23/06/2026
សុខចិត្តនៅឯកោ ប្រសើរជាងមានគ្នាអសប្បុរស!
ចរិតនិស្ស័យមនុស្សម្នាក់ៗមិនដូចគ្នាទេ ជនខ្លះត្រូវការមានគ្នីគ្នាអ៊ូអរទើបរីករាយ ជនខ្លះត្រូវការគេមកអែបអបទើបរីករាយ ជនខ្លះត្រូវការគេមកយកចិត្តយកថ្លើមទើបរីករាយ ជនខ្លះត្រូវការគេនិយាយលើកទឹកចិត្តទើបរីករាយ ជនខ្លះត្រូវការ ភាពឯកោស្ងៀមស្ងាត់ទើបរីរាយក ជនខ្លះត្រូវគេសរសើរទើបរីករាយ ។
នេះជាចរិតលក្ខណៈសម្បត្តិរបស់មនុស្សយើង គឺមានផ្សេងៗគ្នាទៅតាមសម្ពាយបុណ្យរបស់ជនទាំងឡាយនោះ ដូច្នោះហើយកុំមោទនភាពនឹងមានគ្នាច្រើន កុំមោទភាពនឹងគេសរសើរ កុំមោទនភាពនឹងគេអែបអប កុំមោទនភាព នឹងការរស់ឯកោម្នាក់ឯង នៅលើលោកនេះសុទ្ធតែជា របស់ក្លែងក្លាយទាំងអស់ ជាគ្រឿងបោកបញ្ឆោតចិត្តយើង គ្មានអី្វការពិតទេ ក្រៅពីខ្លួនឯងយល់ខ្លួនឯង នឹងសច្ច:ធម៌ពិតនោះ ។
មនុស្សសាមញ្ញជន ត្រូវកិសេសអូសទាញបោកបញ្ឆោតដោយអាយតន:ខាងក្នុងខាងក្រៅ តាម រូប សម្លេង ក្លិន រស សម្ផស្ស នឹងផោដ្ឋព្វៈ ដែលមានចិត្តជាប្រធាន យោងតោងតាមអារម្មណ៍នីមួយៗ កើតតាមទ្វាទាំង៦ មានសោតប្រាសាទ ជាឬសគល់ត្រូវបញ្ជូនទៅឱ្យចិត្តធ្វើបរិកម្ម ដើម្បីកំណត់សម្គាល់ថា នេះជាអារម្មណ៍សុខ នេះជាអារម្មណ៍ទុក្ខ នេះជាអារម្មណ៍មិនសុខមិនអារម្មណ៍ទុក្ខ ជាដើម ។
វិធីដ៏ល្អ គឺអប់រំខ្លួនឯងឱ្យខ្លាំងបំផុត ដោយការធ្វើ សមាធិ កុំភ្លេចអប់រំចិត្តខ្លួនឯង កុំភ្លេចជួយខ្លួនឯង កុំភ្លេចមើលថែខ្លួនឯង កុំភ្លេចស្រលាញ់ខ្លួនឯង កុំភ្លេចដាស់សតិខ្លួនឯង កុំភ្លេចធ្វើទីប្រឹក្សាដ៏ល្អដល់ខ្លួនឯង ព្រោះដល់ពេលយើងលាចាកលោកទៅ គឺទៅតែម្នាក់ឯង គ្មានជនណាមករួមដំណើរជាមួយយើងឡើយ ។
ភិក្ខុ វិរយធម្មញាណ
ថ្ងៃអង្គារ ៩កើត ខែបឋមាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២៣ ខែមិថុនា ២០២៦
22/06/2026
22/06/2026
21/06/2026