30/11/2025
ធ្វើការស្រួល ពេលយើងដោះស្រាយបញ្ហាដែលយើងយល់ច្បាស់។
ធ្វើការពិបាក ពេលយើងត្រូវដោះស្រាយបញ្ហា ដែលយើងមិនដឹងអីសោះ ហើយគេរុញមកឱ្យយើងភ្លាម។
វិធីខាងក្រោមនេះ ជារបៀបធ្វើការកុំឱ្យគេដើរខ្សែលើ។
(បើអ្នកអានធ្វើការក្នុងផ្នែកតិចណូឡូជី ប្រហែលជាត្រូវជាង)
⚫️ ១ កុំលាក់មុខលាក់មាត់ ហើយប្រឹងធ្វើការពេក
បើគ្មានអ្នកដឹងថាយើងធ្វើអ្វីខ្លះ ពេលមានបញ្ហាគេស្រួលទម្លាក់កំហុសមកឱ្យយើងណាស់។
- រៀនបញ្ចេញយោបល់ពេលប្រជុំ
- ផ្ញើការ updates ទៅឱ្យថ្នាក់លើ
- បង្ហាញការងារយើងទៅអ្នកផ្សេងផង។
⚫️ ២ រក្សាឯកសារការងាររបស់យើងទុកជាភស្តុតាង
យើងអាចទុកចិត្តអ្នកធ្វើការជាមួយគ្នាបាន តែត្រូវមានភស្តុតាងរបស់យើង។
- រាល់ការប្រគល់កិច្ចការ ត្រូវមានអ៊ីម៉េល។
- រាល់ការសម្រេចចិត្ត ត្រូវមានអ៊ីម៉េល។
ពេលមានរឿង អ្នកណាដែលមានភស្តុតាងច្បាស់ជាង មានទឹកមាត់ប្រៃជាង។
⚫️ ៣ រើសមិត្តរួមការងារឱ្យឆ្លាតបន្តិច
អ្នកដែលពូកែទម្លាក់កំហុសដាក់គេ កុំយកខ្លួនបៀត។ មុនក្រោយ គេនឹងចង្អុលម្រាមគេមករកយើងហើយ។
អ្នកធ្វើការ toxic មិនអាចកែចរិតព្រោះតែមិត្តភាពរបស់យើងទេ។
⚫️ ៤ ចែកក្រេឌីតទៅអ្នកផ្សេង តែមិនអាចចែកអស់ទេ
អ្វីដែលយើងធ្វើម្នាក់ឯង យកធ្វើជាកម្មសិទ្ធិ។ បើមានអ្នកផ្សេងចូលរួម ត្រូវនិយាយឈ្មោះគេ តែមិនអាចជោរដកខ្លួនឯងចេញបានទេ។
ការនិយាយច្បាស់ៗ ទើបមិនអាចឱ្យដើរខ្សែលើបាន។
⚫️ ៥ កុំស្ម័គ្រចិត្តធ្វើការថែម ដែលគ្មានប្រយោជន៍
ការងារដែលមិនជួយដល់អាជីព កុំលូកដៃ
ការងារដែលមិនពង្រឹងឈ្មោះយើង កុំលូកដៃ
ការងារដែលមិនជួយជំនាញយើង កុំលូកដៃ។
⚫️ ៦ រៀនរុញថ្មបាក់ទៅវិញ តែរុញដោយសុភាព ឬសិចស៊ី
ថ្មបាក់ ជាទំនួលខុសត្រូវដែលមិនមែនជារបស់យើងពីដំបូង។
ការសួរបញ្ជាក់ថា ហេតុអ្វីបានជាត្រូវធ្លាក់មកលើដៃយើង? ជាការចាប់ផ្តើមថាយើងមិនទទួលទេ។
‼️បើសិនធ្វើការ នៅអង្គភាព ដែលមានវប្បធម៌រុញថ្មបាក់ដាក់គ្នា ខ្ញុំឱ្យជាយោបល់ល្អមួយ គឺប្តូរកន្លែង។
បើរវល់តែគេចថ្ម ធ្វើម៉េចមានពេលធ្វើការងារខ្លួនឯង?
