វិទ្យាស្ថានជាតិសង្គមកិច្ច National Institute of Social Affairs

វិទ្យាស្ថានជាតិសង្គមកិច្ច ពង្រឹងគុណវុឌ្ឍិកម្លាំងសេវាសង្គម តាមរយៈវគ្គបណ្តុះបណ្តាលស្តីពី «ការគ្រប់គ្រងករណី ការប្រឹក្សាយោបល់ និងការឆ្លុះបញ្ចាំងខ្លួនឯង និងជំនាញថែទាំខ្លួនឯង» ដល់មន្ត្រីរាជការ

វិទ្យាស្ថានជាតិសង្គមកិច្ចនៃក្រសួងសង្គមកិច្ច អតីតយុទ្ធជន និងយុវនីតិសម្បទា បានរៀបចំពិធីបិទវគ្គបណ្តុះបណ្តាលយ៉ាងដិតដល់ស្តីពី «ការគ្រប់គ្រងករណី ការប្រឹក្សាយោបល់ និងការឆ្លុះបញ្ចាំងខ្លួនឯង និងជំនាញថែទាំខ្លួនឯង» ក្រោមអធិបតីភាពរបស់ ឯកឧត្តម សរ បូរីរក្ស នាយកវិទ្យាស្ថានជាតិសង្គមកិច្ច ដោយមានការចូលរួមពីសំណាក់ លោក លោកស្រីនាយករងវិទ្យាស្ថាន មន្ត្រីរាជការ គ្រូឧទ្ទេស និងសិក្ខាកាមជាច្រើនរូប។

វគ្គបណ្តុះបណ្តាលដ៏មានសារៈសំខាន់នេះ ត្រូវបានរៀបចំឡើងក្នុងគោលបំណងឆ្លុះបញ្ចាំងពីការប្តេជ្ញាចិត្តខ្ពស់របស់វិទ្យាស្ថាន ក្នុងការអភិវឌ្ឍសមត្ថភាព និងវិជ្ជាជីវៈរបស់មន្ត្រីរាជការ ក្នុងការឆ្លើយតបទៅនឹងតម្រូវការជាក់ស្តែង។ ជំនាញស្នូលដែលបានបណ្តុះបណ្តាលក្នុងសិក្ខាសាលនាពេលនេះ គឺជាឧបករណ៍បច្ចេកទេសដ៏សំខាន់មិនអាចខ្វះបាន សម្រាប់ជួយឱ្យមន្ត្រីជួរមុខអាចបំពេញការងារគាំពារប្រកបដោយក្រមសីលធម៌ និងវិជ្ជាជីវៈខ្ពស់ ព្រមទាំងអាចគ្រប់គ្រងសម្ពាធផ្លូវចិត្តផ្ទាល់ខ្លួនបានយ៉ាងមានប្រសិទ្ធភាព។

ក្នុងឱកាសនោះ ឯកឧត្តមនាយក បានមានប្រសាសន៍សង្កត់ធ្ងន់លើការកសាងសមត្ថភាពមន្ត្រីរាជការនាពេលនេះ គឺដើម្បីធានាឱ្យបាននូវការបម្រើផលប្រយោជន៍ប្រជាពលរដ្ឋរងគ្រោះ និងងាយរងគ្រោះឱ្យកាន់តែមានប្រសិទ្ធភាព និងទាន់ពេលវេលា។ នេះជាជំហានយុទ្ធសាស្ត្រដ៏ច្បាស់លាស់ ស្របតាមបរិបទនៃការកែទម្រង់ និងការពង្រឹងកម្លាំងសេវាសង្គមឱ្យមានគុណវុឌ្ឍិខ្ពស់ និងឆ្លើយតបទៅនឹងការវិវត្តនៃសង្គមជាតិ។

វិទ្យាស្ថានជាតិសង្គមកិច្ច នឹងបន្តបេសកកម្មរបស់ខ្លួនក្នុងការធ្វើទំនើបកម្ម និងពង្រឹងសមត្ថភាពកម្លាំងសេវាសង្គមជាបន្តបន្ទាប់ ដើម្បីឆ្លើយតបទៅនឹងចក្ខុវិស័យវែងឆ្ងាយក្នុងការកសាងប្រព័ន្ធគាំពារសង្គមមួយដ៏រឹងមាំ និងមានបរិយាបន្ននៅកម្ពុជា។

ឯកឧត្តម សរ បូរីរក្ស នាយកវិទ្យាស្ថានជាតិសង្គមកិច្ច
បានចូលរួមបើកវគ្គបណ្តុះបណ្តាលស្តីពី «ការគ្រប់គ្រងករណី ការប្រឹក្សាយោបល់ និងការឆ្លុះបញ្ចាំងខ្លួនឯង និងជំនាញថែទាំខ្លួនឯង» ដើម្បីពង្រឹងសមត្ថភាពមន្ត្រីរាជការ

នាព្រឹកថ្ងៃទី១៥ ខែមិថុនា ឆ្នាំ២០២៦ វិទ្យាស្ថានជាតិសង្គមកិច្ចនៃក្រសួងសង្គមកិច្ច អតីតយុទ្ធជន និងយុវនីតិសម្បទា បានរៀបចំពិធីបើកវគ្គបណ្តុះបណ្តាលដ៏មានសារៈសំខាន់មួយ ស្តីពី «ការគ្រប់គ្រងករណី ការប្រឹក្សាយោបល់ និងការឆ្លុះបញ្ចាំងខ្លួនឯង និងជំនាញថែទាំខ្លួនឯង» ក្រោមអធិបតីភាពរបស់ឯកឧត្តម សរ បូរីរក្ស នាយកវិទ្យាស្ថានជាតិសង្គមកិច្ច ដោយមានការចូលរួមពីសំណាក់ពីលោក លោកស្រីនាយករងវិទ្យាស្ថាន មន្ត្រីរាជការ គ្រូឧទ្ទេស និងសិក្ខាកាមជាច្រើនរូប។

វគ្គបណ្តុះបណ្តាលនេះ រៀបចំឡើងក្នុងគោលបំណងឆ្លុះបញ្ចាំងពីការប្តេជ្ញាចិត្តខ្ពស់ក្នុងការអភិវឌ្ឍសមត្ថភាព និងវិជ្ជាជីវៈរបស់មន្ត្រីរាជការ ដើម្បីបម្រើផលប្រយោជន៍ប្រជាពលរដ្ឋរងគ្រោះ និងងាយរងគ្រោះឱ្យកាន់តែមានប្រសិទ្ធភាពខ្ពស់ ស្របតាមបរិបទនៃការកែទម្រង់ និងការពង្រឹងកម្លាំងសេវាសង្គមឱ្យមានគុណវុឌ្ឍិខ្ពស់ ដោយផ្តោតសំខាន់លើប្រធានបទស្នូលចំនួន ៣ រួមមាន៖ ១. ការគ្រប់គ្រងករណី ២. ការប្រឹក្សាយោបល់ និង៣. ការឆ្លុះបញ្ចាំងខ្លួនឯង និងជំនាញថែទាំខ្លួនឯង។

ឯកឧត្តមនាយក បានសម្តែងនូវក្តីសង្ឃឹមយ៉ាងមុតមាំថា រយៈពេលនៃវគ្គបណ្តុះបណ្តាលនេះ នឹងក្លាយជាវេទិកាដ៏រស់រវើកក្នុងការដកស្រង់បទពិសោធន៍រវាងគ្រូឧទ្ទេស និងមន្ត្រីអនុវត្តផ្ទាល់ ដើម្បីយកទៅអនុវត្តក្នុងបេសកកម្មបម្រើប្រជាពលរដ្ឋឱ្យកាន់តែប្រសើរឡើង និងសូមប្រកាសបើក «វគ្គបណ្តុះបណ្តាលស្តីពីការគ្រប់គ្រងករណី ការប្រឹក្សាយោបល់ និងការឆ្លុះបញ្ចាំងខ្លួនឯង និងជំនាញថែទាំខ្លួនឯង» ចាប់ពីពេលនេះតទៅ។

🙏💙🇰🇭