អឿ ស៊ីណា-Oeur Sina

ត្រឹមផ្កាមួយទង
១.ត្រឹមផ្កាមួយទង កុំឱ្យចូលស៊ង
ជាប់មងប្រុសព្រាន ត្រូវប្រុងប្រយ័ត្ន
គិតគ្រប់ជំហាន ប្រុសព្រើលស្រេកឃ្លាន
ចង់បានខ្លួនប្រាណ។
២.ជាបុណ្យស្រុកគេ យើងមិនគួរទេ
ប្រឹងឥតខកខាន ខុសប្រពៃណី
ក៏យើងធ្វើបាន យុវសន្តាន
គួរខានខ្លះទៅ។
៣.គោរពដឹងគុណ គ្រូលេខនព្វន្ត
ពុកម៉ែណាពៅ គុណអ្នកទាំងនេះ
មហាជ្រាលជ្រៅ គួរគោរពទៅ
នោះមិនខុសឡើយ។
ដោយអ្នកនិពន្ធសំរែ

អ្វីៗសុទ្ធមានតម្លៃ

I. ឡាមមុតស្ដើងស្រាលកោរមុខបានស្អាត
កុំប្រើខុសខ្នាតយកមកកាប់ឆ្ការ
ពូថៅរឹងមាំកាប់ឈើខ្លាំងខ្លា
តែប្រើកោរណាច្បាស់មុតហូរឈាម។

II. សព្វគ្រប់សារពើមាននៅលើលោក
អ្វីៗលៃលោកវេលាឥតល្អៀង
កុំប្រៀបប្រដូចបង្ខំក្រំក្រៀម
កុំយកញ៉ាំស្ដៅធៀបនឹងស្លម្ជូរ។

III. មនុស្សលោកកើតមកមានខុសគ្នាឆ្ងាយ
ខ្លះមិនបរិយាយតែចិត្តមាំមូរ
ខ្លះមានវិជ្ជាចំណេះជ្រៅយូរ
ខ្លះមានលាភប្តូរហូរហៀរគាប់ភ្នែក។

IV. កុំយកគំនិតខ្លួនវាស់​តម្លៃ
កុំយកកាឡៃធៀបមាសនាំប្លែក
មាសនិងកាឡៃប្រើតាមចំណែក
ស្រស់ស្អាតគាប់ភ្នែកលម្អដូចគ្នា។

និពន្ធដោយ អឿ ស៊ីណា
ថ្ងៃទី​៣០ ខែមករា ឆ្នាំ២០២៦

កវីដីភូមិកោះធំ
​
I. រាត្រីត្រជាក់ខ្យល់បក់រំភើយ
ដួងចន្ទ្រាអើយអណ្ដែតនភា
នឹកកាលកូនទូកប្រៀបដូចនាវា
កណ្ដាលជលសាឆ្ងាយដាច់សន្លឹម។

II. ដាក់មងសន្ទូចយប់ប្រឹងនេសាទ
ព្រឹកប្រឹងសង្វាតរៀនសូត្រសង្ឃឹម
កន្ទេលមុងខ្នើយកើយជាប់ញញឹម
វិជ្ជារំពឹងដឹកនាំវាសនា។

R. ឱ! ភូមិកោះធំស្រុកជលគិរី
កវីសំភីខិតខំសិក្សា
លើកស្ទួយស្រុកភូមិលេចធ្លោរកាយា
បង្ហាញសាស្ត្រាក្មេងជំនាន់ក្រោយ។

III. ដៃធ្លាប់នេសាទប្រែមកកាន់ប៊ិច
ចិត្តចង់រំលេចជីវិតខ្លាំងខ្សោយ
រើបម្រាស់​ក្រមិនទុកបណ្ដោយ
សុខសាន្តថ្ងៃក្រោយត្រូវលំបាកមុន។

និពន្ធដោយ៖ អឿ ស៊ីណា
ថ្ងៃទី២១ ខែមករា ឆ្នាំ២០២៦

ផ្កាស្ដៅ
​
I. ខ្យល់បក់រំភើយរដូវរងា
ស្ដៅរីកសន្ធាលាស់ពេញភូមិដ្ឋាន
ទឹកគ្រឿងត្រីអាំងជួបជុំសន្តាន
រស​ឆ្ងាញ់ដិតដាននៅស្រែចម្ការ។

II. នេសាទក៏រកស្រែក៏ប្រឹងធ្វើ
សព្វគ្រប់ទង្វើស្វែងរកមាសប្រាក់
ផ្គត់ផ្គង់ពុកម៉ែតស៊ូសស្រាក់
ចិត្តមិនរុញរាក់ចោលវិជ្ជាឡើយ។

R. ផ្កាស្ដៅរស់ល្វីងតែផ្អែមខាងចុង
ជីវិតលិចលង់គង់មានកោះត្រើយ
ស៊ូទ្រាំលំបាកលត់ដំឱ្យហើយ
គង់បានធូរស្បើយត្រើយពន្លកថ្មី។

III. ពីកូនកសិករក្លាយជាកវី
ស្នាដៃថ្មោងថ្មីត្បិតពុំល្បាញល្បី
គ្រាន់ចង់ផ្ដាំផ្ញើដល់ជនប្រុសស្រី
រៀនក្រេបសម្តីឱ្យដូចផ្កាស្ដៅ៕

និពន្ធដោយ អឿ ស៊ីណា
ថ្ងៃទី២២ ខែមករា ឆ្នាំ២០២៦

អំបុកកូនខ្មែរ វីរភាពជាតិ

I. អំបុកស្រូវស្រែស្នេហាជួយជាតិ
រាស្ដ្រខ្មែរជ្រួតជ្រាបតម្លៃសាមគ្គី
រួបរួមកម្លាំងនៅគ្រប់ទិសទី
វប្បធម៌សោភីដ៏ល្អផូរផង់។

II. អំបុកឈ្ងុយឆ្ងាញ់វាយខ្មាំងសត្រូវ
ឱ្យរលាយទៅក្លាយជាផេះផង់
ទឹកភ្នែកកូនខ្មែរយោធាឧត្តម
ជីវិតលះបង់ការពារទឹកដី។

R. អំបុករួមចិត្ដមិនខ្លាចរអា
វាយសៀមឫស្យាមហាអប្រិយ
ត្រូវតែវិនាសចេញពីផែនដី
ជ័យយោទឹកដីប្រទេសកម្ពុជា។

III. អំបុកកូនខ្មែរឈ្នះមារសត្រូវ
វីរ:ភាពស្ថិតនៅក្នុងចិត្តគ្រប់គ្នា
ស្មោះស្ម័គ្រជីវិតរក្សាការពារ
មាតុភូមិកម្ពុជារៀងរហូតទៅ។

និពន្ធដោយ អឿ ស៊ីណា
ថ្ងៃទី១៣ ខែធ្នូ ឆ្នាំ២០២៥

ផ្ញើខ្សែក​ផង

I. ជាតិជាទាហានស្មារតីអង់អាច
មិនញញើតខ្លាចនឹងខ្មាំងសត្រូវ
ជីវិតជូនជាតិគ្មានអ្វីហ្មងសៅ
ការពារញាតិផៅនិងប្រទេសជាតិ។

II. ច្បាំងក្នុងសមរភូមិ​កិត្តិយសយោធា
ស្មោះស្ម័គ្រធានាអធិបតេយ្យភាព
ផ្ដាច់ប្ដូរជីវិតវាយខ្មាំងចោលម្សៀត
លះបង់ជូនជាតិ​គ្មានអ្វីត្រូវស្លុត។

R. ប្អូនប្រុសបងសូមផ្ញើខ្សែកផង
ជូនប្រពន្ធបងជាទ្រព្យសំណព្វ
ត្បិតអីពេលនេះជីវិតកម្សត់
ដង្ហើមនឹងផុតពលីជូនជាតិ។

III. លាហើយជីវិតទុកធាតុជូន​ម្ដាយ
​លាហើយ​រូបកាយ​បិទបាំង​ធម្មជាតិ​
​​​ឧត្ដម​យោធា​សង្ខារត្រូវឃ្លាត
ស្មោះរក្សាជាតិរៀងរហូតទៅ៕

និពន្ធដោយ៖ អឿ ស៊ីណា
ថ្ងៃទី​១៧ ខែធ្នូ ឆ្នាំ២០២៥

ស្មារតីខ្មែរតែមួយ

I. សមរភូមិជួរក្រោយកម្លាំងសាមគ្គី
ចូលរួមគ្រប់ទីកន្លែងទាំងអស់
​​ស្មារតីខ្មែរតែមួយ​រួមស្ម័គ្រស្មោះ
​យុវជនស្រួលស្រុះវិញជាធ្លុងមួយ។

II. កម្លាំងចលករដ៏សំខាន់នេះ
ជាយាន្ដជំនិះដឹកនាំជំនួយ
ប្រយុទ្ធតស៊ូចិត្ដមួយថ្លើមមួយ
យោធាមិនព្រួយសមរភូមិមុខ។

R. កុំចាញ់ឧបាយខ្មាំងសត្រូវយើង
កូនខ្មែរក្រោកឡើងរឹងមាំមោះមុត
​ស្មារតីសាមគ្គីធំជាងសមុទ្រ
ជឿជាក់ប្រាកដ​រដ្ឋា​ភិបាល។

III. ក្រោមការដឹកនាំសម្ដេចធិបតី
សង្រ្គាមខ្មែរថៃនឹងបានធូរស្រាល
សន្ដិភាពនឹងវិលមកស្រស់ត្រកាល
ជាក្ដីប្រាថ្នា​​កូនខ្មែរគ្រប់គ្នា៕
​
និពន្ធដោយ៖ អឿ ស៊ីណា
ថ្ងៃទី១៨ ខែធ្នូ ឆ្នាំ២០២៥

សច្ចាការពារមាតុភូមិខ្មែរ
I. សំឡេងគ្រហឹមលាន់រង្គើមេឃ
បោះពួយហោះជ្រែកដែនអាកាសា
F-16 រញ្ជួយលោកា
រាស្ត្រខ្មែរខ្លោចផ្សាឈឺចាប់ពេកក្រៃ។
II. ទម្លាក់គ្រាប់បែកបង្ហុយផ្សែងពុល
កាំភ្លើងធំរុលគគ្រេងផ្អើលព្រៃ
នាវាចម្បាំងអត់មានប្រណី
ចោរសៀមអប្រិយសម្លាប់រាស្ត្រខ្មែរ។
R. ខ្មែរអើយក្រោកឡើងរួមកម្លាំងគ្នា
ស្មោះស្ម័គ្រការពារស្មារតីជាតិខ្មែរ
វិលជាធ្លុងមួយរឹងមាំពូកែ
ឈាមជ័រជាខ្មែរស្នេហាពូជសាសន៍។
III. ប្រជាជនខ្មែរប្រាថ្នាសន្តិភាព
រស់ក្នុងឯករាជ្យស្មើភាពជាក់ច្បាស់
មោះមុតស្វាហាប់ការពារជាតិសាសន៍
ប្តូរផ្តាច់ខ្លាំងណាស់ដើម្បីមាតុភូមិ។

និពន្ធដោយ: អឿ ស៊ីណា
ថ្ងៃទី២០ ខែធ្នូ ឆ្នាំ២០២៥

សងភ្នែកមិត្តខ្ញុំវិញមក!
I. ស្នូរសន្ធឺកគ្រាប់លាន់ដូចបាក់ភ្នំ
ខ្មាំងបាញ់ជញ្ជ្រំជំរំដងរែក
ផ្សែងពុលហោះហើរខ្មៅអាប់ពេញមេឃ
ព្រោះចោរចិត្តក្អែកប៉ុនប៉ងប្រល័យ។

II. ចោរសៀមអប្រិយ ទម្លាក់គ្រាប់បែក
រំសេវហែកញែកជ្រលងដងព្រៃ
អាយុមិនអស់ ទឹកដោះម្ដាយថ្លៃ
កែវភ្នែកពេញន័យក្លាយស្បៃងងឹត។

R. សងភ្នែកមិត្តខ្ញុំមកពួកចោរថៃ
ចោរសៀមចង្រៃអប្រិយពេកពិត
ប្រហាររូបកាយ វីរជនយុទ្ធមិត្ត
បូរជាជីវិតការពារខេមរា។

III. ទោះភ្នែកងងឹត មើលមិនឃើញអ្វី
ចិត្តកាយស្មារតីគង់នៅភ្លឺថ្លា
មិត្តវីរជន ស៊ូប្តូរសង្ខារ
ជាតិនឹងកត់ត្រាចាំមិត្តជានិច្ច។

និពន្ធដោយ: អឿ ស៊ីណា
ថ្ងែទី២១ ខែធ្នូ ឆ្នាំ២០២៥

២៩ ធ្នូ បញ្ចប់សង្គ្រាម ចារឹកសន្តិភាព

I.ផ្ទាំងពពកខ្មៅផាត់ឆ្ងាយទៅហើយ
តែមិនភ្លេចឡើយមេឃខ្មៅអប្រិយ
ឈាមខាប់ជាងទឹកធ្ងន់លើសអ្វីៗ
ព្រោះជាតិទឹកដីស៊ូប្តូរសង្ខារ។

II. បង្រួបបង្រួមបញ្ចប់សង្រ្គាម
ខ្មែរលែងហូរឈាមដោយការផ្សះផ្សា
តេជោឈ្នះ ឈ្នះ ល្បីពេញលោកា
ដោយការចរចា​សន្ដិភាពគ្មានពីរ។

R.ហេតុនេះយើងត្រូវរួបរួមការពារ
ខ្មែរគ្រប់អង្គាស្ម័គ្រកាយសាមគ្គី
ថែទាំសន្ដិភាពនៅគ្រប់ទិសទី
សាងព្រះភូមីលើកស្ទួយសេដ្ឋកិច្ច។

III. ២៩ ធ្នូ នយោបាយឈ្នះ ឈ្នះ
ខ្មែរចងចាំច្បាស់ជាក់ឥតមានភ្លេច
មាគ៌ាតេជោបង្គោលសេដ្ឋកិច្ច
នឹកឃើញជានិច្ច​វីរជន​សន្ដិភាព៕

និពន្ធដោយ៖ អឿ ស៊ីណា
ថ្ងៃទី៥ ខែធ្នូ ឆ្នាំ២០២៥

សាលារៀនក្នុងលេណដ្ឋាន

I. ឱកុមារអើយសែនកម្សត់ក្រៃ
បាត់ពន្លឺថ្ងៃឃ្លាតឆ្ងាយសាលា
ធ្លាប់ហាត់សរសេរអានរៀនអក្ខរា
បែរខ្លោចឱរាពួនក្នុងរណ្តៅ។

II. ជម្រកក្រោមដីជិតស្លុងងងឹត
លេណដ្ឋានតូចពិតចង្អៀតហ្មងសៅ
សត្រូវឈ្លានពានបង្កទុក្ខជ្រៅ
​ចិត្តខ្លាចកម្លៅស៊ូរៀនក្រោមដី។

R. បោះបង់សាលាក្បែរខ្សែព្រំដែន
រត់មកពួនណែនក្នុងផែនប្រថពី
គ្រាប់ផ្លោងបាញ់ស្រោចមក​ពេញធរណី
​ចោរសៀមញាំញីដោយចិត្ដអប្រិយ។​

III. សំឡេងក្មេងអាន​រំពងក្រោមដី
លាយក្តីភិតភ័យ​ឥតបីអាស្រ័យ
ខាំមាត់អត់ធ្មត់រងចាំរស្មី
សាលាក្នុងដី​គ្រឹះជាតិថ្កុំថ្កើង៕

និពន្ធដោយ អឿ ស៊ីណា
ថ្ងៃទី២៦ ខែធ្នូ ឆ្នាំ២០២៥

សន្តិភាពលើផ្ទៃប្រឹថពី

១. ជម្លោះព្រំដែនធ្លាប់ក្ដៅគគុក
​បង្កជា​ទុក្ខសុខសោកសង្រេង
កាំភ្លើងគ្រហឹមបំភ័យក្មេងៗ
កាត់ផ្ដាច់សំឡេងសំនៀង​ក្អះក្អាយ។

២. ឥឡូវប្រទេសមានសន្តិភាព​
បញ្ចប់វិវាទចម្បាំងចាកឆ្ងាយ
ស្មារតីយុវជនសកម្ម​សុះសាយ
ចលនាផ្សព្វផ្សាយស្នេហារជាតិខ្មែរ។

R. មរតកដូនតាជួរភ្នំដងរែក
​​សីមាខណ្ឌចែក​ត្រូវរក្សាថែ
កូនខ្មែររួមចិត្តមោះមុតពូកែ
ការ​ពារ​ជាតិខ្មែរ​ភពផែនបុរី។

៣. តម្លៃសន្តិភាពមានន័យជ្រាលជ្រៅ
ស្ថិតក្នុងជម្រៅប្រជាប្រុសស្រី​
រក្សាឱ្យបានគង់វង្សអត្ថន័យ
រាស្រ្ដខ្មែរភក្ដីប្រទេសថ្កើនថ្កាន។​

និពន្ធដោយ អឿ ស៊ីណា
ថ្ងៃទី២ ខែមករា ឆ្នាំ២០២៦