22/08/2026
ជំនួបសម្ដែងការគួរសម និងសំណេះសំណាលជាមួយសហគមន៍អ្នកគណិតវិទ្យាកម្ពុជា និងសិស្សជ័យលាភីការប្រកួតគណិតវិទ្យា (YMC) Global Final 2026 និងប្រគល់-ទទួលថវិកាសប្បុរសធម៌សម្រាប់ជួយដល់បុគ្គលិកអប់រំ និងកុមារភៀសសឹកនៅព្រំដែន
រាជធានីភ្នំពេញ៖ នារសៀលថ្ងៃទី២១ ខែសីហា ឆ្នាំ២០២៦ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានទទួលជួបសម្ដែងការគួរសម និងទទួលថវិកាសប្បុរសធម៌សម្រាប់ជួយដល់បុគ្គលិកអប់រំ និងកុមារភៀសសឹកនៅព្រំដែន សរុបចំនួន ១ ៣០០ដុល្លារ (មួយពាន់បីរយដុល្លារសហរដ្ឋអាមេរិក) ពីសំណាក់សហគមន៍អ្នកគណិតវិទ្យាកម្ពុជា ដែលមាន លោកបណ្ឌិតសភាចារ្យ ច័ន្ទ រ័ត្ន ទីប្រឹក្សាក្រសួងអប់រំ យុវជន និងកីឡា ជាតំណាង និងសប្បុរសជន រួមមានសិស្សានុសិស្សជ័យលាភីការប្រកួតគណិតវិទ្យា (YMC) Global Final 2026 ចំនួន ១៣រូប ព្រមទាំងក្រុមគ្រួសារ។
នាឱកាសនេះ តំណាងសហគមន៍អ្នកគណិតវិទ្យាកម្ពុជា បានឱ្យដឹងថា ក្រសួងអប់រំ យុវជន និងកីឡា បានជ្រើសរើសសិស្សចំនួន ១៣រូប មកពីសាលារៀនរដ្ឋ និងឯកជន តំណាងកម្ពុជា ទៅចូលរួមក្នុងការប្រកួតគណិតវិទ្យា The Young Master Challenge Global Finals ២០២៦ នៅសាកលវិទ្យាល័យ Queen Mary នៃទីក្រុងឡុងដ៍ ប្រទេសអង់គ្លេស កាលពីចុងខែមិថុនា ឆ្នាំ២០២៦ កន្លងទៅនេះ។ ក្នុងនោះ សិស្សានុសិស្សទទួលបានជោគជ័យ ដោយដណ្ដើមបានមេដាយមាសចំនួន ៣រូប, មេដាយប្រាក់ ៥រូប និងមេដាយសំរឹទ្ធចំនួន ៥រូប។ ក្នុងឱកាសនេះដែរ សហគមន៍អ្នកគណិតវិទ្យាកម្ពុជា សិស្សានុសិស្សជ័យលាភីទាំង ១៣រូប ព្រមទាំងក្រុមគ្រួសារ ក៏បាននាំយកនូវថវិកាសប្បុរសធម៌ មកប្រគល់ជូនក្រសួងអប់រំ យុវជន និងកីឡា ដើម្បីបែងចែកបន្តជួយដល់បុគ្គលិកអប់រំ និងកុមារដែលមានតម្រូវការបំផុត ដែលកំពុងរស់នៅតាមតំបន់ព្រំដែន។
ជាការឆ្លើយតប ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានចូលរួមអបអរសាទរ និងថ្លែងអំណរគុណយ៉ាងជ្រាលជ្រៅ ដល់សហគមន៍អ្នកគណិតវិទ្យាកម្ពុជា សិស្សានុសិស្ស ព្រមទាំងមាតាបិតា អ្នកអាណាព្យាបាលទាំងអស់ ចំពោះទឹកចិត្តសប្បុរសធម៌ដ៏ថ្លៃថ្លា ចូលរួមចំណែកជួយដល់បុគ្គលិកអប់រំ លោកគ្រូ អ្នកគ្រូ សិស្ស និងកុមារ ដែលកំពុងខ្វះខាតនៅក្នុងសហគមន៍តាមបណ្ដោយព្រំដែនកម្ពុជា-ថៃ។ បន្ថែមពីនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានលើកឡើងពីកត្តាគាំទ្រដ៏សំខាន់ចំនួន ៥ ដែលជួយឱ្យសិស្សជោគជ័យក្នុងការសិក្សា គឺការខិតខំប្រឹងប្រែងរៀនសូត្រប្រកបដោយភាពឆ្លាតវៃរបស់សិស្ស ការជួយជ្រោមជ្រែង និងលើកទឹកចិត្តពីសំណាក់គ្រួសារ កត្តាសាលារៀន គ្រូបង្រៀន និងគោលនយោបាយគាំទ្រពីរាជរដ្ឋាភិបាល។ ក្នុងន័យនេះ យុវសិស្សជ័យលាភីទាំង ១៣រូប ពិតជាធនធានមនុស្សដ៏មានសក្ដានុពល ដែលបានកសាងនូវកិត្តិយស និងមោទនភាពជូនប្រទេសជាតិ ក្រុមគ្រួសារ សាលារៀន និងខ្លួនឯង និងសូមលើកទឹកចិត្តឱ្យសិស្សជ័យលាភីទាំងអស់បន្តយកចិត្តទុកដាក់ខិតខំរៀនសូត្រ ពង្រឹងសមត្ថភាពផ្នែកគណិតវិទ្យាឱ្យកាន់តែខ្លាំងក្លាបន្ថែមទៀត ដើម្បីឈោងចាប់នូវអនាគតដ៏ភ្លឺស្វាង ដោយត្រូវប្រើប្រាស់ចំណេះដឹងបង្កើតអ្វីដែលថ្មីជាប្រយោជន៍ដល់សង្គមជាតិ និងចូលរួមចំណែកដល់ការអភិវឌ្ឍប្រទេសជាតិ។
សូមបញ្ជាក់ថា សហគមន៍អ្នកគណិតវិទ្យាកម្ពុជា (Cambodian Mathematical Society - CMS) បានចូលរួមលើកកម្ពស់ការអប់រំ និងការស្រាវជ្រាវ ជំរុញ និងអភិវឌ្ឍការបង្រៀន ការរៀន និងការស្រាវជ្រាវផ្នែកគណិតវិទ្យានៅគ្រប់កម្រិតសិក្សា និងបង្កើនកិច្ចសហប្រតិបត្តិការអន្តរជាតិ ធ្វើជាស្ពានចងភ្ជាប់សហគមន៍គណិតវិទ្យាកម្ពុជា ជាមួយសហគមន៍គណិតវិទ្យាតំបន់អាស៊ាន និងអន្តរជាតិ។ កន្លងមក សហគមន៍អ្នកគណិតវិទ្យាកម្ពុជា បានចូលរួមយ៉ាងសកម្មជាមួយក្រសួងអប់រំ យុវជន និងកីឡា ក្នុងការបណ្ដុះបណ្ដាល និងជ្រើសរើសសិស្សពូកែគណិតវិទ្យា ដើម្បីចូលរួមក្នុងការប្រកួតប្រជែងកម្រិតតំបន់ និងអន្តរជាតិ៕
MORE INFORMATION: https://t.me/cambodianmathematicalsociety
