07/08/2026
គណៈគ្រប់គ្រង និងលោកគ្រូ អ្នកគ្រូ នៃវិទ្យាល័យសម្តេចម៉ែ
ជូនចំពោះបេក្ខជន និងបេក្ខនារីប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង៖ ១០ សីហា ២០២៦
ក្មួយៗសិស្សានុសិស្សថ្នាក់ទី១២ នៃវិទ្យាល័យសម្តេចម៉ែ ជាទីស្រឡាញ់ និងជាទីសង្ឃឹមយ៉ាងមុតមាំ!
ក្នុងឱកាសដ៏មានអត្ថន័យ និងសំខាន់បំផុតនៃ សម័យប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ថ្ងៃទី១០ ខែសីហា ឆ្នាំ២០២៦ ខាងមុខនេះ គណៈគ្រប់គ្រងសាលា ព្រមទាំងលោកគ្រូ អ្នកគ្រូទាំងអស់ នៃវិទ្យាល័យសម្តេចម៉ែ សូមផ្ញើជូននូវក្តីស្រឡាញ់ ជំនឿចិត្ត និងសារជូនពរយ៉ាងកក់ក្តៅបំផុតចេញពីដួងចិត្ត ជូនចំពោះក្មួយៗបេក្ខជន និងបេក្ខនារីទាំងអស់។
ពេញមួយឆ្នាំសិក្សាកន្លងមកនេះ លោកគ្រូ អ្នកគ្រូបានមើលឃើញ និងទទួលស្គាល់យ៉ាងច្បាស់នូវកិច្ចខិតខំប្រឹង ប្រែងការពុះពាររាល់ឧបសគ្គ ការលះបង់ពេលវេលា និងការយកចិត្តទុកដាក់រៀនសូត្រយ៉ាងសកម្មរបស់ក្មួយៗគ្រប់រូប។ រាល់ការខិតខំ និងដំណក់ញើសដែលក្មួយៗបានបំពេញកន្លងមក គឺជាគ្រឹះយ៉ាងរឹងមាំសម្រាប់ថ្ងៃជោគជ័យខាងមុខ។
ក្នុងថ្ងៃប្រឡងខាងមុខនេះ គណៈគ្រប់គ្រង និងលោកគ្រូ អ្នកគ្រូ សូមផ្ដាំផ្ញើ និងណែនាំក្មួយៗបន្ថែមនូវចំណុចសំខាន់មួយចំនួន៖
1. ថែរក្សាសុខភាព៖ សម្រាកឱ្យបានគ្រប់គ្រាន់ បរិភោគអាហារមានអនាម័យ និងរក្សាស្មារតីឱ្យបានស្រស់ថ្លា។
2. មានទំនុកចិត្តលើខ្លួនឯង៖ ចូលប្រឡងដោយភាពក្លាហាន រក្សាស្មារតីនឹងនរ ស្ងប់ស្ងាត់ និងមានទំនុកចិត្តលើចំណេះដឹងដែលបានខិតខំក្រេបជញ្ជក់។
3. គោរពបទបញ្ជាផ្ទៃក្នុង៖ គោរពតាមបទបញ្ជា និងបទប្បញ្ញត្តិផ្សេងៗនៃការប្រឡងឱ្យបានខ្ជាប់ខ្ជួន ដើម្បីធានាបាននូវលទ្ធផលដ៏ត្រឹមត្រូវ និងសមរម្យ។
ជាទីបញ្ចប់ គណៈគ្រប់គ្រង និងលោកគ្រូ អ្នកគ្រូ នៃវិទ្យាល័យសម្តេចម៉ែ សូមប្រសិទ្ធពរជ័យ សិរីសួស្តី ជ័យមង្គល ជូនចំពោះក្មួយៗទាំងអស់ សូមឱ្យមានសុខភាពល្អបរិបូរណ៍ មានប្រាជ្ញាឈ្លាសវៃ សម្រេចបាននូវការធ្វើវិញ្ញាសាគ្រប់មុខវិជ្ជាដោយរលូន និង ទទួលបាននិទ្ទេសល្អៗ ព្រមទាំងប្រឡងជាប់ជ័យលាភីគ្រប់ៗគ្នា ដើម្បីលើកកម្ពស់កិត្តិយសខ្លួនឯង គ្រួសារ និងជាមោទនភាពដ៏ខ្ពង់ខ្ពស់សម្រាប់វិទ្យាល័យសម្តេចម៉ែរបស់យើង។
«ជោគជ័យ និងអនាគតដ៏ភ្លឺស្វាង រង់ចាំក្មួយៗជានិច្ច»
