19/04/2026
Айж айж орсон сургалт маань амжилттай боллоо.
Өнөөдөр МУИС Бизнесийн сургуулийн маркетинг, худалдааны тэнхмийн эрдэмтэн багш нарт Anger management сургалтаа оров.
Миний төгссөн сургууль, бүр тэнхим маань болохоор сүрдэж байлаа. Багш нарт асуугдах гэж байгаа юм шиг мэдрэмж төрдөг юм байна…
Гэтэл багш нарын сониуч хандлага, хөгжилтэй хариулт, нээлттэй яриаг сонсоод айдас овоо багасав😊
Дандаа академик сургалтад хамрагддаг учраас хааяа хувь хүний хөгжлийн сургалт, яриа хийхээр төлөвлөж, эхний сургалтаар манай Anger management -ийг сонгожээ.
Амралтын өдрөө цаг гаргаж, идэвхитэй оролцсон эрдэмтэн багш нартаа баярлалаа. Санал болгосон Ч. Батбаатар багшдаа мөн баярлалаа.
Хүмүүс Anger management -ийг ууртай хүмүүст зориулсан сургалт гэж ташаа бодох гээд байдаг. Огт тийм биш.
Энэ бол хүн бүрт байдаг, байх ч ёстой хамгийн хүчтэй сэтгэлийн хөдөлгөөнийг зохицуулах замаар өөрийгөө таних, бусдыг ойлгох, уян хатан сэтгэх, ойлголцох, шийдэлд төвлөрсөн сэтгэлгээг хөгжүүлдэг сургалт билээ.
Өөрөөр хэлбэл хүн бүрт зориулагдсан, ялангуяа эрүүл харилцаа, уян хатан сэтгэлгээ, айдасгүй соёлыг эрхэмлэдэг хүмүүст зориулагдсан.
EQ, зөөлөн чадвар өнөө үед улам л чухал болж байна. Учир нь хүмүүс, нөхцөл байдал улам л өөр болж байна. Энэ үед өөрийгөө болон бусдыгаа ойлгож, хүлээн авах, ялгаатай үзэл бодлыг хүлээн авч сонсох, сэтгэлийн хөдөлгөөнөө зохицуулж, өөрийгөө зөв илэрхийлж байж л бид илүү нягт хамтран ажиллаж, илүү их үнэ цэн нийлүүлж чадах билээ.
Та бүхний эрдэм судлал, мэдлэг түгээх, бүтээх их үйлст амжилт хүсье.
Доктороо хурдан хамгаалахын төлөө хичээнэ. Судалгааны ажил маань мэдсэн зүйлээ хэрэгжүүлэх, дадал болгож өөрчлөлт авчрахад нь нөлөөлөх тухай юм. Сургалтаар олж авсан зүйлээ дадал болгоход нь туслах арга хайж л явна. ☺️
С.Энхжаргал (Үйлчилгээний зөвлөх, anger management чиглүүлэгч)
