22/06/2021
វិញ្ញាណជាខ្សែកំលាំងដឹង តែវាដឹងតាមសំបកដែលវិញ្ញាណជាអ្នកធ្វើសំបកនោះឡើង។ សូមក្មួយ ចាប់អារម្មណ៍នឹងពាក្យខ្សែកំលាំង។ បើវាជាខ្សែកំលាំង ដូច្នេះវាត្រូវតែនៅវិលតាមកំលាំងចេញពីកលាបៈវិល។ វាអត់មានក្បាលអត់មានដៃជើងឬខ្លួនជាសត្វអីនោះទេ ប៉ុន្តែវិញ្ញាណនោះវាដឹងជាលក្ខណៈចេះគិត អីចឹងខ្សែកំលាំងដឹងនោះ ក៏ឆ្នៃជារាងក្បាលមក កាលណាវាត្រូវការដៃជើង ក្រពះ ពោះវៀនព្រោះជាវិញ្ញាណសត្វកាមភព នោះខ្សែកំលាំងដឹងនោះ ក៏រមូទៅជាទំរង់រូបរាងសត្វកាមភពទៅ តែវិញ្ញាណអត់មានជារូបរាងសត្វស្អីទេ គឺខ្សែកំលាំងប្រែជាដឹងប៉ុណ្ណោះទេតើ។ សូម្បីតែរុក្ខជាតិ ក៏មានវិញ្ញាណដែរ ប៉ុន្តែវិញ្ញាណនោះ វាមិនទាន់ត្រូវការទ្វារភ្នែកច្រមុះត្រចៀកស្អីនោះទេ គឺវិញ្ញាណដ៏ទន់ខ្សោយរបស់រុក្ខជាតិវាត្រូវការសំបកតែត្រឹមដើមរុក្ខជាតិប៉ុណ្ណោះទេ តែព្រោះតែរុក្ខជាតិវាមានវិញ្ញាណ អីចឹងហើយបានជាវាចេះរេរកពន្លឺថ្ងៃដែរអីចឹងនោះ។ វិញ្ញាណរុក្ខជាតិមានលក្ខណៈប៉ុណ្ណឹង វាមានរូបសំរាប់ដឹងប៉ុណ្ណឹងដែរ អីចឹងបានជាវាត្រូវតែឆ្នៃរូបជារុក្ខជាតិអីចឹងទៅ។ ចំណែកវិញ្ញាណចេះគិត ខ្សែកំលាំងនោះរមូរជារាងខួរបែបណាតាមសភាពវិញ្ញាណចេះគិតបែបហ្នុងទៅ។ នេះជាលក្ខណៈនៃខ្សែវិញ្ញាណឆ្នៃរូប កម្មជ្ជរូប។ ខ្សែកំលាំងច្រឡំដឹង ហើយដើម្បីដឹងបាន វិញ្ញាណនោះជាអ្នកឆ្នៃរូបដែលមានទ្វារវិញ្ញាណតាមសភាពលក្ខណៈរបស់វិញ្ញាណនោះទៅ ហើយសត្វនោះដឹងច្រឡំនូវពិភពលោកជាធាតុរបស់វាអីចឹងទៅ។ គិតមើលខ្សែកំលាំងនៅតែជាកំលាំង ដែលត្រូវ ត្រូវតែទុកវាជាខ្សែកំលាំងរួមតែមួយ អត់អារម្មណ៍អញជាសត្វបែកខ្សែកំលាំងជាសត្វមួយៗផ្សេងគ្នាទេ។ អារម្មណ៍អញ ឬអារម្មណ៍អាត្មានិយម នោះខ្សែកំលាំងបង្កើតវិញ្ញាណវិប្បយុត្តិវិលមិនត្រូវគន្លងកំលាំងទេ។ ខុសគន្លងកំលាំង វិញ្ញាណសត្វនឹងរងទុក្ខហើយ៕
