Баткен мамлекеттик университети The State University of Batken

Элдик Банктын Улуттук демилгеси Баткен кампусунун студенттери үчүн өткөрүлдү

Кыргыз Республикасында сактык ишинин 100 жылдыгын белгилөөнүн алкагында, ошондой эле Кыргыз Республикасынын Президентинин чечими менен Элдик Банктын өлкөдөгү сактык ишинин сактоочусу катары таанылгандыгына байланыштуу, банк тарабынан республика боюнча жаштардын финансылык сабаттуулугун жогорулатууга багытталган Улуттук демилге ишке ашырылууда.

Бул демилгенин алкагында Баткен шаарында Кыргыз улуттук университетинин Баткен кампусунун студенттери үчүн атайын окутуу тренинги өткөрүлдү. Иш-чара жаштардын финансылык билим деңгээлин жогорулатууга жана акча каражаттарын туура башкарууга үйрөтүүгө багытталды.

Тренингдин жүрүшүндө катышуучуларга сактык ишинин тарыхына арналган таанып-билүүчү фильм көрсөтүлүп, жеке бюджетти пландаштыруу, финансылык жоопкерчилик, ошондой эле финансылык сабаттуулуктун негизги куралдары боюнча маалыматтык-окутуу сессиялары уюштурулду.

Элдик Банктын адистери Кыргыз Республикасынын Улуттук банкынын өкүлдөрү менен биргеликте интерактивдүү сабактарды өткөрүп, студенттердин суроолоруна кеңири жооп беришти. Иш-чаранын соңунда активдүүлүк көрсөтүп, талкууларга катышкан студенттерге эстелик белектер тапшырылды.

Баткен мамлекеттик университетинин эмгек жамааты Гыязов Айдарбек Токторовичти сый-урмат менен жылуу мамиледе узатты.

Баткен мамлекеттик университетинин жалпы окуу-түзүмдүк бөлүмдөрүнүн өкүлдөрүнүн катышуусунда Гыязов Айдарбек Токторович 5 жылдык ректордук мөөнөтү аяктаганына байланыштуу өз арызынын негизинде кызматын тапшырды.

Эске салсак Баткен мамлекеттик университетиндеги 2021-2025-жылдар аралыгында көп иштер аткарылды.

5 жыл аралыгында окуу жайдын бардык окуу-түзүмдүк бөлүмдөрүндө капиталдык оңдоп-түзөөлөр жүргүзүлдү, материалдык-техникалык база чыңдалды, студенттер жана окутуучулар үчүн ыңгайлуу шарттар түзүлдү.

Илим тармагында 1 жолку сый акылар каралгандыктан, 2021-жылга чейин 24 илимдин кандидаты болсо, бүгүнкү күндө 54 илимдин кандидаты эмгектенет.

Эл аралык байланыштар өркүндөп КР аймагынан сырткары Европа, Россия Федерациясынын, Өзбекстан Республикасынын, Түркия, Түштүк Кореянын ж.б. өлкөлөрдөгү бир катар университеттер менен кызматташуу башталды.

Бир канча инфраструктуралык курулуштар ишке берилди:
1. Башкы мекемеде административдик имарат ишке берилди;
2. 120 орундуу жатакана курулду.
3. Сүлүктү шаарындагы жатакана толук капиталдык оңдоп-түзөөдөн өттү.
4. КГПИ жана башкы мекеменин ажатканалары курулду.

Айдар Гыязов Токторовичтин мындан аркы иштерине ийгиликтерди каалайбыз.

Кыргыз Республикасынын Илим, жогорку билим берүү жана инновациялар министрлигинин 2025-жылдын 24-декабрындагы 118-П буйругунун негизинде Баткен мамлекеттик университетинин ректорунун функционалдык милдетин аткаруу окуу иштери боюнча проректор, тарых илимдеринин кандидаты - Таиров Хайридин Рахманалиевичке жүктөлдү.

Гыязов Айдарбек Токторович 5 жылдык ректордук мөөнөтү аяктаганына байланыштуу өз каалоосунун негизинде кызматын тапшырды.

Баткен мамлекеттик университетинде Улуттук адабият күнүнө арналган иш-чара өттү

Баткен мамлекеттик университетинде 12-декабрь – Улуттук адабият күнүнө жана улуу жазуучу Чыңгыз Айтматовдун туулган күнүнө карата Кыргыз Республикасынын Президентинин «Улуттук дем – дүйнөлүк бийиктик» уңгужолунун алкагында концерттик программадагы маданий иш-чара болуп өттү.
Иш-чараны БатМУнун илим, мамлекеттик тил жана уюштуруу иштери боюнча проректору, педагогика илимдеринин кандидаты М.Д. Айдарова ачып, Улуттук адабият күнүнүн жана Чыңгыз Айтматовдун чыгармачылыгынын коомдогу орду тууралуу сөз сүйлөдү.
Иш-чаранын жүрүшүндө Табигый, гуманитардык жана педагогикалык факультетинин 1–2-курстарынын студенттери тарабынан «Манас» эпосунан үзүндүлөр, Чыңгыз Айтматовдун чыгармаларынан алынган сахналык көрүнүштөр көрсөтүлүп, обондуу ырлар аткарылып, кыргыз улуттук бийлери тартууланды.
Активдүү катышкан жана өзгөчө ийгиликтерди көрсөткөн студенттер Баткен мамлекеттик университетинин ректору, экономика илимдеринин доктору, профессор Гыязов Айдарбек Токторовичтин Ардак грамоталары менен сыйланышты.

БАТКЕН МАМЛЕКЕТТИК УНИВЕРСИТЕТИНДЕ ЭТНОСТОР АРАЛЫК ДИАЛОГ ФОРУМУ ЖАНА ЖАШТАР ФЕСТИВАЛЫ ӨТТҮ

2025-жылдын 4-октябрында Баткен мамлекеттик университетинде “Улуттук дем – дүйнөлүк бийиктик” уңгу жолу жөнүндөгү жарлыкты ишке ашыруунун алкагында “Баткен жаштары” этностор аралык диалог форуму жана “Социалдык биримдик” жаштар фестивалы өткөрүлдү. Иш-чара Илим, мамлекеттик тил жана уюштуруу иштери боюнча проректору, п.и.к., профессор М.Д. Айдарованын жетекчилигинде өтүп, Борбордук Азиядагы Евразия фонду тарабынан каржыланды.

Форум жана фестиваль Баткен облусунда жашаган ар улуттагы жаштардын ортосунда өз ара түшүнүшүү, этностор аралык кызматташтык, коомдук биримдик жана жарандык активдүүлүктү чыңдоону максат кылды. Катышуучулар ачык диалог жүргүзүп, социалдык биримдикке байланыштуу сунуштарды талкуулап, чыгармачыл жана командалык тапшырмаларда өздөрүнүн активдүүлүгүн көрсөтүштү.

Иш-чарага Баткен райондук администрациясынын акиминин орун басары Ж. Сатыбалдыева катышып, студенттерге каалоо-тилектерин билдирди. Ошондой эле Табигый, гуманитардык жана педагогикалык факультетинин деканы А.А. Кадыров “Улуттук дем-дүйнөлүк бийиктик” темасында баяндамасын жасап, студенттер менен талкуу жүргүздү.

Программага ылайык, таанышуу этабында “Санат” этнофуршети улуттук даамдарды сунуштады. Иш-чарага БатМУнун түзүмдүк бөлүмдөрүнүн жана өнөктөш окуу жайлардын студенттери катышып, активдүү катышуусу менен өзгөчөлөндү.

БатМУда коррупцияга каршы күрөшүү боюнча маалыматтык жолугушуу өттү

2025-жылдын 8-декабрында Баткен мамлекеттик университетинде Баткен облусунун прокуратурасы тарабынан Кыргыз Республикасынын Президенти С. Жапаровдун Жарлыгы менен бекитилген 2025–2030-жылдарга карата коррупцияга каршы мамлекеттик стратегиянын алкагында жана Коррупцияга каршы күрөшүүнүн эл аралык күнүнө арналган «Биз коррупцияга каршыбыз!» аттуу маалыматтык жолугушуу уюштурулду.

Иш-чарага прокуратура кызматкерлери, университеттин профессордук-окутуучулар курамы жана студенттер катышты. Жолугушуунун жүрүшүндө коррупцияга каршы мамлекеттик саясаттын негизги багыттары, мыйзамдардагы акыркы өзгөртүүлөр, ошондой эле стратегияны ишке ашырууда Башкы прокуратуранын ыйгарым укуктуу орган катары аткарып жаткан иштеринин мазмуну боюнча кеңири маалымат берилди. Ошону менен катар Баткен облусу боюнча жүргүзүлүп жаткан алдын алуу жана көзөмөл чаралары тууралуу да айтылды.

Студенттер активдүү катышып, адистерге суроолорун берип, кызыктырган маселелер боюнча так жоопторго ээ болушту. Жолугушуунун соңунда БатМУнун студенти жана чыгармачыл тобу тарабынан «Коррупцияга жол жок!» аталышындагы сахналаштырылган спектакль тартууланып, коррупциянын коомго тийгизген терс кесепеттери көркөм түрдө чагылдырылды.

Бул иш-чаранын негизги максаты – жаштардын укуктук маданиятын жогорулатуу, мыйзамдуулукту бекемдөө жана студенттер арасында коррупцияга каршы активдүү жарандык позицияны калыптандыруу болуп саналат.

3-декабрь- Ден соолугунан мүмкүнчүлүгү чектелгендердин эл аралык күнү

Баткен мамлекеттик университетинин студенттери бул күнгө карата уюштурулган иш-чараларга катышып, өз ара колдоо жана камкордукту көрсөтүштү. Студенттер балдардын маанайын көтөрүү максатында өткөрүлгөн маданий программаларга активдүү катышып, мүмкүнчүлүгүнө жараша акчалай жардам беришти. Бул кайрымдуулук аракети балдар үчүн жылуулук тартуулап, коомдо мээримдүүлүк жана биримдүүлүктүн маанисин дагы бир ирет баса белгиледи.

ЖАРЫЯ!

Баткен мамлекеттик университети Кыргыз Республикасынын Министрлер Кабинетинин 2025-жылдын 26-сентябрындагы №841-т тескемесине ылайык 2026-жылга карата мамлекеттик тапшырыктын алкагында Баткен облусу боюнча мамлекеттик жарандык кызматчыларды жана муниципалдык кызматчыларды кайрадан окутуу жана квалификациясын жогорулатуу курстарын өткөрүүгө тренерлерге конкурс жарыялайт!

Окутуучунун/тренердин квалификациясына ылайык тандоо критерийлери:

• билим деңгээли, илимий даражасынын же илимий наамынын болушу;
• билиминин тандалган курстун багытына, тематикаларына дал келиши;
• мамлекеттик же муниципалдык кызматта иштеген тажрыйбасынын болушу;
• окутуучулук/тренердик ишмердүүлүктө 2 жылдан кем эмес тажрыйбасынын болушу;
• илимий-усулдук иштелмелеринин, илимий басылмаларынын жана эмгектеринин болушу;
• тандоо критерийлерине жооп берген Университеттин штаттык окутуучулары конкурстук тандоодо артыкчылыкка ээ болушат.

Тажрыйбасын жана тандалган багытка дал келүүсүн тастыктоону талап кылган документтердин тизмеси (сканерленген көчүрмөлөрү, архивделген түрдө):
• окутуучунун/тренердин тандалган курстун аталышын көрсөтүү менен конкурстук тандоого катышуу жөнүндө арызы (эркин формада);
• резюмеси (анда тренингдерди/курстарды өткөрүү тажрыйбасын, иштеп чыккан окуу-усулдук колдонмолорун, илимий басылмаларын жана башка эмгектерин тастыктаган маалыматтарды көрсөтүү менен);
• тиешелүү билиминин, илимий даражасынын бар экендигин тастыктаган документтери;
• тандап алган курстардын/темалардын багыты боюнча сертификаттары.

Мамлекеттик тапшырыктын алкагында 2026-жылга карата мамлекеттик жана муниципалдык кызматкерлерди окутуу курстарынын багыттары:
1. Мамлекеттик жана муниципалдык кызматтын жалпы багыттары боюнча кайра даярдоо курстары;
2. Кыргыз Республикасынын аймактык жетекчилери үчүн квалификацияны жогорулатуу курстары;
3. Мамлекеттик/муниципалдык башкаруудагы стратегиялык менеджмент;
4. Мамлекеттик органдарды жана жергиликтүү өз алдынча башкаруу органдарын нормативдик-укуктук жактан камсыздоо;
5. Мамлекеттик жана муниципалдык кызматтагы натыйжалуу башкаруу;
6. Мамлекеттик башкаруудагы санариптештирүү;
7. Мамлекеттик сектордогу жана жергиликтүү өз алдынча башкаруудагы финансылык-экономикалык негиздер;
8. Муниципалдык кызматкерлер үчүн квалификацияны жогорулатуу курстары;
9. Мамлекеттик антикоррупциялык саясат;
10. Улуттук жана мамлекеттик программалардын алкагындагы окутуучу курстар.

Кошумча: Курстар Баткен мамлекеттик университетинин башкы мекемесинин жана Кызыл-Кыя, Сүлүктү шаарларындагы окуу-түзүмдүк бөлүмдөрүнүн базасында өткөрүлөт.

Документтерди 2025-жылдын 13-декабрына чейин кечиктирбестен Кыргыз Республикасынын Президентине караштуу Жусуп Абдрахманов атындагы Мамлекеттик башкаруу академиясынын Кайра даярдоо жана квалификацияны жогорулатуу борборунун аймактык жогорку окуу жайларында окутуу бөлүмүнүн башкы адиси Бөрүбаева Гульбара Назырбековнага тапшыруу керек. Дареги: Баткен шаары, И. Жусупов көчөсү, 11; Баткен мамлекеттик университетинин башкы окуу корпусу, 2-этаж, 211-кабинет; моб.телефону: +996 773 409 672 (Whatsapp).

БатМУнун студенти “40 райондон 40 демилге” долбоорунун жеңүүчүсү аталды

28-ноябрда Илим, жогорку билим берүү жана инновациялар министрлиги тарабынан уюштурулган “40 райондон 40 демилге” долбоорунун финалдык иш-чарасы болуп өттү. Иш-чарага Министрлер Кабинетинин төрагасынын орун басары Эдиль Байсалов, министрдин орун басары Кемель Садыков жана ведомстволор аралык комиссиянын өкүлдөрү катышты.

Финалда аймактарда иштелип чыккан инновациялык идеялар жана стартаптар сунушталып, мыкты деп табылган 8 демилгечиге сертификаттар тапшырылды.

Инновациялык демилгелер жана стартаптар арасында:
Айдарали уулу Эрнист — “Гидропоника” (БатМУнун студенти) — жеңүүчүлөрдүн катарына кирди.

Долбоор Кыргыз Республикасынын Министрлер Кабинетинин токтомун ишке ашыруу максатында уюштурулуп, аймактардагы инновациялык идеяларды колдоого багытталган. Жобого ылайык, мыкты инновациялык демилгелерге 500 миң сом, ал эми мыкты стартаптарга 1 миллион сомдон акчалай колдоо каралган.

Быйыл долбоорго өлкө боюнча 209 өтүнмө келип түшүп, алардын ичинен 20 катышуучу финалда өз долбоорлорун сунушташты.