتكره ناس لأن أي حلم ليه أعداء. ولما يحاربوك ويتوحشوا عليك انت برضو هتتوحش, بس مش هتتوحش عليهم, هتتوحش لحلمك وهتعمل حاجات انت نفسك هتستغربها من نفسك . حلمك دافع وقوده من روحك.انت الضوء في قلبك والشعلة في عينيك وانت بتعيش حلمك ساعتها هتكون وصلت . انت في الحقيقة بتوصل كل يوم بتبني فيه حلمك.
ساعتها هتتطمن أوي. وهتواصل رحلتك.
