កំណាព្យវេយ្យាករណ៍ប្រចាំថ្ងៃ The Grammar poem daily

#សំណួរ ៖ បង! ពាក្យប៉ុណ្ណឹង និង ពាក្យប៉ុនហ្នឹង ប្រើបានដូចគ្នាដែរឬទេ?
ចម្លើយ ៖ ពាក្យប៉ុណ្ណឹង និង ពាក្យប៉ុនហ្នឹងគឺប្រើបានដូចគ្នា។ ទោះបីនៅក្នុងវចនានុក្រមដែលបោះពុម្ពដោយវិទ្យាស្ថានពុទ្ធសាសនបណ្ឌិត្យ មិនបានបង្ហាញត្រង់មេពាក្យ(ប៉ុនហ្នឹង)ក៏ដោយ តែពាក្យនេះ(ប៉ុនហ្នឹង)គឺបានបង្ហាញនៅត្រង់មេពាក្យប៉ុណ្ណឹងយ៉ាងច្បាស់។ ដោយនៅក្នុងវចនានុក្រមបានពន្យល់ថា “ប៉ុណ្ណឹង(ប៉ុន-ណឹង) និបាតសព្ទ ពាក្យប្រើក្លាយមកអំពីពាក្យ ប៉ុនហ្នឹង គឺប៉ុនគ្នាឬស្មើគ្នា នឹង ហ្នឹង ប៉ុណ្ណឹងចុះ,តែប៉ុណ្ណឹងបានហើយ។
អនុសារ និង អនុស្សារ មួយណាត្រឹមត្រូវបង?
អនុសារ និង អនុស្សារ ជាពាក្យត្រឹមត្រូវទាំងពីរ ព្រោះជាពាក្យដែលមាននៅក្នងវចនានុក្រមទាំងអស់ តែពាក្យទាំងពីរនេះមានន័យនិងលក្ខណៈនៃការប្រើប្រាស់ខុសគ្នា។
#តាមវចនានុក្រមខ្មែរ
អនុសារ នាមសព្ទ (សំ.) លំអាន, ដំណែល,ទំនៀម,ទំនៀមទម្លាប់,ការប្រព្រឹត្តតាមដំណែល,តាមលំអាន,តាមទំនៀមឬតាមបវេណី,តាមបវេណីនិយម។ ធ្វើតាមអនុសារ; កាន់តាមអនុសារចាស់ព្រឹទ្ធាចារ្យ។
អនុស្សារ(អនុស-សារ)/អនុស្វារ(អនុស-ស្វារ៉ៈ) នាមសព្ទ(សំ. ឬ បា.) និគ្គហិត(ំ) អនុស្វារមានសំឡេងជាគរុ(ប្រើជា-រៈ ក៏បាន)។
#ចំណាំ៖ អនុសារ គឺគេយកទៅប្រើប្រាស់ក្នុងន័យតម្អូញតម្អែររៀបរាប់ពីដំណើររឿងរ៉ាវអតីកាលដែលធ្លាប់បានធ្វើអ្វីជាមួយនឹងគ្នាកន្លងមក។
ឧទាហរណ៍៖ អនុសារអូននិងបង ធ្លាប់សាសងផ្ដោះផ្ដងក្រោមដួងចន្ទថ្លា...។
#តាមវចនានុក្រមសំស្ក្រឹត
अनुसार (Anusar,anussar អានថា អនុ-សារ៑, ឬ អនុស៑-សារ៑) នាមសព្ទ ការដេញតាម,ការអនុលោម,ការសម្រេចចិត្ត, គុណនាម ដែលយោងទៅតាម
अनुस्वार(anusvaaraH អានថា អនុ-ស្វារៈហះ) ជានិគ្គហិតមួយប្រភេទដែលមានឈ្មោះថា អនុស្វារៈនៅក្នុងភាសាសំស្ក្រឹត។
#រូបសញ្ញានិងឈ្មោះ
រូបសញ្ញា “ं”
និគ្គហិតនេះហៅថា អនុស្វារៈ(अनुस्वार)
#គោលការណ៍ប្រើប្រាស់
អនុស្វារៈ នេះគឺសម្រាប់ប្រើជានិគ្គហិតមការន្ត(បញ្ចេញសំឡេងតាមច្រមុះបញ្ចប់ដោយសំឡេង “ម”នៅខាងចុង)។ ឧទាហរណ៍៖ अस्तंगमन(អស្ត័ម-គមនៈ) ,संस्कृत(ស័ម-ស្ក្រឹតៈ) ។ នៅត្រង់ “स्तं ស្ត័ម និង सं​ ស័ម”ហ្នឹងហើយ ដែលលោកឱ្យឈ្មោះថា អនុស្វារៈនោះ។
សញ្ញាសម្គាល់របស់អនុស្វារៈ“ं” និងសញ្ញាសម្គាល់ពិន្ទុឬអនុនាសិកៈ“ँ”នេះស្រដៀងគ្នា គ្រាន់តែខុសត្រង់ពិន្ទុមានអឌ្ឍចន្ទបន្ថែម។ ហើយការបញ្ចេញសំឡេងសោតគឺខុសគ្នាបន្តិចប៉ុណ្ណោះ គឺត្រង់អនុស្វារៈរៀងស្រាលជាងសំឡេងពិន្ទុបន្តិច។
អនុស្វារៈ គឺជាសញ្ញាសម្រាប់អាស្រ័យលើស្រៈដែលបញ្ចេញសំឡេងតាមច្រមុះ។
ចំណាំ អនុស្វារៈ និង ចន្ទពិន្ទុ ឬ អនុនាសិកៈ ទោះបីប្រើជា “ម ការន្ត”ដូចគ្នាក៏ពិតមែន តែការបញ្ចេញសំឡេងគឺខុសប្លែកចាកប្រក្រតី ដោយសំឡេងចន្ទពិន្ទុធ្ងន់ជាងសំឡេង អនុស្វារៈ។
#សរុបរួមមក ៖ ពាក្យ អនុសារ និង អនុស្សារ/អនុស្វារ ប្រើបានទាំងពីរ គ្រាន់តែន័យនិងការប្រើប្រាស់ខុសគ្នាតាមតួនាទីរៀងៗខ្លួនប៉ុណ្ណោះ..........។
#សំណួរ ៖ សុំប្រែឈ្មោះប្អូនផង វរមនោ?
ចម្លើយ ៖ វរោ មនោ=វរមនោ ។
#ប្រែលោតប្រយោគ
មនោ រីចិត្ត វរោ ប្រសើរ រវមនោ ឈ្មោះថាវរមនោ, វរមនោ រីចិត្តស្អាត
#ប្រែយកន័យ
ចិត្តស្អាត,ចិត្តដែលប្រាសចាកគ្រឿងសៅហ្មង,ចិត្តដែលរួចផុតពីគ្រឿងស្មោកគ្រោក
#សម្ព័ន្ធ
វរោ វិសេសន:របស់មនោ ៗលិង្គត្ថ, វរមនោ សមាសនាមបទ ឈ្មោះវិសេសនបុព្វបទកម្មធារយលុត្តសមាស និងជាលិង្គត្ថ។
#សំណួរ ៖ សូមប្អូនពន្យល់ពីការប្រើប្រាស់ពាក្យ សុំ និង សូម?
#ចម្លើយ ៖ តាមវចនានុក្រមខ្មែរ
សុំ កិរិយាសព្ទ សុំទាន,សុំគេស៊ី។
សម្រាប់អ្នកធំនិយាយទៅរកអ្នកតូចដោយសេចក្ដីអង្វរឬសេចក្ដីគួរសម...។
សូម កិរិយាសព្ទ បញ្ចេញវាចាឬសម្ដែងអាការឱ្យគេឱ្យអ្វីៗដែលខ្លួនត្រូវការ។
សូមទាន,សូមប្រាក់,សូមពរ(ព.សា. សុំ)។
វិភាគតាមបែបវេយ្យាករណ៍
សុំ
“សុំ”គឺសម្រាប់ប្រើជាកិរិយាសព្ទសុទ្ធ ហើយក៏ជាកិរិយាធំគ្រប់គ្រងនៅក្នុងប្រយោគផងដែរ...។
- កិរិយា+នាម (សុំទាន)
-បុរសទី២+កិរិយា+កិរិយា(សុំ)+នាមសព្ទ (ឯងទៅសុំស្លឹកគ្រៃពីផ្ទះយាយអ្ហែងមួយគល់មក.....)
-អតីតកាល+កិរិយា+សព្វនាម(បុរស)+កិរិយា(សុំ) (ម្សិលមិញឱ្យខ្ញុំសុំទោសផង ដែលបាននិយាយពាក្យមិនគប្បីដាក់លោកបង.....)។
- សព្វនាម(បុរស)+កិរិយា(សុំ)+កិរិយា(ខ្ញុំសុំទៅដែរ…..)
កំណត់ចំណាំ ៖ “សុំ”គឺប្រើជាកិរិយាសព្ទសុទ្ធ ហើយជាកិរិយាសព្ទធំនៅក្នុងប្រយោគ ឬជាកិរិយាសព្ទគ្រប់គ្រងប្រយោគទាំងមូល ដោយមិនមានកិរិយានុគ្រោះមកជំនួយឡើយ។
ឧទាហរណ៍៖ ខ្វិតទាំងនេះខ្ញុំបានសុំពីផ្ទះអ៊ំឆនមក។......
សូម
“សូម” គឺសម្រាប់ប្រើនៅក្នុងប្រយោគដែលជាអនុត្តកាល(កាលដែលមិនបានប្រាប់ថាជាបច្ចុប្បន្ន អតីត ឬអនាគតកាល) ហើយប្រើសម្រាប់ប្រាប់សេចក្ដីប្រាថ្នា សេចក្ដីប៉ុនប៉ង និង សេចក្ដីអង្វរ។
-សព្វនាម(បុរស)+កិរិយានុគ្រោះ(សូម)+កិរិយា (ខ្ញុំសូមអង្វរសុំដោះលែងខ្ញុំទៅ) ប្រាប់សេចក្ដីអង្វរ
-​ សព្វនាម(បុរស)+កិរិយានុគ្រោះ(សូម)+កិរិយាសព្ទ (ខ្ញុំសូមប្រាថ្នា សច្ចវាចា តទៅជាតិមុខ..........)។ ប្រាប់សេចក្ដីប្រាថ្នា
-កិរិយានុគ្រោះ(សូម)+កិរិយា (សូមឱ្យខ្ញុំបានជួបនាងជារៀងរហូតទៅ) ប៉ុនប៉ង ឬ ប្រាថ្នា។
-កិរិយានុគ្រោះ(សូម)+នាមនាម/សព្វនាម(បុរស)+កិរិយា (សូមអ្នកទាំងឡាយស្ដាប់ខ្ញុំ....................)
កំណត់ចំណាំ៖ “សូម”គឺសម្រាប់ប្រើនាំមុខកិរិយាសព្ទ និងនាំមុខនាមនាម ឬសព្វនាម តែត្រូវនាមនាមឬសព្វនាមនោះហៅរកកិរិយាសព្ទមកអាស្រ័យជាមួយផង គឺកិរិយានុគ្រោះមិនអាចដើរដោយខ្វះកិរិយាសព្ទបានឡើយ។
ឧទាហរណ៍ ៖ សូមឱ្យព្រះពុទ្ធសាសនារុងរឿងចម្រើន សូមឱ្យព្រះពុទ្ធសាសនាផ្សាយទូទៅពេញសកលលោក…………….។ យើងឃើញថា “សូម”គឺជាកិរិយានុគ្រោះ(ពាក្យដែលនាំមុខកិរិយាសព្ទ) រីឯ “ឱ្យ”គឺជាកិរិយាសព្ទធំសម្រាប់គ្រប់គ្រងប្រយោគ​ឬគ្រប់គ្រងឃ្លានីមួយៗ។ ដូច្នេះយើងអាចចំណាំបានថា កិរិយានុគ្រោះ “សូម”គឺដើរនាំមុខកិរិយាសព្ទ ឬហៅរកកិរិយាសព្ទធំជានិច្ច។
សូមឲ្យឯកសារមួយនេះបានជាប្រយោជន៍ដល់សិក្ខាកាមគ្រប់រូប។..........
#បើមិត្តៗប្រាថ្នាចង់សិក្សាវេយ្យាករណ៍កំណាព្យប្រចាំថ្ងៃសូមចូលរួម ចុច👍🏿 Share និង Follow ផេកនេះ មិត្តៗនឹងទទួលបានឯកសារវេយ្យាករណ៍កំណាព្យប្រចាំថ្ងៃជាប្រចាំ។ សូមអរព្រះគុណ!-សូមអរគុណ!
សូមមេត្តាចូលទៅកាន់តំណផេកខាងក្រោម ↓
https://www.facebook.com/%E1%9E%80%E1%9F%86%E1%9E%8E%E1%9E%B6%E1%9E%96%E1%9F%92%E1%9E%99%E1%9E%9C%E1%9F%81%E1%9E%99%E1%9F%92%E1%9E%99%E1%9E%B6%E1%9E%80%E1%9E%9A%E1%9E%8E%E1%9F%8D%E1%9E%94%E1%9F%92%E1%9E%9A%E1%9E%85%E1%9E%B6%E1%9F%86%E1%9E%90%E1%9F%92%E1%9E%84%E1%9F%83-The-Grammar-poem-daily-108829637505393/
#សូមបញ្ជាក់ ខ្ញុំព្រះករុណា-ខ្ញុំមិនមែនជាវេយ្យាករណបណ្ឌិតឡើយ គឺគ្រាន់តែចង់ចែករំលែកនូវមត៌កអក្សរសាស្ត្ររបស់ជាតិតែប៉ុណ្ណោះ។ ប្រសិនបើខ្ញុំព្រះករុណា-ខ្ញុំឆ្លើយទៅហើយខុសឆ្គងមិនទំនងទៅតាមបែបបទវេយ្យាករណ៍ត្រង់ចំណុចណាមួយ សូមពហុស្សូតទាំងឡាយចូលរួមកែលម្អដោយក្ដីអនុគ្រោះ។
#សូមសេចក្ដីចម្រើនកើតមានដល់អក្សរសាស្ត្រជាតិរបស់ខ្ញុំជារៀងរហូតតទៅ!
🖋២៨.០៣.២០២១🖋
ពីខ្ញុំព្រះករុណា-ខ្ញុំប៉ាកកាកោវិទ

#សំណួរ ៖ ប្អូនសុំសួរពាក្យ “កុំបី”មានន័យយ៉ាងណា? ចុះបើសរសេរថា កុំបីឃ្លៀងឃ្លាត វិញមានន័យបែបណា?
ចម្លើយ
#ទស្សនៈផ្ទាល់ខ្លួនរបស់ខ្ញុំ
= កុំគប្បីនិយាយអាក្រក់(វាចា)
កុំបី =កុំសូម្បីតែគិតទៅរកផ្លូវអាក្រក់(ចិត្ត)
=កុំដើម្បីតែប្រយោជន៍ខ្លួនឯងហ៊ានធ្វើអំពើអាក្រក់(កាយ)
#ចំណុចទី១ ៖ “គប្បី សូម្បី ដើម្បី” យើងពិនិត្យឃើញថា ពាក្យទាំងបីខាងដើមនៅក្នុងអព្ភន្តរសញ្ញាគឺសុទ្ធតែជាពាក្យដែលមានពីរព្យាង្គទាំងអស់ ហើយសូរដែលនៅខាងចុងនៃព្យាង្គទាំងនោះគឺសុទ្ធតែបញ្ចប់ដោយពាក្យ“បី”ទាំងអស់ដូចគ្នា។ ដូច្នេះយើងអាចធ្វើការសន្និដ្ឋានបានថា ក្នុងបណ្ដាពាក្យទាំងឡាយបីនោះ គឺលោកកាត់ចោលព្យាង្គខាងមុខ(គាប់ សូម្ ដើម្)ចេញ ហើយលោកកំណត់យកតែព្យាង្គខាងចុង(បី)ប៉ុណ្ណោះ ដើម្បីឱ្យដើរតួជាមួយនឹងពាក្យបដិសេធ(កុំ) ហើយជម្រុញពាក្យបដិសេធ“កុំ”ទៅដាក់ពីខាងមុខ“បី”វិញ រក្សាទុកចំនួនព្យាង្គនៅដដែល ទើបបង្កើតបានទៅជាពាក្យបដិសេធមួយ(កុំបី)ដូច្នេះ។ បុរាណាចារ្យយើងបង្កើតពាក្យ “កុំបី”នេះឡើងគឺដើម្បីបង្កប់ន័យឱ្យយើងស្វែងរកនូវប្រភពពិត ហើយម្យ៉ាងវិញទៀត បុរាណាចារ្យយើងចង់ឱ្យយើងដឹងថា បាបរមែងបង្កប់នៅជាមួយនឹងកាយ វាចា ចិត្តរបស់យើងគ្រប់ពេល ទើបលោកបង្កើតពាក្យ“កុំបី”នេះឡើង។
#ចំណុចទី២ ៖ យើងឃើញថាពាក្យទាំងបី “គប្បី សូម្បី ដើម្បី”នេះ ប្រសិនបើយកពាក្យបដិសេធ“កុំ”ដាក់ពីមុខ ឃើញថាពាក្យទាំងនេះមានលក្ខណៈបដិសេធតាមបែបផែនរៀងៗខ្លួន។
- “កុំគប្បី” សម្រាប់ប្រើដាស់តឿន ដោយចង្អុលបង្ហាញពីផលនៃអំពើរបស់បុគ្គលណាមួយ ហើយលើកយកផលនៃអំពើរបស់បុគ្គលនោះមកក្រើនរម្លឹកដាស់តឿនដល់បុគ្គលដទៃផ្សេងទៀត ដើម្បីកុំឱ្យបុគ្គលនោះយកជាគម្រូតាម។ ឧទាហរណ៍៖ ឯងកុំគប្បីធ្វើដូច្នេះឡើយ!>ឯងកុំបីធ្វើដូច្នេះឡើយ!>ឯងកុំធ្វើដូច្នេះឡើយ!។ យើងសង្កេតឃើញថា ពាក្យ”កុំគប្បី កុំបី កុំ”គឺចេញមកពីប្រភពតែមួយ គ្រាន់តែពាក្យមួយជាពាក្យពេញលេញ និងពាក្យពីរទៀតជាពាក្យបង្រួមខ្លីប៉ុណ្ណោះ។ ម្យ៉ាងទៀត ពាក្យ“កុំគប្បី”នេះគឺបានបង្ហាញអំពើតាមទ្វារពីរគឺ កាយទ្វារ(អំពើដែលស្ដែងចេញតាមរយៈផ្លូវកាយ) និង វចីទ្វារ(អំពើដែលស្ដែងចេញតាមរយៈផ្លូវវាចា)
-“កុំសូម្បី” គឺប្រើបដិសេធបែបប្រៀបធៀបលក្ខណៈណាមួយទៅកាន់លក្ខណៈមួយទៀត ដោយយកលក្ខណៈដែលត្រូវបដិសេធនោះបង្ហាញលក្ខណៈធ្ងន់ជាងលក្ខណៈដែលត្រូវលើកយកមកប្រៀបធៀបនោះ។ ឧទាហរណ៍៖ កុំសូម្បីតែនិយាយ សូម្បីត្រឹមតែគិតក៏វាអាក្រក់ណាស់ទៅហើយ=កុំថាឡើយត្រឹមតែនិយាយ សូម្បីតែគិតក៏វាអាក្រក់ណាស់ដែរ(បង្ហាញពីលក្ខណៈពាក្យសម្ដី)។ កុំសូម្បីតែហិត សូម្បីតែធុំក្លិនស្ទើរតែចង់ក្អួតទៅហើយ(បង្ហាញពីលក្ខណៈតាមផ្លូវអារម្មណ៍)។ កុំសូម្បីត្រឹមតែបានឃើញ សូម្បីត្រឹមតែឮក៏វាគួរឱ្យរន្ធត់ណាស់ទៅហើយ(បង្ហាញលក្ខណៈឃោរឃៅ)...........។ “កុំសូម្បី”នេះមានលក្ខណៈប្រើជាច្រើនសណ្ឋាន ដូចជាមាន៖ (កុំសូម្បី.............សូម្បីតែ.......), (កុំថាឡើយ.......សូម្បីត្រឹមតែ........), (កុំសូម្បីត្រឹមតែ...........គ្រាន់តែ......) (កុំថាឡើយបាន..................សូម្បីតែ.........)យើងឃើញបែបផែនទាំងអស់នេះវាមានលក្ខណៈប្រើប្រាស់ដូចគ្នា ទោះណាវាបានបង្ហាញទៅលើរូបផ្សេងគ្នាក៏ដោយ។
-“កុំដើម្បី”សម្រាប់ប្រើនិយាយបដិសេធទៅលើអំពើដែលជាហេតុ តែបែរជាបដិសេធអំពើដែលជាផលទៅវិញ។ ឧទាហរណ៍៖ កុំដើម្បីតែចង់បំពេញក្រពះខ្លួនឯង បែរជាហ៊ានទៅសម្លាប់ជីវិតសត្វដទៃនោះ។ (កុំដើម្បីតែ........បែរជា.......នោះ។ កុំដើម្បីតែចង់ស្អាតខ្លួនឯង ហ៊ានលួចលុយម៉ែបួនប្រាំរយដុល្លាទៅទិញឡេលាបនោះ។...........................................។
សរុបសេចក្ដីមកវិញ ពាក្យ ថា“កុំបី”នេះគឺចង់បង្ហាញទៅលើការហាមប្រាមមិនឱ្យប្រព្រឹត្តអំពើអាក្រក់នានាតាមទ្វារទាំង៣ គឺ ៖ ផ្លូវកាយ ផ្លូវវាចា និង ផ្លូវចិត្ត (កុំបីប្រព្រឹត្តអាក្រក់ដោយកាយ កុំបីនិយាយពាក្យអាក្រក់ដោយវាចា និង កុំបីគិតអាក្រក់ដោយចិត្ត)។ ហើយពាក្យ“កុំបី”នេះ គឺជាពាក្យសង្ខេបសរុបរួមដោយពាក្យបួនម៉ាត់គឺ កុំ+(គប្បី,សូម្បី,ដើម្បី=កុំបី ដូច្នេះឯង)។
#ទស្សនៈតាមឯកសារ
យើងឃើញថា ពាក្យ “កុំបី”នេះមានការប្រើប្រាស់ជាច្រើនអន្លើ ទាំងក្នុងសម័យមុន និងក្នុងសម័យបច្ចុប្បន្ន ។ ភាគច្រើនយើងតែងឮតាមរយៈការឱ្យពរ តាមរយៈការអាន និងតាមរយៈព្រះសង្ឃសូធ្យធម៌ជាដើម។
-…..សូមឱ្យ(បុរសទី២)ជួបនូវពុទ្ធពរទាំងឡាយបួនប្រការគឺ អាយុ វណ្ណៈ សុខៈ និងពលៈ កុំបីឃ្លៀងឃ្លៀតឡើយ។ បង្ហាញពីការអង្វរករដល់ម្ចាស់ទាន គឺមានន័យថា សូមកុំឱ្យម្ចាស់ទានប្រព្រឹត្តអំពើណាដែលជាអកុសល ដែលជាអំពើបដិបក្ខជាមួយនឹងពុទ្ធពរ ហើយនាំឱ្យពុទ្ធពរឃ្លាតឆ្ងាយពីខន្ធសន្ដានរបស់អ្នកនោះ, គឺមានន័យថា សូមកុំបណ្ដោយឱ្យអំពើបាបកើតឡើងតាមទ្វារទាំងបីចូលទៅបំផ្លាញនូវវពុទ្ធពរទាំងទាំងបួនប្រការនោះឡើយ។
-.....នេះគឺច្បាប់ក្រម ប្រសើរឧត្ដម ទូន្មានអ្នកផង ប្រើឱនលំទោន កុំបីមានឆ្គង ប្រាជ្ញាបុណ្យផង កើតដោយប្រណិប័តន៍។
- ....អន្តរាយទាំងឡាយកុំបីមានដល់……………..ឡើយ។
យើងឃើញថា ពាក្យ“កុំបី”នេះ ត្រូវបានស្មេរនិងកវីនិពន្ធលើកយកមកប្រើប្រាស់សម្រាប់ឃាត់ឃាំង ទប់ស្កាត់ និងបដិសេធនូវអំពើកាត់ផ្ដាច់នូវប្រយោជន៍ណាមួយ ហើយអ្នកនិពន្ធក៏បានយកពាក្យនេះមកបដិសេធនូវវត្តមានអពមង្គលផងដែរ។
#សរុបរួមមកពាក្យថា “កុំបី”នេះគឺសម្រាប់ប្រើបដិសេធនូវវត្តមានរបស់អពមង្គល និង ប្រើសម្រាប់ក្រើនរម្លឹកដល់ជនទាំងឡាយ ដើម្បីកុំបណ្ដោយឱ្យអកុសលកើតឡើងតាមទ្វារទាំងបីគឺទ្វារណាមួយបានឡើយ។
សូមឲ្យឯកសារមួយនេះបានជាប្រយោជន៍ដល់សិក្ខាកាមគ្រប់រូប។..........
#បើមិត្តៗប្រាថ្នាចង់សិក្សាវេយ្យាករណ៍កំណាព្យប្រចាំថ្ងៃសូមចូលរួម ចុច👍🏿 Share និង Follow ផេកនេះ មិត្តៗនឹងទទួលបានឯកសារវេយ្យាករណ៍កំណាព្យប្រចាំថ្ងៃ។ សូមអរព្រះគុណ!-សូមអរគុណ! សូមចូលទៅកាន់តំណផេកខាងក្រោម ↓
https://www.facebook.com/%E1%9E%80%E1%9F%86%E1%9E%8E%E1%9E%B6%E1%9E%96%E1%9F%92%E1%9E%99%E1%9E%9C%E1%9F%81%E1%9E%99%E1%9F%92%E1%9E%99%E1%9E%B6%E1%9E%80%E1%9E%9A%E1%9E%8E%E1%9F%8D%E1%9E%94%E1%9F%92%E1%9E%9A%E1%9E%85%E1%9E%B6%E1%9F%86%E1%9E%90%E1%9F%92%E1%9E%84%E1%9F%83-The-Grammar-poem-daily-108829637505393/
#សូមបញ្ជាក់ ខ្ញុំព្រះករុណា-ខ្ញុំមិនមែនជាវេយ្យាករណបណ្ឌិតឡើយ គឺគ្រាន់តែចង់ចែករំលែកនូវមត៌កអក្សរសាស្ត្ររបស់ជាតិតែប៉ុណ្ណោះ។ ប្រសិនបើខ្ញុំព្រះករុណា-ខ្ញុំឆ្លើយទៅហើយខុសទំនងទៅតាមបែបបទវេយ្យាករណ៍ត្រង់ចំណុចណាមួយ សូមពហុស្សូតទាំងឡាយចូលរួមកែលម្អដោយក្ដីអនុគ្រោះ។
#សូមសេចក្ដីចម្រើនកើតមានដល់អក្សរសាស្ត្រជាតិរបស់ខ្ញុំជារៀងរហូតតទៅ!
🖋២៣.០៣.២០២១🖋
រក្សាសិទ្ធិដោយខ្ញុំព្រះករុណា-ខ្ញុំប៉ាកកាកោវិទ

សូមឲ្យឯកសារមួយនេះបានជាប្រយោជន៍ដល់សិក្ខាកាមគ្រប់រូប។...........
សូមសិក្ខាកាមគ្រប់រូបទាញយកសៀវភៅនេះទៅសិក្សាតាមសេចក្ថីប្រាថ្នាចុះ។
#សៀវភៅ : មូលដ្ឋានគ្រឹះបាលីវេយ្យាករណ៍
https://drive.google.com/file/d/1itMK7JvGlv0BB_2YZz0RO37hd9nroB5i/view?usp=drivesdk
🖋២១.០៧.២០២០🖋
#បើមិត្តៗប្រាថ្នាចង់សិក្សាវេយ្យាករណ៍កំណាព្យប្រចាំថ្ងៃសូមចូលរួម ចុច👍🏿 Share និង Follow ផេកនេះ មិត្តៗនឹងទទួលបានឯកសារវេយ្យាករណ៍កំណាព្យប្រចាំថ្ងៃ។ សូមអរព្រះគុណ!-សូមអរគុណ! សូមចូលទៅកាន់តំណផេកខាងក្រោម ↓
https://www.facebook.com/%E1%9E%80%E1%9F%86%E1%9E%8E%E1%9E%B6%E1%9E%96%E1%9F%92%E1%9E%99%E1%9E%9C%E1%9F%81%E1%9E%99%E1%9F%92%E1%9E%99%E1%9E%B6%E1%9E%80%E1%9E%9A%E1%9E%8E%E1%9F%8D%E1%9E%94%E1%9F%92%E1%9E%9A%E1%9E%85%E1%9E%B6%E1%9F%86%E1%9E%90%E1%9F%92%E1%9E%84%E1%9F%83-The-Grammar-poem-daily-108829637505393/