រៀនវិភាគ forex gold oil

«អ្នកមានកុំទាន់អាលអរ អ្នកក្រកុំទាន់អាលភ័យ»

សេចក្តីក្រីក្ររមែងតោងស្និតតែបុគ្គលដែលមានឥរិយាបថខ្ជិលច្រអូស ក្រោកពីដំណេកយឺត ដេករហូតដល់ថ្ងៃចាំគូថ ចេញទៅណាទៅណីយឺតយ៉ាវក្រោយគេ ទម្លាប់ធ្វើកិច្ចការខ្ជះខ្ជាយ មិនទម្លាប់រៀនសូត្រ ឬអានសៀវភៅ តែងតែពោលពាក្យ «ខ្ញុំដឹងហើយ» ប្រកាន់កិរិយាចចេសរឹងរូស បុគ្គលដែលបានពោលមកខាងលើនេះ ទោះបីរស់នៅ ១០ជាតិទៀតក៏នៅតែក្រីក្រដែរ ។

ដោយឡែក បើបុគ្គលដែលមានសេចក្តីព្យាយាម ខិតខំប្រឹងប្រែងធ្វើការ ឥតចេះខ្លាចហត់នឿយ ចេះទុកដាក់សន្សំមួយកាក់មួយសេន មានពេលទំនេរឆ្លៀតអានសៀវភៅ ធ្វើនេះធ្វើនោះមិនចេះទំនេរដៃ បុគ្គលបែបនេះ មិនស្គាល់នៅភាពក្រីក្រយូរអង្វែងឡើយ ។​ គេនឹងក្លាយជាអ្នកមានទ្រព្យ មានកិត្តិយស ក្នុងចំណោមមហាជន គេចេះគោរពប្រតិបត្តិដោយសមគួរចំពោះអ្នកមានគុណ និងព្រះសង្ឃ ។

អ្នកមានក៏កុំទាល់អាលអរ កុំទាន់តម្កើងឫក​ ខ្ពស់ហួសមេឃ សម្តីហួសមាឌព្រោះសេចក្តីក្រីក្រ ប្រៀបបានដូចជាដុំថ្មនៅលើកំពូលភ្នំ បើកាលណាតែមានហេតុការណ៍អ្វីមួយកើតឡើង ដូចជាខ្យល់ព្យុះ ភ្លៀង ផ្គររន្ទះ សេចក្តីក្រីក្រ គឺធ្លាក់ចុះលឿនដូចដុំថ្មរមៀលធ្លាក់ចុះពីលើកំពូលភ្នំយ៉ាងដូច្នេះដែរ ។

សរុបសេចក្តីមក ពាក្យបុរាណលោកពោលថា «អ្នកមានរក្សាក្សត់ ដូចសំពត់ ព័ទ្ធពីក្រៅ អ្នកប្រាជ្ញរក្សាខ្លៅ ដូចសំពៅ ពឹងសំប៉ាន»

ដោយក្តីគោរពស្រឡាញ់!

ពីក្រុមការងារ ៖ Ebook Cambodia