24/08/2026
ពេលបានឈានជើងចូលមកកាន់បរិវេណមន្ទីរពេទ្យគន្ធបុប្ផា មនុស្សជាច្រើនតែងតែរំជួលចិត្តចំពោះប្រវត្តិ និងដំណើរដើមទងនៃការកកើតឡើងនូវទីសក្ការៈនៃជីវិតមួយនេះ។ ថ្ងៃនេះយើងខ្ញុំព្រះករុណា មានឪកាសបានចូលមកធ្វើទស្សនកិច្ច ជាមួយនិងក្រុមសិស្សគណ ព្រមទាំងមានថវិកាមួយចំនួនដើម្បីរួមចំណែកជ្រោមជ្រែងដល់មន្ទីពេទ្យ។ លោកវេជ្ជបណ្ឌិត Beat Richner (បណ្ឌិត រីឆ្ន័រ) ស្ថាបនិកដ៏ឆ្នើម បានបន្សល់ទុកនូវប្រស្នាដ៏ជ្រាលជ្រៅមួយនៅលើជញ្ជាំងឥដ្ឋជុំវិញមន្ទីរពេទ្យ ដែលត្រូវបានរៀបឡើងដោយទុកចន្លោះប្រហោងតូចៗជាច្រើន។ ជញ្ជាំងប្រហោងទាំងនោះ មិនមែនជាការរចនាម៉ូដដើម្បីសោភ័ណភាពឡើយ ប៉ុន្តែជានិមិត្តរូបរំលឹកដាស់តឿនអំពី «ភាពខ្វះខាតដែលមិនទាន់ពេញលេញ» ដែលតែងតែទន្ទឹងរង់ចាំទឹកចិត្តមេត្តាធម៌ពីសប្បុរសជនគ្រប់ទិសទីមកជួយបំពេញបន្ថែម។
រៀងរាល់ថ្ងៃ មន្ទីរពេទ្យគន្ធបុប្ផាទទួលបន្ទុកពិនិត្យ និងព្យាបាលកុមារកម្ពុជារាប់ពាន់នាក់ ដោយមិនគិតថ្លៃ និងប្រកបដោយសមធម៌។ ដើម្បីរក្សាដង្ហើម និងដំណើរការនៃបេសកកម្មមនុស្សធម៌នេះ ការចំណាយប្រចាំថ្ងៃត្រូវរ៉ាប់រងចន្លោះពី ១២ម៉ឺន ទៅ ១៣ម៉ឺនដុល្លារអាមេរិក។ ថវិកាដ៏ច្រើននេះ អាចបន្តទៅមុខបាន គឺអាស្រ័យលើការជ្រោមជ្រែងយ៉ាងពេញទំហឹងពីរាជរដ្ឋាភិបាល ទឹកចិត្តដ៏ថ្លៃថ្លារបស់សប្បុរសជនទាំងក្នុងនិងក្រៅប្រទេស ព្រមទាំងការលះបង់កម្លាំងកាយចិត្តយ៉ាងស្វិតស្វាញរបស់ក្រុមគ្រូពេទ្យ និងបុគ្គលិកទាំងអស់ ដែលបានរួមគ្នាការពារ និងផ្តល់ជីវិតទីពីរដល់កុមារកម្ពុជា។
កុមារ គឺជាគ្រាប់ពូជដ៏មានតម្លៃបំផុតសម្រាប់អនាគតនៃមាតុភូមិ។ ការការពារសុខភាព និងអាយុជីវិតរបស់ពួកគេ គឺជាការការពារអនាគតនៃជាតិសាសន៍ទាំងមូល។
សូមបន្តរួមដំណើរជាមួយគ្នា និងជួយបំពេញចន្លោះប្រហោងនៃជញ្ជាំងមេត្តាធម៌នេះ តាមរយៈការបរិច្ចាគទៅកាន់មូលនិធិគន្ធបុប្ផាកម្ពុជា ដើម្បីផ្តល់ស្នាមញញឹម ក្តីសង្ឃឹម និងអនាគតដ៏ភ្លឺស្វាងដល់កុមារកម្ពុជាជារៀងរហូត។
, #គ្រួសារការពិត, #ការសិក្សាការពិត
