01/01/2025
Кыргыз Республикасынын Юстиция министрлигинин интернет сайтында түн жарымда (31.12.24 саат 00.24) чыккан каттоо маалыматы аркылуу мекемебиздин Маариф фондуна өткөндүгү тууралуу кабардар болдук. Сайттагы маалыматтарга ылайык, 3 ээлик кылуучу мекеме көрсөтүлгөн.
Алар:
1. Кыргыз Республикасынын Билим берүү жана илим министрлиги
2. Эл аралык Маариф билим берүү мекемеси
3. Түркия Маариф фонду.
Жетекчиси катары Түркия Республикасынын жараны Хусну Биржан жазылган. Буга чейин соттун чечими аркылуу “Сапаттын” 4
түзүүчүсүнүн бири болгон Орхан Инанды
куруучулардын курамынан чыгарылган, ал эми экинчи түзүүчүсү М. Ж. өз ыктыяры менен
“түзүүчүлүктөн баш тартты” делген. Ошону менен “Сапаттын” түзүүчүлөрүнүн курамында КР Билим берүү жана илим министрлиги менен дагы бир түзүүчүсү A.C. калган. КР Билим берүү жана илим министрлиги A.C. мырзаны түзүүчүлөрдүн курамынан чыгаруу үчүн сотко кайрылган. Сот аталган ишти 2024-жылдын 30-декабрында кароого
коёт, бирок А.С. мырзанын башка мамлекетте болгондугуна байланыштуу, ишти кароону 2025-жылдын 21-январына жылдырган. Тагыраак
айтканда, А.С. мырзанын түзүүчү укугу мыйзам түрүндө уланып жаткан.
“Сапат” эл аралык билим берүү мекемесинин кийинки соттук отурумду күтпөстөн, чукул арада Түркиянын “Маариф” фондуна өткөрүлүшү мекеме
жетекчилиги, мугалимдер, окуучулар жана ата-энелер үчүн күтүүсүз болду. “Сапаттын” мыйзамдуу түзүүчүлөрү катары өз укугубузду КР мыйзамдарынын негизинде жана эл аралык укук талаасында коргоо боюнча аракетибизди көрөбүз.
Өлкөбүздүн жана жаштарыбыздын келечеги сапаттуу билим менен өнүгө турганына терең ишенген билим берүүчүлөр катары 32 жылдык эбегейсиз эмгектин мөмөсү болгон
мектептерибиздин сапатынын үзгүлтүксүз улануусу негизги тилегибиз.
“Сапат” эл аралык билим берүү мекемесинин жалпы жамаатын эч кандай провокацияга алдырбастан,
сабырдуулук менен окуучуларыбыздын билим алуу процессин үзгүлтүккө учуратпай өз ишин улантууларына чакырабыз.
