Buddhivaddhana for Social Welfare

25/04/2022

13/03/2022

#ធម្មសន្ទាថ្ងៃអាទិត្យកណ្យាមិត្តដើម្បីសង្គម
ចូលរួមជាធម្មវាគ្មិនដោយ៖
១. ព្រះតេជគុណ ជា សុភ័ណ្ឌ (ធម្មសម្របសម្រួលកម្មវិធី)
២. ព្រះតេជគុណ ភុំឈុន តុលា (ធម្មវាគ្មិន)
៣. ព្រះតេជគុណ គិន ភាជ (ធម្មវាគ្មិន)
៤. ព្រះតេជគុណ ផន ស៊ីភាង (ធម្មវាគ្មិន).......
ថ្ងៃអាទិត្យ ១១​កើត ខែផល្គុន ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី ១៣ ខែមីនាឆ្នាំ២០២២ វេលាម៉ោង ៧៖៣០ ដល់ម៉ោង ៨៖៣០​ នាទីយប់។

27/02/2022

ថេរដិការបស់សម្ដេចព្រះមហាឃោសនន្ទ៖

«សេចក្តីទុក្ខរបស់ប្រជាពលរដ្ឋខ្មែរ មានទំហំដ៏ធំធេង
មើលឃើញសេចក្តីទុក្ខ នាំឱ្យមានករុណា
មហាករុណា នាំឱ្យមានសេចក្តីសុខសាន្ត
ចិត្តសុខសាន្ត នាំឱ្យបុគ្គលសុខសាន្ត
បុគ្គលសុខសាន្ត នាំឱ្យគ្រួសារសុខសាន្ត
គ្រួសារសុខសាន្ត នាំឱ្យសហគមន៍សខុសាន្ត
សហគមន៍សុខសាន្ត នាំឱ្យជាតិសុខសាន្ត
ជាតិសុខសាន្ត នាំឱ្យពិភពលោកសុខសាន្ត (សន្តិភាព)
សូមឱ្យសព្វសត្វទាំងអស់ រស់នៅដោយសុភមង្គល និងសន្តិភាព។»

សូមព្រះករុណាគុណម្ចាស់ និងញាតិញោមគ្រប់រូប មើលឃើញសេចក្តីទុក្ខរបស់ប្រជាជនដែលកំពុងរស់នៅក្នុងភ្លើងសង្រ្គាម ហើយបណ្ដុះចិត្តមេត្តាករុណា និងចូលរួមផ្សាយមេត្តាករុណាចិត្តដល់ពួកគាត់ផង។

នត្ថិ សន្តិ បរំ សុខំ ពុំមានសេចក្តីសុខណា ស្មើរនឹងសន្តិភាព (ភាពមិនមានសង្រ្គាម) ឡើយ។ សូមឱ្យប្រជាពលរដ្ឋអ៊ុយក្រែន ទទួលបានសេចក្តីសុខដែលកើតចេញពីសន្តិភាពនេះឆាប់ៗ!

19/02/2022

#ធម្មសន្ទនាថ្ងៃអាទិត្យ ក្រោមប្រធានបទ យុវជន និងការឈ្វេងយល់ពីដំណើរនៃការកសាងសន្តិភាពនៅកម្ពុជា ដែលជាកិច្ចសន្ទនារវាង ព្រះតេជព្រះគុណ គិនភាជ (អនុប្រធានក្រុមពុទ្ធិវឌ្ឍនៈ) និងលោក ណា រតនៈ (មន្រ្តីកម្មវិធីនៅពិពណ៌សន្តិភាពប្រចាំខេត្តបាត់ដំបង)។
កិច្ចសន្ទនានេះនឹងមានផ្សាយផ្ទាល់នៅថ្ងៃអាទិត្យ ៤រោច ខែមាឃ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី ២០ ខែកុម្ភៈ ឆ្នាំ២០២២ វេលាម៉ោង ៧៖៣០ ដល់ម៉ោង ៨៖៣០ នាទីយប់ នៅលើទំព័រហ្វេសប៊ុកផេក Buddhivaddhana for Social Welfare ។ ...........
ព្រះថេរានុថេរៈ លោកលោកស្រី ក៏អាចចូលរួមស្តាប់ដោយផ្ទាល់តាមរយៈ MS Teams (App) ដែលមានដាក់តំណភ្ជាប់ជូនក្នុងតេឡេក្រាម៖ https://t.me/bswbtb

17/02/2022

បទបង្ហាញអំពី «ការឈ្វេងយល់ពីអត្ថន័យនៃ ទិវាមាឃបូជា ក្នុងឋានៈជាសមាជិកពុទ្ធសាសនា» ដោយលោក​ធម្មបណ្ឌិត​ ហេង មណីចិន្តា នាយកប្រតិបត្តិអង្គការពុទ្ធសាសនាដើម្បីអភិវឌ្ឍន៍។ (បទបង្ហាញដោយ powerPoint)

រាត្រីព្រហស្បតិ៍ ទី១៧ ខែកុម្ភៈ ឆ្នាំ២០២២ ចាប់ពីម៉ោង៨ យប់ ដល់ម៉ោង ១០យប់។

អាចអញ្ជើញចូលរួមបានដោយផ្ទាល់ តាមរយៈកម្មវិធី App MST តំណភ្ជាប់ (link) នេះ៖ https://tinyurl.com/yckaapr2

ឬ ទស្សនាការផ្សាយផ្ទាល់ (Live) តាម Page: Buddhivaddhana for Social Welfare https://www.facebook.com/BSWBTB

16/02/2022

សូមឈ្វេងយល់បន្ថែមអំពីពីពិធីបុណ្យមាឃបូជា ជាមួយនឹងអត្ថបទលោកគ្រូធម្មបណ្ឌិត ហេង មណីចិន្តា ខាងក្រោមនេះ៖

មាឃបូជា ជាពីធីបុណ្យមួយដែលមានសារៈសំខាន់នៅក្នុងព្រះពុទ្ធសាសនា ដែលរួមពិធីបុណ្យមានៈ មាឃបូជា ពិសាខបូជា អាសាឍបូជា និងបុណ្យបវារណា (ចេញវស្សា) ។ បុណ្យមាឃបូជា ប្រារព្ធឡើងដើម្បីរំលឹកដល់ថៃ្ងដែលព្រះសម្មាសម្ពុទ្ធទ្រង់ប្រកាសបង្កើត ព្រះពុទ្ធសាសនា ឡើងក្នុងលោកនៅ ប្រទេសឥណ្ឌា កាលពី ៥៨៨ ឆ្នាំមុនគ្រិស្តសករាជ នាថៃ្ងទី ១៥ កើតខែមាឃ ក្រោយពីការត្រាស់ដឹងរបស់ព្រះអង្គចំនួន ៩ ខែគត់ ។ ការបង្កើត ព្រះពុទ្ធសាសនា ក្នុងឋានៈជាអង្គការសាសនាមួយនេះ ធ្វើឡើងនៅក្នុងចំណោមព្រះសង្ឃចំនួន ១ ២៥០ អង្គ ជាសមាជិកក្នុងអង្គមហាសន្និបាតមួយដែលបាននិមន្តមកពីគ្រប់ស្រទាប់វណ្ណៈទាំងអស់ ។ នៅក្នុងមហាសន្និបាតនោះ ព្រះសម្មាសម្ពុទ្ធ ទ្រង់បានប្រកាសនូវគោលការណ៍ចំនួន ១១ ប្រការសម្រាប់ឲ្យសមាជិកមហាសន្និបាតទាំងអស់កាន់យកជាវិថីជីវិត និងសម្រាប់យកទៅផ្សព្វផ្សាយ ដល់ជនដទៃទៀតឲ្យបានយល់អំពី ពុទ្ធសាសនា ។ គោលការណ៍ទាំង ១១ ប្រការនេះមានឈ្មោះជាភាសាបាលីថា "ឱវាទបាដិមោក្ខ" ដែលពុទ្ធសាសនិកជនម្នាក់ៗត្រូវយកមកសិក្សាឲ្យយល់ដឹងនិងអនុវត្តដូចតទៅៈ

គោលបំណងៈ គោលបំណងរបស់ ព្រះពុទ្ធសាសនា ឬក៏ដូចជា គោលបំណងរបស់ពុទ្ធសាសនិកម្នាក់ៗ គឺសែ្វងរកនិព្វានដែលប្រែថា សភាវៈប្រាសចាកទុក្ខ មិនមានសេចក្តីទុក្ខ មិនមានបញ្ហានៅក្នុងដួងចិត្តរបស់ខ្លួន ពាក្យនិព្វាននេះ មានន័យស្មើនិងពាក្យថា "សន្តិ" ដែលប្រែថា "សេចក្តីស្ងប់" ។ យើងអាចនិយាយថា គោលបំណង របស់ ព្រះពុទ្ធសាសនា គឺការបង្កើតឡើងនូវ សន្តិភាព ក្នុងដួងចិត្តនេះដែរ ក៏ជាមូលដ្ឋានគ្រឹះនៃសន្តិភាពក្នុងសង្គមដែលខ្លួនរស់នៅផង ។ ការកាន់ ព្រះពុទ្ធសាសនា គឺជាការប្រឹងប្រែងដើម្បីបង្កើតសន្តិភាពដល់ខ្លួន និងចូលរួមចំណែកដល់សន្តិភាពសង្គម និង ពិភពលោក នេះជាកាតព្វកិច្ចដែលពុទ្ធសាសនិកម្នាក់ៗត្រូវប្រឹងប្រែងធ្វើអោយសម្រេច ។

គោលដៅៈ សន្តិភាព ឬនិញ្វន មិនមែនកើតឡើងដោយការសុំបន់ស្រន់បួងសួងទេ និងក៏មិនអាចកើតឡើងដោយសារផ្តល់ឬប្រទានឲ្យដោយចិត្តស្រឡាញ់មេត្តារបស់អាទិទេព ឬព្រះជាម្ចាស់អង្គណាមួយឡើយ សន្តិភាពនេះកើតដោយសារការសន្សំរបស់សកម្មភាព ៣ យ៉ាងគឺៈ
ការមិនធ្វើអាក្រក់ ការកម្ចាត់អំពើអាក្រក់ និងការពារអំពើអាក្រក់គ្រប់ប្រភេទមិនឲ្យកើតក្នុងជីវិតរស់នៅទាំងផ្លូវកាយនិងផ្លូវសម្តី ។
ការធ្វើអំពើល្អ បង្កើតអំពើល្អ និងរក្សាអំពើល្អឲ្យស្ថិតសេ្ថរគង់វង្សក្នុងជីវិតរស់នៅប្រចាំថៃ្ង ទាំងអំពើល្អខាងផ្លូវកាយនិងផ្លូវសម្តី ។
ពង្រឺងចិត្តដែលជាមូលដ្ឋាននៃអំពើ ដោយកម្ចាត់កិលេស ឬមេរោគដែលតោង ចិត្តឲ្យអស់ទៅ រហូតដល់ចិត្តស្អាតបរិសុទ្ធ មិនមានសភាវៈអាក្រក់ស្ថិតនៅ។

លក្ខណៈរបស់ព្រះពុទ្ធសាសនិកជន៖
លក្ខខណ្ឌទី ១​ ៖ មានការអត់ធ្មត់ក្នុងការធ្វើអំពើល្អ និងកម្ចាត់អំពើអាក្រក់ ។
លក្ខខណ្ឌទី ២ ៖ មិនប្រើអំពើហិង្សាក្នុងការរស់នៅ ។
លក្ខខណ្ឌទី ៣ ៖ មិនប្រើពាក្យបៀតបៀននិងតិះដៀលអ្នកដទៃ ។
លក្ខខណ្ឌទី ៤ ៖ រក្សាសីល រស់នៅក្នុងច្បាប់ យកច្បាប់ជាធំ ។
លក្ខខណ្ឌទី ៥ ៖ បរិភោគ ប្រើប្រាស់វត្ថុទាំងទ្បាយដោយសន្សំសំចៃនិងស្គាល់ប្រមាណ ។
លក្ខខណ្ឌទី ៦ ៖ ចូលចិត្តភាពស្ងប់ស្ងាត់ និងបង្កើតបរិយាកាសស្ងប់ស្ងាត់ ។
លក្ខខណ្ឌទី ៧ ៖ មានសេចក្តីព្យាយាមក្នុងការសម្អាតចិត្ត ធ្វើឲ្យចិត្តមានសមាធិ ។

មេរៀនពីបុណ្យមាឃបូជា ៖​ ថៃ្ងនេះជាថៃ្ងដែលព្រះពុទ្ធអង្គទ្រង់ប្រកាសគោលការណ៍ទាំង ១១ ប្រការនេះ សម្រាប់ជាប្រយោជន៍ដល់បរិស័ទយកទៅប្រើប្រាស់ៈ

ចំណុច ១ ៖ ក្នុងឋានៈជាបរិស័ទ ការអនុវត្តតាមប្រការទាំង ១១ នេះនឹងនាំទៅរកសន្តិភាពផ្លូវចិត្តជាពិតប្រាកដ ។
ចំណុច ២ ៖ ក្នុងឋានៈជាពលរដ្ឋ ក្នុងសង្គម ការមានគោលបំណងរួម មានគោលដៅដូចគ្នា និងការប្រព្រឹត្តប្រហាក់ប្រហែលគ្នានេះ នឹងអាចនាំមកនូវ សន្តិភាព និងការអភិវឌ្ឍដែលប្រកបដោយនិរន្តរភាព ។
ចំណុច ៣ ៖ ក្នុងឋានៈជាក្រុមបក្សនៅក្នុងសង្គម ឬប្រទេសជាតិមួយដែលព្យាយាមសែ្វងរកនូវឱកាសដើម្បីរក្សាសន្តិភាព និងជំរុញដល់ការអភិវឌ្ឍដល់ ប្រទេសជាតិតែឯងនោះ ការគោពតាមគោលការណ៍ទាំង ១១ ប្រការនេះនឹងកាត់បន្ថយបាននូវអស្ថិរភាព ជម្លោះ និងអំពើហិង្សាដែលកើតមកពីការប្រគួតប្រជែងគ្នាបាន ។
ចំណុច ៤ ៖ ក្នុងឋានៈជាអ្នកផ្សាយសាសនា ការប្រព្រឹត្តទៅតាមគោលការណ៍នេះ នឹងនាំឲ្យមានការយោគយល់ ការផ្តល់កិត្តិយស ដល់គ្នានិងគ្នា និងការរស់នៅជុំគ្នា ក្នុងឋានៈជាមនុស្សជាតិបាន បើទោះជាមាន សាសនាខុសគ្នាៗក៏ដោយ ។
ចំណុច ៥: ក្នុងឋានៈជាអន្តរជាតិ ការគោរពតាមគោលការណ៍នេះ នឹងនាំមកនូវនិរន្តរភាពរបស់មនុស្សជាតិ បរិស្ថានធម្មជាតិ ពិភពសត្វ និងអាកាសធាតុដ៏យូរអងែ្វងបាន ដោយមិនបាច់ព្រួយបារម្ភក្នុងការដណ្តើមគ្នា ដើម្បីរស់ឡើយ ។

សង្ឃឹមថា យើងម្នាក់ៗអាចទាញយកប្រយោជន៍បានខ្លះពីថៃ្ងមាឃបូជានេះ នឹងអញ្ជើញនាំគ្នាធ្វើបុណ្យទានរក្សាសីល និងសមាធិសម្អាតចិត្តរបស់ខ្លួនក្នុងថៃ្ងនេះ ដើម្បីបូជានិងរំលឹកចំពោះគុណព្រះសម្មាសម្ពុទ្ធដែលព្រះអង្គបានបង្កើត ព្រះពុទ្ធសាសនាសម្រាប់ជាមាគ៌ា‌ជីវិតដល់ពួកយើងទាំងអស់គ្នា។