27/07/2026
បើអ្នកមានអារម្មណ៍ថាខ្លួនឯងមិនជោគជ័យ ហាក់អន់ជាងគេ គេទៅមុខអស់ហើយ ខ្ញុំយឺតជាងគេ ខ្ញុំខ្សោយណាស់មិនដូចគេ ជាដេីម ត្រូវចងចាំថា៖
-មនុស្សយើងមិនអាចប្រៀបធៀបគ្នាបានទេ។ គេមានដំណើរគេ យើងនៅលើដំណើររបស់យើង។ កាលៈទេសៈ ឱកាស និងស្ថានភាពយើងមិនដូចគ្នាទេ។ ផ្កាក្នុងលោកនេះ មានក្លិននិងសម្រស់ផ្សេងៗពីគ្នា ហើយពេលវេលារីកស្រស់បំព្រងរបស់វាក៏មិនដូចគ្នាដែរ។ ដូចនេះគួរដឹងថាឱកាសពេលវេលារបស់យេីងគ្រាន់តែមិនទាន់មកដល់ប៉ុណ្ណោះ មិនអាចប្រៀបធៀបជាមួយគេ ហើយធ្វើបាបខ្លួនឯងនោះទេ។
-រៀនដើរសន្សឹមៗ(徐行)បន្តិចម្ដងៗ។ តក់តក់ពេញបំពង់។ មិនអាចបង្ខំបានទេ ព្រោះផ្លូវយើងដេីរ មិនដូចគ្នាទេ។ ហើយផ្លូវខ្លះលំបាកថែមទាំងឆ្ងាយទៀត ត្រូវប្រើពេលយូរ អត់ធ្មត់ច្រើន ទើបអាចទៅដល់បាន។ បេីគេជាយេីងឬស្ថិតក្នុងស្ថានភាពយេីង ប្រហែលក៏ត្រូវដេីរយឺតៗដូចយេីងអ៊ីចឹងដែរក៏ថាបាន។ គ្មានផ្លូវកាត់ គ្មានផ្លូវស្រួល គ្មានផ្លូវលឿនខុសធម្មជាតិនោះទេ។ ដើមឈើទោះបីប្រើជាតិគីមីក្ដី ក៏នៅត្រូវការពេលលូតលាស់និងចេញផ្លែដែរ។ គួរចាំពាក្យចាស់បុរាណខ្មែរយើងណែនាំទុកថា៖ សន្សឹមៗកុំបំបោល ក្រែងពុំដល់ដូចប្រាថ្នា។ រៀនខាំស្មៅ រៀនអត់ធ្មត់ មួយៗ សន្សឹមៗ។
-រៀនចេះពេញចិត្ត រីករាយ និងដឹងគុណ(感恩)នូវអ្វីដែលយើងកំពុងមាន អ្វីដែលយើងអាចធ្វើបាន កន្លែងដែលយើងកំពុងឈរជើងនិងទីតាំងបច្ចុប្បន្នដែលយើងកំពុងនៅ វានឹងជួយបន្ថែមកម្លាំងឱ្យយេីងកាន់តែច្រើន និងធ្វើឱ្យយើងកាន់តែរឹងមាំពោរពេញដោយថាមពលបន្តដំណើរទៅកាន់គោលដៅខាងមុខបានកាន់តែឆាប់រហ័ស ជាជាងអង្គុយកើតទុក្ខ ប្រៀបធៀប ដាក់សម្ពាធ មិនរីករាយ មិនសប្បាយចិត្តជាមួយនឹងស្ថានភាពច្ចុប្បន្នរបស់ខ្លួនឯង។
គួរចាំថាអ្វីដែលយេីងកំពុងមានសុទ្ធតែជាទ្រព្យ សុទ្ធតែជារបស់មានតម្លៃសម្រាប់យេីង។ បើមិនប្រយ័ត្នទេពេលបាត់បង់ ទើបយេីងដឹងថាវាមានតម្លៃ។
-ពេលខ្លះ ចង់លឿនខ្លាំងជ្រុល ចង់ទៅមុខជាងគេដើម្បីអ្វី? ដើម្បីក្ដីសុខនិងភាពរីករាយឬ? គ្រប់យ៉ាងមិនសុទ្ធតែត្រូវលឿនរហ័សទាន់ចិត្តនិងបានមុនគេនោះទេ។ ចេះសម្របខ្លួនតាមដំណើរ(顺势) ចេះស្គាល់ការពិត ស្គាល់ភាពជាក់ស្ដែង ដឹងកន្លែងត្រូវឈប់ ដឹងពេលត្រូវបន្តដំណើរទៅមុខ និងចេះធ្វើដំណើរដោយភាពរីករាយនិងពេញចិត្តរាល់ដំណាក់កាលតាមកម្លាំង(enjoy the process) ទៅតាមធនធានដែលយេីងមាន ទើបជាជម្រើសល្អបំផុតសម្រាប់ជីវិត ហេីយវាក៏សូវខាតពេលកេីតទុក្ខក្នុងដំណេីរជីវិតខ្លួនឯងផងដែរ។
-កុំបោះបង់ កុំធ្វើបាប កុំដាក់សម្ពាធខ្លួនឯងពេកអី! យេីងបានមកដល់កន្លែងនេះ យេីងមិនខ្សោយនោះទេ។ រៀនញញឹមរីករាយ អរគុណនិងដឹងគុណខ្លួនឯង និងជឿជាក់បន្តដំណើរសន្សឹមៗទៅមុខទៀត ដល់ពេលមួយ ផ្ការបស់យេីងនឹងរីកស្រស់បំព្រងចេញមកជាក់ជាមិនខាន។
ឆាយ មីត
