13/08/2026
ក្នុងនាមខ្ញុំជាគ្រូបង្រៀនម្នាក់ ខ្ញុំមានសេចក្តីរំភើប រីករាយឥតឧបមា និងសូមចូលរួមសម្តែងនូវការអបអរសាទរដោយស្មោះ អស់ពីដួងចិត្ត។
ក្នុងរយៈពេលនៃការបណ្តុះបណ្តាលកន្លងមកនេះ ខ្ញុំបានមើលឃើញយ៉ាងច្បាស់ពីការខិតខំប្រឹងប្រែង ភាពហ្មត់ចត់ ស្មារតីទទួលខុសត្រូវខ្ពស់ និងការតស៊ូជម្នះរាល់ការលំបាករបស់សិក្ខាកាមគ្រប់រូប ក្នុងការក្រេបជញ្ជក់នូវចំណេះដឹង វិធីសាស្ត្រ និងជំនាញគរុកោសល្យថ្មីៗ។ ជោគជ័យដ៏ត្រចះត្រចង់នៅថ្ងៃនេះ គឺពិតជាផ្លែផ្កាដ៏សមគួរបំផុត ចំពោះការលះបង់ និងការប្តេជ្ញាចិត្តដ៏មោះមុតរបស់សិក្ខាកាមទាំងឡាយក្នុងការអភិវឌ្ឍសមត្ថភាពខ្លួន ដើម្បីក្លាយជាអ្នកបន្តវេនដ៏រឹងមាំក្នុងវិស័យអប់រំ។
ឆ្លៀតក្នុងឱកាសដ៏វិសេសវិសាលនេះ ខ្ញុំសូមប្រសិទ្ធពរជ័យ សិរីសួស្តី ជ័យមង្គល និងវិបុលសុខគ្រប់ប្រការជូនដល់សិក្ខាកាមវគ្គខ្លីជំនាន់ទី១៤ នៃវិទ្យាស្ថានជាតិអប់រំ (ក្រុមទី១១ បន្ទប់១០៨)ទាំងអស់ សូមមានសុខភាពល្អបរិបូរណ៍ កម្លាំងមាំមួន និងមានប្រាជ្ញាឈ្លាសវៃ។
សូមក្រេបជញ្ជក់ និងនាំយកនូវរាល់ចំណេះដឹង ជំនាញ ព្រមទាំងបទពិសោធន៍ដែលទទួលបានពីការបណ្តុះបណ្តាលនេះ ទៅអនុវត្តក្នុងបេសកកម្មការងារបង្រៀនជាក់ស្តែងឱ្យទទួលបានជោគជ័យត្រចះត្រចង់ ដើម្បីរួមចំណែកបណ្តុះបណ្តាលធនធានមនុស្ស ក៏ដូចជាអភិវឌ្ឍសង្គមជាតិយើងឱ្យកាន់តែរីកចម្រើនរុងរឿង។
សូមសិក្ខាកាម ព្រមទាំងក្រុមគ្រួសារ ជួបប្រទះតែនឹងពុទ្ធពរទាំងបួនប្រការគឺ៖ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។
ដោយក្តីគោរពស្រឡាញ់ និងរាប់អានដ៏ខ្ពង់ខ្ពស់អំពីខ្ញុំ។
គា សុបញ្ញា
