16/06/2025
ចាប់ផ្តើមម្តងទៀត
ទីបញ្ចប់នៃរឿងមួយជាចំណុចចាប់ផ្តើមនៃរឿងថ្មីមួយទៀត ដូច្នេះអ្នកពុំគួរបោះបង់ចោលក្តីសង្ឃឹមរបស់អ្នកងាយៗនោះឡើយ។ ទស្សនៈមួយបានលើកឡើងថា “ដរាបណាយើងនៅមានដង្ហើម យើងនៅតែមានក្តីសង្ឃឹម ហើយដរាបណាយើងនៅមានក្តីសង្ឃឹម យើងនៅតែមានផ្លូវ”។ អ្វីៗក៏អាចចាប់ផ្តើមសារជាថ្មីម្តងទៀតបានដែរ។
ក្នុងមួយជីវិតយើងនេះ គ្មានអ្នកណាម្នាក់ដែលល្អឥតខ្ចោះ ឬល្អគ្រប់ដប់រហូតនោះទេ គឺតែងតែបង្កើតកំហុសណាមួយចេញមកដោយចេតនា និងអចេតនា ដូច្នេះយើងកុំរំពឹងខ្ពស់ពេកអំពីសមិទ្ធផលណាមួយដែលយើងនឹងបង្កើត រួមទាំងមនុស្សដែលនៅជុំវិញខ្លួនយើងផងដែរ។ នៅពេលដែលចួបឧបសគ្គណាមួយ យើងត្រូវបើកចិត្តឱ្យទូលាយទទួលយកភាពលំបាកនោះ បន្ទាប់មករៀនរកដំណោះស្រាយនិងវិធីសាស្ត្រកែប្រែបញ្ហាពីមួយជំហានទៅមួយជំហាន។ មួយវិញទៀត អ្នកមិនត្រូវប្រកាន់ខ្ជាប់នូវគំនិតមួយដែលគិតថា ជីវិតរបស់អ្នកត្រូវតែល្អគ្រប់បែបយ៉ាងឬត្រូវតែចៀសឆ្ងាយពីបញ្ហារហូតនោះទេ ព្រោះការប្រកាន់គំនិតបែបនេះបានធ្វើឱ្យជីវិតរបស់អ្នកកាន់តែថមថយ និងចុះដុនដាបថែមទៀត។ អ្នកពុំគួរភ័យខ្លាចក្នុងការបង្កើតនូវកំហុសទេ ប៉ុន្តែអ្នកគួរចៀសឱ្យឆ្ងាយអំពីកំហុសដដែលៗ ព្រោះរាល់បុគ្គលជោគជ័យទាំងឡាយតែងតែឆ្លងកាត់នូវភាពបរាជ័យជាមុន។
រឿងដែលកន្លងហួសហើយ អ្នកពុំគួរសោកស្តាយយូរពេកឡើយ ព្រោះបើស្តាយទៅក៏គ្មានបានអ្វីមកវិញដែរ បានត្រឹមតែដេកស្តាយបន្តទៀតប៉ុណ្ណោះ។ អ្វីដែលអ្នកត្រូវគិតបន្ត គឺចាប់ផ្តើមដំណើរទៅមុខទៀត។ អ្នកអាចយំថ្ងៃនេះបាន តែអ្នកមិនគួរយំរហូតដល់ថ្ងៃស្អែកទេ ព្រោះថ្ងៃស្អែកគួរជាថ្ងៃដែលអ្នកត្រូវចាប់ផ្តើមសារជាថ្មីហើយ។ នៅពេលដែលចួបបញ្ហាច្រើន អ្នកនឹងក្លាយជាបុគ្គលម្នាក់ដែលស្គាល់មនុស្សច្បាស់ជាងមុន អ្នកមានបទពិសោធច្រើនជាងមុន និងមានភាពអំណត់ជាងមុន។ ជីវិតតែងមានរឿងបែបនេះហើយ។ បើជូបបញ្ហាអ្វី ចូរដោះស្រាយទៅ រួចបន្តជំហានទៅមុខទៀត។
