المعلمة ولاء شحادة _ كيمياء التوجيهي

🧪 قوّة القاعدة
الفرق بين القاعدة القوية و القاعدة الضعيفة باستخدام الرسم البياني

⚡ القاعدة القوية:

تتفكك تمامًا في الماء ➜ كل الجزيئات تعطي OH⁻ وM⁺

غير منعكسة عمليًا (السهم باتجاه واحد).

على الرسم البياني: الخط بينزل فجاه و بيختفي خط القاعدة القوية → لأن كل القاعدة بتنقلب أيونات من أول لحظة.

🌿 القاعدة الضعيفة:

تتفكك جزئيًا فقط ➜ جزء منها بيعطي OH⁻ و BH⁺ وجزء بيضل B.

تفاعل منعكس (سهمين رايحين جايين).

على الرسم البياني: الخط بينخفض تدريجيًا مع الزمن بس بضل الخط للقاعدة الضعيفة اطول من ايوناته→ لأن التفكك بيصير على مراحل لحد ما يوصل لاتزان.

💧 نقطة مهمــة جدًا:

سواء القاعدة قوية أو ضعيفة… دايـــمًا:

[OH⁻] = [BH⁺]

لأن كل جزيء قاعدة يتفكك بيعطي أيون هيدروكسيد واحد و حمض مرافق واحد ✨

جاهــز لتعرف الفرق بين الحمض الضعيف و الحمض القوي بالرسم البياني 🤍✨

🔬 قوّة الحمض… مش بس اسم!
في الكيمياء، في فرق كبير بين الحمض القوي و الحمض الضعيف، وهاد الفرق بيبان بوضوح في سلوكهم عند التأيّن وفي الرسم البياني كمان 👇

⚡ الحمض القوي:

يتأين تمامًا في الماء ➜ كل الجزيئات تعطي +H₃O و A⁻

غير منعكس عمليًا (السهم باتجاه واحد).

على الرسم البياني: الخط ينخفض فجأة و بيختفي خط الحمض كامل → لأن الحمض صار كلّه أيونات من أول لحظة.

🌿 الحمض الضعيف:

يتأين جزئيًا فقط ➜ جزء منه بيعطي +H₃O و A⁻ وجزء بيضل HA.

تفاعل منعكس (سهمين رايحين جايين).

على الرسم البياني: الخط بينزل تدريجيًا مع الزمن بس ما بيختفي خط الحمض الضعيف و بضل اطول من ايوناته→ لأن التأيّن بيصير على مراحل لحد ما يوصل لاتزان.

💧 نقطة مهمة جدًا:

سواء الحمض قوي أو ضعيف… دايـــمًا:

[H₃O⁺] = [A⁻]

لأن كل جزيء حمض يتأين بيعطي أيون هيدرونيوم واحد و قاعدة مرافقة واحدة ✔️

⚗️ القاعدة العامة : المواد الصلبة و السائلة في الاتزان

في حالة الاتزان الكيميائي:

المواد الصلبة والسائلة النقية لا تدخل في تعبير ثابت الاتزان (K).
لأن تركيزها ثابت لا يتغير مهما تغيرت كميتها (كثافتها ثابتة).

⚙️ ثانيًا: من ناحية التأثير على الاتزان

✅ تغيير كمية المواد الصلبة أو السائلة لا يؤثر على موقع الاتزان.

> يعني لو زدت أو قللت من كتلة المادة الصلبة، الاتزان ما بتحرك ولا تتغير تراكيز الغازات أو المحاليل.

⚠️ لكنها ممكن تتأثر بنتيجة ازاحة الاتزان.

مثلًا لو الاتزان اتجه نحو تكوين مزيد من المادة الصلبة، كتلتها رح تزيد (لكن هذا بسبب ازاحة الاتزان، مش العكس).

---

🧩 ثالثًا: كيف ممكن تزيد كتلة المادة الصلبة فعليًا؟

حتى تزيد كتلة المادة الصلبة، لازم تجبر الاتزان يتحرك نحو الجهة التي تُكوّنها.
مثلاً في التفاعل:
(CaCO₃ (s)⇌ CaO (s) + CO₂(g

إذا قللت ضغط أو تركيز CO₂ : الاتزان يتحرك نحو اليمين (تتكوّن CaO أكثر) كتلته تزيد

إذا زاد تركيز او ضغط CO₂(g) : الاتزان يتحرك نحو اليسار ويتكوّن CaCO₃(s) أكثر ( كتلته بتزيد)

يعني بتزيدها بشكل غير مباشر من خلال تغيير الغازات أو المحاليل اللي داخل في الاتزان.

---

🧠 الخلاصة الذهبية:

🔹 المواد الصلبة والسائلة لا تؤثر على الاتزان بتغيير كميتها.
🔹 لكنها تتأثر بنتيجة ازاحة الاتزان.
🔹 يمكن زيادة كتلتها فقط بإزاحة الاتزان نحو الجهة التي تحتويها.

🧪✨ الخصائص الجامعة للمحاليل باختصار مفيد:

كلّ ما زاد عدد الجسيمات في المحلول 👇
🔹 زاد الانخفاض في درجة التجمد ❄️
🔹 زاد الارتفاع في درجة الغليان ♨️
🔹 زاد الانخفاض في الضغط البخاري ☁️
🔹 زاد الضغط الأسموزي 💧

💡 والعلاقة بين المولالية (m) و التغير في درجة الغليان أو التجمد علاقة طردية:
كلّ ما زادت المولالية ⬆️ زاد التغير بنفس المقدار 🔥❄️

📌 الحالة السائلة : التبخر و التكاثف

💧 التبخر = هروب
☁️ التكاثف = عودة

تخيّل إن السائل عبارة عن سجن، والجزيئات هم السجناء، بينما قوى التجاذب هي السجّانين:

التبخر: لما بعض السجناء يجمعوا الطاقة الكافية ويكسروا قيود السجّانين ويهربوا للحرية (الغاز).

التكاثف: العكس… السجناء اللي هربوا يتم إعادتهم للسجن ويطلقوا (يخسرو ) نفس الطاقة اللي استخدموها للهروب.

⚡ طاقة التبخر المولية = الحد الأدنى من الطاقة اللي لازم يمتلكها مول واحد من السجناء للهروب.
⚡ طاقة التكاثف المولية = نفس القيمة لكن بيرجعها السجين عند رجوعه.

🔒 العلاقة مع قوة السجّانين (قوى التجاذب):

إذا السجّانين أقوياء → صعب السجناء يهربوا → التبخر بطيء ويحتاج طاقة عالية.

إذا السجّانين ضعاف → الهروب أسهل → التبخر أسرع وبطاقة أقل.

🔥 درجة الحرارة = خطط الهروب! كل ما ارتفعت، زادت فرص الهروب وسرعته.

يعني باختصار الاسرع تبخر هوا الي عندو سجانين ضعاف و خطط اكتر
و الي بحتاج يمتلك الحد الادنى من الطاقة ( طاقة تبخره اكبر ) هوا الي عندو سجانين اقوياء

✨💨

بتعرفوا ليش الغازات الأخف بتنتشر أسرع؟ 🫧
لأنو كل ما كانت الكتلة المولية أقل ➡️ كانت سرعتها بالانتشار أو التدفق أعلى 🚀

يعني ببساطة:
الخفيف دمّه (زي الممثل جون أبراهام 😍) بيمشي بخفة وينتشر بسرعة، الكل بيعرفه وبصير مشهور ✨
أما الثقيل دمّه 😅 (الممثلين اللي ما الهم حضور قوي) بطيء بالانتشار، وهيك شهرتهم أقل 🌸

💕

💡 قانون دالتون للضغوط الجزيئية 💡

تخيل معاي عندك غرفة صغيرة، وحطيت فيها 3 بنات : وحدة بتحكي عربي، و وحدة إنجليزي، و وحدة تركي. كل وحدة فيهم رح تحكي بلغتها الخاصة وكأنها لحالها، ما حدا منهم رح تغير لغتها عشان التانية موجودة 😉.

هيك الغازات بالضبط!
لما نحط غازات مختلفة في وعاء واحد (زي أوكسجين + نيتروجين + هيليوم)، كل غاز بضل "يتصرف" كأنو موجود لحاله وبيعمل ضغطه الخاص.

✨ الضغط الكلي = مجموع ضغوطهم مع بعض.

📌 مثال:

الأوكسجين ضغطه 2 atm

النيتروجين ضغطه 3 atm

الهيليوم ضغطه 1 atm

الضغط الكلي = 2 + 3 + 1 = 6 atm.
و بسمي كل ضغط لكل غاز بالوعاء الجديد الضغط الجزئي للغاز

وإذا غيرنا الظروف (سخّنا الوعاء أو صغرنا حجمه)، كل غاز رح يتأثر لوحده بالقوانين، مش لأنه انخلط مع غيره، لكن لانه الظروف تغيرت عليه وكأنه تغيرت عليه وهوا لحاله 💡.

📌 بنود نظرية الحركة الجزيئية للغازات

✨ تخيّل الغاز زي قاعة مليانة كرات صغيرة عم تتحرك بسرعة وبدون توقف... البنود اللي بتحكمهم هي:

1️⃣ الجزيئات صغيرة جدًا ومسافاتها عن بعض كبيرة → كأنها نقاط متباعدة.
2️⃣ بتتحرك بحركة عشوائية سريعة بكل الاتجاهات. √ كأنها مجنونة
3️⃣ الاصطدامات بينها أو مع الجدران مرنة تمامًا √(ما في فقدان للطاقة).
4️⃣ ما في قوى تجاذب بينهم ولا حتى تنافر(كل واحد لحاله ✌️). √لهيك ولا يمكن ينسال او يتجمد
5️⃣ طاقة الحركة المتوسطة ∝ درجة الحرارة المطلقة (كلفن) → كل ما سخّنا الغاز زادت سرعته.

🔥 باختصار: الغاز عبارة عن جزيئات بتتحرك بسرعة، بتصطدم بس بدون ما تخسر طاقة، وبتصير أسرع لما ترتفع الحرارة.