23/02/2026
2025-2026-окуу жылынан тартып жалпы билим берүү уюмдарында Кыргыз Республикасынын “Алтын казык” мамлекеттик программасын ишке ашырууда республикабыздын жалпы билим берүүчү мектептеринин мугалимдерине мамлекет тарабынан 2025-2026-окуу жылынан тартып этап-этабы менен бекер ноутбуктар таркатылып жатат.
Кыргыз Республикасынын Агартуу министрлиги тарабынан бул этапта башталгыч класстарынын мугалимдери үчүн да сүйүнүчтүү жаңылык болуп, аларга сабакка колдонуу үчүн ноутбуктар берилди. Башталгыч класстардын мугалимдерине ноутбук тапшыруу иш-чарасы райондук билим берүү бөлүмүнүн башчысы С.А.Акпаралиевдин жана райондук билим берүү кызматкерлеринин кесиптик бирлигинин төрагасы Алмаз Аширмамбет уулунун катышуусунда 2026-жылдын 20-февралында өткөрүлүп, районубуздагы жалпы билим берүүчү мектептердин мугалимдерине тапшырылды. Райондук билим берүү бөлүмүнүн башчысы тарабынан мамлекетибиздин билим берүүнүн сапатын жогорулатуунун, жакшыртуунун үстүндө иш алып барууну күчөтүп, мугалимдерди заманбап технология менен камсыз кылып, сабак өтүүнүн ыкмаларын жеңилдетүү үчүн түзүп жаткан шарттарын эске алып, баарыбыз мамлекеттин ишеничин актап, окуучуларга татыктуу билим берип, сабакта ушул ноутбуктарды эффективдүү пайдаланууну колго алуу тапшырмалары жүктөлдү.
Белгилей кетсек, мамлекет тарабынан ноутбуктар 1-этапта СТЕМ предметтеринин, 2-этапта англис тили предметтеринин, 3-этапта башталгыч класстардын мугалимдерине таркатылды. Ошолордун катарында биздин билим берүүчү мектепте тактап айтканда Нуркул Орозалиев атындагы жалпы орто мектебинде эмгектенип жаткан СТЕМ предметтери боюнча 10 мугалимге, англис тили предмети боюнча 4 мугалимге, ал эми, бул күндө башталгыч класстар боюнча 19 мугалимге ноутбуктар тапшырылды.
