БатМУнун Кызыл-Кыя гуманитардык-педагогикалык институту

01/09/2025

БатМУ КГПИде Билим күнү белгиленди

Бүгүн, 1-сентябрда Кыргызстандын бардык аймактарында Билим күнү белгиленүүдө. Бат МУнун М.М.Тайиров атындагы Кызыл-Кыя гуманитардык-педагогикалык институтунда бул датага карата салтанаттуу жыйын өткөрүлүп, ага окуу жайдын профессордук-окутуучулук курамы, студенттер катышты.
Иш-чараны институттун директорунун милдетин аткаруучу, б.и.к., доцент А.А.Абдибаитова ачып, окуу жайдын босогосун алгач аттап жаткан студенттерди билим майрамы жана Эгемендүүлүктүн 34 жылдыгы менен куттуктады. А.Абдибаитова 2024-2025-окуу жылында институтта аткарылган иштер, ийгиликтер менен бөлүшүп, жаңы окуу жылына алдыга коюлган максаттар менен тааныштырды.
Жыйында окуу жайдын ардактуу профессору, КГПИнин түптөөчөсү М.М.Тайиров сөзгө чыкты; гуманитардык факультетинин дүйнөлүк тилдер кафедрасынын ага окутуучулары М.А.Курбанова жана Г.Даврановалар орус, англис тилдеринде жалпы жамаатка, институттун босогосун алгач ирет аттап жаткан студенттерге каалоо-тилектерин жолдоду. Алдыга бийик максаттарды коюп, ага жетүүгө талыкпаган билим жана аракет жасоо керектигин белгиледи. 1-курстун студенттерин жалпы студенттердин атынан алдыңкы студенттер да куттуктап талыкпай билим алууга, келечекте мыкты, кесипкөй адис болууга чакырышты.
Иш-чарада таланттуу студенттердин чакан концерттик программасы менен жыйынтыкталды.

01/07/2025

Абитуриент - 2025
__________________________
Баткен мамлекеттик университетинин М.М.Тайиров атындагы Кызыл-Кыя гуманитардык-педагогикалык институту 2025-2026-окуу жылына абитуриенттерди кабыл алууну жарыялайт.

18/06/2025

СТУДЕНТТЕР ӨНДҮРҮШТҮК ПРАКТИКАГА ЧЫГЫШТЫ

2025-жылдын 12-17-май күндөрү БатМУнун М.М.Тайиров атындагы Кызыл -Кыя гуманитардык педагогикалык институтунун биология профилинин 2-курсунун студенттери усулчулар б.и.к., проф.м.а. Г.Омурзакова жана ага окутуучу Г.Жакыповалардын жетекчилиги менен окуу планына ылайык Сары-Челек жаратылыш коругуна бир жумалык өндүрүштүк практикага чыгышты. Практика жараянында студенттерге теориялык билимдерин практика жүзүндө бекемдөөгө шарт түзүлдү.
Практиканттар коруктун флорасы жана фаунасы менен таанышып, аларга байкоо жүргүзүп, өздөрүнө керектүү материалдарды чогултушту. Ошону менен катар музейге кирип, пайдалуу маалыматтарга ээ болушту.
Мындай практикалар келечектеги адистер үчүн чоң тажрыйба жана шыктандыруучу күч болуп эсептелет.

13/06/2025

Үстүбүздөгү жылдын 12- июнь күнү БатМУнун М.М.Тайиров атындагы Кызыл-Кыя гуманитардык-педагогикалык институтунда семинар-тренинг өткөрүлдү.
Иш-чара "Тынчтык демилгелери" коомдук бирикмеси менен биргеликте, КГПИнин көркөм жетекчиси Г.Курбанали кызы менен демилгечил студенттердин "Жаштарды инклюзивдүү өнүгүүгө багыттоо" аталышындагы долбоорунун алкагында жаштарды коомго тартуу жана инклюзивдүү өнүгүүгө багыттоо максатында уюштурулду.
Семинар-тренинг өзгөчө муктаждыктагы жаштар менен студенттердин өз ара түшүнүүсүн, колдоосун жана биргелешип өнүгүү мүмкүнчүлүктөрүн күчөтүүгө багытталды.
Иш-чара "Биз бирге өнүгөбүз — бул жөн гана сөз эмес, бул - ишеним, колдоо жана тилектештик!" деген ураандын астында мыкты тренерлердин модераторлугу менен жогорку деңгээлде өттү.

30/05/2025

30/05/2025

"Сабатуу мугалим – сапаттуу билим алуунун кепили" аттуу бош орундар жарманкеси болуп өттү

2025-жылдын 29-май күнү БатМУнун М.М.Тайиров атындагы КГПИде карьера жана бүтүрүүчүлөрдү ишке жайгаштыруу боюнча иш-чара өткөрүлдү.
Ага окуу жайдын жетекчилиги жана Кызыл-Кыя шаарынын, Кадамжай, Ноокат райондорунун мектеп директорлору катышты.
Иш-чарада окуу жайдын директорунун м.а., доцент А.А.Абдибайитова сөзгө чыгып, учурда институтта даярдалып жаткан жана бул жылы окуу аяктап жаткан адистиктер, алардын сандык, аймактык көрсөткүчтөрү жана бюджеттик орундарды мектептерге бөлүштүрүү боюнча конокторго маалымат берди.
Ал эми сөзгө чыккан мектеп директорлору мектептердеги жетишпей жаткан кадрлар, алардын сапаты жөнүндө жана өз ара кызматташтыкты күчөтүү менен сапатты жогорулатууга болгон ойлорун бөлүшүштү. Ошондой эле, негизги билим берүү программасынын максаттары талкууга коюлуп, иш берүүчүлөр кош тилдүүлүктү өнүктүрүү боюнча өз сунуштарын беришти.

Студенттерди ишке жайгаштыруу боюнча чоң мааниге ээ бул иш-чарада эки тарапка да пайдалуу маалыматтар айтылды.
Ал эми иш-чаранын соңунда келген конокторго окуу жайдын атынан ыраазычылык каттар тапшырылды.

30/05/2025

Эл аралык ЖОЖдор менен кызматташтык уланууда

Үстүбүздөгү жылдын 27-май күнү БатМУнун М.М.Тайиров атындагы КГПИнин табигый-математикалык билим берүү кафедрасынын окутуучулары Өзбекстан Республикасынын Фергана мамлекеттик университетинин аграр кошмо факультетине иш сапары менен барышты. Барган коноктон университеттин жетекчилиги менен жолугушуп, окуу жайдагы окуу-тарбия процесси, материалдык-техникалык базасы менен таанышып, өз ара тажрыйба алмашышты.
КГПИден барган өкүлдөр алгач "Талабалар бахори" фестивалына катышып, андан соң музейге саякат уюштурулду.

30/05/2025

«Алган билимим менен даңктанам, БатМУ КГПИ менен сыймыктанам» аттуу майрамдык иш-чара өткөрүлдү

Үстүбүздөгү жылдын 28-май күнү БатМУнун М.М.Тайиров атындагы Кызыл-Кыя гуманитардык-педагогикалык институтунда Акыркы коңгуроо майрамына жана окуу жайдын түзүлгөн күнүнө карата «Алган билимим менен даңктанам, БатМУ КГПИ менен сыймыктанам» аттуу салтанаттуу иш-чара өткөрүлдү. Иш-чарага окуу жайдын жалпы эмгек жамааты, бүтүрүүчүлөрү жана институттун 20 жылдык бүтүрүүчүлөрү катышты.
Кечени КГПИнин директорунун м.а., б.и.к., доцент А.Абдибаитова ачып, куттуктоо сөзүн, изги каалоо-тилектерин айтты. Окуу жайдын басып өткөн жолуна кыскача токтолуп, мындан аркы аткарыла турган иштер тууралуу азыноолак сөз кылды. Ошону менен катар куттуктоо үчүн сөзгө мамлекеттик тил жана тарбиялык иштер боюнча директордун орун басары Г.Үсөнова жана ф-м.и.д., профессор М.М.Тайировдор чыгышып, окуу жайдын эмгек жамаатын, бүтүрүүчүлөрдү майрам менен куттуктап, каалоо-тилектерди билдиришти.

КГПИни аяктаганына 20 жыл болгон кыргыз тили жана адабияты; орус тили жана адабияты адистигинин бүтүрүүчүлөрү да катышып, билим алган уясына, устаттарына ыраазычылык айтышты.

Майрамдык кече таланттуу студенттердин ыр-бийлери менен коштолду. 2025-жылкы бүтүрүүчүлөрдүн ыраазычык сөзү менен кече жыйынтыкталды.

19/05/2025

БатМУ КГПИнин студенттери дебат турниринде 1-орунду багындырышты

Үстүбүздөгү жылдын 17-майында БатМУнун М.М.Тайиров атындагы КГПИнин студенттери "Коррупцияга каршы 16 күн" акциясынын алкагында түштүк аймагынын жогорку окуу жайларынын арасында Ош мамлекеттик университетинде өткөрүлгөн "Бир кадам" дебаттык турнирине катышып келишти.

"Sky life" аттуу команданын курамында эки дебатчы: информатика профилинин 3-курсунун студенти Баатыров Сыймык жана башталгыч класстарды окутуу адистигинин 3-курсунун студенти Надырбекова Айтбүбүлөр жогорку интелектуалдык деңгээлдеги оюну менен айырмаланып, 1-орунду элегендиги үчүн 1-даражадагы дипломго ээ болушту. Ошондой эле, команданын капитаны Баатыров Сыймыкка дебатка жигердүү катышкандыгы үчүн ыраазычылык кат ыйгарылды.

Жаш дебатчыларды даярдоодо КГПИнин көркөм жетекчиси Курбанали кызы Гулмираны салымы зор.

Дебатчы студенттерге мындан ары да ийгиликтерди каалайбыз!

14/05/2025

БатМУнун М.М.Тайиров атындагы КГПИнин жамааты дагы бир илимдин кандидаты менен толукталды.

Бүгүн, 2025-жылдын 14-майында БатМУнун М.М.Тайиров атындагы КГПИнин табигый-илимий билим берүү кафедрасынын ага окутуучусу Даовлатова Феруза Муктаровна диссертациялык ишин ийгиликтүү коргоду.

Ал илимий изилдөө ишин 25.00.24 – экономикалык, социалдык жана саясий рекреациялык география багыты боюнча КЫРГЫЗСТАНДЫН ТҮШТҮК АЙМАГЫНДАГЫ ЖЕР-СУУ АТТАЛЫШТАРЫНЫН ТАРКАЛЫШЫ ЖАНА КЕЛИП ЧЫГЫШЫ деген темада география илимдеринин доктору, профессор Низамиев Абдурашит Гумаровичтин илимий жетекчилиги менен география илимдеринин кандидаты окумуштуулук даражасын изденип алуу үчүн диссертация жазган.

Феруза Муктаровнаны жана анын жетекчисин бул ийгилиги менен чын дилден куттуктайбыз!

Илимдеги жаңы ачылышы адамзатка кызмат кылган, пайдалуу эмгектерден болушуна тилектешпиз!
Мындан аркы илимдеги, агартуу тармагындагы иштерине ийгилик, үй-бүлөлүк бакубатчылык каалайбыз! Окуу жайыбыздын, чөлкөмүбүздөгү илим-билимдин өсүп-өнүгүүсү үчүн талыкпай эмгектене берүүсүнө тилектештик билдиребиз!

11/05/2025

БатМУ КГПИнин ЭМГЕК ЖАМААТЫ УЛУУ ЖЕҢИШТИН 80 ЖЫЛДЫГЫНА АРНАЛГАН ИШ-ЧАРАГА КАТЫШТЫ

Улуу Ата Мекендик согуштагы Жеңиштин 80 жылдыгына арналган Кызыл-Кыя шаарында өткөрүлгөн салтанатка БатМУнун М.М.Тайиров атындагы КГПИнин профессордук-окутуучулук жамааты жигердүүлүк менен катышып, "Өчпөс отко" гүл коюшту жана "Өлбөс полк" жүрүшүнө чыгышты.

26/04/2025

БатМУ КГПИде Улуу Жеңиш күнүнө карата эскерүү иш-чарасы өткөрүлдү.

Үстүбүздөгү жылдын 23-апрелинде БатМУнун М. М. Тайирова гуманитардык факультетинин кыргыз тили жана тарых кафедрасы тарабынан «Улуу Жеңиштин даңкы өчпөйт!» аттуу эскерүү кечеси болуп өттү.
Иш-чарада КГПИнин директору, т.и.к., доцент А.Т.Бердиев жана гуманитардык факультетинин деканы, ф.и.к., доцент Ф.К Кайымовалар сөзгө чыгышып, Улуу Ата Мекендик согуштун жүрүшү, ал кездеги кыргыз элинин жашоо-шарты жана женишке жетүүдөгү аталардын эрдиктери жөнүндо айтышты, ошону менен катар аларга түбөлүк таазим этүү, баатырларды даңктоо баарынын милдети экендигине токтолду. Эскерүү иш-чарада студенттер тарабынан баяндама окулду, согуш темасындагы сахналык көрүнүш, ырлар аткарылды.