25/08/2026
ជីវិត ដូចជាសៀវភៅមួយក្បាល
មានមាតិកា មានអារម្មណ៍កថា មានជំពូក មានមេរៀន ជំពូកខ្លះកំសត់ មេរៀនខ្លះកើតទុក្ខ ជំពូកខ្លះសប្បាយរីករាយ ហើយមេរៀនខ្លះទៀត រំភើបនឹកស្មានមិនដល់។ ប៉ុន្តែប្រសិនបើអ្នកមិនបានបើក ពីទំព័រមួយ ទៅទំព័រមួយទៀតទេ អ្នកនឹងមិនអាចដឹងថាជំពូកបន្ទាប់ មានអ្វីទៀតឡើយ។
សេចក្តីស្រឡាញ់ជាប់ជំពាក់ក្នុងរូបកាយរមែងនាំមកនូវសេចក្ដីទុក្ខទាំងពួងដល់ការរស់នៅការជាប់ជំពាក់តែនឹងរូបកាយរហូតភ្លេចសតិមិនបានបំពេញសេចក្ដីល្អទីបំផុតត្រូវធ្លាក់ទៅសោកទុក្ខដូចព្រះមហេសីនៃព្រះបាទអស្សករាជដែលបានទៅកើតជាសត្វកំពោងអាចម៌គោដូច្នោះដែរ។
ការបំពេញបុណ្យក្នុងកាលមុនរមែងធ្វើឲ្យសម្រេចបានផលតាមសេចក្ដីប្រាថ្នាផលនៃសេចក្ដីប្រាថ្នាខុសចាកគន្លងធម៌ជាទោសក្នុងលោកហើយរមែងនាំមកនូវសេចក្ដីវិនាសដល់ខ្លួនក្នុងទីបំផុត។
បាប៥យ៉ាងកើតអំពីការសេពគប់ជាមួយមាតុគ្រាមមានគេហួងហែង។
១.ដេកមិនបានស្រណុកសុខស្រួលអារម្មណ៍ភ័យខ្លាចគេទាន់ជានិច្ច។
២.ទទួលការតិះដៀលពីក្រុមញាតិមិត្តជិតខាងនិងមហាជនក្រោយពីគេដឹងរឿង។
៣.វិនាសទ្រព្យសម្បត្តិនិងតំណែងតួនាទីបាត់បង់កិត្តិយសកេរ្តិ៍ឈ្មោះអាប់ឱន។
៤.នឹងធ្លាក់ទៅកើតក្នុងនរកដូចគេទាញទម្លាក់ព្រោះទោសនៃកាមេ។
៥.សេចក្ដីត្រេកត្រអាលប្រកបដោយសេចក្ដីភ័យខ្លាចរាល់ថ្ងៃចំពោះរឿងអាក្រក់របស់ខ្លួនដែលបានប្រព្រឹត្តប្រឈមនិងបាត់បង់ការងារគ្រប់ពេល។
ដូច្នេះហើយនរជនមិនគួរគប្បីលួចលាក់ក្បត់ដៃគូរខ្លួនឯងព្រោះតែកិលេសតណ្ហាមួយពេលនោះទេ។ ការសម្រេចបាននូវគុណធម៌ទើបអាចកម្ចាត់បង់នូវសេចក្ដីអាក្រក់ទាំងស្រុងចេញពីក្នុងសន្ដានចិត្តបាន។
រឿងនាងសិរិនីកើតជាប្រេតញីព្រោះការជេរប្រមាទភិក្ខុសង្ឃ
នៅក្នុងថ្ងៃឧបោសថសីលពួកភិក្ខុសង្ឃបានប្រជុំគ្នាធ្វើឧបោសថកម្ម ឧបាសក ឧបាសិកាទាំងឡាយ មានសេចក្តីជ្រះថ្លា ក៏នាំគ្នាយកភេសជ្ជៈមាន ស្ករស ទឹកដោះគោ ទឹកឃ្មុំ ទឹកអំពៅដើម្បីរៀបចាត់ចែងក្នុងសាលាភត្តចាំប្រគេនព្រះសង្ឃ ដែលចេញពីរោងឧបោសថ ។
ជួនជាពេលនោះពួកបរិស័ទទាំងឡាយបានឃើញនាងសិរិនីជាស្រីផ្កាមាសដើរទៅក្បែរទីនោះក៏ហៅឱ្យចូលទៅដើម្បីអនុមោទនាយកចំណែកបុណ្យ តែបែរជាស្ត្រីផ្កាមាសនោះមានចិត្តក្រោធខឹង ឆ្លើយតបទៅវិញថា យើងមិនចង់បានបុណ្យស្អីទេ គ្មានបុណ្យអ្វីកើតពីពួកសមណៈត្រងោលនោះទេ ពួកអ្នករាល់គ្នាសុទ្ធតែចាញ់បោកសមណៈត្រងោលទាំងនេះ និយាយរួចក៏ដើរហួសទៅ ។
ពេលក្រោយមកនាងបានធ្វើមរណកាលទៅកើតជាប្រេតញីនៅក្បែរកំពែងនគរ មានកាយអាក្រក់ ធុំក្លិនស្អុយអសោចិ៍ចេញពីមាត់ ដូចសាកសពស្អុយរលួយ មិនដែលមានអាហារបរិភោគទេ ។
ថ្ងៃមួយមានឈ្មួញម្នាក់បររទេះទៅលក់អីវ៉ាន់ដល់ពេលយប់ ក៏ដាក់រទេះដេកក្បែរកំពែងនគរនោះ ។ ប្រេតញីឃើញបុរសនោះស្គាល់ថាជាអ្នកមកពីស្រុកកំណើតខ្លួន ក៏ទៅបង្ហាញខ្លួនឱ្យឃើញច្បាស់នឹងភ្នែក ។ ឈ្មួញបានឃើញហើយភិតភ័យស្រឡាំងកាំង ព្រោះរូបនោះអាក្រក់គួរខ្លាចខ្លាំងណាស់ ក៏សួរទាំងញ័រមាត់ថា នាងជាអ្វី ? យើងមិនដែលឃើញមនុស្សបែបនេះសោះ នាងប្រេតប្រាប់តាមដំណើររឿងរបស់នាង ហើយផ្តាំនឹងបុរសនោះទៅឪពុកម្តាយរបស់នាងថា នាងសិរិនីជាកូន ដែលបានស្លាប់ទៅបានទៅកើតជាប្រេតមានសេចក្តីលំបាក ស្រេកឃ្លានខ្លាំងណាស់ សុំឱ្យមាតាធ្វើបុណ្យឧទ្ទិសកុសលឱ្យនាងផង ។
ឈ្មួញពេលត្រលប់ទៅដល់ស្រុកកំណើតវិញ ប្រាប់ឪពុកម្តាយនាងប្រេតនោះតាមបណ្តាំ ឪពុកម្តាយក៏បានចាត់ចែងធ្វើបុណ្យទានឧទ្ទិសផលឱ្យកូន ប្រេតនោះក៏បានរួចកម្មពៀរ ក្លាយខ្លួនជារុក្ខទេវតា សោយសម្បត្តិទ្រព្យមានរូបកាយល្អប្រិមប្រិយ ។
ក្រោយរួចពីកំណើតប្រេត រុក្ខទេវតាបង្ហាញខ្លួនឱ្យឪពុកម្តាយឃើញ ហើយរៀបរាប់ពីទុក្ខលំបាករបស់ខ្លួនកាលកើតជាប្រេត ទើបរំលឹកមាតាបិតាឱ្យខំធ្វើទាន រក្សាសីល កុំបីធ្វេសប្រហែសឡើយ។
បពិត្រព្រះអង្គដ៏ចម្រើន ខ្ញុំព្រះអង្គមានចិត្តជ្រះថ្លាចំពោះព្រះសម្មាសម្ពុទ្ធយ៉ាងក្រៃលែង ដោយការជ្រះថ្លានេះសូមឱ្យខ្ញុំព្រះអង្គបានជាឧបនិស្ស័យជាបច្ច័យនៃព្រះឈ្នះមារ កុំបីក្លាយជាបការ:ដ៏ទៃឡើយ៕
