Research Center For Excellence and Innovation,A.U.

សមិទ្ធផលថ្មីរបស់ Angkor University " កម្មវិធីបណ្តុះបណ្តាលជាស៊េរីស្តីពីបច្ចេកវិទ្យាឌីជីថល និងបញ្ញាសិប្បនិមិត្ត (AI)" សម្រាប់ប្អូននិស្សិត និងសិស្សានុសិស្សសិក្សាក្នុងរយ:ពេល៩០ម៉ោងដោយឥតគិតថ្លៃ។

សូមចុះឈ្លោះឥឡូវនេះ។

ក្នុងនាមជាតំណាងនៃមជ្ឈមណ្ឌលស្រាវជ្រាវ ដើម្បីឧត្តមភាព និងនវានុវត្តន៍ Angkor University សូមគោរពអរគុណចំពោះលោកសាស្ត្រាចារ្យបម្រុងបណ្ឌិត ហេង ប៊ុនសុង ព្រឹទ្ធបុរសនៃមហាវិទ្យាល័យគ្រប់គ្រងពាណិជ្ជកម្ម និងទេសចរណ៍ដែលបានប្រគល់ជូននូវសៀវភៅដ៏មានតម្លៃសម្រាប់ជាប្រយោជន៍ដល់ការរៀន ការបង្រៀន និងការស្រាវជ្រាវ។

លោកបានចំណាយពេលដ៏មានតម្លៃដើម្បីស្រាវជ្រាវ សរសេរ និងចងក្រងជាសៀវភៅទាំងនេះឡើង ក្នុងគោលបំណងដើម្បីចូលរួមលើកកម្ពស់ការសិក្សា ការស្រាវជ្រាវ និងបោះពុម្ពផ្សព្វផ្សាយ។ យើងខ្ញុំសូមគោរពនូវឆន្ទៈដ៏ផូរផង់នេះ និងសូមគោរពជូនពរលោកចម្រើនលូតលាស់គ្រប់ភារកិច្ចការងារ សុខភាពល្អ និងអាយុយឺនយូរ។

ការបង្កើតទំនាក់ទំនង និងពង្រឹងគុណភាពទស្សនាវដ្តី

នាយករងនៃមជ្ឈមណ្ឌលស្រាវជ្រាវដើម្បីឧត្តមភាព និងនវានុវត្តន៍ (ម.ស.ឧ.ន)នៃសាកលវិទ្យាល័យអង្គរ (ស.អ)បានជួបពិភាក្សាជាមួយអ្នកស្រាវជ្រាវជាន់ខ្ពស់ផ្នែកវប្បធម៌អាស៊ី និងកម្ពុជា លោកសាស្ត្រាចារ្យបណ្ឌិត John Marston ។ លោកសាស្ត្រាចារ្យបានធ្វើដំណើរមកកាន់កម្ពុជាក្រោយរបបខ្មែរក្រហមត្រូវបានផ្តួលរំលំ ហើយបន្តធ្វើការសិក្សាស្រាវជ្រាវអំពីកម្ពុជាចាប់ពីពេលនោះ រហូតមកដល់បច្ចុប្បន្ន ជួនកាលលោកក៏ជាសាស្ត្រាចារ្យនៅសាកលវិទ្យាល័យមួយចំនួននៅកម្ពុជា ផងដែរ។ លោកសាស្ត្រាចារ្យមានបំណងចង់ឱ្យវិស័យស្រាវជ្រាវជ្រាបចូលទៅក្នុងវិស័យអប់រំឱ្យបានច្រើនហើយស៊ីជម្រៅ ជាពិសេសគឺកម្រិតឧត្តមសិក្សា។ លោកសាស្ត្រាចារ្យមានប្រសាសន៍ថា ការស្រាវជ្រាវ ការបោះពុម្ពផ្សាយ និង គុណភាពនៅមានកម្រិត ដូច្នេះកម្ពុជាត្រូវបន្តសេចក្តីព្យាយាមបន្ថែមទៀត ដើម្បីពង្រីកនិងពង្រឹងពុទ្ធិឱ្យបានទូលំទូលាយ។

លោកសាស្ត្រាចារ្យបានអបអរសាទរចំពោះការខិតខំប្រឹងប្រែងរបស់វិស័យអប់រំកន្លងមកជាពិសេសគឺការធ្វើកំណែទម្រង់ ទទឹមនឹងនោះ លោកក៏បានអបអរសាទរចំពោះសាកលវិទ្យាល័យអង្គរដែលបានផលិតទស្សនាវដ្តីស្រាវជ្រាវលើកដំបូងបានយ៉ាងជោគជ័យ ហើយសង្ឃឹមថានឹងមានជាបន្តបន្ទាប់។ លោកសាស្ត្រាចារ្យបានណែនាំបណ្តាញអ្នកស្រាវជ្រាវបរទេស ដែលធ្វើដំណើរមកខេត្តសៀមរាបដល់នាយករង ម.ស.ឧ.ន ដើម្បីផលប្រយោជន៍ផ្សេងៗ នាអនាគត។

ក្រុមការងារនៃ Research Center For Excellence and Innovation,A.U. របស់ Angkor University ធ្វើការពិនិត្យឡើងវិញនូវការដាក់លេខកូដមុខវិជ្ជា ការធ្វើបច្ចុប្បន្នភាពនៃ CLOs , PLOs និង LLO តាមមហាវិទ្យាល័យនីមួយៗ។

ក្រុមការងារនៃ Research Center For Excellence and Innovation,A.U. របស់ Angkor University ធ្វើការបណ្តុះបណ្តាលដល់បុគ្គលិក និងនិស្សិតអំពីវិធីសាស្ត្របញ្ចូលទិន្នន័យ វិភាគទិន្នន័យ និងការបង្កើតកម្រងសំណួរតាមរយ:Google Form។

សូមអបអរសាទរ "ទស្សនាវដ្តីស្រាវជ្រាវវិទ្យាសាស្ត្រ ស.អ នៃសហគ្រិនភាព និងនវានុវត្តន៍បៃតង" នៃសាកលវិទ្យាល័យអង្គរ ទទួលបានលេខ ISSN ជាផ្លូវការ និងជាអចិន្ត្រៃយ៍។

សូមអរគុណប្អូនៗដែលបានមកជួយបញ្ចូលទិន្នន័យ ជាហេតុធ្វើឲ្យឃើញល្បឿនមានសន្ទុះខ្ពស់ជាងសព្វមួយដង។ បើសិនជាមួយថ្ងៃ អាចបញ្ចូលបាន១,០០០ ទិន្នន័យ នោះ មិនលើសជាង៥សប្តាហ៍ទេ នឹងបានបិទបញ្ចប់។

ជំនួបជាមួយមន្ត្រីនាយកដ្ឋានស្រាវជ្រាវនិងនវានុវត្តន៍

នាយករងនៃមជ្ឈមណ្ឌលស្រាវជ្រាវដើម្បីឧត្តមភាព និងនវានុវត្តន៍នៃសាកលវិទ្យាល័យអង្គរបានចូលជួប និងសម្តែងការគួរសមចំពោះលោកសាស្ត្រាចារ្យរងបណ្ឌិត ឈឿត ឃុនលាភ អនុប្រធាននាយកដ្ឋាន ស្រាវជ្រាវនិងនវានុវត្តន៍ នៃក្រសួងអប់រំ យុវជន និងកីឡា និងលោកសាស្ត្រាចារ្យរងបណ្ឌិត ហេង គីមគង់ សហស្ថាបនិកវេទិកាអប់រំកម្ពុជាដើម្បីថ្លែងអំណរគុណចំពោះការគាំទ្រ ជួយ និងជំរុញក្នុងនាមជាសហនិពន្ធនាយកទស្សនាវដ្តីស្រាវជ្រាវវិទ្យាសាស្ត្រ ស.អ. នៃសហគ្រិនភាព និងនវានុវត្តន៍ ព្រមទាំងស្តាប់ និងទទួលយកនូវអនុសាសន៍បន្ថែមទៀតដើម្បីកែលម្អរទស្សនាវដ្តីឱ្យកាន់តែប្រសើ ការផ្សព្វផ្សាយ និងយុទ្ធសាស្ត្រនិរន្តរភាពទស្សនាវដ្តី។

លោកសាស្ត្រាចារ្យបណ្ឌិត ហេង គ្រេង ប្រធាននាយកដ្ឋានស្រាវជ្រាវ និងនវានុវត្តន៍ និងមន្ត្រីក្រោមឱវាទរបស់លោក ព្រមទាំងតំណាងគ្រឹះស្ថានឧត្តមសិក្សាជាច្រើនរូបដែលអញ្ជើញមកចូលរួមសិក្ខាសាលាស្តីពី «ការពិនិត្យឡើងវិញ និងកែលម្អបញ្ចប់សេចក្តីព្រាងក្របខណ្ឌគ្រប់គ្រងការស្រាវជ្រាវ» នៅសណ្ឋាគារអង្គរប៉ារ៉ាឌី ខេត្តសៀមរាប បានអបអរសាទរចំពោះសមិទ្ធផលរបស់សាកលវិទ្យាល័យអង្គរដែលបានបោះពុម្ព និងផ្សព្វផ្សាយទស្សនាវដ្តីស្រាវជ្រាវ ឆ្នាំទី១ លេខ១ បានយ៉ាងជោគជ័យ។ លោកបានលើកទឹកចិត្ត និងផ្តល់អនុសាសន៍បន្ថែមដើម្បីឈានទៅរកការបោះពុម្ពឆ្នាំទី១ លេខ២ នាខាងមុខនេះ។

មជ្ឈមណ្ឌលស្រាវជ្រាវដើម្បីឧត្តមភាពនិងនវានុវត្តន៍នៃសាកលវិទ្យាល័យអង្គរ បានទទួលទិន្នន័យស្តីពី«ការបន្តការសិក្សារបស់សិស្សានុសិស្សក្រោយបញ្ចប់ការសិក្សាទុតិយភូមិឆ្នាំសិក្សា ២០២៣-២០២៤ ចំនួន១១,១១៦ ច្បាប់មកពីបណ្តាវិទ្យាល័យក្នុងខេត្តចំនួន៦។

ក្រុមការងារបានយកចិត្តទុកដាក់ខ្ពស់ក្នុងការបញ្ចូល និងវិភាគទិន្នន័យឱ្យបានទាន់ពេលវេលាដែលបានកំណត់ទុក។

ពិធីសម្ពោធ និងផ្សព្វផ្សាយទស្សនាវដ្តី

«ទស្សនាវដ្តីស្រាវជ្រាវវិទ្យាសាស្ត្រ ស.អ. នៃសហគ្រិនភាព និងនវានុវត្តន៍បៃតង» ត្រូវបានធ្វើពិធីសម្ពោធ និងផ្សព្វផ្សាយជាផ្លូវការដោយលោក ហួត គង់យូរ សាកលវិទ្យាធិការ នៃសាកលវិទ្យាល័យ អង្គរ ក្រោមវត្តមានដ៏ខ្ពងខ្ពស់ពីគណៈក្រុមប្រឹក្សាភិបាល មាន ឯកឧត្តម អ្នកឧកញ៉ា បណ្ឌិតសៀង ណាំ និងឯកឧត្តមកិត្តិគុណសាស្ត្រាចារ្យ បណ្ឌិត សុខ តុញ គណៈគ្រប់គ្រង ស.អ. ព្រមទាំងសាស្ត្រាចារ្យ និស្សិត ភ្ញៀវកិត្តិយសពីបណ្តាស្ថាប័ន និងអង្គភាពនានា ក្នុង «ទិវាគម្រប់ខួប ២០ឆ្នាំរបស់ ស.អ. និងពិធីដឹងគុណជូនចំពោះ ឯកឧត្តម អ្នកឧកញ៉ា បណ្ឌិត សៀង ណាំ ស្ថាបនិក និងជាប្រធានក្រុមប្រឹក្សាភិបាល នៃ ស.អ.» កាលពីថ្ងៃទី២០ ខែកក្កដា ឆ្នាំ២០២៤។
ទស្សនាវដ្តីស្រាវជ្រាវនេះ ត្រូវបានបោះពុម្ពជាប្រភេទសៀវភៅ និងប្រភេទអនឡាញ (ក្នុងគេហទំព័ររបស់សាកលវិទ្យាល័យ) ហើយទទួលបាន ISSN: 3007-679X ។ អត្ថបទស្រាវជ្រាវក្នុងទស្សនាវដ្តីនេះ មានចំនួន៧ បានឆ្លងកាត់ការត្រួតពិនិត្យយ៉ាងម៉ត់ចត់ និងវាយតម្លៃពីអ្នកជំនាញមកពីនាយកដ្ឋានស្រាវជ្រាវ និងនវានុវត្តន៍ នៃ អយក វេទិការអប់រំកម្ពុជា និងមកពីគ្រឹះស្ថានឧត្តមសិក្សាជាច្រើន។ អត្ថបទស្រាវជ្រាវទាំង៧ រួមមាន៖
 ១. ការដាស់ស្មារតីយុវជន បន្តវេនឱ្យផ្តល់តម្លៃចំពោះវប្បធម៌ និងប្រពៃណីខ្មែរតាមរយៈសកម្មភាពនៃការប្រណាំងទូកងក្នុងព្រះរាជពិធីបុណ្យអុំទូក បណ្តែតប្រទីប និងសំពះ ព្រះខែ អកអំបុក ៖ ករណីសិក្សានៃកិច្ចការទូកង «ស.អ. រះថ្មីតេជបារមីរស្មីអង្គរ» របស់សាកលវិទ្យាល័យអង្គរ
 ២. ការលើកកម្ពស់ក្រមសីលធម៌របស់នគរបាលជាតិកម្ពុជា
 ៣. ព្រះពុទ្ធសាសនាដើម្បីសង្គម ៖ ទស្សនៈការគ្រប់គ្រងគម្រោងព្រះពុទ្ធសាសនាក្នុងសង្គមរបស់សមាគមជីវិត និងក្តីសង្ឃឹម
 ៤. សិក្សាពីសំណេរពាក្យកម្លាយនៃភាសាខ្មែរទំនើបក្នុងក្របខ័ណ្ឌសំរាយតំរួត
 ៥. សិក្សាវិភាគកត្តាដែលជះឥទ្ធិពលលើលទ្ធភាពនៃប្រាក់ចំណេញរបស់ធនាគារពាណិជ្ជនៅកម្ពុជា
 ៦. សិក្សាពីឥទ្ធិពលនៃការគ្រប់គ្រងសំណល់ប្រកបដោយនិរន្ដរភាពលើប្រាក់ចំណេញរបស់សណ្ឋាគារក្នុងក្រុងសៀមរាប ប្រទេសកម្ពុជា
 ៧. សិក្សាពីអនុសាសន៍គោលនយោបាយសម្រាប់ការសម្រេចបាននូវចក្ខុវិស័យរបស់ប្រទេសកម្ពុជាក្នុងការក្លាយជាសង្គមពុទ្ធិ។

ដើម្បីទទួលបានអត្ថបទទាំងនេះ សូមទៅកាន់គេហទំព័រតាមរយៈ ៖ AUJEGI (angkor.edu.kh)

មជ្ឈមណ្ឌលស្រាវជ្រាវដើម្បីឧត្តមភាព និងនវានុវត្តន៍ សូមធ្វើការប្រកាសរកអត្ថបទស្រាវជ្រាវសម្រាប់បោះពុម្ពក្នុងខែធ្នូ ឆ្នាំ២០២៤។ សូមទាក់ទងតាមរយៈតេលេក្រាម ៖ +85561820587 Email: [email protected]

ក្រុមការងារ Research Center For Excellence and Innovation,A.U. នៃ សាកលវិទ្យាល័យអង្គរ ( Angkor University ) ចូលរួមពិធីថ្វាយព្រះពរជ័យ សិរិវឌ្ឍនា បវរមហាប្រសើរថ្វាយសម្តេចព្រះមហាក្សត្រីនរោត្តម មុនីនាង សីហនុ ព្រះវររាជមាតាជាតិខ្មែរក្នុងសេរីភាព សេចក្តីថ្លៃថ្នូរ និងសុភមង្គល ក្នុងព្រះជន្មគម្រប់ខួប៨៨ យាងចូល៨៩ ព្រះវស្សា។

សូមថ្វាយព្រះពរ

សេចក្តីប្រកាសរកអត្ថបទស្រាវជ្រាវ

ទស្សនាវដ្តីស្រាវជ្រាវវិទ្យាសាស្រ្ត ស.អ. នៃសហសគ្រិនភាព និងនវានុវត្តន៍បៃតង
«ទ.ស.ស.អ.ស.ន.ប»
AU Journal of Entrepreneurship and Green Innovation (AUJEGI)

ទ.ស.ស.អ.ស.ន.ប សូមស្វាគមន៍អត្ថបទស្រាវជ្រាវសម្រាប់បោះពុម្ពផ្សាយឆ្នាំទី១ លេខ២ ប្រចាំខែមីនា ឆ្នាំ២០២៥។ អត្ថបទដែលនឹងទទួលយកជាប្រភេទអត្ថបទដើម (Original article) អត្ថបទវិវេចនា (Review article) អត្ថបទទំនាក់ទំនងខ្លី (Short communication) និងអត្ថបទសង្ខេបគោលនយោបាយ (Policy Brief) ដែលទាក់ទងនឹងវិស័យសុខភាព ពាណិជ្ជកម្មនិងទេសចរណ៍ វិស្វកម្មនិងស្ថាបត្យកម្ម បច្ចេកវិទ្យា មនុស្សសាស្ត្រនិងភាសា សង្គមសាស្ត្រនិងនីតិសាស្ត្រ និងកសិកម្មនិងការអភិវឌ្ឍន៍ជនបទ។

ជ្រើសរើសយកអត្ថបទស្រាវជ្រាវជាភាសាខ្មែរ និងភាសាអង់គ្លេស។ បើជាភាសាខ្មែរ ឈ្មោះអ្នកនិពន្ធនិងឈ្មោះប្រធានបទ មូលន័យសង្ខេប និងពាក្យគន្លឹះត្រូវមានជាភាសាអង់គ្លេស តែបើជាភាសាអង់គ្លេសតម្រូវឱ្យរៀបចំឈ្មោះអ្នកនិពន្ធនិងឈ្មោះប្រធានបទ មូលន័យសង្ខេប និងពាក្យគន្លឹះជាភាសាខ្មែរ។

សូមអ្នកនិពន្ធដាក់អត្ថបទស្រាវជ្រាវមកកាន់ [email protected] ឬតេលេក្រាម/ទូរស័ព្ទ +85561820587 / +85512334398។ ព័ត៌មានបន្ថែម សូមទៅកាន់ https://journal.angkor.edu.kh/។
សូមបញ្ជាក់ ៖ រាល់អត្ថបទស្រាវជ្រាវ មុននឹងបោះពុម្ពត្រូវឆ្លងកាត់ការត្រួតពិនិត្យ និងវាយតម្លៃពីអ្នកជំនាញ (Peer Review) និងគណៈកម្មការនិពន្ធនាយក។

អត្ថបទទទួលពេញមួយឆ្នាំ!

ក្រុមការងារនៃ Research Center For Excellence and Innovation,A.U. បានចូលរួមក្នុងពិធីបើក និងបិទ «តម្រង់ទិសនិស្សិតកម្រិតបរិញ្ញាបត្ររង មុខជំនាញ គិលានុបដ្ឋាក និង មុខជំនាញ ឆ្មប ក្នុងឆ្នាំសិក្សា ២០២៣ - ២០២៤» ក្រោមអធិបតីភាពឯក.សាស្ត្រាចារ្យកិត្តិគុណ បណ្ឌិត សុខ តុញ អនុប្រធានក្រុមប្រឹក្សាភិបាល និងលោក គង់ យូរ សាកលវិទ្យាធិការ។

លោកទាំងពីរបានធ្វើការចែករំលែកនូវវឌ្ឍនភាពរបស់សាកលវិទ្យាល័យអង្គរ និងបទពិសោធផ្ទាល់ខ្លួនដើម្បីជាការក្រើនរំលឹកដល់និស្សិត ព្រមទាំងលើកទឹកចិត្តក្នុងការសិក្សា។

ក្រុមការងារនៃមជ្ឈមណ្ឌលស្រាវជ្រាវដើម្បីឧត្តមភាព និងនវានុវត្តន៍បានចូលរួមស្វាគមន៍ទស្សនកិច្ចរបស់ឯកឧត្តម សុក ផេង ប្រធានគណៈកម្មាធិការប្រឡងថ្នាក់ជាតិ សម្រាប់ការបណ្តុះបណ្តាលវិស័យសុខាភិបាលនៅសាកលវិទ្យាល័យអង្គរ នាថ្ងៃទី២០ ខែមេសា ឆ្នាំ២០២៤។

ឯកឧត្តមបានសួរនាំអំពីការរៀបចំប្រលងថ្នាក់ជាតិ និស្សិតជ័យលាភី ការរៀននិងការបង្រៀននិងបញ្ហាប្រឈមមួយចំនួនដែលត្រូវធ្វើការសិក្សានិងដោះស្រាយ។ ឯកឧត្តមក៏បានផ្តល់អនុសាសន៍ដែលជាតម្រុយ ល្អៗសម្រាប់ការកំណត់ផែនការសកម្មភាពនិងលើកទឹកចិត្តដល់គណៈគ្រប់គ្រងចំពោះកិច្ចខំប្រឹងប្រែងនេះ។

វឌ្ឍនភាពទស្សនាវដ្តីស្រាវជ្រាវនៅកម្ពុជា

ក្រុមការងារនៃមជ្ឈមណ្ឌលស្រាវជ្រាវ ដើម្បីឧត្តមភាពនិងនវានុវត្តន៍ លោកសាស្ត្រាចារ្យរង បណ្ឌិតយន់ សុធា ទទួលបន្ទុកផ្នែកទស្សនាវដ្តីស្រាវជ្រាវបានចូលរួមសិក្ខាសាលាគំាទ្រគ្រឹះស្ថានឧត្តមសិក្សាក្នុងការរៀបចំទស្សនាវដ្តី រៀបចំដោយនាយកដ្ឋានស្រាវជ្រាវវិទ្យាសាស្ត្រ ក្រសួងអប់រំ យុវជន និងកីឡា ដែលប្រព្រឹត្តទៅនៅសាកលវិទ្យាល័យជាតិបាត់ដំបង ខេត្តបាតដំបង រវាងថ្ងៃទី២៨ និងទី២៩ ខែមីនា ឆ្នាំ២០២៤។

ក្នុងសិក្ខាសាលានេះ លោកសាស្ត្រាចារ្យរងបណ្ឌិតយន់ សុធា បានធ្វើបទបង្ហាញអំពីវឌ្ឍនភាពទស្សនាវដ្តីស្រាវជ្រាវវិទ្យាសាស្ត្រ ស.អ នៃសហគ្រិនភាពនិងនវានុវត្តន៍បៃតង កត្តាប្រឈម និងផែនការសកម្មភាពមួយចំនួន។ ជារួមសម្រាប់សាកលវិទ្យាល័យអង្គរបានត្រៀមសម្រាប់បោះទស្សនាវដ្តីបាន៧០% ខណៈពេល គ្រឹះស្ថានឧត្តមសិក្សាមួយចំនួនបានដំណើរការបោះពុម្ភខ្លះហើយ ចំណែកខ្លះទៀត បាននឹងកំពុងធ្វើសេចក្តីព្រាងផ្សេងៗ។

សិក្ខាសាលានេះ ក្រុមការងារនៃនាយកដ្ឋានស្រាវជ្រាវ និងវាគ្មិនមួយចំនួន បានធ្វើការចែករំលែកនូវបទពិសោធន៍មួយចំនួនទាក់ទងនឹង វប្បធម៌ស្រាវជ្រាវ ស្ថានភាពនៃការអភិវឌ្ឍទស្សនាវដ្តីស្រាវជ្រាវនៅកម្ពុជា ការបង្កើត គ្រប់គ្រង និងការអភិវឌ្ឍទស្សនាវដ្តីស្រាវជ្រាវវិទ្យាសាស្ត្រ វឌ្ឍនភាពនៃការបង្កើតទស្សនាវដ្តីពីគ្រឹះស្ថានឧត្តមសិក្សា ប្រព័ន្ធគ្រប់គ្រងទស្សនាវដ្តី(Open Journal System) ការអភិវឌ្ឍគុណភាពទស្សនាវដ្តីស្រាវជ្រាវវិទ្យាសាស្ត្រដើម្បីរៀបចំស្នើសុំលិបិក្រមអាស៊ាន(ASEAN Citation Index)ការប្រើប្រាស់ប្រព័ន្ធគ្រប់គ្រងឯកសារយោងទស្សនាវដ្តីស្រាវជ្រាវ (Referencing Software)ការដាក់ពា្យស្នើសុំលេខសេរ៊ីស្តង់ដាអន្តរជាតិ (ISSN)សម្រាប់ទស្សនាវដ្តីស្រាវជ្រាវ និងការដាក់ពាក្យស្នើសុំអត្តសញ្ញាណឌីជីថល (DOI) គោលនយោបាយគាំទ្រ កែលម្អ និងគម្រោងផែនការសកម្មភាពផ្សេងៗ។